財女手筆：
冰島買樓無力感
■不少冰島投資者買入住宅短租Airbnb，投資需求令當地樓價一年高過一年。 資料圖片
到冰島行冰川，當地帶隊導遊只有二十多歲，後生仔女一討論，話題仍然圍繞樓價、生活指數，喺呢位冰島年輕人身上，感受到同香港年輕人一樣嘅氣息，就係對買樓嘅沉重無力感！
由芬蘭、挪威走到冰島，一路聽到當地人投訴樓價不斷上升，主因是Airbnb。歐洲酒店價格昂貴，加上一些國家如冰島，旅客數量一年多過一年，即使經歷2008年金融海嘯破產，2010年火山爆發，去年到訪冰島旅客仍高達180萬人，係冰島33萬人口的5.4倍，當地酒店房間根本唔夠住，不少投資者買入住宅，靠Airbnb短租，投資需求令當地樓價一年高過一年。
講番冰島領導年輕人，一臉baby face上留鬚，帶隊上冰川兩年，當地最低工資每月只有21萬冰島克朗，大約1.8萬港紙，佢話普遍後生仔女可以賺到兩、三萬蚊一個月，但係Airbnb當道，冰島樓價年年升，根據萊坊樓價指數，冰島樓價單係去年第三季按年上升13%，睇嚟樓價仲未升停。
冰島領隊表示，同香港嘅後生仔女一樣，冰島後生仔女想買樓上車，原來都係要靠父母，靠自己可能一世都上唔到車，即使當地各樣福利已經好好，不過消費指數貴，一公升柴油都要13.6港紙，仲貴過香港！
喺冰島必須開車代步，已經成為當地人沉重負擔。冰島領隊話，同香港後生仔女一樣，佢唔願意向父母拎錢勉強買樓、供樓，買唔到樓生活點算？佢話做咗兩年工作，寧願用筆錢去泰國等東南亞國家休息番半年，逃離樓價無日無之嘅困局。
Melody
http://www.facebook.com/whichroad
本欄逢周三刊出
http://hk.apple.nextmedia.com/financeestate/art/20170222/19935811
