春泥
2017-11-25 22:52:39
既然決定了要到英國修讀音樂,星期一呂靜宜回到學校,準備辦理退學手續,並且把這個消息告訴給相熟的同學知道。
布正麗聞得這個消息,愕然道:「靜宜,妳真係決定咗要到英國啊?咁成皇志佢點同妳講啊?」
呂靜宜一臉苦澀,道:「我地…分咗手。」
「吓!點會咁架?」
布正麗與自己感情要好,於是呂靜宜把自己生日那天的事情告訢給布正麗聽。
布正麗聽畢,不禁搖頭,道:「嗰個成皇志,算係點嘖?明明你地都鍾意大家,點解要分手喎?唔通除咗分手就無其他辦法咩?唔得,我要去同佢講。」
性如烈火的布正麗一溜煙走向四樓的自強會,雖然呂靜宜害怕碰見成皇志會令大家尷尬,但她更害怕布正麗會在這時候捅出什麼簍子,於是從後追趕布正麗,喚道:「布甸,唔好啦!」
布正麗走進了自強會,舉目一看,沒有發現成皇志的蹤影,她向坐著做功課的楊鳳瑤問道:「喂!成皇志喺邊啊?」
「吓!我又唔係佢邊個,點知佢喺邊啊?」楊鳳瑤冷冷地道。
此時,呂靜宜亦剛剛走進了自強會的大本營,楊鳳瑤的視線由布正麗轉到呂靜宜身上,道:「靜宜,我聽人講妳要退學,係咪真架?」
呂靜宜頷首嗯了一聲,楊鳳瑤訝道:「咁突然嘅!發生咗啲咩事啊?」
「我要去英國進修音樂,所以我返埋依幾日就退學喇!」
「咁妳幾時飛啊?」
「星期六。」
「吓!咁快嘅?」
「係啊!我想早啲過去準備下。」
「哦!原來咁。」楊鳳瑤道:「妳地搵成皇志啊?但係我成日都唔見佢喎!」
這時,管佳莉步進了自強會,她道:「咦!布甸,妳好少會落嚟架喎!落嚟仲咩啊?」
布正麗瞧向管佳莉,道:「係喎!莉莉,妳同成皇志讀同一班嗰喎!知唔知成皇志晌邊啊?」
管佳莉道:「成皇志啊?佢今日無返喎!」
「唔係啊?平時都唔覺佢請過假嘅!依家先嚟唔返學算係點啊?」布正麗冷笑一聲,道:「哼,我就睇佢可以避到幾時?今日唔返,我就唔想佢聽日都唔返。」
春泥
2017-11-26 02:17:38
翌日,成皇志依然沒有在學校出現,布正麗心想:「我就唔信你聽日都唔返。」
豈料,第三天成皇志仍舊沒有上課,距離呂靜宜去英國的日子只剩下三天,布正麗開始有點慌張,成皇志在搞什麼鬼?
布正麗多次致電到成皇志的手機,但均被接駁到留言信箱,她從榮仔口得知成皇志家中的地址,於是上門找他。
她拍打著大門,喊道:「喂!成皇志,你好出嚟啦!你個懦夫,唔好再做縮頭烏龜喇!靜宜真係要走喇!」
大門敞開,開門的不是成皇志,而是阿興。
阿興與布正麗面面相覷,雙方均有點愕然。
布正麗認出阿興,立時問道:「阿興,成皇志呢?你快啲叫佢出嚟。」
「布甸姐,阿哥,佢唔晌到啊!」
布正麗現出懷疑的目光,道:「唔喺到?」
「係啊!布甸姐,妳唔信嘅話,可以入嚟睇下。」
布正麗一向覺得成皇志詭計多端,可能擺出空城計來算計自己,於是她真的走進了屋內,查看一番,她找遍可以藏人的地方,但都是沒有發現。
阿興見狀,心想:「睇嚟阿哥應該得罪得布甸姐好緊要,嬲到要上屋企攞人。」
布正麗問道:「阿興,成皇志有無講低佢去咗邊?」
布正麗目光炯炯地盯著阿興,在成皇志眾多女性朋友當中,阿興最敬畏的,可算是布正麗,她雖然人長得美,身栽又好,但她眉宇有種不怒而威的氣勢,所以儘管成皇志臨走前,叮囑他不要向其他人透露他的行程,可是阿興並不敢向布正麗隱瞞,道:「阿哥,佢去咗長洲,話一星期先返。」
布正麗愕然道:「長洲?仲要一個星期先返?佢有無留低地址啊?」
阿興搖頭道:「咁又無喎!不過佢每晚都有打番嚟。」
「死人頭,縮頭烏龜,入長洲匿埋就得咩?我實搵到你架!」布正麗道:「阿興,如果成皇志再打畀你,你叫佢搵我,知唔知道?」
「哦!好啊!」
阿興瞧著走遠的布正麗,心想:「阿哥唔係同緊飛機場姐姐一齊嘅咩?點解上嚟搵佢嘅係布甸姐,唔係飛機場姐姐嘅?唔通阿哥一腳踏兩船?唔,男女間嘅野,我依啲小學生都係唔明架喇!」