呢個問題其實係講緊，
基督徒係咪一定要做十一奉獻？
我解答到嘅，不過回覆都幾長
你唔怕悶嘅，就睇晒佢啦。要答呢個問題，先要睇吓舊約、新約係點睇奉獻。我哋先睇舊約
早係創世記28章，已經記載左聖經人物執行十一奉獻，當時雅各（阿伯拉罕個孫）正係別是巴去緊哈蘭，佢發夢，聽到上帝對佢嘅諾言，話要賜土地畀佢同後代
醒左之後，佢就懷住敬畏既心許願，話要將上帝賜畀佢既，都要獻出十份之一，交畀上帝還恩，呢個係佢對主愛嘅回應
呢個習俗有機會繼承自阿伯拉罕，當時阿伯拉罕打敗基大老碼，救返姪仔羅得，有個王（亦係祭司）麥基洗德出嚟祝賀佢，並以上帝之名祝福佢，於是阿伯拉罕就將打勝嘅財物，分左十份之一俾麥基洗德
跟着時光繼續推進，去到摩西年代，十一奉獻亦有係利未記、民數記、申命記蒲頭。佢哋已經變成法律或規條，廣為以色列人採用
係呢幾卷書，十一奉獻有幾種形式：
1. 利未人的十一奉獻
利未人係雅各後代，係12支派之一，專責協助祭司進行宗教儀式，所以地位崇高，當時，耶和華規定，以色列人係要奉獻十份之一既出產俾佢地，當係事奉人工
2. 祭司的十一奉獻
然後利未人又將所得既十份之一，當中最好既，又奉獻畀幫神做嘢嘅祭司，當係獻俾耶和華。而祭司就唔使再奉獻俾錢了，因為佢已經係當時嘅頂層 （係咪好唔公平呢
）
(可以睇返民數記18章）
3. 節期的十分之一
另外，申命記12章又講明，以色列人要將牛羊頭生個隻、五穀、油、酒既十分之一，拎到神選擇既地方食，要歡喜地吃喝，呢個都係奉獻形式之一，每年啲節期都要做的
4. 慈惠的十一奉獻
呢個又係另一種奉獻形式，呢個唔係每年比嘅，而係，每三年，以色列人就要奉獻十分之一畀利未人，同窮人，包括孤兒寡婦
記住，呢幾卷書所講既十一奉獻係規條、律例，係以色列人必須遵守的，做呢樣服侍係為答謝賜福畀我地既上帝、多謝勞苦功高既利未人同祭司，亦係想佢地有憐憫既心，分啲財物俾有需要既人，呢個係初衷
但去到新約年代，耶穌教導上已有調整，佢無硬性，強推呢種服侍。佢反而係馬太福音23:23 話，法利賽人淨係識得十一奉獻，係有問題的，奉獻係好，但並唔係最重要，更重要係公義、憐憫、信實嘅事
而事實上，新約聖經已經無明文規定十一奉獻，並冇寫明捐獻嘅法則，初期教會領袖保羅，反而更着重人嘅內心，林後8章，佢讚信徒做得好，好在自己有缺乏既時候，都甘心樂意慷慨捐贈
去到呢個時候，我地就明白十一奉獻，已經唔係硬性規定，反而係信徒自己內在要修練嘅修養
耶穌仍然希望我哋奉獻，但係要甘心樂意、發自內心咁做，就唔係好似法利賽人咁，為名為利咁做，奉獻係為回應主愛、係為成全公義、憐憫、信實嘅事
十一奉獻有做固然值得欣賞，但冇做，都唔代表係有罪，因為新約冇明顯嘅規定，要基督徒死跟，當初既利未人同祭司都已經退出咗歷史舞台，我睇唔到有任何原因，基督徒要硬性遵從呢種規則
只要發自內心，你嘅奉獻動機亦係想回應主愛，成就美善既話，無論係奉獻時間、才能、利是錢、$50、$100，定抑或係窮寡婦既兩個小錢，我相信耶穌都一定欣然接納
希望上述解釋，幫到你明白多啲
所以唔係話硬性規定要奉獻十份之一，你做到，效法到古代信徒嘅遺風，咁當然要俾個叻叻你。但做唔到既，都唔係罪該萬死，最緊要俾得甘心樂意，心態要正確，有啲人係enjoy見到自己個名喺程序表出現，大大隻字寫咗自己捐咗幾皮嘢。如果有人心態係咁，就真係要改改佢啦
事實上，你真係冇奉獻，教會都係照俾你返崇拜，照俾你聚會，冇人會責怪你，不過你明明好有實力，但專登唔奉獻，咁你嘅良心，同上帝都會知道呢個狀況嘅
我個人比較單純，冇咁多神奇經歷，就已經好順攤咁信咗耶穌
所以唯有就係善用我得到嘅錢，唔係淨係用嚟吃喝玩樂啦
