【基督教討論】我係教會傳道人，你問我盡答？！

Hi 連登巴絲，我係入職近兩年嘅香港教會傳道人，想同各位傾吓計，討論信仰

我喺度諗，今日唔知聽日事，LIHKG唔知仲會run 幾耐，或者聽日就熄登，既然係咁，不如趁仲有空間，同大家一齊講下耶穌

另外，我諗有唔少人都對牧師/傳道人有啲疑惑同想像，甚至對呢行有極度負面印象，希望作為行內人，我可以提供到唔同角度，畀各位了解吓呢行究竟係點

無論係神學、聖經問題，又或者對呢行嘅疑問，我都會盡量試吓解答，請出招

先嚟個自問自答：

1. 其實要點先入到行？傳道人嘅career path係點㗎？

要入行，第1步要了解吓自己係咪真係適合做傳道，你係咪真係咁有熱誠/感動，全時間服侍上帝？神係咪真係叫你行呢條路？

呢個求問階段，通常涉及長時間嘅祈禱、靈修，即係同上帝傾下計，你亦可以搵唔同嘅弟兄姊妹蒐集意見，求印證。我哋耶撚叫呢個階段做「尋求上帝呼召」

（當然，都有人會直接skip咗呀part，我嘅第1步係歷時半年，之後先決定入坑)

然後，當基督徒真係feel到God’s calling嘅時候，就會開始搵教會工，未有神學學位之前，我哋會入職做住福音幹事/宣教幹事先，你當係牧師嘅助理，教會裏面大大小小嘅雜務都關你事

（當然，亦有唔少行家冇做過呢個位，就直接讀神學，人人諗法唔同）

做呢個位，先決條件係你要係一個基督徒，然後再有牧者推薦信，以及要交篇蒙召見証。入行門檻話高唔高，唔使有degree都做得，但有冇passion、係唔係動機善良，想全時間委身，in你嘅牧師會睇得出嘅

幹事呢個位，通常會做2-3年不等，順利又合適嘅話，你就可以考慮報讀神學院，要符合做傳道嘅資格，你要完成神道學學士課程 （BD)，或者道學碩士課程（MDiv) ，呢個過程大概係3-4年

同教會歷史、系統神學、希臘文、希伯來文、大戰完，應付完無數論文及實習，然後你又Survive到，成功拎到沙紙（獵人執照），你就可以開始搵傳道人嘅工作。（當然，有少部分同學呢個時候會行咗第二條路，讀上去搞學術）

做咗教會傳道後，一般再晉升就係牧師 （有啲宗派係聖職上會分多一層，例如循道衛理宗既傳道人，名銜上係叫宣教師，升一級係叫會吏，再升先係牧師）

按牧資格，就真係睇你係邊個宗派，唔同教會及傳統，做法好唔同。但通常都必須擁有多年嘅全時間牧會經驗 ，講緊係5-10年不等，之後要經過嚴謹嘅審核，仲要有按牧團認可你嘅能力同牧養心腸，最後你先會做到牧師

對比傳道，牧師會擔當更全面嘅聖職工作，施行洗禮、聖餐，都係牧師主力負責嘅項目，牧師一般亦會處理更加多行政、管理嘅工作，上述所講嘅，只係香港宗教圈嘅狀況，外國玩法就未必一樣嘅

當然好多細節，我係未交代清楚。入行期間，自然係要過五關斬六將，會有各種甜酸苦辣嘅狀況，但當中都有上帝嘅包底同恩典

呢行有好公義、好憐憫嘅真牧者，亦都有唔少呃飯食、魔化咗嘅神棍。如果你受過教會嘅傷害，我都喺度講聲，唔好意思，對唔住先。希望香港牧者仲可以好好補救，檢討同埋反省。吹住咁多先，到你問

現實啲問
依家入行做傳道人
手頭鬆唔鬆夠錢租咩單位？

Hi

你覺得何西阿先知
係愛佢老婆而結婚 , 定抑或係上帝叫到先結婚？

如果係初入行嘅傳道人，人工都可以相差幾遠
有朋友係搵緊23000，亦有人高到27000，亦有人係低過兩皮，視乎教會經濟狀況，唔同宗派分別都大嘅

租單位唔係話唔得嘅，不過就未必好儲到錢。（當然有啲特別情況係，你可以住喺教會裏邊，有啲地方係有傳道宿舍嘅）

你覺得麻雀福音事工有冇得諗？

點解無一間教會 , 可以有齊唔同款式嘅敬拜？
( 靈恩型 , 神學型 , 禮儀型…)

聖餐係唔係耶穌既身體?

想問下咩叫因信稱義

哇，咁快就有咁多問題
俾少少時間我，處理埋啲工作，晏啲努力答大家

聽落範範都關傳道人事
咁既人工少啲愛都唔掂


有樣野我好奇
做呢行係咪要壓抑性需要
定已經累到冇需要

點睇出賣耶穌嘅猶大？

佢當年唔出賣，你宜家無得撈

想問耶穌 33 歲前經歷過咩事？佢學過啲乜？一走出黎就有神蹟

我同我啲朋友叫呢條問題做「逃學威龍爭議」

我會咁睇，猶大佢出賣耶穌當然唔係好人，但佢係曾經好人過，曾經對耶穌忠誠過

不過佢嘅自由意志選擇左出賣耶穌，之後佢有悲慘收場，就係佢自己要付嘅代價

周星馳曾經話過，猶大出賣耶穌，牧師先有十字架帶

不過，我我嘅想法係，無論有冇猶大都好，耶穌嘅救恩計劃都係會完成，係時間遲早，同埋用咩方式完成姐

基本上佢俾唔俾人出賣都好，當時嘅猶太人同政權已經當佢係眼中釘，覺得佢勢力坐大唔係一件好事，所以佢係咪都俾人釘十字架㗎啦，我係咁樣理解

基督教行業內點睇其他宗教？
會唔會鼓勵基督徒都要認識其他宗教或者異端？

要睇吓教會嘅開放程度，如果係傳統保守嘅教會，一般信徒都會妖魔化咗打麻雀呢樣嘢，咁就好難實施你所講嘅事工。同埋就係究竟搞呢個活動，我哋係想達成咩目的？想take care咩群體？打麻雀同傳福音，兩者點樣構成連結？咁呢啲都係要諗嘅

受限於傳統、或者信徒嘅神學觀，我哋確實係好難一次過塞晒唔同style嘅敬拜模式入一間教會，會有人嬲，有人接納唔到另類嘅方法，讚美上帝。

如果你教會老人家多嘅話，你喺崇拜度打個鼓你都俾人投訴

大家多啲溝通，多啲包容，唔係話做唔到嘅。我教會係做到傳統聖樂、敬拜讚美兩者並存嘅

請問係邊個堂會啊

我識嘅牧者 & 信徒
有80% 都會私底下打麻雀
亦都唔會覺得打麻雀係錯

但就係接受唔到係教會開枱
但係接受到係教會鋤Dee

你見到d神棍牧師/教友會點做? 直斥其非定當睇唔到?
無社會經驗, 又無挨過苦, 即係引一兩句聖經金句就老點人如何面對人生難題,
教會條數唔清唔楚, 成日話無錢, 但櫃檯底收收埋埋幾多唔知
做幫工但係其實主力溝女

你嘅God’s calling係咩