[長氣多圖][無限期] 香港staycation之旅(3)

咁唔洗選擇之下當然係揀左乜都有齊果個店長推介
大約都係十分鐘左右上麵

湯底無上次奇跡個濃味咁混濁
清少少
但都好夠味
雖然呢個料理長推介有齊慢煮同火炙叉燒
有成四塊係豐富既
但我覺得火炙鞋鞋地
慢煮果款亦都唔夠嫩
係肉呢方面完全比唔上奇跡

幼麵無意見


隻強就唔錯夠味


咁黎得係當然要試下佢地名物
被稱為好食過碗拉麵
十五蚊既特製加麵底

小二見你就黎食晒就會問個麵上唔上得
呢個麵底之前可以就咁散叫既
可能太多人就咁叫麵底加叉燒玩爛左
之後就改左要叫左拉麵先可以追加麵底
個麵本身就已經有肉碎同洋蔥蔥粒
可以就咁當撈麵咁食

食完呢個真係夠晒滿足
難怪有咁既評價

即係如果就咁單叫拉麵呢間麵處一家就唔算好突出
但加埋個替玉兩種享受就唔同講法

埋單要百三蚊都真係貴既
始終唔係沾麵
不過追加完個麵底就食到好飽好滿足
小二服務正常
老闆有堅持亦都值得加分
不過餐廳可以試既食物唔多
今次基本就已經試晒成個拉麵店所有食物
所以要覆桌都只有食番同一樣既野


其實仲有間兩間東京米芝蓮既過江龍可以寫
一間係蔦
不過都已經執左成年又都唔太記得當時既味道都唔知可以點寫了
另一間係金色不如歸
個湯好清麵條有小麥點似係自家製
味道其實都唔錯
不過因為做左打手都唔貼了

講到尾我自己都係鍾情比較粗同曲既麵條
所以就算下次再去日本
我應該都會搵番d沾麵專門店黎食
感覺呢三年雖然無得出去
但對於自己
的確係明確左一點
始終人大左
quota又再少左
都無辦法再乜野都放晒落肚



DAY82 完

無咩地方想去
岩岩先取消左張東京機票
不過之前都換左張新加坡機票聖誕去
未諗定去唔去

台風有個特色係荀蛋叉燒互換
我次次都唔要荀要多份蛋
唔知道依家仲有無

咁好既咩
咁打死都轉叉燒

佢地叉燒我覺得麻麻
蛋好食d

無加到錢試叉燒

估唔到開關開得咁突然
原來d機票純粹換黎等里數唔洗過期
結果好似聖誕就要飛了
有少少後悔cut左東京張機票
當時四月book仲係千一蚊附加費
而家睇已經要兩千蚊
不過港女轉左新工應該放唔到假
到時我又應該都係毒遊
但我真係好鍾意香港
所以呢個遊記我仲會繼續寫



DAY83.1 愛秩序灣海濱花園 愛秩序灣公園 葛量洪號滅火輪展覽館

基本上我真係好少黎到筲箕灣
對上一次有記憶應該就係中學畢業果時係度等車入鯉魚門渡假村
反而因為讀書果時係天主教學校同係東區醫院做過野
比筲箕灣再東既柴灣同小西灣仲比較有印像

成條路就係由海濱花園開始
相傳愛秩序灣係香港以前既一個海灣
因為填海已經消失左
變成左而家已愛蝶灣同愛東邨



海濱花園出面而家係筲箕灣避風塘
都泊左幾多船係出面


其實呢個地方黎過二次
第一次落雨就無乜點行
今次就曬到仆街

對面係嘉亨灣


呢度海邊仲有個碼頭仔有船可以去到東龍島

海濱花園向前行仲有個東區文化廣場
再深入d就係海防博物館
不過就留番下次先去了
今次過對面既愛秩序灣公園



原本都只係鳩行下
但估唔到咁樣一個屋邨公園又起左架木船係度
仲有個水池


但背景係高樓大廈

其實就好淺水


又有遊樂場同草地


連微型瀑布都有

真係點睇都唔單只係個屋邨公園咁簡單

呢間民生書院就咁貼住個公園

平日可能會好多學生係度打躉


不過九月既香港都仲係曬到hihi
係度行一陣都差d中暑

一條馬路之隔離已經係西灣河站

有西灣河街市同熟食中心
之前仲有個連名都唔會見到既7頭話要為呢度爭取黨鐵站

對面係好多野食既太安樓




估唔到入到黎又真係比出面涼爽

而呢間小老板係麥記女婿開既

望落同麥記價錢都係差唔多
不過麥記就只有一間
呢個小老板仲開埋分店

西灣河仲有一間好想食既就係呢間合時小廚

不過之前問過大半年都full晒
都應該唔會食到

咁其實由愛秩序灣海濱花園一直沿海邊行
過左嘉亨灣
就會黎到鯉景灣酒吧街
之前係度食過一次鬼式泰國野味道還可以
不過坐係度開放式門口對住個維港就幾chill
同尖東果邊唔同
呢邊係優閒舒服好多
咁格離係西灣河海濱公園
但我就無影到相
因為只係好短既一條路
過左酒吧街就已經係鰂魚涌公園既範圍

成個鰂魚涌公園因為東區走廊一分為二

海濱同近太古城兩邊


中間就由呢條天橋連接



近太古果邊反而少人



海濱果邊仲有d廢老係度玩下

不過想講下係海旁呢邊好似愛秩序灣公園咁有架船泊左係度
但呢架係確確實實曾經係海上行走既真船

可能疫情關係
封左個後門
入口就要去番海旁



呢架就係葛量洪號滅火輪

估計係曾經有人係度拍婚紗相掛

不過講番起我自己就仲未諗到去邊影好
雖然話開番關
但無咁多時間亦都無咁多假更加無銀兩呢

裝番佢個褲浪底


消防輪係十八世紀末出現


而呢架葛量洪號就係1953年投入服務

至2002年退役

差唔多服役左半個世紀

就係由呢架精英號取替


而家香港一共有12艘滅火輪


下層就係介紹下消防隊d裝備同歷史

上層就可以入船參觀





亦都算係公園比較高既方


原本佈局有餐室沖涼房救護室同寫字樓


救護室


寫字樓


沖涼房


廁所係唔人道既


洗滌室

下層仲有船員休息室

有六間房既碌架船

而家就唔開放

尾錨機


可以再上埋上面甲板


再上面既瞭望塔就唔比上了


係度要一面射水一面擊鐘船通海面船隻



駕駛倉都係唔比入既


咁其實成架船就唔太多野睇
亦都無咩會有導賞活動
就只係好簡單咁擺放左係公園既退役船
所以好快就會行完
後來就由公園過天橋過對面太古城食野了


續

清book左幾耐
想食個焗豬扒飯
或者要試下lunch會快d

雖然話就話關已開
但就仲係無咩意慾想去日本
反而係因為想同屋企人慶生
就book左嘉里酒店黎住
順便可以用credit黎食紅糖
又滿足下自己既私慾
嘉里同置地文華應該係之前最高級既兩間隔離酒店
都好一段時間無得住
我都用信用卡book左12月amber買一送一
之前睇過kkday個plan因為包左晚餐唔係咁岩
而且亦都無12月份
如果下次再出優惠
住埋呢兩間
就應該只係得一個住唔到既rosewood了



DAY83.2 CIAK All Day Italian Piccolo Jacomax Mother of Pizzas Pizza Maru California Pizza Kitchen The Pizza Project

由鰂魚涌公園行入去太古城
都係黎食pizza

呢間係ciak all day italian
同名仲有另一間開係中環置地廣場既ciak in the kitchen
雖然名一樣
但中環店係貴d既
餐牌都有少少分別
同埋兩個總廚都唔同
中環店係意大利肥佬
太古店係香港肥佬
呢兩間ciak都曾經係米芝蓮餐廳
中環店係米芝蓮一星
太古店係必比登推介
但中環店係2018年後已經無再入選
太古店亦都係最近一次被除名
而家兩間都再無米芝蓮既光環

咁黎呢度既原因
都係因為係網上收左套麗新集團既現金券
因為海洋公園萬豪係屬於麗新集團旗下物業
而佢地推出既staycation優惠其中有一個就係會送八張一百蚊既麗新集團餐飲禮券
咁我就係網上用半價收左呢pack禮券番黎食用
其實去中環食都可以既
不過條數就難計d

商場餐廳環境都幾舒服

座位唔會太迫
角落可以見到開放式廚房

唔知係咪有book檯關係
我地係坐圓形梳化位

牆上面有三星大廚bombana既掛畫
因為8 1/2都係屬於麗新集團既餐廳
不過而家bombana自己都整左個Octavo餐飲集團出黎

圓形餐檯都大張

檯面正正常常
無擺設

雖然餐廳都係深色小二多
但餐牌係有中文既

意粉屬於中價

但pizza對比起好多中環名店都真係比較貴

先上麵包

普普通通

第一道上既係carbonara

最記得果時飲食男女拍左幾條介紹意粉既片
係叫個chef一邊食番自己d意粉一邊介紹
而ciak個意廚就話卡邦尼一定唔會落忌廉
個汁係由蛋同芝士打成
聽講involtini老闆以前都係係中環店做
呢份比起係involtini同da filippo食過既傳統卡邦尼都要多汁

但蛋香味我就唔係好食得到
反而淨係食到好重既芝士味
煙肉粒好食
自家製意粉唔差
但覺得之後果款乾意粉仲好

咁去意大利餐廳
除左卡邦尼
紅蝦意粉都係我至愛
但佢地話今日無紅蝦
轉左龍蝦
咁係失望既
龍蝦感覺就普通好多
不過預左個價錢就唔想再揀其他野唯有照叫啦

半邊龍蝦
另外仲有小量龍蝦肉
個扁意粉話係用意大利mancini牌
感覺呢隻乾意粉仲煙韌過佢地手工果款
整體都係好食過卡邦尼既

上完意粉先上pizza

係最普通既馬格麗特
10吋大
好在呢張檯夠大張
三個主菜都放得落

話說呢間ciak好似係pizza比較出名
因為除左係前米芝蓮餐廳
中環店仲入選左亞洲五十大pizza
餐牌話係用左5款意大利麵粉經過一日半時間去發酵
造出鬆脆既口感
咁港女就最鍾意呢種視覺效果

佢用個特別高架上檯
望上去幾特別
薄脆口感幾好

最後有叫埋最傳統既tiramisu

仲有一球咖啡雪糕相伴
成個畫面就靚左
tiramisu幾滑
上面仲有d朱古力粒粒
連埋tiramisu咬落幾得意

經過精密計算連加一792

岩岩好就可以用晒八張一百蚊禮券
即係今餐只需要400蚊落樓
三份主菜一份甜品
咁就緊係抵食啦
但如果正價食就屬於中檔價位
不過佢係商場餐廳黎講都算高質既
始終曾經都入過米芝蓮
勉強亦可以算係八部半既姊妹餐廳
味道唔差
服務我自己覺得都算客氣
無其他食評寫到咁差
環境坐落都好舒服
有券用既話一定會番黎
同埋都想試下中環係咪真係會高質d

除左ciak
今年都仲食左唔少pizza店
仲有幾間係黃店
話說我同屋企人每年清明附近都會去寶福山拜阿公阿婆
咁由20年開始拜完山最緊要都係帶廢老去食黃店
新城市廣場既黃店真係唔多
第一年去左食而家已經轉藍既三星牛肉麵
上年就食左間普通偏貴既mimila
咁今年就揀左呢間開左唔係好耐既piccolo

呢間本身我就bookmark左西環店既
呢間piccolo出名係用拿玻里磚爐烤pizza
但係黎到商場店就無左呢個特色

餐廳座位少迫
當時仲係二人限聚
我地三個人就坐一張圓檯

不過就要用膠板相隔
呢個位背後玻璃窗會比人當動物園咁睇

但餐廳就應該以呢個位坐得最舒服

餐刀話係made in france


餐牌




前菜揀左個佢地官網有介紹過既炸南瓜波

60蚊四粒
入面有火腿粒

食落幾特別

同廢老食飯就無咩好揀
又要配合番佢地合味
一問佢食咩
佢就話要揀番夏威夷風情
因為pizza hut成日叫
咁我就唯有認命啦

真心唔想叫菠蘿pizza
但餐廳擺得出黎餐廳即係都唔介意去整
想食埋廢老呢條水
咁就一如所料啦
廢老緊係話pizza hut仲好食
其實佢都薄身唔會好似咬麵包咁

意粉就要左卡邦尼

佢個名有寫白汁
意粉上面放溫泉強真係好cafe feel
完全係我都做到既水準
但係賣cafe既兩倍價錢

仲有叫肉醬意粉

呢份比較正路
起碼個賣相都好d

甜品tiramisu竟然係好似高級餐廳咁成個盆拎過黎筆上碟
以為好勁啦
點知一上檯就fail左
更進一步係小二完全無意慾扶番起佢
最後係我自己幫佢企係身影相

前置同grissini一樣
但態度唔同
味道亦都唔可以相比
不過望落去都靚仔
呢份只係賣50
即係都叫做合理價

連加一583

因為新城市廣場既印像就係貴到唔正常
所以咁樣就唔算話好貴
但整體黎講真係失望既
餐廳似係想扮高級
但扮唔到
服務西西地
意粉好普通
連賣點既pizza亦都無左個磚爐黎烤
雖然係黃店
但真係無咩值得令我回頭
而家連西環店已經執左
重開後改名叫trattoria piccolo
由主打pizza變左主打意式小菜
無左部磚爐
都真係好靚咁遠走過去再試

下一間係黃店入面好出名既jacomax
幾乎都係一致好評
些少負面都聽唔到
上環太遠就一直未去
但而家開左銅鑼灣同將軍澳店
又係去完將軍澳華人永遠墳場拜山之後唔死心再帶兩個廢老食黃店

今次要係門口等左陣
不過有梳化坐
小二都有禮貌

餐廳有上過yellopenrice
意大利老闆風趣
香港老闆娘又有義氣
成個feel都好正

呢間將軍澳店都算係新開
地方都幾大
除左門面

仲有入面bar檯位




我地就坐入面既梳化位

好寬落
不過因為二人限聚仲係要用隔板隔開

餐牌

選擇就唔係話特別多
主要都係以pizza為主

甜品

先係招牌既海鮮意粉

意粉雖然比較粗
但其實就無乜話口感特別好
海鮮都係普普通通
整體唔特出

就左老母既素千層麵

但食落做到肉醬口感
可能醬汁比較多就好食左


招牌藍芝士蘋果pizza

雖然老闆係意大利人
但佢d pizza同傳統唔係幾同
除左有美式夏威夷
又有泰式
最出名應該就係呢個蘋果pizza
平時一見到藍芝士就會覺得好難食好臭
但呢個完全係連廢老都入得到口
而且果味好清新
芝士同蘋果兩種口味出乎地夾
更難得係由意大利佬整出黎

甜品一樣叫左tiramisu

呢個杯裝
對比piccolo就再滑d
不過又細杯d

連加一615

價錢比起piccolo貴
同屬商場黃店
但我更喜歡jacomax
呢間將軍澳雖然係分店
但見到老闆都出現係度
親力親為仲做埋小二傳菜
而其他後生小二感覺都好有活力
周圍走黎走去熱情招待
咁大家都係黃店
大家意粉其實都一般般
但態度就好好好勁多
咁呢間我就覺得好值得再去

第三間黃店一樣係好有名既mothe of pizzas
其實當日既目的原本係去食little napoli既
但原來星期一唔開
結果就要係銅鑼灣轉場
所以就去左呢間一樣有火爐既黃店

呢間應該係咁多間pizza店排最耐既一間
平日星期一夜晚都排左成九個字先入得

門口就已經見到呢個招牌火爐


今晚坐六人檯就好舒服

但其實呢度如果兩個人黎好似會排得快好多
起碼我地排緊隊都比人skip晒

餐牌同介紹

介紹話全部都係正宗拿玻里pizza必備既材料
用上火山蕃茄
意大利麵粉亦都用足兩日黎發酵

咁我估意粉應該唔係強項
係門口望下望下都唔係幾見到有人食

佢地普通13吋pizza已經比一般大
亦都有18吋既巨型pizza
不過就唔敢挑戰
咁另一樣特別既就係佢地有兩餸pizza
價錢計比較貴果一個價

岩岩出爐既pizza真係熱辣辣
正宗拿玻里主張係用手將pizza摺埋黎食
但真係熱到拎唔到
雙餸一個係我的帕爾馬

滿滿既parma ham
另一邊係愛的夏天1967

呢個有激死意大利既菠蘿
同埋好多肉腸
咁雖然賣相好吸引
料又多餅又大又有燶邊
但其實拎出黎就好易散
感覺好骨肉分離
而佢地最著名既柴火香又唔係好感受到
反而有成個瘤咁大既致癌物
就真係無想像中咁好食

另外仲叫左個好似都係特色既香蒜芝士包

呢個上檯蒜味好濃
芝士可以瘋狂拉絲
因為稱為麵包
係比起pizza厚身既
不過佢地上完個pizza無耐就上呢個麵包
一次過兼顧唔到兩邊就慢慢擺到凍左
凍左之後就差好遠
同埋碟番茄汁同想像好唔同
更似泰式口味
感唔又好似唔係好夾咁

限時係75分鐘
不過我地成八點幾先入到黎
就無下一輪客
都可以慢慢坐

兩樣野連加一458蚊
三個人平均每人百五多少少
份量就岩岩好
兩個人應該會滿瀉
咁樣價錢係正常價
但並無好驚靘既感覺
小二態度正常
試過就好
如果要排成大半個鐘就不了

元朗商場亦都有間新開既pizza店

係來自韓國既pizza maru
呢間係香港既第四間分店
之前行經荃新天地已經見識過條長龍
咁岩岩開係yoho
以為佢會比較少人掛
點知佢地十二點開門
十一點幾門口已經排左唔少人

佢格離仲有間狗salon

同埋呢間韓國pizza都唔係請香港小二
即係貌似有d識廣東話既
佢地都非常堅持自己係唔識講既
即係好搞笑
係呢個咁多新香港人既元朗叫人講英文

餐牌有講佢地既麵團係韓國係有國家專利
用12種天然穀物混合發酵一日


座位二人檯就迫左少少


擺盤久奉

餐具籃除左刀叉仲有手套

單點餐牌


韓國餐廳除左pizza主打都係食炸雞


同場其實仲有間nene
另外lunch menu既pizza就抵食好多

跟餐有杯冰茶


午餐全部pizza都係9吋size
都係屬於fusion既口味
揀左望落比較特別既燉海鮮味

蕃茄底
見到配料都幾多
就好似將個燉飯放左落pizza咁
味道就好濃
餅底就唔係意大利餐廳果種薄脆
而係有厚度既
不過食落都好食既

另外個set叫左焗飯

呢個就真係算鳩數
去豉油扒房會好食好多
黎呢度真係食番炸雞pizza好過

最後都有單點左份炸雞
花多眼亂都係揀左蜂蜜牛油

百二蚊六隻
大細都算唔錯
食落脆口仲真係好重牛油味

埋單連加一就食左四百二

都係走左睇番先見到原來漏左兩個湯無比
價錢如果午餐黎講都合理既
不過只限於pizza
而家呢個價就真係偏貴
另外小二就真係商場連鎖店
無乜服務架啦
可以兩個湯都漏晒我自己又無為意
咁就真係試過就算
如果女仔鍾意韓式野一戰都無妨既
同埋呢間都有見過搵人寫野
要自費個心始終都係有d唔平衡