[長氣多圖][無限期] 香港staycation之旅(3)

我買既係卡邦尼同黑松露一半半既組合

個樣正正經經
唔會話佢好靚仔
無乜燶邊

個底都係差唔多

始終係外賣生意
拎上手已經唔算太熱
不過都可以接受

餅底正常唔算厚

其實係pizza project都叫過晒卡邦尼同黑松露呢兩種口味
但同佢地相比
dough bros既味道真係唔太出
卡邦尼就好似純粹芝士底

而黑松露味亦都唔太出
比火箭菜蓋過晒

pizza project兩隻口味都係完全屌打
而且熱辣辣價錢又唔貴
仲有set menu提供
咁呢間dough bros的確無其他人講到咁出色

食完都唔算太油

咁佢地價錢就唔算太貴
味道其實亦都唔難食
街坊生意叫做平時唔洗出去可以多一個選擇
同埋朋友話佢地冬甩比pizza更出色

咁下次就試下呢幾款啦







咁pizza黎講比較有名既應該就淨番都曾經上過50亞洲元創坊既gustaci
不過呢間地理上更加難去
而且pmq已經有去過
都無咩意慾去第二次
再去既話都應該會比較想食louise
所以要食gustaci就真係有些少難度

都仲有灣仔羅馬方形pizza既alice
ifc間falcone亦都有motorino大廚座陣
太古廣場平台間emmer
山頂間fiamma都成日係ig選舉見到
暫時都係得番呢幾間pizza比較有興趣

同埋開拓左世界觀之後
而家去親旅行都會搵番五十大亞洲黎食下
岩岩去完東京曼谷同大阪都有食到佢地地區最top果一間
但我覺得始終都係香港比較好食
下次去台北應該都會再試下
不過安德睿而家改行預約制好似比較難訂位


DAY111 完



今年做節會去埋人人和平試下佢地好出名既燒鵝
之前已經去過大圍小館同鏞記
又可以出寫個燒味系列出黎

DAY80 香港港麗酒店(下)->咖啡園->金葉庭 (3)#28
DAY81 吉田舍料理->竹里烏冬居酒屋->嘉兵衛日本料理->活水和風食堂->灘萬日本料理->西川日本料理 (3)#46 #61
DAY82 丸目背脂煮干->神虎麵商店->漁場台風->T2P Mashi No Mashi->一生懸麵->麺屋こころ->凪拉麵->奇跡拉麵->麺処一家
(3)#79 #95
DAY83 愛秩序灣海濱花園->愛秩序灣公園->葛量洪號滅火輪展覽館->CIAK All Day Italian->Piccolo->Jacomax->Mother of Pizzas->Pizza Maru->California Pizza Kitchen->The Pizza Project (3)#108 #117
DAY84 立鮨->雲壽司->鐵火堂->海言どんぶり専門店->寿司の神->宗像壽司 (3)#129
DAY85 香港迪士尼公園(上) (3)#147
DAY86 香港迪士尼公園(下) (3)#154
DAY87 唯港薈(上)->天外天行政酒廊->天外天 (3)#167
DAY88 唯港薈(下)->海港城->GREEN (3)#184
DAY89 香港柏寧酒店(上)->SKYE天台酒吧及餐廳->行政樓層休憩室->行政樓層休憩室 (3)#191
DAY90 香港柏寧酒店(下)->PLAYT->樂天皇朝->鼎泰豐->詠藜園->豆漿大王->手拉麵小廚->美味廚 (3)#208 #213
DAY91 阿元來了->丁爸食府->瀑布灣->Interval Farmcy->Little Napoli->Babacio (3)#236 #245
DAY92 香港嘉福州際酒店(上)->Theo Mistral by Theo Randall->洲際行政俱樂部 (3)#254
DAY93 香港嘉福州際酒店(下)->海景咖啡廊->海景軒 (3)#271
DAY94 全日雞實驗所->麥記美食->油街實現->東岸公園->Gotthard Base->1987Plus (3)#284 #291
DAY95 獅房菜->旺角大球場->好旺角粥麵專家 (3)#300
DAY96 希戈餐廳->訊號山公園->咖啡廳 (3)#312
DAY97 聆渢咖啡廳->黃金海岸->Savvy->尚廚 (3)#328
DAY98 黃大仙廟->詠黎園->佐敦谷水道花園->黃大仙廟 (3)#353
DAY99 星宴->M+藝術館->Frites (3)#370
DAY100 香港嘉里酒店(上)->貴賓廊->貴賓廊->紅糖 (3)#388
DAY101 香港嘉里酒店(下)->貴賓廊->勇記海南雞 (3)#411
DAY102 Henry->香港瑰麗酒店(上)->瑞閣->瑞閣 (3)#432
DAY103 香港瑰麗酒店(下)->瑞閣->彤福軒 (3)#455
DAY104 The Lounge->Argo->Cafe Too->港畔餐廳->露台餐廳 (3)#468
DAY105 上海飽餃店->滿堂樂滬京風味->上海真真豆漿大王->威風百麵->蒙麵->火夫->寶城美食店-> 時新漢堡->紅磡雞蛋仔->陳茶館->Sweet Craft->揉然地 (3)#498 #513
DAY106 香港置地文華東方酒店(上)->Somm->置地廣場->MO Bar (3)#520
DAY107 香港置地文華東方酒店(下)->MO Bar->Amber (3)#533
DAY108 香港科學館->Osteria意大利餐廳->Sfizio (3)#542
DAY109 長洲->島中坊研樹下店->是蛋->香港摩天輪 (3)#549
DAY110 沙田馬場->喜馬當先 (3)#558
DAY111 Motorino->Fiata->Baci->The Pizza Project->Dough Bros (3)#565

以下預定

DAY112 楚撚記->大圍小館->鏞記->人人和平小飯店
DAY113 Chaat->大堂茶座->La Table French Brasserie->釧->Grand Hyatt Steakhouse->The Steak House
DAY114 快船廊->咖啡園->萬麗咖啡廳->Garden Lounge->The Farmhouse->海景咖啡廊->The Market
DAY115 前粉嶺裁判法院->雲泉仙館->雄泰>寶寶海南雞

DAY112.1 Chaat 大堂茶座 釧

寫自助餐太煩太多相
所以都係寫左酒店餐廳先
因為之前去staycation只係得二日一夜時間
頂盡都係食到三間餐廳
而有好多五六星酒店既餐廳有成七八間
就總有d漏網之魚係食唔到既
所以有時都會去試下呢d未食過既餐廳

第一間就去左rosewood既印度餐廳chaat
除左staycation正路都係揀番中西餐呢個原因之外
更大原因係呢間chaat係極之難book
基本上係唔會搵到你想食果個日子
咁佢地每個月第一日既十點就會開放下一個月既booking
所以當時結完婚第二日就要即刻上網book
好在開關後香港餐廳開始少左人
叫做book到個星期日夜晚時段
隔左半年再次黎到rosewood
當係慶祝新婚啦

門口就隱藏係5樓foodcourt既一角
係比較近k11 musea果邊入口既

chaat係22年開始得左到米芝蓮一星
成為香港唯二有星星既印度餐廳
由原本已經難訂既餐廳變得難上加難
今年23年係連續兩年得到星星
亦都係瑰麗唯一一間有星既餐廳
成續比起扒房同中菜更突出
當時總廚仲係由大肥佬Manav Tuli擔任
不過而家已經過檔佳民集團開左新既印度餐廳leela
應該都係未來奪星既熱門餐廳

近門口有個水bar

再入d擺左唔同既香料仲有部石磨機


餐廳地方唔算大
就只有個L型大廳

大概都係坐3,40人左右
梳化位後面係半開放式廚房
不過就見唔到果位大肥佬

我地就坐近窗邊圓檯

比起二人檯寬落
不過rosewood餐廳大部份座位都無正海景

外面會多左個露檯位

單點餐牌就好簡單得一頁

永遠都係飲品更多

佢都有set menu既

不過我就覺得唔太抵食
跟番佢單點減番唔啱食既應該會更好

未點菜就已經上左個餐前小食

有四塊薄脆
都唔只係每人一口
咸咸地都有d辣
都係食佢既醬
又可以用黎點之後samosa跟果隻乳酪醬或者咖哩

印度呢種鬼地方我應該永遠都唔會踏足
不過去印度餐廳就有必點既mango lassi

比出面貴兩三倍
都成舊水一杯
而且仲要細細杯
但係飲落勁濃厚杰身
杰到好似飲緊杯乳酪咁

跟住個set menu叫既前菜就係咖哩角

基本上每一檯必點既指定食物
佢將傳統三角形既咖哩角改造變成甜筒形狀焗出黎
渣上手唔會太油膩
而且入面係果肉變埋素食
再配埋個乳酪醬好開胃
仲有道餡料脆餅都係好多人點既菜式
不過我見好似會整到散晒有d難搞就無點到

炭烤類別單點都唔貴
不過因為叫左butter chicken
所以就無叫到炭烤雞
點左炭烤和牛面肉

真係同平時食到鞋鞋地既牛扒唔同
話係炭燒過
堅係有肉汁
輕鬆就可以切得開

非常之淋
唯一可惜就係份量唔多
食完唔太夠喉

下一道係butter chicken
佢都有跟番set menu個順序上

因為老婆唔食得辣
呢樣都係燉煮類別入面唯一無辣椒標誌既
咖哩都惹味
所以係一定要配番塊naan先得

88蚊四塊

上檯仲有熱度
未算好燶
亦都唔係話好脆
成塊餅煙煙韌韌
所有野都啱啱好非常之好食

甜品餐牌

係朱古力naan同kulfi之間掙扎左好耐

隻甜品碟幾靚


最後都係揀左個naan甜品
但佢上檯既係kulfi
以為落錯左單
但小二話因為個薄餅寫唔到字
所以送左個kulfi比我地

超驚喜
結果兩樣招牌甜品都有齊

kulfi即係印式雪糕條

下面係米粉
撈埋一齊食有兩種口感
幾特別

另外個朱古力naan都係餐廳招牌之一

話係總廚係以前間餐廳創出黎既得意菜式
再配埋雪糕
甜上加甜
不過呢個naan同之前食果塊唔一樣
呢個係比較脆
同埋配料都係碎晒
會食到成檯都係
原本食完主菜就真係未夠飽既
但食完呢兩個甜品就真係飽到上心口
好滿足

洗手間係餐廳最入面

係獨立廁所黎

雖然係米芝蓮餐廳
但未算fine dining咁食咁耐
上檯都幾快
未坐夠兩個鐘都已經食完好飽

一個前菜
三個主菜
一個甜品
一杯飲品
仲有一個送既甜品
加埋都唔洗千二蚊
夜晚食米芝蓮一星餐廳都幾抵食
而且真係好飽
食物有特色
味道亦都唔錯
環境就無fine dining咁拒謹
現場仲有d嘈
呢餐飯算食得幾輕鬆
係入夜之後環境都幾黑
小二就大部份都講英文
就正常瑰麗水準
有禮貌既

後尾出去露台影相

終於見到肥佬總廚係度同人吹水
不過佢而家就已經離開左
下次可以試下佢間新既餐廳

之後去左半島食生日飯
大堂茶座除左下午茶出名
仲不嬲有做開生日優惠
就係會送上原個蛋糕一個
如果四個人食仲會有一人免費
咁呢餐飯其實幾年前本身已經book過
但係果時7婆開始興起禁晚市
成餐飯就咁唔見左
之後開始去staycation就無再理會
直到今年先再諗番起大堂茶座呢個優惠又終於book多次
但係正日果晚老婆又中左武肺
最後拖到月尾過晒生日先補番呢餐生日飯

收工黎到都已經八點
夜晚既大堂茶座同日頭或者下午茶好唔同
長期都係得幾檯客



之前黎半島staycation早餐full左要上露台餐廳食
所以今次真係第一次坐係大堂食野
我地坐呢張檯雖然有四張凳

但就一定唔係四人檯
因為擺左兩套餐具已經無乜位

始終係六星酒店
都有鮮花擺設


生日餐牌
好似同平時係一樣

個價錢已經由當年4百幾加到558
過多半年而家23年尾仲去到628
武肺呢幾年酒店加價太勁
人工根本無可能追得上

上次係gaddis麵包就好好食
大堂茶座就好普通



前菜除左湯之外其實得兩個選擇
一人一個就無得爭
吞拿魚他他係其實同吞拿魚蓉差唔多

本身魚油充足
仲要煎過
我覺得係比起其他生牛肉他他好食既

但係凍批我就真係從來都唔識欣賞

佢檯面都有幾塊薄片可以配黎食

或者用番一開始跟既麵包都得
但種口感真係點都食唔慣

之後上主菜
我揀左羊

有羊架同羊肉兩件
切就幾難切
但食落口又唔算太難食
唔鞋唔un
無咩蘇味

另外果件係黃鱸魚

都係普普通通無咩特別
而且份量都細
今次就真係食風

食完主菜就到重頭戲

生日蛋糕
同平時慶祝果D蛋糕仔唔同
係原個蛋糕拎出黎
之前都淨係amber試過
但價錢係呢餐飯既五倍
雖然明知大堂茶座質素一定無半島其他餐廳好
但老婆都係為左呢個蛋糕先想黎呢度慶祝


另外兩個甜品係完全被比落去


而且味道都好一般

最後緊係揀番壺earl grey

半島無論邊間餐廳揀番紅茶都係無得輸

另外加錢要左杯凍朱古力

就唔係好明要加錢既原因
不過賣相都唔錯
好似杯裝tiramisu咁

雖然唔算話好飽
但都無咩可能可以係餐廳清得晒個蛋糕
所以正路都係拎番屋企食
小二本身都準備好晒
個蛋糕擺上檯都係for打卡用途

佢有晒原裝盒

本身以為個蛋糕好似雲石面咁
但切落去原來係軟既

好似啫喱咁
蛋糕裡面仲有餡
都幾好食
大勝晒果兩件甜品

半島大堂係無洗手間
M樓商場夜晚又鎖晒
要上番一樓自助餐果層先去到

大堂茶座好處係無限時
附近都無咩人
唯一唔好係會比入黎酒店既人眼望望
仲有d會自己走埋黎開凳坐
私隱度唔高
咁呢三道菜晚餐都食左兩個鐘

558加35蚊杯凍朱古力再加一
埋單就1266
平均每人六百零蚊
如果淨係計食飯就緊係唔抵啦
講緊之前去gaddis食lunch都係呢個價位
而且呢度食物離好食都真係有一段距離
咁點解唔去grand d既餐廳食
比我揀就會去未去過果間瑞士餐廳
不過講緊半島既蛋糕都應該值四五舊水
咁計番都OK既
服務就正常水準
唔會好似fine dining咁多動作
如果係武肺以前
可能會覺得黎食餐飯踏足過半島都會覺得威威
不過試暈晒唔同酒店之後就已經再無呢種諗法
所以時間真係好重要
如果當年黎到食飯既話感覺應該會同而家好唔一樣

第三間其實只係間開係半島酒店商場既餐廳
實際並唔係由酒店負責既餐廳
叫做釧
咁呢間餐廳就係食omakase既
不過我自己就好少食
始終大貴食唔起
同食唔起fine dining既晚餐唯有去食午餐一樣
10月果時見佢成日賣廣告話出左個秋天特別午市套餐
係由omakase轉左做會席set形式
望完之後覺得好似都OK
就搵左個星期六同老婆過黎試下
前一日網上訂檯都有位
不過要先比每人500即係總共一千蚊訂

餐廳位置係半島商場地庫
即係半島精品店果層



咁佢都有寫話食呢個set既話就唔會坐bar檯
因為佢都仲有做本身既omakase
不過黎到就唔知咩原因啦
佢就話將我地升級左坐獨立房
成間餐廳應該得一間


應該坐六至八人都可以
天花仲有吊燈

鮮花


比起出面bar檯位就闊落好多

亦都無咁拘謹
不過就睇唔到師傅處理料理

今日呢個秋天午市套餐就係七道菜

中間有加錢項目
不過我地都無要到

第一道上既係沖繩水雲

無我預想中咁酸
而且入面加左幾片帶子中和
令我對水雲呢樣野改觀左
真係有開到胃

第二道係刺身

比想像中豐富好多
而且呢一盤係單人份量
並唔係share既
入面有深海池魚
秋刀魚
鰆魚
赤身
拖羅
牡丹蝦
六種一共十塊刺身
每樣都好鮮甜
有一兩款仲有炙燒過

第三道蒸物係茶碗蒸

加左菇同黑松露

幾香滑

第四道係主菜燒物
甘鯛立鱗燒

睇過有啖好食大肆宣傳之後就開始覺得立鱗燒係一樣好西利既野
每次見到魚鱗豎起晒都會有種讚嘆
魚肉仲係熱辣辣

不過聽小二係主力講解下面既汁醬係由辣肉腸大豆之類整成

第五道主食有兩個選擇
意大利飯或者海鮮丼
咁就緊係每樣一份啦


就唔係話意大利飯唔好食
佢同茶碗蒸都一樣好重黑松露味
但我始終覺得都係海鮮丼比較配合呢個會席料理
感覺比較滿足

第六道係味噌湯

小二有講話碗蓋底個花紋係全部都唔同既


最後第七道甜品有兩樣

全晚MVP反而係呢一份甜品
唔知點稱呼
話係硬既腐皮入面加左流心既豆腐奶凍
成個感覺好正
咁好食既甜品竟然出現係日本菜入面都係第一次遇到

另外係餐牌無既

以為係中菜菲林卷果類野
但咬落去係硬身既朱古力
都有d心思

網上訂檯果時有寫到話係周年紀念
所以有送上蛋糕

仲有即影即有相一張留念

都真係第一次係香港遇到
呢個又係另一個驚喜

洗手間就要出面商場先有
我地食得慢
又嘈下呢樣果樣
一點鐘黎到
雖然只係個平set
但都食到出面d客走晒
差唔多三點半先走

午市set680加一
同去食米芝蓮法國餐三道菜午餐差唔多價位
今日既體驗我就好滿意
除左有獨立房坐
食物都比想像中豐富
甜品仲好好食
連食最平個set都有即影相留念
咁我覺得佢地都無因為你唔係貴客而係待遇上有差別
又聽到我地夫婦有爭吵而做出對應
雖然笑左但我覺得都幾貼心
每道菜都有介紹
服務甚至比起上面半島自家餐廳更好
環境因為地庫所限雖然無景
但呢間房裝潢得都幾日式
坐得好舒服
整體我就好滿意呢一餐飯
不過呢間餐廳好搞笑長期都有事端發生
之前有個就係facebook話餐廳搞到佢中武肺
今期又有個係小紅書話亂收費追加壽司都要錢
唔知點解成日會招惹到呢d事
可能廣告做得太多掛


散左場再行下半島商場
個精品店好似同以前唔同左



之前唔係好覺有得堂食

另外呢間就係分域碼頭果間意大利雜貨品

蔡瀾有介紹過

勁撚大碌麵

成盒tiramisu買都唔貴

我就買左包墨魚汁貓耳朵麵番去
38蚊包
口感都唔錯




下一篇係酒店扒房
除夕會去食埋麗晶扒房個sunday brunch
咁就可以寫到三間
不過香格里拉間龍蝦吧就真係加價加到搞不撚掂
唔知以後仲會唔會食到呢


續

想問下盒tiramisu幾多錢

我記得好似係百幾蚊搞掂

咁快又一年
已經2024
武肺經過左四年
即係呢個香港遊記就開始左四年
一開始講過可能會係無限期
估唔到通番關年幾
長短旅遊都去左幾次
都仲有貨交
咁大概
可能
都真係會一直寫落去
只要我仲係香港生存既話





DAY113.2 La Table French Brasserie Grand Hyatt Steakhouse The Steak House

千禧新世界同尖沙咀凱悅一樣
都係曾經想去staycation但無去到既酒店
原因都係miss左佢地個零房價優惠
而千禧新世界更加係做左一段好長既時間
原本住間豪華套房已經可以一次過食晒佢地法國菜中菜自助餐日本菜
但因為優先次序排到好後
去到後尾想去果時佢就將套房個價升左好多
結果都係無去到

咁今次就見到酒店出左夏日優惠
我就揀左法國菜既自助早午餐
因為餐廳係逢星期日休息
所以就佢係逢星期六推出
時間由十一點半去到三點半
可以食足四個鐘
價錢只需要428
而佢地本身既三道菜午餐都要488
雖然平時有折扣優惠
但早午餐每人仲多左個湯同有自助甜品
望落係比起平時豐富既
八月我就抽唔到時間
後來佢加推埋九月份
就終於可以試得到

因為有四個鐘食
所以我地都成十二點半先到
叫做仲有三個鐘可以坐


千禧新世界係大堂可以望上去幾層樓

環境開揚
而且落地玻璃仲好光猛

酒店大部份餐廳都集中係一樓


一出電梯就係有買一送一懷石料理既日本餐廳嵯峨野

不過最平果個set都要1780
即刻平均每人都要成千蚊先落到樓
望落去都係唔太抵食
唔係好明千禧新世界明明唔係頂級酒店但可以做呢個價

前面係自助餐廳cafe east

又係長做買二送一優惠
用手機apps做個會員就有
不過屋企四五個人又用唔盡個優惠

自助餐左手面就係今日食既法國菜餐廳

la table french brasserie


原來餐廳都幾細下

數數下連埋vip房都係得十二張檯
有d似宴會廳感覺
同埋其實無窗景
窗外面都係自助餐既位置

後面仲有部鋼琴同大檯

不過估唔到入座率大概都係得四成左右
仲以為佢真係官網所指既反應熱烈會更多人
唔怪得網上完全搵唔到呢個saturday brunch既評價

所以四人檯好舒服

有檯布有湯匙
因為brunch包左任飲
坐落就會問你想飲咩
不過得可樂同橙汁
無分still同sparkling water

有鮮花


周六早午餐餐牌

la table平時午餐都有得揀自助前菜
同埋每日烤焗精選既帶骨肉眼應該同今日都係一樣
不過前菜就應該比較少選擇
同埋今餐甜品都係自助
再多左個餐湯
即係大概係四道菜咁上下

不過出面自助選擇又真係算少
如果拎黎同之前去過幾間好似theo mistal或者skye相比既話
咁當然價錢都比較低
就唔拎黎同sabatini或者conrad呢d貴既黎比較啦
就只有一張長檯同三張細檯

而大部份食物都係無標籤既

芝士係少有有名牌既食物

都叫做有六款選擇
可惜我就唔好呢味野

比較有驚喜係佢都叫做有凍海鮮選擇

雖然只得三款
但都叫做有隻龍蝦鉗
不過唔知係咪格離餐廳運過黎

餐包跟把牛油刀擺得好型

個包都幾軟

咁原來除左自助前菜
仲有個叫做是日精美小食


蝦多士同魚膠
點睇都唔係普通小食
已經係正常前菜水準

相比個自助前菜就無咁出色



係蜜瓜同芝士唔錯

餐湯我就必定係揀龍蝦湯

入面多龍蝦肉同濃厚
不過舊cream就未溶得晒差左少少

另一個焗洋葱湯

外面有層酥皮加滿分
隻碗都特別過龍蝦湯果個
入面充滿洋葱

飲落都好濃味

前菜雖然選擇唔算多
但食完呢幾樣位上既都已經飽左一半
到上主菜係仲有驚喜

先換把鋸扒刀

件帶骨prime rib係超大塊
雖然無係面前切
但係上檯係熱辣辣好靚仔
有四款芥末選擇

塊扒有牛味
而且唔鞋仲少少淋
可以輕鬆切開
好食過hugo果塊實在太撚多

清晒都完全無難度
呢塊真係近年食過最好既prime rib

另外果個係北海道帶子配墨魚汁扁麵

有四粒帶子
而扁麵都係比一般出色

食落彈牙好好口感
無話比塊牛扒比落去
係比brunch個名吸引左黎
但估唔到兩份主菜都真係比想像中好好多

最後甜品檯一共有六款選出

一隻碟已經可以拎齊

係偏向小朋友設計
味道都唔差唔難食既
正常中準
個tiramisu都唔錯

每人一球班蘭雪糕

餐牌話係haagen dazs
但出面好似無咩點買得到

臨到餐廳先電話話想慶祝生日
佢地話唯有做到有蠟燭
最後上檯多左塊紙牌

雖然都係出面d蛋糕
但都開心既

熱茶同熱朱古力



洗手間係外面全層餐廳共用
咁最後都坐到三點半先走

埋單428一位
無任何折扣
連加一四百七左右
雖然可能貴過格離自助午餐
但湯同扒仲有意粉都高質
坐得舒服
都叫做有少少凍海鮮選擇
我都夠收貨
可能前菜無食得咁飽
份主菜比起去食其他sunday brunch係特別好食
服務就正常無咩特別啦
咁我覺得係食過咁多間半自助餐廳入面都真係幾抵食
淨係塊扒都值回票價

君悅扒房同chaat一樣都係當時staycation食唔到既餐廳
兩年前扒房仲只做夜晚生意
而我屬意就係食兩餐午餐多過晚餐
始終有lounge入
夜晚都唔會點肚餓就無食到
咁都過左成兩年時間
而家見到平日既lunch set係抵過星期六日既brunch set唔少
唯有特登請日假過黎食啦

之前黎staycation果時已經見識過
扒房門口係獨立係酒店外面

先上幾級樓梯仲有部獨立電梯

個儀式感重過中菜同意大利菜好多
有d同半島間gaddi's相似既感覺

君悅扒房專用電梯


入到去餐廳見到仲有多一層可以上

感覺君悅既餐廳好多都有兩層設計

君悅扒房既座位設計得好唔規則
坐定定係完全睇唔透佢地既設計
近門口既係梳化卡位

牆身有d油畫

呢邊樓底唔高
而中間位係水吧

後面好似係有d窗口位既

另外餐廳入面仲有個大廳

呢邊窗口位係望落去酒店大堂既
但係座位望落去就好迫下
而餐廳好似會將多數人放係呢一邊坐

我地就坐皮座卡位果邊

檯面無檯布亦都無咩擺盤
亦都無裝飾物
就係好單調既檯面

午餐餐牌同網上一樣
不過就只有英文版本

我覺得佢比假日brunch抵既原因係佢本身已經平左兩舊幾水
而蟹餅同湯都係可以追加既
價錢唔貴
更重要係rib eye同蘋果批係brunch時段係要兩個人share
平日lunch就有更加靈華既選擇
所以就特登揀左平日黎鋸扒

就係咁啱黎之前幾日
葉朗程就出左篇千字文屌鳩扒房熱水都要收三十蚊
咁其實餐牌係有寫既
我自己就去親邊度都係叫tap water
不過佢地都話無呢個選擇
咁我地就轉而睇左呢個drink menu

88蚊已經有最普通既紅白啤酒汽水任飲
不過最奇怪係加多2蚊就可以由一個鐘變成兩個鐘
唔明個設定係點玩法

咁我地就加左90要呢個最基本既free flow
但都係無水飲既

所以就先落左白油同汽水
紅白酒都只有一個選擇
而汽水就有可樂同雪碧

先上既係牛他他

牛他他已經預設左係兩塊酸種麵包上面
塊包硬硬地唔太好食
不過牛他他好軟口感仲係唔錯
如果分開就好

另外一份係青口

份量好多
配味正
牛油味仲好香

而蒜蓉包都係餐廳名物之一

如果用黎塗牛他他應該會更正

追加既前菜竟然係等我地食完他他同青口先上

就算係一塊蟹餅都有獨立碟同配菜
食落去一絲絲

口感同蟹蓋都係一模一樣好好食

小二呢個時候問我地要唔要加紅油

應該都係有順序掛

而個龍蝦湯更加係上牛他他既九個字之後先有

一開始有話係share既
但佢只係就咁拎左一碗湯上檯
最後都係比多左個碗我地
竟然係要自己分湯
服務真係差少少

而個湯呢
雖然只係加48蚊
但我個人就覺得都係一般般
入面連些少料都無
而且個湯仲幾清下
唔濃唔厚身
係失望既
明明前幾個前菜都唔錯
可能周打魚湯先係君悅扒房主打掛

到上牛扒已經係一個鐘之後既事

後面果檯客遲過我地黎
但已經上甜品
雖然佢地應該無追加前菜
不過我其實都唔趕時間
係怕既佢地之後甜品可能會上得好急姐

黎得扒房都係想鋸扒
而主菜餐牌亦都只有兩款牛扒
同時亦都係我揀出平日黎既原因
因為如果星期六日黎肉眼係要share既
而份量係無多到
今次兩款牛扒一齊上檯

預設已經切開左
下面份量多既係肉眼
上面既係牛柳


有六種芥末選擇


另外side就揀左芝士通心粉同薯條


君悅扒房同普通高級餐廳唔係太一樣
呢度樣樣野都幾大份
連個side都好似主菜咁


扒房仲係少有可以炭烤既餐廳
之前去過既henry同之後會去既麗間扒房都係
今次份牛柳都係切得好輕鬆

但食落口就好失望
首先已經係唔熱
連暖都稱唔上
可以話係涼
而我地都只係影左幾分鐘相
佢個樣係靚既
但食落去係比較韌
亦都無炭烤所講既鎖住肉汁
反而另外果件肉眼仲比較淋身
不過都只係好韌同無咁韌既分別
同埋都幾乾下
搞不撚掂
可能lunch既扒真係質素比較低啦
又或者升級做澳洲和牛先會比較好掛

side dish係完勝份主菜

通心粉連個芯入面都有芝士
另外薯條都好脆

之後再叫埋啤酒

係asahi
咁就應該叫親晒可以點既飲品

因為份量真心多
前菜加埋主菜都已經食左兩個鐘
到上甜品已經三點鐘
都走左大部份既客
甜品就揀左蘋果批同蛋白糕

book檯果時一樣tick左慶祝周年
得到既係紙條一張
但係之後上菜小二會即刻影張相再比你

呢張紀念相就有價值好多
可能算係老牌扒房
就有呢種老牌服務對應番

咁蘋果批就跟左杯新地
我將佢倒落杯可樂到

就變成左自製既黑牛
係酒店應該無咩可能會見到

而個蘋果批就真係好撚好食

就算擺左陣都筆出黎仲係熱辣辣好脆
蘋果肉又香

但係另外果個話係招牌既蛋白糕就搞唔掂

好似食緊石膏咁
早知叫一樣都話係signature既芝士蛋糕

洗手間要穿過入面大廳先去到
入面d位又擺得密密麻麻
每次行過都係尷尷尬尬

洗手間都幾乾淨
而且都大間

估唔到一個午餐竟然都差唔多食足三個鐘先走

原本lunch set就540蚊一個人
加左蟹餅同龍蝦湯
又每人加多九十蚊任飲
出示番新世界個免費會員就會有番個85折
但係酒水就無折扣優惠
最後就千三蚊埋單
平均每人六百八左右
都仲平過brunch既價錢唔少
咁樣飲飽食醉就真係抵食
雖然兩塊牛扒都好一般
但前菜同蘋果批好食都叫做打番個和啦
服務正常唔算熱情
不過又有影相服務
小二全部都講英文
上菜既大部份反而講番中文
個設計都係怪怪地
我地坐呢邊環境係比較少人清靜既
不過梳化位又同後面係完全相連
即係後面檯講野都完全係一清二楚聽得到
但都叫做坐得舒服
如果塊扒真係再好少少就完滿好多

今次黎君悅仲有一個目標
就係當日staycation見唔到獨角獸

今次都係以義賣方式推出
雖然佢唔係君悅既吉祥物
但好似都長年有賣呢隻野
今次就趁機買番屋企
100蚊真係幾抵玩
但係當年既白色獨角獸已經買唔到
今年就得藍色得粉紅色

最後買左隻藍色仔


對上一次黎君悅已經係兩年前既事
當時係聖誕黎staycation
而家又係臨近聖誕節


又要裝飾一下
不過門口聖誕樹好似都係差唔多咁

咁去完君悅扒房既半個月後
我就去左麗晶扒房
同君悅扒房唔同既係
麗晶扒房係有sunday brunch既
係多方面都係我杯茶
之不過個價就係食過咁多間sunday brunch最貴既
每人連加一差唔多要千五蚊
雖然麗晶餐廳用ae卡可以有八五折
不過因為收年費就cut左卡仲過緊冷河
咁所以我就特登book左除夕呢d用唔到任何折扣既日子黎試一次

sunday brunch既時間由十一點半去到兩點半
三個鐘時間
咁我地就差唔多十一點九去到酒店
今次係第二次黎
同上次黎食自助餐都已經相隔左九個月
而家上面酒店房已經正式開放左
見有遊客一齊上房
今次可以睇煙花
不過價錢都係fatfat


另外二樓nobu都開左

唔知之前間一星米芝蓮法國菜會唔會開番呢

大堂酒廊而家就旺左好多

仲見到麥玲玲係度吹水

而扒房就同自助餐係同一層
不過就要另一條樓梯落去



地庫有落地玻璃望番出去星光大道


見佢無鎖行左出去

出面好多係等睇過年煙花既支那人
不過好快就有職員話原來個露台係唔開放比人趕番入去

呢一邊就係扒房入口

另一邊連住自助餐個後門
因為扒房無獨立洗手間
要入去自助餐先有

時間未到十二點
扒房都未算好多人

餐廳多數都係四人檯

仲有多人長檯
不過位同位就比較迫
尤其是仲要出去拎野食條路就有d難行

我地呢d窗邊就二人檯

呢度小二比起君悅扒房熱情好多
而且今日遇到全場100%都係講廣東話既
咁樣就真係開心好多

一坐低就送上一杯香檳


仲有介紹餐牌

麗晶扒房sunday brunch索價1288
應該係全港酒店之冠
而且佢前菜係無凍海鮮
龍蝦湯同egg benedict都只有一份
賣點應該係魚子醬
同埋可能塊扒比較貴掛

窗口位同自助餐一樣都係對住星光大道

不過日頭陽光越黎越猛
去到尾段太陽光就會開始曬入黎

咁呢個brunch香檳就只有一杯
另外汽水係free flow既
入黎果陣小二都有問要still定sparkling water
我以為有汽水任飲咁水就一定係包埋啦
點知竟然係要收費既

唉

另外餐牌寫仲有隻無酒精既飲品
就係呢支rossino

係草莓氣泡果汁

呢隻幾好飲

咁自助counter就係餐廳入面獨立房
因為地方唔大
都耐唔耐會有塞車情況
自助前菜主要分左三張檯
最右手面係cold cut

有風乾火腿
原板蜜糖

四款芝士同牛角包


牛角包幾軟又有牛油香

仲有紅色果隻丹麥包甜甜地幾好食

入面係開心果

中間大檯有沙律


植物薯片
蝦

deviled egg
吞拿魚

兩款煙三文魚

都唔算係平時係自助餐輕易見到既食物


最後係魚子醬區

唯一有專人坐鎮同你筆
佢有分pancake或者分子料理
分子料理一隻係薯仔一隻椰菜花
不過都係pancake比較好
同埋位哥仔都好細心有禮貌
之前係jw the lounge拎魚子醬就好趕咁

仲有隻係龍蝦生菜包

同埋呢度係開發式廚房

可以見到個炭火爐同埋牛扒一碟碟咁送出去
不過就未輪到我

咁前菜基本都係高質既
雖然未去到henry放題咁精緻
但佢選擇比較多
亦都無野可以稱得上係唔好食
除左植物全部都可以encore


egg benedict係早段就送上

靚仔
仲有介紹話有d松露

但係個湯就隔左好耐先有

因為小二有問到我地想繼續食前菜定上湯同主菜
所以停左手無再出去拎野
但呢個真空時間都成三四個字
可能人多時間預得唔好
就唔係好明龍蝦湯原來都要即刻煮
不過個湯係好濃厚
同埋入面都有龍蝦肉

唔夠仲可以去搵生菜包補充

可能見我地食得多前菜都無咩停手
佢真係到好尾段淨係一個鐘唔夠先上扒
但其他檯有唔少已經一早食完
咁麗晶扒房最特別既體驗就係可以揀牛扒刀

雖然我係完全唔識
但又並唔係網上有個youtuber咁講淨係刀柄既分別
我就揀左小二話重少少望落去有d唔同既法國刀

德國同法國刀每樣一把

仲有六種鹽同芥末

就算係share碟都係熱熱地既

係度鋸扒都幾有儀式感

最後兩塊扒係一齊上既

同君悅一樣都係炭燒
但望落去就好似靚好多
可能因為無切開一舊過掛
餐牌都有三款美國牛可以揀
大塊既係10安士肉眼扒

細塊既6安士牛柳

另外唔少得既當然係芝士通心粉

一樣都係充滿芝士味
仲有個揀左磨菇

呢份都係好香口

又杯又扒又side真係要用盡晒成張檯

塊肉眼切落去都feel到好有肉汁
但睇隻色就唔係太似小二所講主廚建議既medium rare

咁肉眼食落都差正常唔太差
但係件牛柳就韌韌地又柴柴地

同君悅既感覺差唔多
都係肉眼仲淋過件牛柳
唔通牛柳真係好難煎?
明明係henry食過咁柔軟
都差唔多去晒香港d酒店扒房
但係食塊扒都要抽獎咁先知好唔好食
搞不撚掂

最後仲有個甜品櫃


以sunday brunch黎講款式都幾多
但又好似同格離自助餐有d似

但其實我地勉強食完兩塊扒都已經差唔多兩點半
自助區時間就黎完
真係每樣極速拎一件就出番黎



不過食完扒就真係飽左十一成
只可以好勉強咁試下
就應該真係同自助餐既甜品係一樣既

連慶祝蛋糕都係一樣

不過我remake左兩句字比較長
佢就比左兩份我

最後呢度係無雪糕供應
但就有每人一件既心太軟

岩岩焗起仲好流心
味道唔錯