[長氣多圖][無限期] 香港staycation之旅(3)

之後十一月第一間自助餐就去左香港而家唯一既洲際
海景咖啡廳
咁就緊係無可能同麗晶個自助餐可以相比啦
不過當日食完早餐個感想就係呢度以量取勝
但質素唔算差
而且出面廚師充足
成個場應該係用熱鬧黎評價
咁當然啦
都一定係要有優惠先黎食既
十月果時kkday就出左個買二送二既蟹之盛宴自助餐優惠

星期五六日個價就係1820
用番恆生95折code
埋單1729
平均每人就係432
所以就同埋老豆老母一家人星期日去食左餐飯
順便慶祝老豆生日
有remake到
不過呢間餐廳係完全無慶祝蛋糕出現

自助晚餐時間由1830去到2200
食三個半鐘
因為星期日黎食
第一次可以係開場前黎到

都已經係樓梯排晒隊
原來呢邊先叫做正門

海景咖啡廊有分外面同入面
即係企樓梯果邊可以share大堂樓座
咁自助餐區入面呢d座位就要接受矮樓底

不過有落地玻璃海景既


四人檯好大張

不過無檯墊無擺盤
就咁包埋套餐具就擺檯面
張凳又有d食物碎

海福嘉福真係完全配唔上洲際呢個名

呢度自助區之前食過都知係兩個方形檯
個場野食就唔算少
不過排隊空間就好窄
尤其係兩張方形檯中間果條走廊
所以一開始凍海鮮刺身果邊長期就塞晒車

影下相果刻已經比人清左唔少

少量芝士cold cut

凍海鮮都算係比較齊

仲有垃圾小龍蝦

順帶一提
呢度係仲有熟龍蝦
不過佢凍龍蝦d膏都係豐富既
質素就不過不失

沙律

壽司


六種刺身

八爪魚
鯛魚
吞拿魚
三文魚
甜蝦
同埋有帶子都算係咁

但又想講下
呢度有d廚師好撚惡既
其中一個就係刺身師傅
佢自己果邊無碟
會叫你自己擺隻碟上黎
而佢出面又無碟
但佢係唔會有任何反應既
仲會喝其他客話自己做緊野
另一個就係拎蟹粉大閘蟹果邊個阿嬸
都係無乜毫無禮貌
而兩個人都有個共通點就係上左年紀
所以話點配得上洲際呢個名
唯獨有個似總廚既南亞樣反而仲更加親切
煎龍蝦比較後生果個都ok
其他都無咩特別問題

飲品呢
kkday果個餐單話每人會送一杯無酒精飲品
睇youtube片都見到有既
但今日問係無左呢樣野
話係變成自助飲品

仲有汽水任飲


到熟食檯



呢個位1915會切乳豬

塊皮仲係好脆口

另外因為蟹主題
每人又有一張配給粉可以得到一隻大閘蟹

我本身就麻麻地食蟹
因為拆殼麻煩
係呢幾年先練得快左剪蟹腳
咁大閘蟹要成隻拆就更加唔會去試

不過今日有廢老助陣

叫做可以拆到黎食
都叫有d膏
不過真係唔化算
我都係食番麵包蟹好過

另外呢個位仲有蟹粉撈麵可以拎

麵條係刀削麵
蟹粉都多
可以黏晒上麵
不過就唔算好濃味

海南雞又係呢邊拎


格離仲有原條蒸魚
咖哩蟹
燒鵝
燒腩仔




中式海底椰燉湯同西式蟹肉忌廉湯


中式野食都算唔錯



再格離已經係燒肉眼


都好夠紅

味道可以
好過好多cheap cheap餐廳

炸雞同印度咖哩

印式薄餅

蟹主題仲有焗蟹蓋
蟹肉意粉

同埋蟹粉龍蝦

呢個位我就encore最多
因為蟹蓋以自助餐算唔錯
雖然都溝左唔少料
但細細隻易入口

煎龍蝦都香口

不過肉質比凍龍蝦差少少
勝在用蟹粉拌

麵檔仲好多選擇

比左碗牛腩河

牛腩有驚喜
好淋好好食

再落去就已經係甜品區

雪糕係haagen dazs

法式栗子薄烤餅同法式班戟應該係重點推介
有大大張相擺後面

橙酒pancake係即整既

tiramisu又已經唔係人手整比你
蛋糕仔望落賣相都唔差

不過就無原個蛋糕

最後係馬卡龍同水果


蛋糕正常
重點既tiramisu同燈酒pancake都唔錯




最特別係有海景軒名物蛋白杏仁茶

上次係海景軒無叫到
今次叫做補完左
用左黎收尾就好完整

洗手間多人用

都唔算太乾淨

即係以食物黎講
cafe on m真係唔差
雖然賣相一般
但好難得係個以量取勝既自助餐仲會搵到有d比較好食既食物
仲有d係佢地自己比較有特色既好似杏仁茶乳豬
加上而家蟹主題
蟹粉都算係唔姑寒咁派
雖然唔算好濃郁
但都已經收貨
而且食物基本上都有refill
唔會話有d野食完就永遠唔再見
不過餐廳係比較污糟同埋服務麻麻既
除左廚師問題
有時小二仲會想收走未食完既碟
整體感覺就大概係咁
四百三既話就真係咁多間最撚抵食呢一間
仲要係星期日

近期最後一間就係hotel icon既the market
the market其實食過一次早餐就已經可以知道佢地夜晚一定係吹大左架啦
不過呢間酒店對我地黎講都幾大意義
所以覺得都係需要黎一次食下正餐
咁the market就不嬲都係得poly舊生先有折
今次係因為九號風球果日klook出左個800減100既優惠
上到去klook仲見到竟然本身係有做the market9折

減左優惠就係758蚊一位
大約等於正價858蚊既78折左右
不過就要兩個人分開買先抵玩
越多人既話就越煩

呢個自助餐係由六點半食到十點
三個半鐘

門口都擺左主廚塊紙牌係度
一開始就話你知呢度永遠都係榴槤餐廳

the market因為有落地玻璃對住中庭
所以空間感都唔錯

其實呢度都可以包場搞婚宴
中庭仲可以用黎註冊用
不過包場要百幾二百人
我就唔諗住請太多人所以係地下搞就算

今次坐二人梳化位

張檯都OK大
有簡單擺盤
不過同格離檯距離都幾窄
肥少少出入都有d困難

the market自助區就分得好鮮明
同座位完全係兩個區
唔會係入地身後面拎野食
甜品亦都唔會同前菜混埋一齊
仲有獨立雪櫃去擺備用甜品

一入門口就見到


近中庭玻璃長檯擺左生果沙律芝士cold cut前菜
基上同早餐擺位無咩分別

背後有自助水吧


仲有果汁都係任飲

比較特別係五花茶同椰青水


仲有一格係擺熱茶同西湯


今晚係海鮮濃湯

有d似龍蝦湯既味道
都唔錯既

刺身係近洗手間果邊

只有一個名牌叫做日式刺身
目測就係八爪魚
吞拿魚
三文魚
北寄貝
飽魚
帶子同赤蝦
我去拎果時佢應該又用盡左叫我比碟佢

呢度刺身全部都好巨型
赤蝦好大條
不過未去殼
三文魚用魚腩
同埋有帶子都好大粒
係比較高質既

壽司擺左係凍海鮮果邊

檯面d吞拿魚望落比較靚
同埋都有三文魚子蟹丼任食

凍海鮮有龍蝦有蟹腳

今日個主題都仲係蟹之盛宴
但d蟹就去左食其他菜式
係無麵包蟹

不過一間咁貴既自助餐
龍蝦隻色水竟然唔係雪白


同埋赤蝦刺身仲大條過熟蝦
都唔洗點揀

凍海鮮背後係普通系既熱食

款式可能比文華東方仲少
仲要鳩鳩地
係有唔知邊條hihi擺左筆野隻叉係個熱爐上面
無為意拎起一野辣到隻手

泰式食物望落仲吸引


而佢出面都有唔少師傅坐鎮


蟹肉包同番茄龍蝦都係即整
尤其是蟹肉包個師傅勁好笑容
不過個包好多步驟要整好耐
同埋相隔麵包同龍蝦呢個位我仲以為有野拎


半開放式廚房區

入面見到有師傅一批批帶子拎去焗
同埋有阿根廷primb ribs

羊架


印度食物


鵝肝同蟹粥

咁所以拎左呢碟野真係唔錯

除左龍蝦
以為同凍海鮮會有分別
但結果都係一樣霉霉地
蟹包雖然好有心機
但係半島果舊真係比較好食
不過其他好似鵝肝帶子都好高質
真係入口即化
呢d我全部都會encore

牛扒都唔太差


蟹粥入面得D幼腳

純特色野

另外個開放式廚房仲有生滾粥同喇沙


最尾最尾原來仲有中式燉湯花雕蟹鉗

同埋軟殼蝦


蟹鉗真係得呢度先有

就好似上次去海景嘉福有蟹蓋咁
花雕酒味都幾重
叻沙都唔差
燉湯亦都足料


但係the market既重心都係甜品果度
老婆同其他人好早就已經去拎甜品
因為有榴槤食丫嘛
尾段熟食果邊靜到
得少量客好似我咁先會再行過去

蛋糕全部獨立細細件
就係為左硬塞d榴槤入面

所以基本上係得白色果三杯先係無毒可以食用既甜品

有綠茶奶凍
百利酣酒奶凍
同士多啤梨奶凍
黑色杯既已經係榴槤奶凍
連焦糖燉蛋都有榴槤

其他既都係
榴槤班蘭
榴槤芝士
榴槤卷
榴槤撻
榴槤波波
全部都係毒藥黎

佢亦都會響鐘
會有限時既榴槤菠羅包

個樣就同普通包無分別
但係入面就咁既款

好似食納豆咁格硬食左一啖
真係搞不撚掂

雪糕有兩隻牌子
haagen dazs有五款味
但係黎我the market
應該都係要食godiva軟雪糕

老婆就大大pet毒藥加埋一齊食


成個甜品區只有呢幾件野係無受感染


最後仲有個慶祝蛋糕仔可以食


餐廳入面有獨立洗手間
多人去無影到相
不過都乾淨

雖然一早已經係klook比左錢
不過佢都有比番張單我地
因為分開book所以有兩張

呢個係九折後既價錢
就無減到klook code既
咁大約七百六呢個價對於而家周圍都買一送一之下係比較貴既
但全香港最高質果堆真係頂盡都只係做到85折
今次已經算係以比較平既價錢可以食到the market
咁同早餐一樣啦
其實佢地都係選擇唔多
不過特色野方面表現幾好
帶子同鵝肝都好好
仲有蟹鉗
又有老婆好鍾意既榴槤食品
不過龍蝦就真係比較差
同埋係完全無燒味類食物
仲以為呢個價位應該都會有皮片鴨之類
而且小二服務都只係一般
成日過黎想收仲食緊既碟
其實只係停左手姐
我又唔會話唔食榴槤不如唔好黎之類既野
不過就真係要有心理準備甜品會比較少野揀
同埋黎得無折既自助餐都無咩性價比好提
一定係唔抵食架啦
都係睇你食得開唔開心既姐
而最後我都唔係好明the market會成為咁熱門既原因
都係一間有好有壞既自助餐
可能公關做得好啦





我成日做開一樣野就會成日做
好似呢幾個月不斷食自助餐咁
然之後十二月就鋸左兩次扒
唔知2024又想做d咩

同埋其實食得多自助餐
佢地野食既模式其實都差唔多
食黎食去都係凍海鮮
刺身
燒牛肉
甜品
就咁樣
去到五星正常味道果d分別已經唔算大
差別就只有價錢
搵到優惠同搵唔到優惠既差別太大
而家我都唔會特登係某D慶祝日子想去
變成係見到優惠先去諗食唔食

不過最最最後
其實係仲有一間自助餐最想食既
就係君悅咖啡廳
以早餐黎計
佢絕對係咁多間酒店入面排top1
所以對佢有特別既期待
只係咁耐都唔覺有平未有機會食到
咁大致上都差唔多食過晒了



DAY113 完




因為同老婆鬧交而可以加速我都唔知算好唔好事
不過就可以專心咁寫下
呢段時間都要睇人面色做人
清咁一d自己想做既list都好

DAY114 大圍小館 鏞記酒家 人人和平 竺扶大班燒味

除左點心之外
燒味都係香港菜式既核心價值之一
係未有咁多兩餸飯之前
就係以燒味飯盒為主流
我細細路都食過九蚊飯盒
俗稱就係狗飯
因為價錢平
所以唔識欣賞
覺得燒味都係濕鳩垃圾
然後大個先知咩叫做靚燒味

不過好奇怪既係
係酒店中菜廳
燒鵝既價錢永遠都係叉燒之下
有好多酒店都係用叉燒用同自己做宣傳
全部都話自己叉燒世一乜乜乜
但係街舖呢
幾乎全部都係清一色燒鵝貴過叉燒
雙拼飯更加唔會食得到燒鵝
咁所以我自己平時都真係好少好少會食到燒鵝
最多都係老母會買番黎做節
但永遠都係得皮同骨
我都唔知食緊咩
呢個就係我對燒鵝既有既印象

咁街邊燒味舖坐位少又污污糟糟
仲要排隊跟機
同屋企人朋友食飯就比較難
所以今次去左三間都係要book檯比較大既舖頭

第一日係大圍小館
呢間本身就想食左好耐
因為黃店x米芝蓮實在太出名
亦都係最難book既一間
四月果時都成個半月前打電話去訂位
佢地夜晚分開兩輪
想book到星期六日既第一輪好似無咩可能
唯有book第二輪八點三既時間
不過電話都幾難打
食飯果時都聽到佢地長期電話響都無人理
係最近追加左可以網上訂位就方便左好多

去到門口未夠鐘已經成村人排隊
應該就full house無咩機會walkin食到
佢門口好多紅色燈籠都好搶眼


都擺左d獎出黎

係唔擺必比登隻衰仔出黎

入面比較似酒樓格局

全部圓檯設計
兩個人黎食好似有少少困難
又食唔到多餸
所以臨結婚前全家一齊去食餐飯就岩岩好

呢張檯5個人坐夠晒位

無轉盤

有d懷舊菜佢話要預訂既

主餐牌都豐富

但就係無乜素食可以揀

因為老母要食齋
佢地主食就無乜素食
就揀左兩個齋既前菜

雲耳海帶
一酸一辣

糖醋豆腐粒


而佢地都出名燒鵝就好快上

我都有預先電話留低既
餐牌就無分上庄下庄
呢個係例牌
但都有隻脾
價錢只係168
都幾抵食
應該真係岩岩燒完出黎仲有溫度
皮薄脆口肉厚多汁
原來好食既燒鵝係咁既味道
係有沖擊性既

不過大圍小館最招牌果樣係叉燒
叫做勾魂叉
188蚊只得5件
唔平得天龍軒幾多

佢上完檯會有小二再拎碟陳皮醬再查上去

然之後再用火槍再燒濃少少

呢個就係大圍小館既勾魂叉
唔知同早餐既第一叉有咩分別
佢每一件都勁厚身
一件大約等於普通既叉燒兩至三倍厚度
再黏埋米通一齊食口感會好少少

可惜咁出名既叉燒除左真係肥大之外就唔太特出
完全稱唔可以稱得上軟淋
太大舊仲有些少難趙
同天龍軒或者嘉麟樓都有好大既距離

又係叫比老母既豆腐煲

煲得幾香口
其實中間呢一堆野都一齊上咁濟
所以係一次過食唔晒既
叉燒都擺左一陣

個飯都係差唔多一齊上咁濟

叫左睇完好吸引既籠仔蒸蟹飯
以前係好想去天寶閣食佢地個紅蟳米香
估唔到可以係呢度食到
上檯就好香
不過上完檯就會搬走隻蟹

再搞暈個飯

但咁樣分開左個飯又唔算特別好食
有少少齋

食完隻蟹拎個蓋黎載飯又幾得意

仲有一道道菜係之後先上
金沙日本南瓜

呢一碟都好食
咸蛋黃岩岩好
整得唔會太漏同大濟
如果用黎轉鮮魷應該會好撚好食

張檯夠晒位擺咁多碟餸


食到好飽仲有糖水送

一人一碗蓮子糖水
唔錯幾清甜

埋單茶錢收成廿八蚊位
係直迫五星酒店價錢
不過如果當係送既糖水就舒受好多

連埋加一就差唔多千五蚊
平均每人三百蚊
大約係中價高少少既餐廳
如果以米芝蓮黎講就真係唔算貴
不過好似叉燒同燒鵝
我覺得兩者價都唔太合理
燒鵝平到普通燒味店咁
叉燒貴到去六星酒店級
食完就真係唔係好明咁多人去推祟舊叉燒既理由
其實都食過大部份香港比較貴既叉燒
真係無咩邊度可以及得上天龍軒嘉麟樓同埋潤呢三間
不過都想試下好似鋒膳咁用日本豬黎做叉燒係咩感覺
另外服務呢
大圍小館都係想營造一種高級中菜既感覺
姐姐會係席前做好多野
又會介紹下菜式
不過某d姐姐背書又背到ee呀呀咁就差左少少
另外問佢地有無咩素食佢又話可以試下海鮮
堅係九唔搭八
同埋又有試過上錯左兩個菜比我地
係有些少混亂既
近期睇過老闆既自問自答
佢話大廚已經過左去元朗店管佢唔到
咁我就唔知呢餐飯果時大圍店仲係咪大廚主理
不過個燒鵝就真係一流
回味無窮
如果可以試多d懷舊味就仲開心
但唔食雞子戈渣佢又無得轉其他料都無計
老母食過之後次次做節都話想再book
但永遠都只係得番八點三呢個時間又搞不撚掂
所以之後就book左另外一間黃店入面都同樣幾出名人人和平黎做冬

人人和平岩岩做冬去既
以前都有食過lunch set
呢間係堡壘街既舖頭都幾勁
由街坊生意做到區外人黎排隊
再逆市擴張
又西餐又私房菜
最近仲係銅鑼灣做埋焗豬
仲話會租埋格離舖位黎做大檯客
呢邊就會做番散客為主
品牌真係幾重要既一樣野
始終可以做大既黃店唔多
仲係唔係一間收收埋埋既舖頭

不過新舖唔知幾時先開始營業
都係係番舊舖食

今日同親戚做節

九個人就坐長檯
食物係唔太方便去分
不過舖頭設計問題無計
將來話新店會放圓檯應該會舒服好多

餐牌封面係蒙羅麗莎抱住隻燒鵝

咁大概都估唔到呢個係最招牌既菜式

餐牌二人餐四人餐都有







唔會話係乜都有得食
但都已經夠晒咁多個人去揀
而且都係主要想黎試下燒味

牆上面有麼師推介
本來都想叫蠔餅但唔知賣晒定點話今日無

有屋企人叫左兩杯啤酒


而家慣左叫皮蛋

一人半隻做前菜
呢個蛋黃就黃色既
上次係庸記果隻係黑色
我就唔知有無咩分別
但係人人和平呢個就比較有蛋味
同埋都係溏心

叉燒都係人人和平既名物之一
而且佢仲有唔同選擇有加拿大瘦叉
波蘭肥叉
同埋加拿大白豚既半肥瘦差
最正路應該就揀肥叉既
但係白豚又貴d wor
所以呢碟係白豚半肥瘦黎

都有燶邊
不過切得比較薄

食落口感就一般
爽口但唔係軟淋

之後就到餐廳最出名既燒鵝
今次多人就叫左半隻

話係用荔枝柴去燻
但就唔太覺得有pizza烤完味出果種柴香味
同埋有少少涼左
亦都無汁墊底
就無好似大圍小館咁爆汁既情況
食落都唔差
脆皮有肉地但就唔算太驚喜

老母教落做節就一定要叫雞
所以仲落左南乳吊燒雞一隻

佢有還原番個形出黎
如果燒鵝都叫全隻好似都可以做得到
皮更脆亦都唔鞋口
無乜紅色位
幾好食

炒飯跟住燒味上
可以送埋飯

呢個係L佛大推既鵝汁炒飯
佢有例牌同加大分別
呢個係加大版
分比全家人每人一至兩碗都仲有得淨
都只係180蚊
好多中高級餐廳普通一個炒飯都唔只呢個價
入面就唔多料
不過用鵝汁炒油香重惹味
真係粒粒分明既狀態唔會黏埋一舊

跟住都係要就番食素既老母叫番d齋菜
黃金豆腐粒

份量都幾多下
又唔厚粉
亦都唔會好油膩
size一口大細又有調味

紅燒豆腐

呢個就普通正常D

鮮竹浸菜苗


之前都話無蠔餅叫
所以都只係得一碟普通小菜

菠蘿船咕嚕肉
用半隻菠蘿上碟
老母話個菠蘿新鮮好食
另外咕嚕肉已經去晒骨
啖啖肉入口
隻醬又唔會過酸
樣樣都岩岩好
真係我食過最好既
不過平時去中菜廳都唔會點叫咕嚕肉所以就比較唔到

最後仲有個齋炆米

茄子都唔錯

佢有得叫對面西餐甜品
不過感覺就唔係咁夾
同埋最後會送每人一位既腐竹糖水


咁就唔同大圍小館
人人和平都係同樣出名但並唔係收酒店價位
因為另外仲有間私房菜做平均五六百蚊一位
所以呢間定位就算係平民中中低價
茶錢每位只係十蚊
已經有糖水送

九個人十樣野兩杯啤酒
連加一都只係1866
每人平均兩舊水左右
就真係好抵食
仲平過兩個人去食二人餐
我有預早大半個月訂檯
怇地話係餐廳規矩唔記得話多過幾多人要落500蚊訂金
同埋晚市有分兩輪
我地今晚食六點至八點
小店上菜都幾快
兩個鐘其實都好夠
仲好多walkin客
呢個市道都有唔少人等位同外賣
證明餐廳名聲真係算幾好
平時屌黎屌去既老婆都話幾好食
不過我自己就覺得可能每樣都只係食少少就記憶唔深
下次可能兩公婆再黎叫精d食
餐廳都有後生小二
正常有禮貌
雖然唔會特別熱情
但都算係間比較有活力既中菜
係廁所比較污糟
地面痴立立
仲有十人長檯講野傳菜都係差少少
算係可以改善既地方
不過佢地都自己出po話新舖位有改善就盡量期待下
同埋fb ig都真係keep住日日更新講下自己d特色野
又唔洗交比食客賣廣告
呢方面係出色既
真係要好好珍惜香港仲有呢種黃店堅持落去

想再講年中果時都去左鏞記
話晒香港好多燒鵝名店都算係佢地分支
官網話佢地1942年創立
都有81年歷史
鏞記個名聽就聽得多
咁就同朋友去左試一次

地址就係中環威靈頓街
即係海言果條街
鏞記樓高四層
而且仲係自家物業
所以武肺果時就應該未驚過
仲將餐廳再翻新埋
亦都係好多年前既米芝蓮一星餐廳
不過自從2013年之後就無再入選過
而家全香港兩間一星米芝蓮燒味
其中一間甘牌燒鵝就係由孫仔甘崇轅主理

睇過史堤芬娘就話而家地下格局似茶餐廳
可能係比散客坐掛
我地book左五位就上左二樓


樓底唔高
不過裝修都有d格調

成個場基本上就聽唔到廣東話
格離仲有一人鬼佬毒自食燒鵝
估計我自己去獨遊人地都係咁樣睇我

張圓檯坐五個人就岩岩好

擺盤正常
仲有一邊係梳化位

咁小二耐唔耐都會斟下茶

不過就唔係太密
通常就fill左茶果時先會咁做

餐牌唔多頁數




價錢就係大圍小館再之上
茶錢三十蚊位
完全就係五星酒店中菜廳價位

聽聞皮蛋幾出名
所以叫左四份

廿蚊份
但每份就只得半隻
個黃係比較黑
食落除左啫喱口感係完全無特別既

今次一樣都係叫做叉燒燒鵝
呢兩份一樣都係最先上既

呢度一份叉燒份量都唔算少
每件有厚度
未去到大圍小館咁厚
又無人人和平咁薄
我覺得咁樣先係適中既size
有燶邊
望落去都靚仔
不過食落都係比較普通同瘦
同埋口感一般都係唔算軟淋
稱唔上好食既叉燒

燒鵝例牌已經差唔多係大圍小館兩倍價錢
今次就叫左半隻
上檯之後會再淋上佢地既鵝汁

咁樣望落去就會反晒光

但係咬落去首先係唔熱
皮脆肉嫩
全部都無
唔知係咪擺得太耐定點
仲要唔肥
食骨仲多
咁對於呢個燒鵝就真係好撚失望既

小菜叫左炒帶子

XO醬香口
不過四百幾蚊份量都算少

福建炒飯就正常無咩投訴


最後先上既炒鮮奶反而最好食

超級滑身食落好順口好c服



呢間比較好既就真係因為自己物業
而且地方大
完全無限時
七點半黎到食到十點先走
洗手間都唔錯
地方算係乾淨

六樣野連三十蚊茶錢加一
兩千蚊落樓
平均每人四舊水
係人人和平既兩倍
但鵝同叉燒都輸晒
服務唔差但又未算去到周到
呢個價位我完全可以去五星酒店食得到
咁樣高不成低不就
想食米芝蓮我仲可以去甘牌
同系品牌但半隻鵝平百三蚊
呢度只係多左其他粵菜可以食到
最後寫呢篇野果時openrice仲係由全部lv1無相既食評洗版
即係佢而家真係全心去做水遊客既生意
真心笑撚左
咁就緊係狗都唔再屌系列啦

仲有間只係買過外賣番屋企

竺扶大班
呢間係律敦治下面
因為米紙介紹過話都係由前酒店師傅主理

價錢唔算貴


買左盒下庄番屋企過中秋


始終都係外賣
番到屋企都巢晒皮

食落都係鞋鞋地
可能用番氣炸鍋玩完佢先會比較好食

又有買過樓下間榕記陳皮燒鵝
呢間就真係鳩既永不錄用
相都唔想貼出黎

都仲有米芝蓮四大天王燒味舖未試過
一樂
甘牌
天鴻
波記
不過後果兩間一間港島西一間新界西
要食晒佢地都有d難度
都仲有間叫做天龍燒鵝想試
話係天龍軒師傅開業
但始終全部都係街邊燒味檔
好唔好食更大原因應該都係睇彩數
同埋而家支那人太多
應該都係排好耐隊先食得到
咁樣就會諗點解武肺果時唔會試呢


DAY114 完



應該終於
可以寫關西個遊記
澳門就再之後再算了
其實都無咩好講
都係得間自助山

唔覺haagen dazs 有出斑爛味雪糕
反而維記有

唔覺haagen dazs 有出斑爛味雪糕
反而維記有

所以我都唔知佢仲係haagen dazs
不過唔識分

想一嘗最老牌6星酒店既lunch buffer
樓主覺得半島露台餐廳好d定四季argo好d?
環境，食物種類，質素相比如何？

可以睇下#468果篇
環境其實半島就無乜
都係老牌野
Argo就比較浮誇

半島出面無乜即整既食物
不過味道黎講我覺得半島就好些少
Argo有片皮鴨同即煮牛扒

同埋兩間自助餐平日同假日個lunch都應該差幾遠下

岩岩睇左
我本身見argo好似多d選擇, 又平d, 但睇相好似見到d位坐得好迫, 同隔黎枱好近, 枱又細, 好似坐得唔太舒服咁

又未去到唔舒服
不過真係迫少少
始終佢地方唔大