《冷靜與熱情》
1.
第一次見到佢係喺我阿哥間酒吧度。
當時我手上攞住部macbook,急急忙忙咁推門衝咗入去。
由於時間尚早,呢刻酒吧入面好冷清,只有一個着住黑色T-shirt嘅男仔背對住我坐咗喺吧檯前。
可能係我嘅腳步聲太急促,個男仔擰轉頭望咗過嚟,不過我哋視線交匯咗一秒都冇佢就擰返轉。
我行埋去吧檯,坐咗喺個男仔右手邊,同佢隔咗兩個座位嘅距離。
「搞咩咁急。」一坐低,我阿哥就喺吧檯後問我。
「一陣要出文呀,但我仲未寫完。」講緊呢句嘅同時,我打開咗macbook。
唔記得咗自我介紹,我係喺網上寫小說嘅。不過我仲讀緊u,平時都係得閒先會寫文,所以只勉強算係半個網絡作家。
我好鍾意我阿哥間酒吧嘅氣氛,所以成日都揀啲少人嘅時間入嚟坐低寫文。
我阿哥已經習慣咗我成日做deadline fighter,所以佢冇再多講啲咩。
「照舊Vieux Carré?」佢隨口問咗句,但其實佢已經開始調緊。
因為我次次都係飲呢杯。
我胡亂點頭,視線仍然緊盯住電腦螢幕。
雖然我專注緊,但呢刻我仍然feel到左邊一道好奇嘅視線落喺我身上,不過只係維持咗好短時間就又消失不見。
我知道個男仔好奇緊啲乜嘢。
好少後生女會叫Vieux Carré。
但其實我飲酒嘅口味咁奇特係有原因嘅。
我十幾歲就開始被我阿哥瞞住我阿爸阿媽train我飲酒。喺我阿哥嘅訓練下,我由一開始飲幾杯啤酒就唔掂嘅酒量成長到而家可以靠一人之力擊倒晒我所有friend。
跟得我阿哥飲酒多,我飲酒嘅口味都越嚟越似佢。
我有問過我阿哥點解要訓練我飲酒,佢話女仔識飲酒就可以保護自己。
但其實我懷疑佢只係因為覺得好玩。
不過佢又錯唔晒嘅,至少我到而家都未試過被我阿哥以外嘅異性灌醉過。
過咗冇耐,阿哥將調好嘅酒放咗喺我面前。
我滿足咁飲咗啖,然後開始投入寫作。
飲住酒寫文其實幾chill,亦更容易有靈感,我用咗半個鐘頭左右就打完今日要出嗰篇文。
Check過內容冇問題之後,我就打開平時喺上面post文嘅網站。
明明我只係遲咗少少,上面已經有一堆人好似冤魂索命咁係咁留言催我更文。
乜佢哋平時冇其他嘢做㗎咩?有時見佢哋係咁催,我都不禁感到疑惑。
「幾時更文?」
「文呢?」
催更嘅留言千篇一律,我都懶得回覆。
我乜都冇講,淨係霸氣咁掉咗篇文上去,然後就熄咗個網。
出完文,我放下心頭大石,終於有時間一邊飲酒一邊觀察下其他人。
喺我頭先寫文嘅期間已經有兩檯客入咗嚟,坐咗喺我身後不遠處嘅梳化位。
酒吧充斥住佢哋嘅談笑聲,頓時變得熱鬧咗。
而吧檯前仍然只有我同嗰個男仔安靜咁坐咗喺度。
我覺得我哋兩個好似同身後嗰兩檯客處於唔同世界咁。
阿哥呢個時候喺吧檯後面忙碌緊,我廢事打擾佢。
於是我呷咗啖酒,無聊咁偷偷觀察左手邊嘅男仔。
佢年紀應該同我差唔多,飲酒飲得唔算好快,間唔中先拎起酒杯飲一啖,好似好悠閒咁。
我唔知佢飲緊咩酒,但我直覺覺得佢一定係好識飲酒、好鍾意飲酒嘅人嚟。
因為會自己一個坐喺酒吧慢慢嘆酒嘅後生仔其實同鍾意飲Vieux Carré嘅後生女一樣,都係咁少見。
喺我識嘅人當中,只有我阿哥(3x歲已婚男士)會咁做。
諗到呢度,我單方面咁對呢個男仔產生咗一種遇到同類嘅感覺。
其實我好想搭訕,但我又怕人哋淨係想靜靜地咁飲酒。
我覺得佢未必想俾人打擾。
內心掙扎咗一陣,我最後都係帶住遺憾咁執嘢起身走人。
「走喇。」我同阿哥講。
佢點咗點頭。
而喺我離開座位嘅時候,個男仔抬頭望咗望我。
我哋四目交投,佢對我點咗點頭。
我掩飾內心嘅悸動,微笑回應佢,然後就離開咗。
結果我都係唔夠膽同人搭訕......