美胸(Acup)
2022-06-26 03:01:30
8.
喺iron man嗰度出嚟之後,我提議去睇獅子王慶典。
江睿銘同意咗。然後佢上網查咗查獅子王慶典嘅時間表。
「原來十分鐘後就有一場。」佢講。
時間啱啱好!
「咁我哋直接過去啦!」我興奮咁邁開腳步。
同江睿銘一齊行緊去探險世界嗰陣,我一路上都擔心緊佢會唔會提出同陳柏坤佢哋匯合。
但直到我哋到咗目的地,佢都完全冇提過呢樣嘢。
就好似我哋本來就係單獨約嚟迪士尼,冇約過其他人咁。
我唔提匯合當然係出於我嘅私心啦,而江睿銘可能係想做助攻,俾個機會陳柏坤同Sharon獨處。
又或者佢真係唔記得咗。
我唔肯定佢係因為邊一個原因而唔提起佢哋。
於是,我暗中做咗一個決定。
今日唔可以喺江睿銘面前提起陳柏坤或者Sharon嘅名!
萬一佢真係唔記得咗而俾我提醒咗佢,咁我就會白白錯失咗同佢繼續獨處嘅好機會。
嚟到獅子王慶典,我哋只係等咗冇耐就已經可以入場。
我哋跟住人群前進。
但過程中我唔小心被個細路踩咗腳,爭啲失平衡。
江睿銘好敏捷咁扶住我,但好快就放開咗。
但即使佢嘅手掌離開咗我嘅皮膚,上面仍然留有殘餘嘅溫熱。
我抿唇,忍住興奮尖叫嘅衝動。
江睿銘嘅行為好明顯係冇其他意思,只係好心幫我,但佢心無雜念嘅模樣反而令我忍唔住係咁幻想,好想知道佢心動嗰陣會係點嘅。
我發現我嘅癖好真係好奇怪。
「我哋坐嗰度!」入場後我睇中咗一個比較後嘅位置。
坐喺嗰度可以將成個舞台一覽無遺。
因為都多人入場,我怕我睇中嗰個位會俾人坐咗,情急之下我直接拉住江睿銘嘅手臂行過去,到坐低咗先鬆手。
當然,我咁做都係有少少私心嘅……想借啲意同佢有身體接觸。
坐低之後,我偷偷觀察江睿銘嘅反應,卻發現佢嘅表情冇乜變化,仲神色自若咁同我討論一陣睇完表演之後去玩咩好,彷彿啱啱捉佢手臂嘅只係一個無關緊要嘅人。
我不禁有啲沮喪。
佢好似完全唔心動喎……
之後表演開始,我哋兩個就好專心咁欣賞,間中講一兩句嘢。
但因為呢度太嘈,有時我聽唔清楚江睿銘講乜。
呢啲時候,佢就會哄埋嚟再講多次。到後尾我哋一講嘢就會哄埋對方度,但講完之後又會即刻縮開。
於是我又重拾返信心。
就咁樣重複咗幾次之後,我發現江睿銘靠近我嘅時候總係伴隨住似有若無嘅香味,係柑桔嘅清新夾雜住薄荷嘅冰涼。
搞到我完全專心唔到。
到表演嘅後半段,我滿腦都係江睿銘身上嘅香味,對於表演嘅內容一無所知。
完場嘅時候,大家陸陸續續起身離開。
我同江睿銘冇郁,想等人潮稍微散去之後先至起身走,費事咁逼。
但等待期間,我無意中發現咗兩個熟悉嘅身影。
係Sharon同陳柏坤。
此刻佢哋兩個正跟隨住人群往出口走去,有講有笑咁。
我見到佢哋之後嘅第一個反應係:佢哋竟然咁啱都係睇同一場表演,好有緣!
於是我望向佢哋嘅方向,不自覺咁脫口而出。
「嘩!陳柏……」但話一出口,我就僵硬咁停住。
係喎!唔可以俾江睿銘知道佢哋喺度!
萬一佢打算同佢哋匯合嘅話我哋就冇機會獨處㗎喇!
我想扮冇事發生。
但由於我頭先「嘩」得太大聲,江睿銘嘅注意力已經被我講嘅嘢吸引咗。
佢擰咗個頭過嚟望住我,好似等緊我講落去咁。
呢個時候再唔講嘢好似有啲奇怪,我亦唔知道佢係咪已經聽到我講嘅嗰兩個字。
於是我唯有硬着頭皮咁繼續講落去。
「陳柏……陳柏宇都嚟咗迪士尼呀!」我急中生智,求其指住一個方向。
江睿銘順住我嘅手勢望過去。當然,佢冇可能搵到陳柏宇。
「係咩?我見唔到。」佢凝望咗人群一陣。
「太多人喇,你搵唔到都唔出奇。」我連忙接話。
於是江睿銘冇再深究。
呢一刻我終於鬆一口氣,偷偷地拍一拍自己心口。
真係好險呀。
好彩憑住我嘅機智,危機順利解除。
不過唔知點解,我而家回憶返我哋啱啱嘅對話,硬係覺得江睿銘頭先好似忍緊笑咁。