美胸(Acup)
2022-06-22 01:57:59
4.
同Sharon同陳柏坤道別之後,江睿銘望向我。
「我哋行啦。」佢示意我跟住佢。
行去蛋糕舖嘅途中, 江睿銘主動同我打開話題:「酒吧老闆係你阿哥嚟?」
「係呀,你點知㗎?」我好奇咁望住佢。
「呢排我成日去酒吧,同佢熟咗之後有吹下水,佢有同我講起你。」
都似係我阿哥會做嘅事嚟,佢好鍾意同熟客搲水吹。
「佢講我啲咩?」我變得更加好奇。
出乎意料咁,江睿銘嘅表情變得有啲猶豫:「Er……佢早兩日問我使唔使介紹你俾我識……」佢有啲唔好意思咁低頭笑一笑,然後又補充:「不過我哋而家已經識咗啦。」佢笑得好陽光。
我窒咗窒,避開佢嘅目光,耷低頭抿嘴忍笑。
我覺得我阿哥肯定係知道我會鍾意江睿銘呢type男仔,所以先話介紹我俾佢,想幫我製造機會。
明明以前佢都冇介紹過我俾其他男仔。
知我者莫約阿哥!我心入面暗喜。
由餐廳去蛋糕鋪嘅路程唔係好遠。即使我已經盡力放慢腳步,我哋都係傾咗冇耐就到咗。
然後我哋入咗舖頭兩分鐘都冇就買完芒果mousse出返嚟。
呢刻我拎住期待已久嘅芒果mousse,內心卻忍唔住有啲不捨。
好想再同佢相處耐啲呀!
不過我理智上都明白我哋今日先至第一日正式認識,唔可以太急。
於是我爽快咁同江睿銘道別。
「唔該晒你呀!咁我走喇,你行左邊定右邊?」
我內心偷偷祈求佢同我行嘅方向一致。
「我左邊。」佢答。「你呢?」
好可惜,佢同我係相反方向。
「呀,我右邊。咁……Bye bye?」我同佢揮手。
「Bye bye。」佢面上仍然掛着嗰個禮貌嘅微笑,企係原地冇郁,好似想目送我離開。
「Bye bye……」我被佢嘅笑容迷得神魂顛倒,傻更更咁又對佢揮多次手。
佢輕笑。
見到佢嘅笑,我好似突然驚醒一樣,連忙轉身離開。
我一邊行,一邊逼自己唔好回頭望。
佢真係好charm呀!!!!我喺心入面尖叫。
返到屋企洗咗手之後,我攞住芒果mousse入廚房,將佢放咗入雪櫃。
我阿媽聽到聲,從客廳行咗過嚟。
「返嚟喇?今晚想幾點開飯呀?」佢問我。
我哋屋企平時冇固定嘅開飯時間。
我歪頭諗咗諗:「晏啲都得,我啱啱食咗放題好飽。」
我阿媽點頭,又走開咗。
跟著我就入房攞換洗衣物,再行去浴室沖涼。
嗱嗱臨沖完涼寫文就差唔多喇!我咁樣諗,手下動作都不自覺咁變快咗。
到我沖好涼出嚟,都只係四點幾。
我不嬲喺傍晚六點出文,而我之前一早已經寫好晒大綱,所以應該寫得切。
一邊諗,我一邊用最快啲速度衝入房。
打開電腦嘅同時,我順手攞起叉緊電嘅電話嚟睇。
然後發現有堆嚟自陌生群組嘅訊息。
群組名係「四人同行一人免費」。
我心下一跳,幾乎係即刻就估到呢個咩group嚟。
我迫不及待咁㩒入去。
不出所料,Sharon喺入面講緊嘢。
「杜卓瑤!!!」
「得唔得閒!!」
「一齊打機!!!」
佢一連send咗幾個message出嚟轟炸我,全部都係一分鐘前send嚟。
我冇急住覆,而係碌咗上去睇對話紀錄。
加咗我入嚟之後,Sharon講咗句:「加咗喇」,然後另外兩個男仔都send咗笑嘅sticker。
Sharon唔止喺group同我講嘢,佢仲有私底下搵我。
佢喺我沖涼嘅時候send咗兩個message嚟。
「你入唔入我哋個group一齊打機?頭先江睿銘問我你有冇玩呢隻game 話不如叫埋你一齊玩 你ok我就加你入嚟」
佢send message嗰陣我仲沖緊涼,所以睇唔到。
下一個message係隔咗幾分鐘先send過嚟:「一係我照加咗你入嚟先啦」
佢應該等咗一陣,見我未覆,就自作主張加咗我入group。
睇完Sharon嘅message之後,我㩒返入個group度睇group member嘅資料。
我見到其中一個人嘅名係kwan,應該係陳柏坤。咁即係另一個人就係江睿銘。
Gordon。呢個係佢set嘅名。
我偷笑,即刻將佢加咗入contact。
然後我先至施施然咁喺group講嘢:「等我一陣」
電腦一早已經開咗。我打開咗平時用嚟出文嗰個網站,喺用嚟更新故嗰個位打字。
「趕住去溝仔,今日停更!」我交代完之後就乾脆俐落咁熄咗電腦。
「玩得!」我喺打機group宣布。