Bottas(已硬)
2022-11-05 17:15:45
2.
呢個時候,我嘅目光無意中放咗喺遠處嘅便利店度。
喺便利店度留一晚應該唔成問題掛......
所以,當個男仔提議收留我嘅時候,我不加思索咁就拒絕咗。
「你諗住瞓街呀?」佢訝異咁問我。
「唔係。」我指住遠處嘅便利店,「我諗住喺嗰度等一晚。」
邊個女仔會放心去一個陌生人屋企過夜吖,我寧願喺便利店企到天光。
個男仔應該都明白呢個道理,所以佢只係挑一挑眉:「咁行啦。」
我疑惑咁望住佢。
「我同你一齊過去,我都要買啲嘢。」講完之後佢就向住便利店嘅方向走去,示意我跟上。
我用探究嘅目光打量佢嘅背影。
呢個人真係奇怪,佢啲言行舉止自然到我以為我哋係識嘅添。
思考咗幾秒之後,我企起身跟喺佢後面。
企咗起身我先發現原來呢個男仔都幾高。我165,佢高我起碼成個頭。
喺沿途街燈嘅照明下,我放肆咁打量佢呢個人。
咁嘅高度,攬嘅時候佢個下巴應該可以放喺我頭頂?
我俾自己突如其來嘅ff嚇到猛烈咁搖咗搖頭。
唔好見人哋生得唔錯就喺度亂諗嘢啦!我告誡自己。
彷彿要警告自己咁,我用力加重腳步。
個男仔疑惑咁望咗我一眼。
我扮見唔到。
踏入便利店,裏面只有一個店員阿叔。佢本身攞住部電話唔知睇緊咩,聽到聲之後佢抬頭望咗望我哋,然後將電話放返落褲袋。
我裝模作樣咁周圍望咗幾眼,尋找最適合嘅落腳點,最後行到嚟飲品櫃前。
而個男仔攞咗幾包零食同兩個杯面之後都行咗嚟飲品櫃呢度。
我望一望佢手上嘅零食同杯面,竟然咁啱都係我鍾意食嘅牌子同口味。
諗到呢度忽然間有啲肚餓添……
個男仔企喺我側邊,凝視住眼前嘅一排排酒精飲品。
「喂。」佢突然開口,「其實你留喺呢度,都一樣係要同人孤男寡女咁過成晚啫,只不過對象變咗係個阿叔咁解。」
我呆咗一呆,冇即刻回應佢。
不過佢都好似冇打算等我回應,表情淡然咁打開櫃門攞咗幾罐啤酒之後就自己行咗去俾錢。
佢俾完錢就直接行咗出門口,得返我同個阿叔喺度你眼望我眼。
我突然打咗個冷震。
然後我急急腳咁跑咗出便利店門口。
臨跑出便利店嗰陣,我聽到個店員阿叔自己喺度口噏噏:「呀呢個後生仔係有鋪癮㗎喎,成日都掉低自己條女走先嘅。」
我只當佢係誤會咗我哋嘅關係。
個男仔都行得幾快,到我追到佢嗰陣,我早已氣喘吁吁。
聽到我嘅腳步聲,佢停低咗擰轉頭望住我。
我哋沉默咁對視。
等唞順條氣之後,我終於開口問佢:「你屋企遠唔遠?」
話音剛落,我就見到佢笑咗,露出一口白牙。
我硬係感覺佢臉上係奸計得逞嘅表情。
「行幾分鐘就到㗎喇。」
然後,佢將手上嗰袋零食杯面遞俾我:「幫手攞嘢啦。 」
我下意識接過,無意中見到佢手腕上有條手繩。
我嘅動作一頓。
條手繩係黑色嘅,同我以前戴過嗰條一模一樣。
不過我嗰條手繩已經唔見咗一排,係喺我嚟呢個城市之前就已經唔見咗。
「我都有呢條手繩,不過唔見咗好耐。」我指一指佢手腕。
「係咩。」個男仔平淡咁應咗一句,然後又催促我:「快啲行啦,越夜越凍呀。」
「哦。」我回過神來,連忙跟上佢嘅腳步。
皎潔嘅月亮高高咁掛喺如墨般沉靜嘅天空中。
銀白色嘅月光灑落,我偷偷咁望咗一眼地下,只見到兩道屬於我同隔離呢個男仔嘅影子。
我突然醒起自己仲未問佢個名。
「係呢,你叫咩名?」
「張柏朗。」佢答完之後沉默咗幾秒,然後問返我:「咁你呢?」
「我叫陳家寧。」
Bottas(已硬)
2022-11-07 18:17:08
3.
同張柏朗一齊行去佢屋企嘅途中,我不斷喺內心感嘆緣份嘅奇妙。
唔知道係咪得我先會遇到咁嘅情況,有時同某個人明明只係啱啱識,但硬係會唔知點解好快就同對方熟悉起嚟,好似大家已經識咗好耐咁。
短短五分鐘路程,明明我哋唔係講咗好多嘢,但我已經幾乎完全放低咗對佢嘅戒心。
我唯一怕嘅就係一切都係佢嘅偽裝,可能佢真係嗰啲變態殺人犯都唔奇。
不過諗就咁諗,我知道我內心深處根本唔認為佢係啲咁嘅人。
我都唔知我呢種莫名其妙嘅信心係喺邊度嚟,唯有將呢一切都歸咎於佢個樣生得太人畜無害。
喺我胡思亂想嘅期間,我哋已經到咗佢屋企門口。
張柏朗開門嗰一下,屬於佢屋企嘅獨有氣息頓時襲來。
我僵咗一下,陷入恍惚。
張柏朗冇留意我嘅神情,行咗入屋開燈。
室內頓時變得光亮無比,我唔習慣咁瞇咗瞇眼。
張柏朗無意中擰轉頭,見到我仲呆咗喺門口。
「入嚟啦。」佢行過嚟,接過我手上嗰袋零食杯面,然後笑咗一笑:「又縮沙呀?」
我用力眨咗下眼,迫自己恢復清醒。
「冇呀。」我鎮定自若咁跟住佢行入去。
其實我唔係因為驚先至有咁嘅表現。
我只係突然之間覺得佢屋企陣味好熟悉。
好耐以前,我聽過一個講法,係話氣味可以喚醒人嘅記憶。好多時只要一聞到特定嘅氣味,某段情景就會好似本能反應咁喺個腦度浮現出嚟,完全唔需要經過思考。
人唔會忘記自己聞過嘅味道,我好肯定我聞過呢陣味。
但當我嘗試回想自己究竟係喺邊度聞過類似嘅味嘅時候,腦海中卻只有一片空白。
可能係我嘅表情太過凝重,張柏朗疑惑咁望住我:「咁嘅樣嘅,你唔舒服呀?」
我搖頭,冇再迫自己回憶,亦冇同佢講我嘅諗法,費事俾佢當我係怪人。
我俾佢帶領住坐咗喺客廳嘅梳化度。
「肚唔肚餓?食唔食杯面?」佢問我。
俾佢咁問一問,我先醒起自己連晚飯都未食。
「好呀。」
為咗等氣氛冇咁尷尬,張柏朗開咗一套喜劇,等我哋可以一邊食嘢一邊睇。
食完嘢,我哋覺得有啲口渴,所以又好順其自然咁開咗佢買返嚟嗰啲啤酒,仲開埋啲零食嚟餸酒。
之後嘅時間過得好快,等我回過神來嘅時候,套戲已經完咗。
電視出緊黑底白字嘅片尾名單,電影主題曲適時響起。
睇戲嗰陣我哋係熄咗燈嘅,所以室內變得特別昏暗。
唔知點解,我哋兩個不約而同咁保持沉默。
室內只剩下歡快嘅背景音樂。
冇人提出要去開燈。
呢刻隱約有股曖昧氣息正在發酵。
我低頭,覺得自己塊面有啲熱,唔知係咪因為酒精嘅作用。
我感受到張柏朗嘅視線落咗喺我身上。
我雙目低垂,唔敢同佢對視。
呢個時候,連片尾名單都播完,背景音樂中斷。
電視螢幕回復返一片漆黑,意味住呢刻室內嘅唯一光源都被捏斷。
突如其來嘅黑暗同寂靜令我忍唔住放輕呼吸,但我控制唔住自己如鼓擂般嘅心跳。
我嘅心跳聲好重,我懷疑張柏朗其實聽到,於是忍唔住抬眼偷望佢,卻對上佢深沉如潭水般嘅目光。
佢一直都冇移開過視線。
呢個諗法令我嘅心跳越趨失序。
而冇幾耐之後,唔單止係心跳,就連我嘅行為都開始脫軌。
我不由自主咁向張柏朗靠近。
我哋對視片刻,嘴唇越嚟越貼近,然後佢緩緩咁合埋眼。
唇與唇相觸,我滿足咁發出一聲輕嘆。
張柏朗隻手已經唔知喺幾時伸出,攬實咗我條腰,迫使我嘅身體貼近佢。
嘴唇被溫柔咁反復輕咬吮吸,我嘅意識混沌,就好似一團被攪亂嘅漿糊咁,只好用力咁捉緊佢,貪婪咁汲取佢身上溫暖嘅氣息。
我諗我真係醉咗。
臨合上眼之前,我同自己講。