Bottas(已硬)
2022-12-25 12:24:50
《失憶醒返發現自己有個男朋友……》
1.
醒返嗰刻,我第一眼就留意到坐喺病床邊嗰個男仔。
好靚仔!!!!
呢個係我第一個反應。
不過接住落嚟嗰幾秒我個頭就痛到仆街,我都唔記得咗去諗點解會有個靚仔出現喺我病房度。
個靚仔見我捂住個頭,面上流露出擔憂,捉咗下我嘅手。
俾佢寬闊溫暖嘅手掂到,我覺得我嘅頭痛瞬間緩解咗不少。
唉,同埋,佢皺眉嗰陣都好靚仔……
之後,佢叫咗醫生過嚟。
我問醫生我點解會喺醫院。
一開口先發現我把聲原來勁虛弱無力。
醫生話我俾車撞到,昏迷咗幾日。
我完全唔記得有件咁嘅事。
不過死啦,撞到昏迷咁嚴重?
我有啲驚,第一時間就問靚仔我有冇毀容。
佢笑咗出嚟:「冇呀冇呀,都仲係咁靚女。」
佢講完仲摸咗摸我個頭。
好危險!我內心警剔。
咁口花又借啲意同我有skinship,都唔知係咪player嚟。
再之後,我屋企人都過咗嚟。
見到佢哋,我鬆咗一口氣。
靚仔讓咗個位出嚟,我媽咪就坐咗嚟病床邊。
我老豆企喺側邊同靚仔講緊嘢,我隱約聽到佢哋講緊咩「婚禮」、「度蜜月」之類。
「媽咪,」我示意佢湊近我,「呢個靚仔究竟係邊個嚟㗎?」
其實我仲想問埋佢有冇女朋友,冇嘅話睇下可唔可以介紹我識>.<
我覺得自己問得好細聲,但話音剛落,我就見到連我老豆同個靚仔都望咗過嚟,表情奇怪。
由啱啱我問咗嗰個問題開始,個靚仔就一直默不作聲咁望實我。
搞到我覺得自己好似問咗個唔應該問嘅問題咁。
「你真係唔記得咗?」我媽咪表情焦急。
記得啲咩?
我唔明。
「佢係你男朋友喎!」
我驚訝咁睜大雙眼,唔小心同個靚仔對視咗。
我倒抽一口涼氣。
世間上竟然有咁大隻夾乸隨街跳?!