Bottas(已硬)
2022-11-21 20:02:31
4.
醒返嘅時候,已經得返我一個瞓咗喺張柏朗張床度。
琴晚飲得太多酒,我個頭有啲痛。不過我冇斷到片,呢刻我仍然清楚記得琴晩同張柏朗發生嘅一切。
我真係同一個第一次見嘅人上咗床……
宿醉嘅感覺折磨住我,我艱難咁坐起身望一望床頭個鬧鐘,原來而家已經十點幾。
明亮嘅陽光透過窗簾嘅縫隙鑽入室內。
我一邊按摩自己隱隱作痛嘅太陽穴,一邊打量張柏朗間房。
佢間房同一般男仔嘅差唔多,有少少凌亂:近房門嘅電腦檯嗰張櫈疊咗幾件應該係着過但又未洗嘅衫;而床隔離嘅書櫃入面就塞滿咗恐怖漫畫同小說。
除此之外,都冇乜大問題。起碼佢冇將着過嘅臭襪同底褲周圍擺。
諗到呢度,我窒咗一窒,然後先醒起自己仲係處於一絲不掛嘅狀態。
秋日朝早略低嘅溫度令飽受鼻敏感困擾嘅我打咗個乞痴。我探頭望向床邊,但就見唔到我琴晩喺激情之中隨意掉喺地下嘅衫。
正苦惱緊嘅時候,客廳出面傳嚟咗開門嘅聲音,然後係膠袋聲同腳步聲。
我連忙將棉被往身上一拉,想遮住自己赤裸嘅身軀。
我呆坐喺床上,唔知一陣間應該用咩態度面對張柏朗。
過咗幾分鐘,佢行咗入房。
借醉行凶嘅激情過後,我喺呢個陌生人面前變得有啲唔自在。
我有啲緊張咁望住行咗入嚟、企喺床邊嘅張柏朗。
「你啲衫未乾呀,着住呢套先啦。」佢將一套衫褲遞俾我,我有啲呆滯咁接過。
然後佢就行返出去:「換完衫出嚟食早餐。」
我望一望啱啱從佢手上接過嘅衫褲。佢又準備得幾齊全,除咗新嘅長袖衫同長褲,佢連bra同底褲都買埋,目測應該啱我size。
又幾細心喎。
但我好快就諗到佢咁清楚我size嘅原因,忍唔住面上一熱。
我尷尬咁拍一拍自己個頭,連忙將新嘅衫褲套咗上身。
張柏朗買咗件淺啡色衛衣同白色薄身棉質褲俾我,係我鍾意嘅style。
佢咁識,應該有好多經驗。我默默喺心入面標籤咗佢。
尷尷尬尬咁食完個早餐之後,我就諗住走人。
「你之後會去邊?」未等我開口,張柏朗就主動問我。
「返酒店攞返啲行李,然後就走。」
「咁快?」佢嘅表情有啲驚訝,「唔玩多幾日先走?」
「你哋呢度夜晚連巴士都冇架,有咩好玩喎。」我仲係對琴晚嘅經歷耿耿於懷。
聽到我嘅抱怨,張柏朗毫不掩飾咁笑咗一下:「小姐,你走到嚟呢一邊咁偏遠梗係冇嘢玩啦,其他地方大把嘢玩。」
我懷疑咁望住佢。
佢好似俾我咁明顯懷疑嘅表情激起咗勝負慾咁,拍晒心口話:「唔信?等哥哥帶你去玩。」
未等我回應,佢又問我:「你本身諗住喺度留幾耐?」
「兩日一夜。」
「兩日邊夠玩㗎,起碼五日啦。嗱我哋一陣出去玩,夜晚我車你返酒店check out——」未等佢講完,我就打斷咗佢:「咪住先,咁嘅話我之後嗰幾日瞓邊?」
講完我先至發現自己咁問好似已經默認咗喺呢個城市留多幾日嘅提議。
「我屋企囉。」張柏朗答到好理所當然。
我再次面露懷疑。
「你老實同我講,你係咪想同我扑多幾次嘢先叫我住喺你度。」呢個人相當有嫌疑。
佢表情一僵:「乜我似係啲咁嘅人咩。」
「似。」
「……」