［結局］【職業魔法師ＩＩ：神威破滅．獵戶座的終末勘星者】

未有全故完

咁睇嚟仲會有伏筆

第二次錯字檢查

餘韻：我們手中所握之物

機場，我好久沒來機場了。

不過印象中每次都是送機，接機，自己飛的話大概是一兩年才一次的旅行吧。

這樣因為工作而來倒是第一次。

「呀～好想去旅行呀～」晨月說，今天她沒穿死神的黑袍而是穿著日常的裙子，如果加上一個行李箱的話倒又真的像是去旅行的人……嘩那邊那個空姐好漂亮—

「阿仁？」晨月擋到我面前，「唔應人既？你唔鐘意旅行？」

「鐘意啦，復活節個時無咁忙去囉。」我心虛地望向天花板。

「天花板有Ｄ咩？」

沒被發現，太好了。

「我欣賞緊建築。」

今天我們來的原因是因為工作，要知道朗基努斯之槍之梵諦岡的珍貴文物，即使是康台長因為他的原因借來阻止神代氾濫，現在依然是要還給人家的。

「其實你唔還都得啦，佢地都無人用到。」晨月與我走向會議室。

「唔緊要喇，做唔做咩神器使無所謂。」我牽著她手說。

會議室就在離境大堂的一角，神代氾濫時世界各地的魔法師因為康台長和可柔的星海燈塔：獵戶座流星雨而來，然後就全部變成非法入境者了。還好那個賈先生出面處理，各地的魔法師機構才派出包機接人。

我看，他根本不想那群海外的魔法師在神代氾濫現場留太久。

這傢伙真的叫人看不透。

總之，今天與我們接頭的是梵諦岡的主教，他會接管聖槍送回意大利，交回梵諦岡聖座。

「無人啊？」晨月說。

「我地早左到…掛？」

不，我們沒有。

總之我們還是在會議室中坐下。

才一坐下，不出３０秒另一扇門打開，正所謂日頭不要說人，進來的人正是那個賈先生！

「係你？」我警剔地問，「我今日約左個個應該係主教黎。」

「個主教唔會黎。」賈先生坐下。

「…講清楚。」

晨月手一揮，手上多了死神鐮。

「冷靜Ｄ，大死神。」賈先生說，「我只係說服左梵諦岡當局，長借朗基努斯之槍俾我地，咁你地又阻止左神代氾濫，又得你先用到，都好合理既。」

我冷笑：「定係你話如果唔借俾你，你就唔放班主教同神職人員返意大利？」

賈先生眉毛一揚：「你做過政府工？」

「聽講過。」

「總之…」賈先生眼鏡射出使人不安的視線，「我地需要聖槍，更需要你，聖槍之神器使。」

「…點解？」

他拿出一張相片，那是個小孩子，男女看不出，大約初小這樣年紀吧，背景是海洋公園。

「世界上唔只庫瑪麗一個活神，有冇聽過活佛？會轉世個個。」賈先生說，「我地需要神器使，大死神，解咒師，一齊去阻止轉世…更重要，係阻止戰爭。」

光是照片亮在我面前，聖槍所在的錦盒已經發出「嗡——」的低鳴聲。

餘韻：我們手中所握之物

完

再黎係故後感，我會開ＰＯＳＴ做完故討論區
畢竟…我仲有故事想同大家講

第三季

支持

仲未有全故完
個心情好矛盾，想快啲睇到個結局，又唔想咁快完

幾時有第三季

未到全文完

多謝大家支持！！

又係呢一句做故後感既開頭但係真係好多謝大家

要知道我寫過既上一個「續集」既其實係末日既前傳，個個故真係俾左好多心機寫，寫出黎其實我自己都好滿意，但係反應真係麻麻 所以我對自己寫既「續集」真係無咩信心 更重要既係我個人對自己無咩信心，加埋魔法師故係一個全新既世界觀，我又更無信心。

係呀，我真係個好無信心既人

有一種理論叫鏡中自我理論，係好岩我，即係我其實係睇唔到自己，我要有一塊鏡先知道自己係型定柒，寫得好定悶，所以我一路上可能煩大家俾下正皮我啦，推下ＰＯＳＴ我啦，就係因為咁，我要有連登上既反應先知自己做得好唔好。其實一有巴打話唔明／睇幾次先明，我就會陷入超大既自我質疑中「仆街啦我係咪寫到１９９９，人地睇唔明啦仆街啦仆街啦」，不過呢個時候我就會搵常眠問佢，佢往往都會俾返Ｄ信心我

講返個故先

今次個故既核心又或者首尾呼應來自於「人會長大三次」個個講法，因為講左太多次所以唔再寫，其實係來自於我自己既反思。舉個例，我寫故就梗係覺得自己寫故係拿手，寫得好架啦，但係萬一唔係呢由小學開始寫起，目標係出書，到依加都未出到，會唔會我其實無自己想像中咁擅長寫文？！？！？比賽又無拎賽，幫人寫文人地篇野又無咩高評價

會唔會，我，只係一個凡人？！

對成長既概嘆，好多時都有呢一句：接受自己係個凡人。

黎到呢度，主角既凡人屬性我直接幫佢點爆，甚至有讀者話主角太貼地，的確係，佢係我寫過最無英雄氣概既主角，好多讀者都話其他角色比佢更似主角，文師兄唔在講啦，文師兄我男神我同你地講，仲有其他角色，例如晨月，例如我稱為第三角既可柔。但正係因為主角呢種凡人屬性，我先至寫到我想寫既野，結局已經畫公仔畫到出腸啦其實

而且最重要的，是在接受自己是個平凡人後不要妄自菲薄，以「平凡人」的身份感到緲小，感到挫敗。

要知道即使是個平凡人，也有平凡人的偉大，平凡人的精彩，平凡人的強大。

大家都知道我轉左工先有咁多時間出文，其實轉左工後我人工係低左，低成點就唔具體講，反正就係出黎食飯打死都唔講個種程度，唔好睇少一個講故佬既遊花園功力，你再問我就再帶你遊花園。所以由一個真係專業，我變成左一個可以隨便被取代既凡人。

然後我明白到凡人既挫敗，凡人既緲少，至少一開始個時係。

魔法師ＩＩ呢個故算係我寫黎鼓勵自己既，就好似上面咁樣講啦，我寫文由小學開始寫起，到依加都仲係網上寫寫寫寫，書都未出到，係咪真係代表我既文比唔上出到書既人呢，係咪代表我其實無想像中咁擅長呢？

我唔知

咁係啦嘛，我只係作者，唔係編輯又唔係神，最多只可以自己寫自己睇返，但我睇返滿意架ＷＯＲ！既然係咁，即使徒勞無功，都繼續努力落去，至少一件事無自己理想既成績都可以堅持十幾年，我唔覺得真係個個做到，容我張狂一次咁大把啦

所以，我唔知道大家人生過成點啦，你開心滿意既，恭喜你！即管自豪啦！因為活著好難，好好咁活著，活得自己滿意，活得自己開心既已經好勁，可唔可以教下我…

但係活得挫敗，覺得自己好無力，做咩都無用，徒勞無功既，我…我好想支持下你。即係活著已經好叻架啦，更加唔好覺得自己無用，緲小，十個有十個都咁諗！跟我一齊講：幻覺黎既啫！嚇我唔到既！！真架！我有個朋友，佢做保險既，真係好叻，又ＭＤＲＴ，同我同年月入幾萬，有一大班人跟佢搵食，岩岩先換左新車添！

佢有日同我講佢係垃圾

先生你使唔使睇下你自己講緊咩，你使唔使睇下咩先係真正既垃圾？！

總之，人類就係咁，唔知點解我地成日都覺得自己好弱小，好挫敗，好緲小，我覺得呀，人只可以係大自然面前話自己緲小，每個人都有自己價值，你老世有米過你，但總有Ｄ野係你做到佢做唔到，甚至誠哥咁勁啦！都一定有野係你做到而佢做唔到，三人行必有我師，我覺得唔係真係三人，就算二人都係咁話。

希望你睇完呢個故，會有少少得著，甚至乎會有少少改變，如果我寫既故能令你笑過，喊過，我就更開心啦，多謝你地支持，寫故真係我好大精神寄託，更加係我少數可以自豪既事，我地下個故再見！！

最後！！



你睇完成個魔法師ＩＩ既故想打賞下我而又唔打算月月訂patreon既，可以隨心ＰＡＹＭＥ醒俾我或者當買書（？），完全係你既意願，先多謝大家！

patreon就會有更多連載同散文
https://www.patreon.com/vantablackstory
請注意好快既公佈多謝大家一路推ＰＯＳＴ，正皮，我每次見到有新回覆通知都會開心一下架

最最後，宣傳一下常眠個愛情故（好似係）

[開放式關係中］
https://lihkg.com/thread/2809600/page/1

我係陳立正，下個故再見，拜拜～～～～～

對唔住係我戇鳩

唔係話用左聖槍會死咩
定我睇漏左啲咩

btw 好中意你個故後感

迷航：？？？？

咖啡店Arcana，理應在一小時前已經關門。

一個老者卻坐在那兒喝著紅茶，舉手投足散發著英式紳士的風韻，唯一可以挑剔的就是明明外頭沒下雨，還是半夜卻放在他身邊的一把傘。

「叮玲～」

大門打開，一個帶眼鏡的少女走進Arcana，因為店內只有老者一人，她一眼就看到。

「可柔。」老者說。

「康台長。」溫可柔說。

可柔坐到他對面，康台長遞給她一隻精緻的花紋茶杯，明明沒有倒茶，杯中卻有芳香的紅茶從杯頂溢滿。

「老人家要飲熱野，唔介意？」康台長問。

「…康台長，我真係可以…繼續留住台長既權能？」可柔低下頭說。

康台長一笑：「如果係我，我都無可能兩日內完成神代氾濫既初步善後。」

「…」可柔不發一言。

「拎去滴，記得暫時唔好用魔法住，交俾第七期喇。」

「佢地都好辛苦。」

「你黎緊會更辛苦。」

「…嗄？」

康台長拿出了一張白紙：「星海燈塔：獵戶座流星雨…我由頭解釋一次，放心，你好聰明，一下就會理解到。」

他於紙的最左，寫著「現在」；然後又在紙的最右，寫上「未來」

「如果等陣你返屋企係坐地鐵既，時間線就係咁。」他畫出一個點，然後用筆拉出一條線到未來。

「如果係的士既，時間線係咁。」又一條線。

「如果阿仁路過車你既，時間線係咁。」又一條線。

「如果千雪黎車你既，時間線係咁。」又一條線。

「如果夏富…」

可柔怒瞪一眼。

「總之就係咁先，我地唔同既選擇就會產生唔同既未來，唔同既ＩＦ。」



可柔恐懼地說：「等陣，星海燈塔……你話＂迷航者＂就係來呢Ｄ　ＩＦ既平行宇宙？」

更可怕的是康台長搖頭：「星海燈塔通向既，唔係咁既程度。」

然後——

康台長把整張紙反了過來，在紙的背面寫上了六個字。

「格拉斯頓王國」

一個人影從漆黑的店面後步出，那是一個銀髮的女生，身上穿著黑紗和紫布交織類似中世紀的歐洲長袍。

「佢叫凡塔莉雅，只係第一個迷航者。」康台長用筆在紙上刺出一個孔，然後在上面寫著「星海燈塔：獵戶座流星雨。」

並不是ＩＦ世界連結在一起。

而是紙的正面和背面，香港和「格拉斯頓王國」透過了那個孔連結在一起。

第七期，將會回歸

全文完

作者：陳立正

～感謝閱讀～

聽日新ＰＯＳＴ

復活左
#791 變返做呀仁視覺個下

仆街咁夜，頂唔住了
聽日覆你地留言＋新ＰＯＳＴ
煩我都要講多次啦！多謝大家！！

睡前講多句
明我點解正副連載要同一日完未…
我今日打左２萬＋以上
早抖…（跌落床

屌你 玩到咁大....

辛苦啦
好好休息下先

PS 身體健康

期待第三季同新故
加油呀！

咁啫係邊個幫施子雄同宋校長？係咪我漏咗