《我的MK妹同桌》(3)【完結篇】

781 回覆
97 Like 8 Dislike
2022-09-04 03:29:25
有啲感動,因為知佢攰,疲倦嘅姿態好耐隱藏,最直觀嘅感受嚟。

「唔洗都得啦,我自己一個嚟,都可以自己一個走,無乜問題姐。」

「我ok㗎。」我有啲唔知點好,呀詩又咁堅持,但佢又咁攰,我都唔想佢咁攰仲要話嚟送我。

「我驚你攰咋,你睇下你瞓得咁少,個樣攰到⋯⋯」我講咗心底話。

「但我想送你。」呀詩一句殺埋嚟,我直接無聲出,俾佢收咗我皮。

有呢個理由就已經足夠,而且包含咗好多含意⋯⋯

食完個早餐,執埋剩底啲嘢,呀詩出門口前又要化妝換衫,佢打扮得都幾靚,睇得出佢今日係有用心打扮的。

呀詩MK妹還MK妹,只要佢用心打扮,係有好大分別的。

真係去到差唔多要出門口啦,拖住啲喼準備出門口,每次呢啲moment呢,拖喼走,就覺得特別傷感。

忍唔住會回頭再望多兩眼,呢個旅程,就咁樣完結。但無時間俾我係度傷春悲秋,好快就要閂門出發,只有停留係心入面幾秒嘅時間,足以令我記好耐。

我哋去機場嘅路上,呀詩明顯地多咗嘢講,但係講嘅嘢都係無乜內容可言。

我都唔係幾知啊,好似又隱約估到佢嘅用意,又唔係咁肯定喎,成撚日搞到進退兩難,唔知點好。

係搭車期間,我竟然開始感覺到焦慮。

因為我想像唔到,搭咗班機,返到香港嘅時候,我同呀詩就唔再係情侶關係。
2022-09-08 23:18:31
越睇越sad
2022-09-08 23:41:54
無喇無喇
2022-09-09 00:14:13
2022-09-09 03:24:27
2022-09-14 08:56:59
晏啲更新
最近好無心機
明知自己好多嘢要完成
但就係提不起勁
久唔久就會咁
都唔知點解
2022-09-14 12:42:56
就係因為太多嘢要完成,所以咪無focus,就自然提唔起勁
2022-09-14 14:01:02
喺我嚟英國之前,我估唔到嘅係,會係佢想選擇離開。

我明白佢嘅苦衷,我知佢唔係唔愛,只係唔想大家咁樣辛苦落去。

但我唔想,佢覺得我辛苦,但咁樣分手,我仲辛苦。行下行下,我哋差唔多跨過咗中學同大學階段,計計下都成5-6年嘅感情。

我接受唔到我哋兩個係咁樣嘅結局。

同埋我接受唔到keep得咁好嘅我哋,突然間因為咁樣而搞成咁。其實我哋一路以嚟嘅狀態都好好,聽講過唔少其他人嘅愛情故事,對比之下,我哋嘅問題都真係唔多。

間唔中嘅甜蜜,適當地調情,就連性生活,都協調到,無因為呢啲問題而產生分歧,真係好難再搵到個樣樣嘢都咁夾,然後又咁愛嘅人。

克服咗好多樣嘢,亦唔係因為第三者嘅出現,就算long d都好,我都清楚無呢樣嘢出現。

當所有嘢都好難得,你亦都有好好珍惜嘅時候,然後要你放手。

點放?我有咩可能眼白白睇住佢自己一個人捱呢?

我哋竟然會卡係度。

呀詩最後同我講:「你唔會真係明白到我感受,就好像當初我都係對憂鬱症有呢啲睇法一樣,我亦都清楚咁樣落去,只會兩個人更加辛苦。」

係我返嚟香港之前,呀詩選擇係機場入面同我分手。

不過係之前,我哋都傾好曬,溝通過,大家有共識,表面嘅共識,但表情都係控制唔到咁展露出我哋嘅內心。

呀詩曾經係網上睇到呢個句子,然後同我分享:

『點解當初兩個人係埋一齊嘅時候,需要兩個人同意,但分手,只要一個人選擇離開就可以?』

到依家我都唔知點解。

但我哋做到兩個人都同意。

我諗我哋都唔想咩都唔講清楚,就咁不辭而別吧?

分手係痛苦,但不辭而別咁分手,仲痛苦⋯⋯

咩都唔清楚,得返自己一個人係度左思右想,點解佢會就咁走咗去,嗰種煎熬係不停咁樣折磨緊你。

與其係咁,點解唔講清講楚,比一個機會大家都對呢段關係釋懷,可以唔洗經歷呢種折磨,咁樣係對真正愛過嘅人的一種尊重。

個過程其實唔係要你說服對方分手,當然如果可以兩個人同意就最好啦,但係至少要將你自己呢一個決定話俾對方知,咩原因,就算對方係被逼接受,都好過係一個咩都唔知嘅漩渦入面。

係機場度,呀詩就好似一個普通朋友咁樣送我機,陪我check in,陪我去到離境大堂。

佢捉住我個衣角,我轉身面對住佢,佢粒聲唔出,淨係低住頭⋯⋯

當我同呀詩面對面嗰陣,佢由捉住我嘅衣角,變咗捉住我嘅手指尾。

氣氛十分凝重⋯⋯就算大家唔出聲,都feel到就嚟想喊咁⋯⋯
2022-09-14 14:25:58
可能阿強覺得陪伴係分擔壓力,但其實回應唔到呢份心意亦都係一份壓力,有個清楚嘅結局都總好過不辭而別,起碼唔會有種未完成嘅心結。
2022-09-14 18:14:41
今晚再繼續更新
2022-09-14 18:55:05
2022-09-15 11:43:32
首先係呀詩忍唔住,哭泣起上嚟。

到最後都係忍唔住⋯⋯又係以為自己做得到,每一次都想像到自己好堅強,卻不堪一擊。

呀詩好自然咁向前行咗一步,企係我心口前面,無進一步嘅動作。

我亦好順勢咁攬住佢,而呀詩呢下舉動亦都係同我講,我哋已經無嘢⋯⋯

呢一個擁抱係出自朋友,出自多年感情嘅擁抱,唔係情侶間嘅愛意。

呢樣嘢,我係分辨到的。

呀詩之所以會喊,都係因為複雜嘅情緒交雜起上嚟吧?我自己啲情緒都上到心口啦,但我的確喊唔出,我感覺到好沈重、好沈重嘅傷感。

我心口俾呀詩喊到濕曬,我當下其實無諗咁多嘢,個腦空白一片,但係內心嘅感受好大,多到處理唔到。

該要狠心嘅時候,唔好拖。

「我⋯⋯」我一開聲,就已經聲沙到卡係喉嚨。

「咳⋯我差唔多夠鐘入去啦。」我溫柔咁同呀詩講。

呀詩抹一抺啲眼淚,「嗯」咗一聲。

「你⋯⋯自己⋯小心啲啦。」呀詩都仲係有啲嗚咽。

欲言又止,然後「嗯」咗一聲。

「你先係啊,自己係英國小心啲啊,如果你真係捱唔住嘅話,就打俾我啦,我都好擔心你自己一個係度搞唔搞得掂,遇到衰人記得識得反抗同埋報警啊。」我語重心長咁同呀詩講。

好矛盾㗎其實,又擔心佢一個人搞唔掂,但若然佢搵到個照顧到佢嘅⋯⋯

我又唔想,如果俾我知道嘅話,我係會介懷。

「我會㗎啦。」呀詩乖巧地點點頭。

「我驚啲鬼佬見你青靚白淨,就食鬼咗你啊,你知外國好多啲戀童廦㗎啦。」

「屌你啦,我咁撚成熟,邊似細路女。」講就咁講,佢個樣根本就童顏。

「係啦係啦。」

「如果⋯⋯如果你係度搵到個人照顧你,我⋯我都會比較放心嘅。」我仲要口不對心咁爆出嚟。
2022-09-15 11:46:00
so sad
2022-09-15 13:28:29
2022-09-16 00:43:19
so sad
2022-09-16 00:43:53
2022-09-16 10:47:12
2022-09-18 15:11:07
今晚再更新
2022-09-18 19:14:36
2022-09-19 03:12:49
Push
2022-09-20 01:51:44
「我自己一個都ok㗎,對我有返啲信心啦,話曬我都係度生活咗咁耐囉。」呀詩同我一樣都係口不對心。

原來係會咁明顯㗎?

係離別嘅時候,反而更加扭擰。

不過我開心,因為口不對心而試探到呀詩嘅心意,我偷偷地樂著。

「咁⋯⋯我都真係夠鐘入去啦。」我都感覺到係時候了。

「好,你返到去send個msg同我講聲啊。」婉如朋友般嘅祝福,有啲唔太習慣。

「知啦。」係最後,我伸出軟柔無力嘅手,摸摸呀詩個頭,揉搓著佢嘅頭髮。

呢一下真係唔好亂嚟,會更加唔捨得。

我就自虐般係要搞到自己sad住咁離開。

然後我就轉身入閘,入到去後,我擰轉頭,再望多次呀詩⋯⋯

佢一路企係頭先個位,伸出個小手,擺係胸前同我揮手。

去到呢度,就無咗佢嘅畫面。

上機坐低,飛機緩緩駛離停機坪,去跑道,慢慢加速,然後飛快,最後起飛。

無咗呀詩之後嘅moment,所有嘢都過得好快,唔經唔覺我就已經盤旋係上空。

英國返嚟香港嘅時間真係好長,其他人一係睇戲一係瞓教。

我既無睇戲嘅心情,亦無瞓教嘅意欲。

鬱悶嘅心情直到上機,先至出現,而且久久不能散去。

忽然間,我想睇返係我手機入面,我同呀詩嘅相。
2022-09-20 01:53:08
平時都唔會點打開嚟睇,成日慢慢拎嚟J咩?反而依家一打開⋯⋯

仆街⋯⋯原來有咁多㗎?

仲有少部分我同佢中學嘅相,嗰陣中四啱啱開學無耐,佢嚟我班房度搵我,然後同我影嘅相嚟。

張相嘅背景係班房嚟,後面有啲on9壁報⋯⋯勁撚MK。

我同呀詩青澀嘅臉容,好真摯,亦都覺得好後生。

我慢慢碌啲相,有下啲對話cap圖,中間穿插咗啲無聊嘅日常,我同佢嘅回憶就係曬度。

以前舊手機啲相back up咗過嚟,同佢啲點滴搞到我啲情緒一下子爆曬出嚟。

仲有啲同呀詩嘅無聊片,整蠱片,好笑得嚟既溫馨又甜蜜;同呀詩大蕃薯子晴佢哋去台灣嘅相,係我哋嘅中學grad trip;經歷過大學拍拖時嘅相,原來我哋都慢慢改變緊,對比返中學時期嘅我哋,我哋都成熟不少,係個外型上面。

太多嘢啦,終於都忍唔住。

我唔捨得呢啲回憶⋯⋯感受原來都可以咁強烈,我係覺得好可惜,但又好無奈。

我唔知呢個決定係啱定錯,但我只可以選擇行落去。

我盡力細聲啲,我驚嘈住隔離位瞓教。

一張張相咁睇,好想del,卻狠唔落心,唔捨得。

真係喊到攰就瞓陣,瞓緊都係呀詩嘅畫面嚟,唔誇張。

直到俾人叫起身食嘢,都有幾餐飛機餐可以食,我醒咗之後個人都呆呆濟濟咁。

然後又諗返起,再望下啲相,感受雖然無頭先咁爆,但嗰種傷感,久久都散唔走。
2022-09-20 02:33:14
好寫實
2022-09-20 05:43:28
睇到想喊
2022-09-20 09:26:13
Lm
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞