葉開葉開
2020-10-09 22:03:00
六
一路同秋兒姐姐返屋企既時候,我一路有小小神不守舍…
如果秋兒姐姐真係有男朋友,會唔會真係唔理我呢?
唔…但如果有姐夫…秋兒姐姐一定會分返啲時間比佢架喎…
「熙熙…」
屌,我唔想孤零零一個呀!
「熙熙?」
不過到時可能真係要搵返班撚樣阿叔日日踢波喇!
「熙熙!」
「呃,係!」我突然清醒返!
「熙熙,響度諗緊乜野?」秋兒姐姐問:「好少見你咁神不守舍架喎。」
「下?呃…冇野呀。」最衰班撚樣阿叔,屌那星,搞到我好似戇鳩鳩咁。
「呵呵。」秋兒姐姐突然笑左一下。
「?」黑人問號。
「估唔到你都緊張喎!」秋兒姐姐奸笑住咁同我講。
我唔知比乜野反應。
「放鬆啲喇!我當年中一開學既時候都好緊張,但係最後都識到好多好朋友。」秋兒姐姐同我講。
「呃…嗯。」
…
秋兒姐姐搞錯左喇。
其實我又真係唔緊張,更加唔在乎識唔識撚到朋友。
反正除左班撚樣大叔之外,我根本就冇朋友。
我既世界…我既心靈支柱…
得秋兒姐姐一個。
如果佢有男朋友既話,我自己又會點生活呢?呢一日始終有一日會來臨!
呀,係喎,要問秋兒姐姐我仲可唔可以繼續同班撚樣踢波。
「係呢,我升左上中學之後仲可唔可以放學就落去球場同班叔叔踢波呀?」我問。
我響秋兒姐姐面前係唔撚講粗口既。
秋兒姐姐突然望實我。
「其實…熙熙,你上到中學之後,我唔諗住再管你管得咁多。」
下?
我都冇嫌過妳管我管得多…
同埋,點解妳要突然之間唔理我…
唔通…
班阿叔講既野…原來已經實現左!?
秋兒姐姐見到我既表情,好似睇穿左我咁,笑道:「放心喇傻仔。我唔係唔理你呀,只不過,你升左上中學之後,係時候學識自己管理自己架喇,你唔可以成世人都依靠人地架。上到中學,係人生既另一個里程碑,踏入人生另一個階段,要開始學識點做大人架喇!」
再拍下我個頭(而家秋兒姐姐仲係高過我),再講道:「而且,我都要開始準備應付會考喇,可能真係冇之前咁多時間去陪你。」然後又係好溫柔咁笑一笑:「不過,我都係會晚晚都煮埋你飯,記得返黎食飯呀。」
嗯…我都明白既。
我老豆返到屋企可能都會講同一番說話,要我上中學之後要學識獨立之類。
不過因為啱啱聽完班撚樣鳩up,搞到我以為秋兒姐姐無啦啦變左個男朋友出黎而唔理我咋。
不過諗深一層都冇可能喇,秋兒姐姐邊會無端端變個男朋友出黎?
比班撚樣搞到我亂諗野添。
況且我又唔係見唔到佢,所以我好快又打起精神,笑道:「嗯!我會晚晚準時返黎食飯!」
準時返黎見妳…
「唔好咁快笑得咁開心住!我話比你自己分配時間,唔代表我唔會睇住你架!」秋兒姐姐又拍下我個頭。
哈哈,都話架喇!
秋兒姐姐點會唔理我呀!
另外,其實我唔鍾意好似小朋友咁比人拍個頭,班阿叔拍鳩我個頭既時候我會屌柒佢地。
不過,秋兒姐姐係例外既。
「行喇,快啲返去煮飯,今晚返學前最後一晚既晚餐,我諗住煮得豐富啲!」秋兒姐姐加快腳步。
「好!」我跟埋上去。
*
食完晚餐之後,我返到屋企,好早就上床休息。
聽朝秋兒姐姐話聽日開學所以同我一齊返學,真係好耐都冇試過!
好似返到小學既時候咁。
諗下諗下…我沉沉睡去…
*
「起身喇熙熙!」一雙手係好溫柔咁拍拍我個頭。
我打開雙眼,睡眼忪忪咁望住眼前既人。
秋兒姐姐。
佢已經換好晒校服。
由於秋兒姐姐會幫手照顧我,所以由我小四開始佢已經有我屋企鎖匙。
「早晨…」我好似未訓醒咁同秋兒姐姐打招呼。
「快啲起身啦,唔好第一日返學就遲到呀!」秋兒姐姐笑道,再一手拉我起床。
之後佢再指一指餐枱:「快啲食早餐喇。」
我望一望,係煎雙蛋同腸仔火腿,仲有多一件多士添!
我即刻彈過去食!
秋兒姐姐煮既早餐好食過茶餐廳呀!不過佢唔係成日煮架咋,所以次次有得食我都會仆到咁仆過去食!
「正!」我狼吞虎咽。
「急到你吖。」秋兒姐姐坐響我隔離靜靜地咁望住我食。
「好味吖嘛!」我口齒不清咁回答。
秋兒姐姐繼續微笑咁望住我。
…
好似個老母望住個仔咁…
我食埋早餐,以神速換埋校服就同秋兒姐姐一齊出門口。
而我人生既新一頁,都正式揭開了。
(待續)
葉開葉開
2020-10-10 22:11:29
七
時隔三年,我再次同秋兒姐姐一齊返學。
一路上,間中都會撞到一啲秋兒姐姐既朋友,然後秋兒姐姐都會同佢地打聲招呼。
似乎佢人緣都好唔錯。
之後其實一路都冇乜特別事發生,直至去到學校門口…
我抬一抬頭望一望…
呢度就係我以後至少有五年會渡過既地方…
就響我諗得出神既時候…
「秋秋~~秋秋~~」有把好撚姣既女聲由後面傳黎。
屌,把聲扮撚晒可愛咁。
我忍唔住擰轉面望下呢把聲既主人。
一個紥住馬尾、身材好好既女仔,正向住我地急步行緊過黎。
雖然佢個樣係幾可愛,而且雙峰好似要逼爆件校服咁係幾吸引,但係可唔可以用把扮撚晒cute既聲音講野,好鳩難頂。
「張潔婷早晨。」秋兒姐姐向佢微微一笑打招呼。
「咦~死人林秋兒~一見面就要響我全朵~」張潔婷對住秋兒姐姐用撒嬌既語氣講。
屌,可唔可以停止…好鳩難頂…
呢個時候張潔婷既目光突然落左響我身上,上下咁打量下我。
唔知係咪我錯覺,我覺得佢望住我既眼神好撚淫賤…
「妳唔係話妳係獨生女黎咩~點解突然多左個咁可愛既細佬呀?」佢突然用雙手捽我塊面!
屌妳,好撚唔舒服呀!
忍撚住…
秋兒姐姐響我隔離…唔可以屌柒佢架…
「妳細佬真係好可愛呀~」佢一路捽一路講,仲要哄到好埋…
如果唔係秋兒姐姐響我隔離,我應該屌柒左佢老母個臭閪好撚耐!
仲有,點會用「可愛」黎形容我,妳真係當我係小朋友咩!
「唔好搞佢啦。」秋兒姐姐輕輕拉一拉張潔婷雙手:「唔好等佢第一日返學就嚇親佢。」
張潔婷停左手,再定睛咁望一望我:「你好cute呀,你叫乜野名?」
屌妳,妳真係當我小朋友喎!
「佢叫余正熙,係我既鄰居。」見我黑面唔出聲,秋兒姐姐就互相介紹:「呢位係Kitty姐姐,係我既好姐妹。」
「哎呀~余正熙~我叫你熙熙得唔得呀?」Kitty姐姐好姣咁講:「原來你住響秋秋隔離,咁我同你之後就可以有~排~玩~嘻嘻!」
秋兒姐姐面上好似閃過一絲不悅,不過好快就回復正常,話:「妳係都同佢玩其他野好啦,千其唔好教壞佢。」
「知啦~知啦~」Kitty伸一伸脷:「我講下笑咋嘛,況且佢仲咁細個!點玩呀~」再望一望我。
佢地既對話其實好似另有所指,但啱啱升上中一既我參透唔到其中既意思。
「我行先啦,陣間見啦~秋秋~啜!」仲要攬住秋兒姐姐錫左一吙,好撚難頂。
「你都係呀,熙熙~」Kitty姐姐都向我道別:「你怕怕醜醜唔出聲個樣好得意好可愛!」
屌鳩妳,同妳好撚熟咩!
怕醜怕醜…
我係嬲到唔識出聲咋!
「唔好介意佢。」秋兒姐姐微微一笑:「佢個人係咁外向,不過除左呢樣之外,佢係一個好好既朋友。」
「嗯。」我點一點頭:「我唔鍾意佢。」我好直接咁講。
「哦?」秋兒姐姐有小小驚奇,然後好似有啲滿意咁笑左一笑:「呢間學校既男仔好少會有人唔鍾意佢。不過…咁都好既。」然後佢好似有小小放下心頭大石咁既樣。
「佢好似當我小朋友咁。」我知我個樣比起我真實年齡細個,但我已經讀緊中學,可唔可以咪鳩用呢種語氣同我傾計。
「哈哈,佢唔知你唔鍾意人地當你係小朋友吖嘛。」秋兒姐姐笑住咁講。
笑起上黎既秋兒姐姐好靚。
好靚…
「點解妳話好少有男同學唔鍾意佢既?」我將話題轉一轉,等秋兒姐姐唔好留意到我望實佢眼都唔斬。
「咁講啦…佢咁靚,又好鍾意同男仔做朋友。」秋兒姐姐好似講啲唔講啲咁回答我。
「咁…點解啲男仔咁鍾意同佢做朋友?」我就一定唔會同佢做朋友!
屌佢老味臭化閪,當我小朋友撚狗咁撚!
仲有…靚?邊撚度靚?
秋兒姐姐既十份一都冇呀!
「嗯…點講呢…」秋兒姐姐突然有小小面紅:「總之,啲男同學就好鍾意同佢玩啦。」
「玩?」黑人問號:「玩乜野?」
「嗯…都係冇野喇。」我地啱啱上到二樓,秋兒姐姐好似鬆一口氣咁:「你到喇。」
我望一望走廊,要暫時同秋兒姐姐分別喇。
「今日你放學自己走先喇,我有會要開。」秋兒姐姐諗左一諗,又微笑咁問:「你今晚想食乜野?」
「妳煮乜我都食架喇!」可能我自己都冇留意到,我呢一刻笑得好開朗。
「嗯,咁…返屋企見。」秋兒姐姐甜笑住點頭向我道別。
「拜拜。」
今日只係返半晝學,但秋兒姐姐唔知要去開啲乜鳩野會…
睇黎,我放學之後都係去踢波架啦。
「熙熙。」秋兒姐姐突然叫我。
我回一回頭。
「唔好成日黑口黑面啦,咁樣一陣先可以識到新朋友架。」秋兒姐姐微笑咁善意提醒我:「記得對新同學友善啲呀。」
「知啦。」我揮揮手,再轉身離去。
一路行去課室,我一路諗野。
諗下諗下,又覺得個Kitty姐姐好可惡又好奇怪…
再諗下諗下…
已經去到課室。
1B班。
未來一年我既班房。
(待續)