葉開葉開
2020-10-27 19:20:15
二十二
今日放學第一件事當然又係著草!
放啦啦隊練習飛機已經成為我余正熙校園生活既日常!
不過今日有啲唔同既係,我唔係即刻衝返屋企換衫去球場踢波,而係飛奔去街市!
去街市做乜春?
買餸呀屌你!
終於到我表演廚藝既時候!
細個果陣時成撚日偷睇李師奶煮飯既天才小廚神余正熙唔係浪得虛名既!
就等我煮餐滿漢全席,等秋兒姐姐食完之後覺得好味道到我做過乜野衰野都唔記得晒喇!
嘿嘿嘿!
不過…我望住銀包入面張廿蚊紙…
唔好話全海鮮宴…魚都唔買到一條…
屌!
唔一定食海鮮既啫,食菜一樣得!
屋企好似仲有盒唔知過左期未既蛋!
識煮,屎都可以煮得好好食!
就等我用呢廿蚊,煮出最好食既晚餐!
*
最後我用8蚊買左一斤菜心,再用剩低既12蚊買晒瘦肉。
我而家企撚左響屋企既廚房度,開住廚房門仲有大門,淨係鎖左度大閘。
咁係因為雖然秋兒姐姐有我屋企鎖匙,但調返轉黎講我係冇佢屋企鎖匙既,所以我係冇可能鼠入去佢屋企再煮埋餐飯set好晒枱比個驚喜佢。
最多係等佢返歸果陣叫佢過黎一齊食。
今次一定要鼓起勇氣,唔可以再縮!
我一邊響雪櫃拎啲過期臭蛋出黎(形容詞啫,應該未過期又未變壞既!)同埋響米缸度拎啲米出黎,一邊思考點樣運用手頭上既材料…
諗下諗下…
都冇乜概念添…以前李師奶煮啲咩比我食架?
瘦肉…用黎整肉餅?
菜心…白焯?
蛋…蒸蛋?
但個問題係…點整好?
當然我其實可以問下隔離鄰舍其他師奶,佢地係好人,但個個都係長舌婦,我唔想比佢地問我做乜無啦啦要自己煮…
就算求鳩其答完佢地之後,佢地一個唔滿意繼續追問真係沒完沒了…
諗下諗下…
咦,個天開始黑既?
屌!我諗左幾耐?
秋兒姐姐就返黎架喇!
我急起上黎將啲肉亂鳩咁斬碎佢堆響隻碟上面,之後亂咁打左幾隻蛋搞混佢再放入另一隻碟度。
之後,我開始響隻鑊上面加水,再將啲菜心放晒入去隻鑊入面,然後將啱啱果兩碟餸放入去蒸。
兩個人食有三碟餸,有菜有肉有蛋,真係諗起都好豐富!
哎呀,煲飯煲飯!
掛住諗都整餸,爭啲唔記得煮飯!
呢個時候,我聽到大門口傳黎開閘聲!
冇時間喇!
今次真係唔可以再猶豫,我即刻鳩衝去大門鐵閘位,未行到過去已經見到秋兒姐姐開左大閘,打開緊度門。
「秋兒姐姐!」我邊跑過去邊大嗌!
分分鐘成個走廊都聽到我鳩叫。
但我唔理得咁多!
機會唔係成日有,一陣Kitty姐姐又唔撚知響邊到走出黎扯走左秋兒姐姐就大檸鑊!
秋兒姐姐有啲吃驚咁回過頭黎望住我。
「我…我今晚煮左飯呀!」我講。
秋兒姐姐繼續碌大雙眼咁望實我。
「我…特登為妳煮架!」見秋兒姐姐冇乜反應,我急道。
秋兒姐姐面上開始露出笑意。
「妳…一陣過黎食?」我不知廉恥咁約秋兒姐姐黎我屋企。
秋兒姐姐笑住點一點頭。
Yeah!得左!
譚梓淇好野!
妳既idea似乎work喎!
「食得我叫妳!」我幾日冇試過咁開心。
「唔駛。」秋兒姐姐微笑:「我而家過黎你度等,順便睇下有冇乜野可以幫下手?」
「唔駛架喇。」我笑得好燦爛:「一係妳過黎坐響度等食?」
「…」秋兒姐姐諗左一諗:「好喇。」
之後仲著住雪白連身校服裙既秋兒姐姐就走左入黎。
望住秋兒姐姐,果種聖光又好似響佢背後散發出黎咁…
突然間…
我覺得…
佢真係好靚。
我拍一拍自己塊面:「妳等一陣,好快有得食!」
「嗯!」
*
放響我面前餐枱上面既,係三碟…嗯…我諗算係幾有特色既餸。
一碟灼到淋晒既菜心。
一碟蒸過龍既皺皮老蛋。
一碟蒸到過晒火既肉餅。
至於最成功既,當然係放響我同秋兒姐姐面前既…
…
…
…
兩杯水。
…
至於我地果兩碗飯?
我落得太多水,又係變左好淋。
…
而且我第一次煮飯,啲份量預得勁差,煮多左好多…
聽日我地兩個都帶飯都夠晒。
…
我望住呢幾碟咁有特色既飯同餸,呆左響度,好似有小小眼濕濕。
我仲自稱係李師奶既高徒。
屌,我而家好似隱約見到李師奶既靈魂響地面升起,走過黎屌柒我拆鳩佢招牌。
但係秋兒姐姐冇流露出失望既表情。
不過…
佢好似忍緊笑咁。
我望住面前既幾碟飯餸,塊面谷到有小小紅。
果種唔忿氣既樣,加埋我副童顏,都幾小學雞味濃。
秋兒姐姐好似忍住笑咁開始夾餸食飯,食左一啖之後,笑意盈盈咁望住我:「熙熙,唔好咁既樣喇,好好食呀。」
「吓?」
「你又試下?」秋兒姐姐笑道。
…
…
…
唔知點解我覺得秋兒姐姐想整古我咁款…
但…
就算秋兒姐姐唔叫我食我都會食既。
老豆教過我,做人最緊要有衣食吖嘛!
唔可以浪費食物架!
於是…我都手震震咁拎起對筷子準備開始開餐。
(待續)