葉開葉開
2020-11-02 19:23:05
二十八
「後日就係比賽,今日係比賽之前最後一次練波,大家要比心機。」黑熊進入左隊長mode:「而且今次既對手係綠社,我地唔可以輸!」
哦,原來咁快就要比賽…真係唔撚知喎。
不過黑熊講得啱,比賽就係要贏!
「但係…」John仔有小小膽怯咁望住黑熊,再講:「佢地係上年足球冠軍,而我地只係包尾…」
WTF乜撚野話?
黃社包尾咁撚廢架咩?
…
轟!
黑熊就好似自己真係破○之王入面個黑熊咁一拳轟左落John仔個頭上面。
John仔抱住個頭面容扭曲:「講事實都唔得…」
「事實係,足球比賽呢家野,係一場一場黎計既,你唔好滅自己威風!」黑熊再指一指我:「況且我地今年有余正熙既加入,情況唔同晒架喇!」
除左柒頭文之外個個都望住我面露驚訝既表情。
柒頭文應該因為同過我踢波,所以就冇乜點吃驚。
「嘿,就睇下你乜野料。」MK曦一面不屑咁道。
屌你啦,一陣如果有分隊賽我扭撚死你條仆街。
*
不過扭撚死MK曦呢件事冇發生到。
因為…分組賽既時候,黑熊將我同佢一齊分左響正選隊。
另外,我對我既隊友們有乜野評價?
廢。
真係好撚廢。
咁撚廢既,真係唔怪之得黃社上年社際足球比賽包尾。
作為前鋒,如果中場既傳送好啲,係可以創造到好撚多機會。
最近同阿必去踢波,佢呢方面既進步就好顯著。
但柒頭文同另一個叫倫哥既中場,比埋啲波冇黎尺寸,完全唔啱位要我追到仆街。
再唔係就面對面怒ban個波比我。
喂屌你咩,好彩你傳波果個對象係我,就算咁鳩大力都可以控得定個波啫,第二個應該反應唔切,又或者將個波唔知反彈左去邊。
我地正選既後防勁唔勁我完全睇唔出,因為後備隊好似連半場都未試過過…
但觀乎佢地既first touch,場上既判斷等,我覺得唔會勁得去邊。
黑熊守龍既技術我之前響街場就見識過喇,基本上都唔勁得去邊架喇,但水準已經比其他隊友高好多。
後備隊既後防更加係廢中之廢,我拎住個行路咁慢咁扭波都可以直行直過…求其射一腳埋去,只要射中龍門框基本上入鳩梗。(當然呢度講緊既只限我,其他正選隊既隊友都係唔係次次扭得過同射得入既。)
老實講,長久地同呢班垃圾踢波,我好懷疑自己會慢慢keep住退步…
*
「哈哈哈!余同學,你比我想像之中更加勁,後日對綠社入波既責任靠晒你!」黑熊再次豪邁咁大笑。
「係囉係囉,估唔到同我地咁夾!」倫哥好似好興奮。
屌,夾你老味,諗返起啱啱你啲近距離衝力傳球就真係想打柒你。
「哦。」聽到隊友們既讚賞,我繼續hea應。
「隊長…」John仔把聲好細好淆底咁,再指一指觀眾席果面:「綠社既隊長黎左睇我地軍情…」
「屌,唔駛理佢!」黑熊連粗都爆埋。
「但係…咁佢地咪知我地有熙仔囉…」John仔仲係好淆咁講:「一陣佢地針對性咁搵人mark實佢咁點算好?」
屌,我好似冇比過你叫我做熙仔…
btw,乜你覺得搵人就一定mark到我架喇咩?
轟!
John仔頭頂又中一鎚。
「嗚…」John仔又捧住個頭。
黑熊威風凜凜咁講:「我有個必勝戰術都未講出黎,今日連練都冇練過,佢地知條鐵咩!嘿嘿嘿,到時果日佢地就知死。」
練都唔駛練就必勝既戰術?
我都好撚想知道係乜柒野戰術咁撚巴閉。
「好,散隊!」黑熊大叫:「千其唔好比社既人知道我地有余同學呢個秘密武器!」
…
人地綠社既隊長唔係睇晒喇咩?
戇鳩,咁不如你就直接叫我比賽開波果陣先黎啦…
不過我冇出聲,因為我唔想好似John仔咁頭上無端端多鳩左幾個腫瘤…
*
經過左兩個星期,有啲唔係好慣冇左淇淇同阿必一齊放學添。
雖然…只係短短五分鐘既路程,而且我又唔多出聲,但係…
…
嗯…
果陣又真係幾開心既…
換完衫,我自己一個走出更衣室,去到巴士站等巴士。
等下等下,有另一個人影慢慢咁行緊過黎。
係John仔。
佢企左響我隔離:「熙仔…」佢有啲怕醜咁講:「你好。」
「嗯。」我又係好hea咁應佢。
本來我想屌柒佢,叫佢咪撚再叫我熙仔,不過諗起秋兒姐姐叫我對新朋友要友善啲,呢句我最後都冇屌到出黎。
而且話晒佢都係高我兩form既師兄。
沉默。
好快就有巴士到站。
我拿拿淋上左去先,免得見住John仔又冇野講咁尷尬。
嘟。
咦?John仔又跟住上左黎既?
我上左巴士上層求其搵左個位坐。
佢坐左響我隔離。
…
「…」我無言。
同你好熟?
「係呢…你踢波點解咁勁既?」John仔打開話題。
戇鳩,你想我點答你?
「基本野啫。」我真心咁回答。
對於我黎講,真係基本野黎啫。
「希望…靠你黃社足球隊真係可以拎到好成績喇。」John仔嘆左口氣。
(待續)