滄海肥豬
2020-08-11 19:44:07
5票A
處理完從提爾到入手嘅昆蟲後閒來無事,攤喺沙發上面發吽竇,本來如同白紙般空白嘅腦海忽然閃過布倫嘅面孔,久久揮之不去。
憶起昨日之春......
以布倫老師一向俾人冰山惡美人嘅形象,琴日你喺眾人面前表白後,佢竟然對你手下留情,冇當頭旁喝,直接送你入醫護室,你不禁想像......
唔通你哋真係有機會?
思緒萬千,身體好似俾螞蟻來回爬嚟爬去般,奇癢無比。唔可以再等落去了!跳起身換衫就立即衝出房門,徑直跑向教員室,為嘅就係一個答案。
嚟到教員室門口通報,齊格飛同學想搵布倫老師,接待員叫你等等後就打咗一個電話。
嘟......嘟......喂?
接待員向你點點頭:「老師話請你去搵佢,布倫老師嘅房間係207號室,呢邊直行轉.......」
你冇耐性聽晒接待員講嘅嘢,布倫老師嘅教員室坊間係幾多號,呢啲小事你一早知道了。
喀喀。
房門並冇鎖上,依依的推開房門,熟悉嘅髮香撲入鼻腔。嗰張百年如一卻曾經為你而改變嘅面孔,嗰種嚴厲中夾雜溫柔嘅可愛,嗰種當全世界都覺得你係垃圾卻大力鼓勵你努力向上嘅善良,呢一切一切,都令你喺衝動之下作出表白嘅決定。卻冇考慮過作為一個老師,同學公開談及情愛之間嘅禁忌,亦冇體諒佢潛在嘅尷尬同負擔。
你,齊格飛。
決定正正經經再表白多一次。
關上房門,你冇開口講嘢。而係走到旁邊嘅凳仔坐低,靜靜噉欣賞布倫認真工作。直到布倫放低原子筆嘅嗰一陣,你先願意眨眼,因為你害怕,害怕錯過布倫任何一刻嘅美麗。
布倫:「咩事?」
你:「上次喺圖書館前面嘅事,對唔住。」
布倫:「噢,知錯就好了。」
你:「係,我知錯了。我唔應該喺噉嘅場合向你表白,我唔應該令你產生緋聞,我唔應該令妳覺得尷尬,我唔應該...」
布倫打斷你嘅說話:「噉又冇咁誇張,你知錯就得了,冇咩事就走啦,我好忙。」
你:「情愛呢啲嘢,本來就係兩個人嘅事,點解我要咁傻,喺咁多人面前表白?所以我決定,係呢個淨係得我哋兩個人嘅環境,我要再表白多一次。」
你:「造成你嘅困擾,對唔住。但係我想講,當我被班上同學唾棄、辱罵、排斥,係你伸出援手,我曾經一度想退學,但你將我從地獄裂縫嘅深處拉返上嚟,上返嚟呢個雖然殘酷,但係有你存在嘅世界,所以,比個機會我,做你男朋友好冇?」
布倫表情毫無變動,依舊無情:「幫助學生係老師嘅責任,齊格飛,請你唔好諗多咗。」
布倫靜咗陣,望咗你最後一眼,然後繼續埋頭苦幹,傳來一句:「多謝你嘅情感,但係保護你,令你成長,係我嘅職責所在,並冇師生以外嘅其他情感。」
「但既然你要機會,我俾你,你要做我男朋友?得!當你打贏我嘅時候,就有資格。」
「但我相信,應該係去到下世都唔會發生嘅事。」
你會...
A1:離開並講:「等我。」
A2:離開並放棄感情
B:留低哀求
滄海肥豬
2020-08-12 11:45:26
7票A1
言語已經冇辦法表達你此刻嘅心情,腦海被兩個簡單嘅字詞填滿。
變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!變強!
你冇將布倫最後嗰句說話當作侮辱,而係一種鼓勵,一個推動你變強嘅動力。
你轉身離開,並在臨走前留下了一句:「等我。」
你二話不說立即飛奔前往你養父雷金所在嘅鐵匠鋪。
唔理旁人嘅目光,以最快速度跑到位於市集附近嘅雷金鐵匠鋪。
砰!厚重嘅鐵門被你一嘢轟開,正在專心打鐵嘅雷金嚇咗一下,望到係你之後,平復心情後放低鐵鎚,再抹抹雙手,就行過嚟你身邊坐低稍作休息。
雷金:「搞邊科啊?」
你:「我要變強。」
雷金不以為意:「邊個唔想變強啊。」
你加重語氣,一字一句地說:
「我。」
「要。」
「變。」
「強。」
雷金豪邁噉大笑出聲,用力拍打自己嘅大腿。擰轉頭準備講野之際,與你四目交投,雷金笑容煞然停下,嘴角嘅興奮緩緩下降,因為佢睇到,你雙目中嘅堅定。
雷金:「搞邊科啊?」
同一句話語,前者係對應你魯莽嘅不滿,後者係出於對你嘅關懷,點解一句說話可以差距咁遠?心中流過一道暖流,令你嘅焦慮漸漸平復,因為你知道由細到大,雷金雖然大咧咧好粗皮噉,卻絕對係呢個世界上最照顧你嘅人,係佢身邊,你先係最真實嘅自己。
你:「你唔好理啦,總之我要儘快變強,越快越好。」
雷金:「你係未知系異能者,要變強嘅首要條件就係唔可以急。你越急住變強,亂咁突破,噉你就自己斬斷咗自己通往強者嘅道路。」
你點點頭表示明白,正當你想講野嘅時候,雷金又繼續講:「格拉墨呢?」
你諗起斷劍格拉墨...
額頭不禁湧出名為緊張嘅汗水。
雷金見我冇回答,不僅置信噉講:「你用咗?」
你艱難噉點點頭,一面唔好意思。
雷金激動噉講:「我同你講過幾多次,神器格拉墨元氣大傷,喺你成神之前,淨係可以用三次!三次之後就可能永遠都冇得再用啦!」
然後繼續講:「第一次喺你細個俾狗追驚到死,為咗逃走而用咗一次;第二次就為咗逞強,同瑟坦特對打嘅時候用咗。今次呢?!今次又咩原因啊?俾狗追?俾人打?」
你冇因為雷金嘅說話而感到憤怒,因為你知佢講嘅全部都係事實。
你:「我救咗一個女人。」
雷金聽到後久久不語。
唉,一聲無奈嘅嘆氣從雷金嘅口中道出。
雷金有好多野想講,但放到口邊卻無法繼續道出。
良久後,雷金:「俾格拉墨我睇下。」
雷金著手檢查格拉墨,但冇幾耐後,佢有啲自責噉擰擰頭:「神器就係神器,我無能為力。」
但當雷金將格拉墨遞返俾你嘅時候,格拉墨竟然耀出無比光芒,充斥住成個房間。雖然光到無法睇到眼前路,但眼睛又唔會覺得刺眼,有著絲絲溫暖,好似喺到撫平緊你嘅情緒噉。
良久後光芒減弱,集中重組,就有一段文字浮現於虛空之中。
「我兒,格拉墨乃一神器,陪我征戰一生。於神魔大戰中元氣大傷,餘下三次使用機會。爹沒好好照顧你,陪你成長,唯予格拉墨為你保命。格拉墨妙用無窮,無視階級固定虛空,或斬斷虛空,建立空間節點,皆能保你三次不死。我兒,若你觸摸到成神的瓶頸,並欲修補格拉墨,需集齊天之水、地之蟲、陽之石、陰之牛、時之爐、空之心,方可重返顛峰。」
你看著這段文字雙眼發光,因為這是名為希望的段落。卻沒注意到雷文那一閃即逝的失落。
你會......
開放式作答,想睇你地會點做,放工再決定揀邊個。