滄海肥豬
2020-08-18 01:55:07
5票A
布倫好感度:-1 = 5/10
瑟坦特好友度:+1 = 5/10
配點: +3幸運,+7敏捷。
——————————
目光放遠,唔再去留意老師們眼神嘅回饋,靜靜噉望著樹葉隨風擺動,令你心靈漸漸放鬆,進入咗一種忘我嘅境界,時間都好似要為你而靜止,等你可以好好欣賞呢幅名畫。
~
瑟坦特:「齊格飛。」
你擰轉頭,瑟坦特高大嘅身終於映入眼簾,佢面色稍露疲態,但雙眼卻射出銳利神光,特別精神,由此可見瑟坦特應該發生了甚麼好事。你對著瑟坦特點點頭,再也按耐不住心中興奮,摩拳擦掌,準備出發。
你:「瑟坦特,時間唔夠,完咗先?」
瑟坦特心領神會,傳回一個冇問題嘅表情,亦透出絲絲與我相近嘅期待之情。
時間,三個小時。
你向瑟坦特點點頭,便全速跑往彩虹之森嘅方向。
彩虹之森雖然叫做處於學院嘅隔離,但以你保持全速100米13秒嘅速度,依然需要10分鐘路程先可以到達。而已經失去咗五個鐘嘅你哋,自然唔會再浪費多餘時間,拔腿狂奔,務求以最快嘅速度到達彩虹之森。
速度不足,耐力有餘。
飛奔嘅過程中你嘗試分出心神轉頭留意瑟坦特,但係發現,佢根本面不紅氣不喘,一直以輕輕鬆鬆嘅步伐跟隨喺你後面。不出半分力氣,就跟貼喺你身後,你就知道呢個男人被稱為校園史上最強未破,身體質素必定佔其中一大部分。
~
你哋終於嚟到彩虹之森嘅外圍,幾個老師企咗喺到隨時候命,以防任何意外出現。老師們見到你同瑟坦特呢個離奇組合,都略為顯出驚訝之情。點解被稱為垃圾嘅你,會同最強未破者嘅喺埋一齊?可能佢哋覺得,你只不過係襯托女神嘅嗰件豬排,隨即向你透露出憐憫嘅眼神。
你齊格飛,唔需要人憐憫。思緒流轉,回憶起書中描述。
「百寶袋鼠,好財好色。於彩虹之森長年定居,學院出發,到達外圈後向50度角右前方直跑,兩公里外,於外圈與內圈交界處,有一山谷,內存瀑布,連接天和地,別有洞天。作者於該處發現一袋鼠,母,育二子,初生。母袋鼠探測結果為二萬異能值,一破者可挑戰,獵殺可獲袋鼠其一生所藏,錢財寶物,無所不奇。」
無視老師們嘅目光,你帶領瑟坦特一路狂奔,不出5分鐘便發現書中描述之處,瀑布水花四濺,飛灑於天地之間。左右掃視,都未能發現所謂洞天,但定睛一望,就發現瀑布後有一凹位,洞空足足有兩米大。
你會...
A:入洞內探索
B:於洞外引誘