其實「相似位」依樣嘢
外國直情有人開咗TVTropes依個類似Wikipedia嘅網站去記錄
而頭先我亦都輕輕講咗Hero's Journey依樣嘢
(話說連登有位巴打開咗個學術Post討論依個概念)
其實就係講緊古今中外嘅故事神話 好多時都係循著依個「套路」去行
如果咁Reductionist 咁拆骨去肉咁睇一個故事
咁其實每個體裁入面99%嘅故事都係同一個故事嚟
相對地有好多「設定」「元素」其實已經滲咗入我哋嘅流行文化入面
甚至可以話係一種「集體回憶」嚟
即係例如有獨角獸 有龍 有聖劍依啲嘢
其實都係由古代嘅傳說同神話轉化出嚟
不過已經喺幾十年前畀人玩爛咗
「地水火風」依啲「元素」更加係「古代科學」嚟
而隨著有『fate』依類作品出現
去搜羅一啲以往唔係咁流行 世界各地嘅傳說神話
將來就會有更加多嘅元素同情節畀人玩爛
近代由Tabletop RPG演化出大為流行嘅MMORPG之後
有「經驗值」「等級」「一招招嘅技能/天賦」甚至係「儲物欄」
都漸漸成為一啲好「標準」嘅Mechanic
而我會始終堅持 Plagiarism「抄襲」唔應該係一樣咁輕易作出嘅指控嚟
「致敬」「模仿」「改編」都係可以接受嘅創作形式
但係「一模一樣咁抄」我相信唔係正常人可以接受 更莫講欣賞嘅做法
「天下文章一大抄」依句來歷不明嘅「名言」
有意無意地將「用典」同「抄襲」混為一談
難聽講句真係好有某國人嘅特色。