[校園]《再見了,還會再見嗎?》(4)

864 回覆
10 Like 4 Dislike
2019-12-26 19:31:12
11sir要放長假先出到文?
2019-12-27 23:04:24
第70章 – 改選

今年家長日就真係無畏無懼,話晒都拎到個數學全級第一,再加上其他成績又唔太差,仲要中文及格。

所以話呢,冇做錯嘢又點會怕要去面對呢啲日子呢。

唉,事實又點會咁美好……

就算你冇嘢做得唔好啊,都可以屈到有!!

話說今日就好似平時家長日咁同媽媽一齊返學校。

原本都冇咩嘅,點知一返到去就撞到上年話我有社交障礙嗰個班主任喎。

咁我同媽媽就冇理由面對面見到佢都唔打招呼啫,所以就行咗過去say個hi啦。

咁就死喇……

條友竟然話我平日喺學校少咗落間細房温書,掛住同中三識嗰啲新朋友玩,荒廢學業。

心諗……

佢哋成班都成績唔差啦,群埋佢哋到又有咩問題喎……

最大鑊係咩呢,係我今次冇講到今個學期啲成績俾媽媽知呀!!

因為而家媽媽已經信任我會自己温書,所以都好少理我勤唔勤力。

不過好彩解釋完一輪,媽媽都係選擇信我,因為我同佢講咗句:「一陣睇成績表咪知囉,而家講乜都冇用,做嘢講證據㗎嘛!!」

真係差啲水洗都唔清,無啦啦返學都要俾人屈。

上到三樓,門口竟然冇人等,我同媽媽就即刻入咗去。

Miss Wong都係同平時一樣咁好笑容,可惜嘅係下年又會換人,冇得再由咁好嘅老師做我哋班主任。

「媽媽同張轟浩~ 麻煩坐低等一等我先,我去一去洗手間」

喺等緊嘅途中,我偷睇Miss Wong枱面張「貓紙」,諗住睇下自己個名次。

喺掃緊落去揾自己個名嘅時候,旁邊有把熟悉嘅聲音。

「你哋好啊,呢份係張同學嘅成績表,你哋可以拎嚟睇住先」

唔怪得啦,原來係阿盈……

仲要特登扮到好似同我唔熟咁,都唔知搞乜鬼。

Miss Wong:「唔好意思呀,要你哋坐喺到等」

媽媽:「邊會唔好意思呢,Miss見咗成朝家長都辛苦,明嘅」

Miss Wong一返嚟,我先醒起我仲未睇我個名次。

不過見媽媽揸住咗份嘢又冇鬧我,應該冇事啦~

Miss Wong:「咁我講一講成績方面先,張轟浩佢考得唔錯嘅。雖然全班得12,但全級都已經喺頭20㗎喇,咁數理方面就……」

「咁操行方面都冇咩問題嘅,張轟浩班朋友都係勤力讀書嗰批,好多都係全班頭10入面嘅……」

唔係嘛…… 佢哋個個唔聲唔聲咁,又喺到秘密練兵。

「張轟浩記唔記得帶埋張選科表返嚟交呢?」

「有啊有啊,等一陣」

我由袋入面將張選科表拎出嚟。

Miss Wong 一望完,都窒咗一窒。

窒咗一窒嘅原因應該都係因為我將Bio揀咗做Geog啦。

「呢個組合都幾有趣喎,估唔到你對地理呢一科會有興趣」 Miss Wong笑一笑咁講。

媽媽聽完呢句,個樣又係呆咗一呆。

「哦,因為我對Bio真係冇乜興趣,所以就冇揀到囉」我將呢句喺腦內預演過幾十次嘅答案講出嚟。

「唔緊要嘅,我都係巡例睇一睇有冇填好,學校會支持同學仔嘅所有選擇㗎」

其實講得呢句都已經唔係特別支持啦,不過Miss Wong冇再追問或者叫我改選擇就冇乜所謂啦。

離開咗學校,媽媽問返我啱啱改選嗰件事。

而我只係講咗句:「書係我自己讀,你俾我自己揀有興趣嘅嘢啦,一科半科啫,到時唔鍾意咪最多drop咗佢囉」

跟住媽媽都理解呢個我為自己做嘅選擇,都冇再提起過呢件事。

不過揀咗呢科真係錯有錯著,正正因為揀咗呢科,我同佢嘅關係先有機會更進一步。
2019-12-27 23:05:30
唔知幾時又會忙返,我趁放假會打定多少少
2019-12-27 23:39:41
幫推,11sir用p牌出文浮唔起
2019-12-28 01:25:15
2019-12-28 19:21:31
2019-12-31 23:37:46
2020-01-01 10:52:48
2020-01-01 21:34:51
新讀者留名
2020-01-01 22:31:03
第71章 – 回味

「今年發生咗咁多事,感覺好似好漫長咁」我對小雲講。

「雖然發生咗好多嘢,但係都開心丫」小雲側一側頭回應。

話說尋晚小雲突然喺Facebook揾我。

「車仔,我哋好似好耐冇傾過偈,不如聽日完咗結業禮見一見面啦?」

講開又好似係,自從大家都拍咗拖之後,就少咗好多機會傾偈,冇得再好似以前咁想幾時見就幾時見。

「可以啊,反正我之後都冇嘢做」

「咁完咗結業禮喺地下間爆炸品儲存室等啦~」

就係咁,我就同小雲約咗今日見面。

「都係嘅,起碼今年可以識到佢哋成班人,一齊玩一齊讀書,都算係開開心心咁過」我回應。

「嗯」

同以前相比,我哋之間好似多咗一層隔膜,好似有咩都要就住就住去講。

「係呢,之後我哋唔同班,應該都會少好多機會見」

我一時間諗唔到應該講乜,所以隨口講一句嘢。

「都冇咩所謂啦,我哋啱啱呢個學期都係咁過」小雲又笑一笑。

小雲呢個笑容好似暗藏咗啲咩,搞到我都唔敢亂咁應。

「車仔,你仲記唔記得呢到,我哋以前成日都會嚟食飯」

我仲記得我哋當年喺到渡過咗一個晏晝。

「點會唔記得,係得呢到先可以靜靜地冇人㗎啫,我都好耐冇嚟過喇,估唔到呢到咁耐都冇變」

「地方點都唔會變嘅,係人嘅關係先會咁善變㗎啫」

「都係嘅…… 不如我哋出去行下啦~」

「嗯」

我哋沿住樓梯上去,一直行到上5樓,陳sir突然喺後面出現。

「好耐冇見過你哋呢個組合一齊行喎,入唔入嚟我嗰班坐下啊?」

我望一望小雲,小雲都望返住我。

我諗小雲應該係冇意見掛。

「哦,好啊」

我哋之後跟咗陳sir入佢嗰班個班房。

陳sir係中四嘅班主任嚟,入面有一班中四嘅哥哥姐姐喺到温緊書。

「我哋入去會唔會阻住佢哋㗎?」我問陳sir。

「點會呢,如果佢哋認真做嘢又點會咁易分心」陳sir刻意大聲少少講呢句,好似係特登想講俾佢班學生聽咁。

咁我哋傾偈就當然冇大聲講大聲笑咁啦,都係一般聲量咁講嘢。

話晒人哋都係做緊嘢,都會怕阻到人哋嘛。

我哋3個人傾咗一陣,都係講下讀書同講下下一年嘅嘢。

喺小雲同陳sir傾緊偈嘅時候,我拎起咗一份放喺枱上嘅數學嚟睇。

入面第一條就要計啲二次方,然後右手邊等於0。

係一啲從來都冇見過嘅題目。

「做咩啊?有興趣?睇下識幾多囉」

跟住小雲同我一齊睇,但係我哋兩個都睇到好迷惘。

「呢啲係你哋下年會學嘅嘢嚟㗎」陳sir對我哋兩個講。

「你哋諗下,如果我話x嘅2次方係9,咁你哋覺得答案係幾多?」

「3囉」我回應。

「好喇,但係要諗下喎 -3 乘 -3都會計到9,所以呢條唔止一個答案㗎」

「不過你哋下年先學啦,今日都傾咗個幾鐘,9月返嚟先再見啦~」

我哋同陳sir講完再見就離開咗班房。

「真係估唔到仲有咁多未見過嘅數學,睇嚟跟住仲有排學」我對小雲講。

「唔係你以為呢,如果初中3年就俾你學晒,咁就唔使有多3年高中啦」

「咁又係,原來都就快5點,不如返屋企喇」

「嗯,我都差唔多要返去同家姐食飯」

「咁好啦,我哋都9月再見~」
2020-01-01 23:27:45
有文,希望佢地唔會咁快就散
2020-01-04 19:39:25
小雲
2020-01-04 20:07:59
2020-01-05 00:24:26
第72章 – 結果

「車仔,起身喇,你尋晚又話今日要睇分班同選科結果」嫲嫲喺房外面叫一叫我。

我望一望放咗喺床邊嘅鬧鐘,原來已經11點半。

「車仔,起咗身未呀?」嫲嫲再叫一叫我。

「我起咗身喇,得㗎喇~」

雖然話就話起咗身,但成個人都仲係迷迷糊糊咁。

我用盡全身嘅力,先成功坐起身再離開張床。

落床之後我就行咗去電腦枱前坐低,等11:45準時睇結果。

其實結果就一早已經定咗係咁,我上年個名次又唔係好低,應該都穩穩陣陣嘅。

一搭正45分,我就㩒咗入去睇。

點知個網死咗……

未夠10秒,就已經收到阿天喺facebook俾我嘅訊息問我入唔入到個網。

睇嚟大家都唔成功……

有乜理由咁少人入都仲搞到學校個網死咗㗎,一級都係得百幾人咋嘛,咁都出事。

唉,算數,都係食完個晏先再睇。

我離開咗自己間房行出廳,嫲嫲一聽到有開門聲就喺廚房叫我。

「車仔咁快睇完喇,等多5分鐘就有飯食喇」

「未睇完啊,個server好似開唔到,應該食完飯就冇事」

「咩梳化呀?做咩要開梳化呀?」嫲嫲問我。

唔記得咗嫲嫲係唔識英文添……

「唔係呀,係學校個網頁上唔到呀。我開定枱等食飯啦」

我快快手食完飯又走返去電腦到,發現佢哋已經影低哂我哋group入面嘅人嘅班同科,啫係我唔使再特登入去睇。

嗯,成功揀到E班同埋物理化學地理,咁啫係冇嘢要擔心啦。

呢個時候阿盈揾我,仲打咗一段字:

「車仔,估唔到我哋下年就冇得同班喇,先至一齊咗半年多少少。

呢半年我過得好開心㗎,雖然之後都未必有咁多機會見面,因為上咗高中都開始要努力讀書。

你唔會因為同我少咗見而唔理我㗎可?」

唔同班只係少咗機會成日見啫,我諗冇影響掛。

「冇嘢嘅,你唔使擔心咁多啦」

「咁我唔阻你喇,過幾日返學見啦」

係喎,原來過幾日就已經要返學,啲暑期功課都仲未做晒,睇嚟呢兩日要勤力啲喇。

我上咗去學校嗰個叫做e-class嘅平台,諗住睇下啲暑期功課。

發現下年啲選修科已經被加入去,而Physics仲已經出埋通告話9月1有補課。

心諗,使咪咁快啊,乜都未學未教就話補課。

但係都冇得唔去啦,唔通俾人捉曠課咩。

碌一碌,發現下年啲科已經有教學內容加咗入去。

我懷住呢個好奇嘅心入咗科Physics到睇。

原來佢嚟緊都係教距離同速度嘅關係……

呢啲嘢小學咪學過囉,仲教嚟做乜,睇嚟下年啲嘢都應該唔係好深,應該應付得嚟嘅。

「車仔,你今日會唔會出去買埋書呀,過兩日就返學喇喎」嫲嫲行咗去房門口問我。

係喎,我都冇諗過呢樣嘢,又會俾嫲嫲諗到先嘅。

「我聽日自己去啦,順便買完之後返屋企」

「咁你聽日自己買完就坐的士返去喇喎,我唔睇住你喇」

「知喇,嫲嫲」

話咁快就已經完咗半個中學,真係唔經唔覺。

喺呢3年都真係算經歷得多嘢,開心嘅同唔開心嘅,都多到數唔晒。

喺中三嘅呢年更加同前兩年有好強烈嘅對比,由得一兩個好朋友變到有一班好朋友。

除此之外,仲試咗第一次拍拖。

雖然自己都唔知呢種感覺係咪叫做鍾意,但起碼大家都係會關心對方。

下一年中四又將會係一個新開始,喺新嘅地方會認識一班新嘅人之外,更會同舊朋友再次見面。

不過,中四先至係真正開始,嚟緊仲有更多更多特別嘅事發生。
2020-01-05 00:25:17
成日一收工就去咗休息 唔記得po
2020-01-05 03:32:21
知你攰啦慢慢出啦 唔爛尾就ok
2020-01-05 11:24:00
傳說中嘅慢工出細貨
2020-01-05 11:37:05

豬仔:一直默默關注事件
2020-01-05 18:46:35
好掛住你
2020-01-06 12:19:43
2020-01-06 22:25:50
原來eclass係咁耐歷史嘅嘢
2020-01-07 07:26:41
第73章 – 無視

尋晚臨瞓嘅時候,阿盈喺facebook揾我。

「聽日你同唔同我哋一齊食早餐之後返學呀?」

我諗咗一陣,不如都係唔好咁早起身同佢哋食早餐,瞓多半個鐘好過。

「唔喇,我想休息耐啲啊」

「但係我想見你喎 :(」

「um…… 都係唔喇,你俾我休息啦」

「咁耐冇見都仲要休息,哼」

我冇覆到阿盈,然後就咁攤咗上床。

成日自己都會喺到諗,到底同鍾意嘅人相處應該係點㗎呢?

無論幾時都會想見到佢?

同佢一齊嘅時候無時無刻都咁開心?

我諗呢啲問題應該都冇特定嘅答案嘅,只要兩個人之間相處得舒服就得掛。

「唉,唔理喇,都係早啲休息」我自言自語。

~9月1號~

仲記得以前每次放完暑假返嚟呢間學校,都會因為太耐冇返嚟而有種陌生嘅感覺。

不過今年唔知點解冇再咁樣覺得,可能係因為已經喺到讀咗3年掛。

今年嘅課室又再搬上咗一層,去到4樓最盡頭嘅位置。

一入到門口,就見到Zoe原來都係呢班,但係佢一個人好孤獨咁坐咗喺距離門口較遠嘅地方。

我冇刻意行過去同Zoe打招呼,畢竟都有接近3年冇聯絡。

除此之外,呢個課室都有好多熟悉嘅面孔。

嗰啲面孔對我嚟講係好熟悉,但係我根本就唔識佢哋。

點解?

因為佢哋都係平時喺學校頒獎典禮見慣見熟嗰啲人嚟,咩班第一呀,科第一呀,好多都出現咗喺到。

我揀咗課室旁邊啲單人位坐低發吽逗。

突然間,Parco行咗過嚟撩我傾偈。

Parco:「估唔到我哋竟然會同班喎」

係我先估唔到你會同我同班囉……

我:「係囉,又會咁啱嘅,自嗰陣喺改進計劃合作完之後,都好耐冇傾過偈喇我哋」

Parco:「得閒約埋Lily食個飯聚下舊囉我哋,話晒我哋三個都叫做一齊做過partner」

我:「好…… 遲啲啦……」

講開又講,原來都好耐冇揾過Lily。

Parco:「喂,我唔係淨係行過嚟約食飯咁無聊㗎…… 只係我喺啲差班升上嚟,全部人入面都淨係識你一個咋……」

我:「咁我都好過你少少嘅,都有一半人左右係上年同班,但係我冇乜同佢哋傾過偈」

Parco:「乜你咁毒冇朋友㗎……」

你都好意思話我喎……

講到毒,我邊夠你勁呀…… 由內而外都散發住“毒氣”……

我:「佢哋咁啱未返啫,一講就到」

阿天同Simon喺呢個時候行入課室。

但係,佢哋兩個都見我唔到,然後行咗去課室遠離走廊嘅一邊,同一班打波嘅朋友坐埋一齊。

嗰班波友係上年都同我同班,只係我冇打開籃球,所以先同佢哋唔熟。

「搞笑,又話係你朋友,但佢哋望都冇望過你喎」Parco一邊笑我一邊講。

唉,唔想解釋咁多,由得佢亂講算。

過咗冇耐,我哋嘅新班主任都入咗嚟,係一個麻煩女人。

「Miss Cheung,今年係你做班主任呀?!」一個我認得係嚟自另一班精英班嘅人問。

「係呀,估唔到可以教足你哋6年中文。有一半同學仔可能未見過我,大家可以叫我Miss Cheung,咁我教開中文同通識嘅……」

一大堆無聊嘅開場白。

「聽講呢個Miss係好偏心啲同自己熟嘅同學,唔知係真定假㗎呢」坐我前面嘅Parco問我。

「我點知喎,我上年又唔係喺佢嗰班,擰返去前面啦你」

「咁而家我哋調咗位先,出去跟就矮排,再順住一男一女咁兩個入1 pair入嚟」

過咗15分鐘左右,我哋每個人都擁有個屬於自己嘅位。

估唔到我喺呢個暑假就咗咁多,竟然有機會坐最後一行。

坐喺我旁邊嘅,係一個路人樣,戴眼鏡,紥咗長馬尾嘅女仔。

佢由坐低開始就粒聲唔出,淨係揸住佢手上本書喺到睇。
2020-01-08 01:37:18

坐喺我旁邊嘅,係一個路人樣,戴眼鏡,紥咗長馬尾嘅女仔。

佢由坐低開始就粒聲唔出,淨係揸住佢手上本書喺到睇。

又有新女
2020-01-08 17:49:08
後宮故日常啦
2020-01-10 10:34:53
up
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台潮流台上班台財經台房屋台飲食台旅遊台學術台校園台汽車台音樂台創意台硬件台攝影台玩具台寵物台軟件台活動台電訊台直播台站務台成人台黑 洞