[校園]《再見了，還會再見嗎？》（4）

推一推

11sir

嘩 終於有文

第63章 – 校慶（上）

「搞咩咁攰呀？尋晚同條女大戰完三百回合？」Lily奸笑住咁問我。

「咪亂諗嘢啦你，係尋晚……」

「尋晚？？？明㗎喇～」Lily開聲截斷咗我講緊嗰句嘢。

明咩啊……而家係我唔明喎……

「我想話我温書咋…… 呢排咁多測驗同功課，平日喺學校以外邊有時間見阿盈喎」

「得喇得喇，唔使掩飾～」

唉，冇佢咁好氣，都係唔同佢拗。

「要開聲喇，仲講」我回應Lily。

練習完咗之後，我留咗喺音樂室等埋阿天先一齊走。

而Lily就喺我隔離執緊嘢。

「聽日你返幾點啊？一唔一齊食早餐？」Lily執執下嘢問我。

因為聽日校慶嘅日子其實係學校假期嚟，咁一般學生就唔使返學嘅。

而學校就會好似開放日咁俾街外人入嚟，校友嗰啲都可以返嚟懷緬下過去。

「都得嘅，聽日第一場個表演係10:30？」

「係啊，不過我哋9點就要返到嚟開聲同準備喇，不如8點半食啦」Lily回應我。

「阿天，我哋聽日食早餐，你一唔一齊啊？」我問仲執緊琴嘅阿天。

「喂，好呀，幾點？」

「八點半你ok？」

「好呀好呀」

「咁我哋三個人食啦」我對Lily講。

「嗯，咁我走先喇，聽日見啦～」

Lily同我哋揮一揮手就離開音樂室走咗。

跟住我行咗去鋼琴附近嘅位置等阿天。

「我就抹完㗎喇，俾多幾分鐘我！！」阿天一望到我行咗過嚟就同我講。

可能阿天見到我行過嚟，以為我係催緊佢。

「我冇催你啊，慢慢啦。都係得我同你一齊走咋嘛，阿盈同雯雯又唔喺到」我回應。

「係喎，佢兩個話唔知我哋練幾耐所以一早走咗」

「咪係囉，唔使急啦所以」

過咗幾分鐘，我同阿天就一齊離開學校。

行緊去西鐵站途中，我問阿天知唔知Choco同Anson佢哋嘅事。

「你有冇聽講過Choco同Anson佢哋嘅事啊？」

「估唔到連你都知喎……」阿天細細聲講。

「唉，我講少少俾你聽啦……」

「咁嗰陣呢……」

聽完阿天講，我都唔係太明點解會發生啲咁嘅事。

既然一齊得，又點會嫌呢樣嗰樣呢？？

你哋想知啊？

我唔想講俾你哋聽住喎，哈哈～

～校慶當日～

我照原定時間去到茶餐廳。

過咗冇耐阿天同Lily都陸續嚟到。

「你哋兩個咁早到嘅？」Lily都未坐低就同我哋講。

「係你遲到囉，住咁近都遲……」我回應。

「咁我諗住你哋會遲少少到㗎嘛～」Lily掃一掃佢把長頭髮。

「你就遲到…… 嗌嘢食啦，再唔食就真係遲喇」

食完嘢我哋就即刻趕返學校。

入到音樂室，發現其他人比我哋更早已經返到嚟準備。

「我過去準備先喇，你哋兩個慢慢傾」阿天對我哋兩個講。

「你嘅～」Lily將今日個Schedule遞俾我。

「唔該～」

望一望個時序表，原來我哋一陣係去禮堂個典禮幫手先，然後先再定時定候做幾次表演。

「各位同學，我哋而家做埋最後嘅練習喇～」

「唔該司琴～」

練咗30分鐘左右，我哋就出發行去禮堂。

「你緊唔緊張呀？」我問Lily。

「有咩緊張…… 我一個人喺台上面跳舞咪仲驚，呢啲表演濕濕碎啦」

咁我都認同嘅，一個人喺台上仲要跳嚟跳去一定驚過而家成碌木咁企喺到。

「我以前小學都有合唱團表演過啦，點會驚喎」我假裝冷靜地回應。

因為以前小學通常都係學校啲活動表演，而唔係喺咁多外人面前表演。

所以我都係有啲緊張。

Lily忽然捉起我隻手攤開。

「驚到出晒手汗，咁都仲話自己冇嘢」Lily捉住我隻手講。

我即刻縮一縮。

點解可以有女仔咁唔介意同異性身體接觸，真係諗唔明啊……

有文

Lilyg

循例要摸下大脾係時候

「搞咩冇文呀？尋晚同條女大戰完三百回合？」

淫底Lily

新讀者留名

做咩

夜啲有文（應該）

要肯定 唔要應該

樓主係咪有睇斗轉星移嘅故仔？我突然見到你寫壹芊靈壹

第64章 – 校慶（下）

「做咩借啲意捉住我隻手啫你」我問Lily。

「諗多咗喇你，邊有人想捉住你隻手」

Lily一下將我隻手fing開。

「掂嗰幾下都臉紅，邊有咁易尷尬呀」Lily一邊笑一邊講。

「我邊有咁易臉紅，唔好亂屈我」

「都費事同你講，入禮堂就靜啲啦」

我哋去到禮堂就直入咗後台，要等到夠鐘嘅時候先出去台前。

「大家絕對唔需要緊張呀，一陣輕鬆啲，照練習咁就得㗎喇」 指揮對我哋所有人講。

其實真係冇乜人係覺得緊張囉，睇見個個上一秒都仲係有講有笑咁。

我諗，我都應該係在場數一數二有少少覺得緊張嘅人。

「雖然我哋冇對街外人表演嘅經驗，但都絕對唔會影響我哋發揮㗎……」

指揮繼續講一大堆廢話，而大家都只係各有各傾偈，冇乜人理佢講緊乜。

「你覺唔覺個指揮先係最緊張嗰個人？平時學校表演嗰陣都唔見佢咁多嘢講嘅」Lily問我。

「我都覺，真係好少見佢一次過講咁耐嘢」

「大家準備返上台嗰三排，第三排最側邊嗰個帶頭，之後第二排跟住。我哋一陣會一條隊咁出去……」

講咗咁耐廢話，終於講啲有用嘅嘢。

「咁我哋而家出去喇，大家跟住我行」

雖然話就話唔驚，但去到俾人望住嚟行上台階嗰下，都硬係有少少唔自然。

終於企咗上台。

我諗今次都係我最後一次嘅合唱團表演喇。

唱歌我覺得係開心嘅，但呢間中學嘅合唱團真係太頹廢。

所以過咗呢個合唱團嘅“三年之約”，我應該都唔會再玩喇。

唯有好好享受埋最後一次嘅表演啦。

當大家都企好之後，指揮向阿天點一點頭，鋼琴聲奏起。

「…… Let the weak say I am strong ……」

「…… Let the poor say I am rich ……」

「看 血在流反映愛沒保留……」

呢到已經係當中比較好聽嘅兩首，其他嗰啲真係唔係太唔啱音，所以就算啦。

完咗表演，我哋就落咗去下面啲攤位。

「過去睇下有咩玩啦，唔好淨係企喺到～」Lily興奮地同我講。

我都冇諗過淨係企喺到，唔通齋企等到下一場表演咩……

「呢個啱你喎，計數遊戲～」

係合廿四，啫係用啤牌抽4個數字，然後要計到24出嚟嘅遊戲。

但係我對呢個遊戲完全冇興趣，望下就好。

「冇興趣呀，睇其他嘢啦……」

喺數學攤位嘅旁邊，係一個有關通電嘅科學實驗。

好似係想人試下將正負極插落唔同嘅水，睇下插落邊啲水，粒燈膽先會光啲。

再跟住嘅隔離，仲有其他嘅科學實驗，但係我都冇咩興趣行過去玩。

「不如過去拎份爆谷丫～」Lily叫我。

都好，反正其他嘢我都冇咩興趣玩。

啲爆谷……

好難食。

免費嘢果然冇好嘢。

呢段時間只係得我同Lily兩個一齊行咋，因為阿天要過咗第二節先至唔使彈琴，先至可以落嚟陪我哋。

「差唔多夠鐘喇，上去準備啦」

跟住嘅時間都冇咩特別，只係變咗三個人一齊行多次啲攤位。

其實學校間唔中有呢啲日子俾學生休息下都幾開心，叫做可以抽離一下嗰啲忙碌嘅校園生活。

六點左右，我哋就離開咗學校。

Lily因為住喺學校附近，所以一出門口就行另一邊走咗。

而我同阿天就向西鐵站嗰邊行。

一開電話就收到兩個信息。

一個係嚟自阿盈嘅，咁呢個就當然啦。

而另一個，竟然係Anson俾我嘅信息。

唔知有咩事呢，Anson竟然會揾我。

我諗應該都係問功課㗎啫。

「我呢，有啲同Choco嘅嘢想揾你傾下同問下你意見，如果你得閒就覆我啦」

唔係掛，唔通佢哋要分手？

「做咩事呀？睇完電話個樣咁呆滯嘅」旁邊嘅阿天問我。

「冇咩事呀，行啦～」

我諗我都係一陣返到屋企先再覆Anson啦。

聽日有啲忙，未必會有文

有啊 好好睇

樓主個故好好睇
喚起我呢啲老嘢嘅青春回憶
中學真係好懷念！

樓主，我想問嗰故事嘅進度係點樣？去到一半未？

好假

就快一半