與你聽風聲
2019-09-23 07:04:42
「多謝你啊,係第一個呀」
「XDDD 唔阻你休息喇,大家都早抖啦〜」
我冇覆到就去咗瞓,因為真係好攰。
第二日起身,嫲嫲同我講咗句生日快樂,仲話會買個蛋糕返嚟同我點蠟燭。
除此之外,都係好似平時咁過。
其實我覺得生日咪又係咁樣過,使乜當係一個特別嘅日子。
即使係生日,咪又係要温書,咪又係要返工返學。
晏晝嗰陣,電腦又收到訊息,今次係小雲。
「車仔生日快樂啊〜」
我又望一望電腦個鐘,係12:24。
「多謝小雲,又會咁準時12:24嘅 XD」
「我上年都係呢個時候打電話俾你㗎,係你冇為意咋嘛」
乜原來係㗎……
我:「乜係咩,sorry啊,我真係唔知道 TAT」
小雲:「生日講咩sorry啫,今日會去邊到玩呀」
我:「冇啊,我去咗嫲嫲屋企陪下佢咋。話晒都老人家,唔知仲有幾多機會可以見面嘛」
小雲:「咁乖仔,寧願陪嫲嫲都唔去玩。好啦,唔阻你陪嫲嫲喇〜」
跟住成個晏晝仲收到晒嚟自阿天,雯雯……
唉,太多喇,我都係唔列晒出嚟,總之就係所有人啦。
成世仔都未試過有咁多人同自己講生日快樂,原來多朋友都會有啲咁嘅麻煩。
夜晚嘅時候,嫲嫲拎咗個新出未夠半年嘅天使蛋糕出嚟。
其實我一直都想試下,因為見佢好多cream好似好吸引,但係又冇理由一個人買嚟食㗎嘛。
嫲嫲將蛋糕上嘅蠟燭點著,然後講咗句
「車仔,許願先啦」
我雙手合十,再合埋眼。
許咩願好呢…… 其實我又冇咩願望。
不如我幫身邊嘅人許願啦!
「希望未有另一半嘅都可以同鍾意嘅人一齊。如果有另一半嘅就長長久久,唔好鬧交!!!」
我打開眼,將蠟燭吹熄。
願望應該會實現掛。
與你聽風聲
2019-09-24 10:13:24
第49章 – 偶遇
〜12月31日〜
我比約定時間早咗45分鐘到。
雖然只係6點幾,但天都已經開始黑,海旁都開始熱鬧。
今日天氣都幾凍下,我特登戴條頸巾出去費事冷親。
沿住海邊一直行,聖誕氣氛十分濃厚,周圍都係一對對情侶,仲有好多聖詩團喺到唱歌。
有時都幾佩服聖詩團啲人,喺咁嘅天氣都仲可以企喺到唔郁,大大聲咁唱歌。
俾著係我嘅話,我一定凍到聲都開唔到。
雖然氣氛真係好好,但我的確唔鍾意人多嘅地方。
所以我冇停低過腳步,繼續跟住人潮向尖東方向行。
行到近尖東站附近,我望到條樓梯連住平台花園就行咗上去。
「估唔到呢到風景都幾好,人又少,又可以望到對岸嘅燈飾」我自言自語。
我揀咗張望海嘅長櫈坐低咗,真係好舒服。
突然,有人從後遮住咗我對眼。
「你估下我係邊個?」
「阿盈?」
其實我都係估估下,不過認得把聲好似係。
「叻仔!」
佢坐咗喺我隔離個位。
「你又知我喺到嘅??」我問阿盈。
「樓下係尖東站嘛,搭出嚟嗰陣企咗成程咁攰,我咪諗住揾個地方有位坐囉。點知一上嚟就見到你喇 haha」
「又會咁啱俾你撞到……」我細聲自言自語。
「可唔可以俾我挨下啊?企咗成程車好攰喇〜」阿盈挨住我膊頭問。
「都冇得唔得啦……」
然後,佢又瞓著咗。
我伸手繞住佢條腰,費事佢瞓瞓下跌咗個頭落嚟,亦都令我坐得舒服啲。
〜15分鐘後〜
仲有5分鐘左右就到約定時間,我決定拍一拍阿盈條腰叫醒佢。
「嘩,點解瞓醒凍咗咁多㗎……」
「係咩,我覺得差唔多咋喎」我對阿盈講。
阿盈跟住將隻手放上我手背。
凍到死屍咁……
「一係我俾條頸巾你啦,你臨走嗰陣還返俾我」
我除低條頸巾遞向阿盈。
「唔該你啊」
「行啦,就快遲到喇我哋」