與你聽風聲
2019-09-16 12:52:07
正常男仔都會想同佢做朋友啦……
Lily喺呢個時候拎轉頭,見到我望住佢對腳。
我隨即抬返高個頭。
「咸濕仔,望緊咩嘢啊? 話聲我知,等我都一齊望下嘛」
Lily講完之後戚起一邊嘴唇奸笑。
我呢一刻同個犯人冇乜分別。
已經乜都俾人睇穿晒,知道自己做錯咗又冇得抵賴,又冇得唔認錯。
可以做嘅就只係等Lily對我嘅判刑。
「又要偷望又要唔出聲,坐低啦」
Lily拍一拍鋼琴櫈示意我坐喺上面。
我坐低後,Lily都坐咗喺我隔離。
佢捉起咗我隻左手問,
「望咗咁耐,想唔想摸下呀?」
Lily一邊講一邊繼續奸笑。
我唔知道應該點回應Lily好。
問心嗰句,邊有男仔望到白滑靚腳會唔想摸……
但我內心就不斷受到良心嘅責備,知道唔應該做出呢啲事。
「Errr…… 唔好啦…… 咁樣好似唔係幾好喎……」我口窒窒咁回應Lily。
「真係?我俾多次機會你喇」Lily捉住我隻手放咗上佢右邊大脾。
我即刻臉都紅埋,然後縮返開隻手。
呢個女仔係咪傻架,咁隨便俾人摸佢大脾嘅。
「唉,唔玩你喇,又會咁純情嘅。俾著其他仔嘅話,一早就已經掃下同揸下我大脾啦。送到埋口都唔識食,下次唔好咁蠢喇」Lily一邊講一邊拎頭。
你都唔知我內心交戰咗幾耐,先成功控制住自己唔好色心起。
「不過都證明我冇睇錯你,果然係正人君子,如果唔係我點敢帶你上嚟。如果我對嗰個Parco做返同一樣嘅嘢,佢肯定已經對我唔知點啦,我仲唔渣都冇得淨」
「原來係想試我同玩我……」我細細聲自言自語。
Lily企咗起身再遞咗2份譜俾我,然後就唔知行咗去邊。
「喂,咁易唔開心㗎咩。練咗嘢先啦,最多我請你食飯補數」
我冇應佢。
我唔係因為嬲所以唔應佢,而係真係想快啲練好,再快啲返屋企休息。
過咗15分鐘,門口突然有鎖鑰聲。
唔通係Lily爸爸媽媽返嚟?
如果俾Lily屋企人見到我同佢個女孤男寡女共處一身,會唔會即刻融咗我㗎……