係衰咗，預咗比巴絲插架啦，但都要面對！諗咗好耐，得出以下總結，現拋拋豬，希望日後有心搞年宵嘅巴絲可以參考，勿重蹈覆徹（講得唔好，請隨便賜教，真心想學嘢
）：1. 錯判市場：行維園嘅人消費力唔係我哋當初想像咁高，好多時候價格係主要考量因素（自家設計公仔成本高，定價難有下調空間，而好多行維園年宵嘅人就覺得貴，完全冇諗過要買）
＊反省：淨生產成本最好控制喺$20以內，咁樣件貨賣$50都有一倍有多嘅利潤（之前有連登巴打話行年宵，50$或以下可以買返去玩吓；$70或以上就要諗清楚；$100或以上就唔洗諗…都幾有道理！）
2. 錯選貨品種類：Cushion呢啲嘢雖然輕，但太脹太大件啦，一大箱可能先得廿個，存貨成本大增；加上檔位放唔晒啲貨又要補，咁樣運輸成本又高咗…運一轉三、四百走唔甩，要搬咁大貨入場行到自己檔位都需時同人迫…
＊反省：意念嘅載體最好係夠輕、夠細、夠扁平，咁樣對生產成本、存貨成本同運貨成本嘅控制上都較有利。
3. 過份原創：意念愈原創，愈需要俾時間消費者去注意到你、認識，同埋理解，而行年宵好多時候快行快過，唔係成日有機會、時間同空間同個客互動，佢第一眼見到冇興趣就會望其他嘢。
＊反省：淘寶抄襲侵權我就100%唔支持！建議二次創作，將原創性建基於一啲已經出名嘅嘢上面（二次創作作品一定要同原創作品有夠大分別先有價值同賣點）。
4. 低估人手需求：維園年宵真係要好多人幫手，每晚都真係要差唔多至少八、九個人，仲一定要有Active嘅人去幫你叫賣（最好係女，靚女更好）而我哋呢啲唔active嘅毒撚最好都係幫返舖內admin嘢，企出去真係未必有用，甚至有反效果。仲有！記住每晚叫多兩至三個backup黎，因為你預會有人放你飛機/臨時唔得閒…
＊反省：人手安排要比充足更充足，分工要做好，記住搵active囡囡出去叫賣，其他人可幫手執貨、收銀、行site…仲有，你身邊隨時臥虎藏龍，如果搞年宵，記住同身邊朋友講，問佢哋有咩幫到手（好似我今次咁，搞年宵先知原來有朋友讀architecture，好多嘢都識整，但當我知道嗰陣已經年廿八，太遲了…）
5. 即場檔位宣傳同佈置失當：我哋太重視Facebook Page同埋其他媒體宣傳，但忽略咗最重要嘅即場檔位宣傳同佈置。首先，我哋冇呢方面人才，亦都冇詳細諗過呢方面嘅細節，尤其喺執行層面上。
＊反省：叫賣嘅人嘅企位、補位等等好重要，同埋產品/攤檔嘅賣點一定要好明顯咁show出嚟俾人睇到，人哋真係冇時間埋嚟慢慢聽你講；另外唔好忽略即場檔位宣傳同佈置呢一環，一早要諗定同埋最好搵埋相關人才幫手。
6. 入貨太進取：我哋一開頭都估啱數，只打算入600隻公仔，但當見到入600隻同入1,200隻嘅單價差好遠，再加上當時想進取啲，想搵大錢，就搏一搏，決定入1,200隻公仔…最後，我哋剩返差唔多一半公仔存貨；另外，我哋仲有賣風車，由於好多廠商嘅MOQ（最少訂購量）都要3,000，所以最後我哋就只好入3,000個…唉，最後，剩返差唔多三份二風車…
＊反省：保守啲好，反正年宵搵唔到咩大錢；同埋唔好揀MOQ咁高嘅產品種類做載體。
