社區藥劑師，健康/藥物問題 你問我答

早排小弟開左個post，估唔到大家咁踴躍問問題可以開到第二個Post
多謝正皮 小弟好感動

Post 1: 毒L 藥劑師，你問我答
https://lihkg.com/thread/849180/page/1

其實上次都有巴打發現左我地其實係一個藥劑師嘅團體
我地係藥劑連線 (Pharmacists Connect)，係由一班年輕嘅藥劑師創立
希望可以令多啲香港人知道藥劑師嘅功能，提升大家對我地嘅認知
歡迎大家比個like我地，我地會不定時發放下健康資訊咁
https://www.facebook.com/pharmacistsconnect/

歡迎大家繼續問任何問題
無論係健康問題，藥物問題，定關於藥劑嘅問題都OK架~ ~
而且最好講得詳細啲，例如你嘅病史，詳細嘅症狀
(因為藥劑師都要問症先可以幫到你架，如果怕羞可以直接Inbox我地個FB Page )

點先算違禁藥先

已追蹤，支持巴打

hi 巴打又係你
上次問完鼻敏感藥, 食左就好dd
但都仲係成日流鼻水, 想問係咪要用類固醇?

K仔街房入唔入？
我發現好多都唔入inj form
問咩針都冇

利伸： 冇追post 做所有野都係合法有PX

你好呀
想問巴打食左鼻敏感藥係完全唔留鼻水定都會有少少?
平時啲鼻水係清定黃?

類固醇係可能會用嘅，不過一般只會用噴霧only (口服係for 超嚴重嘅病情用)
但係症狀好嚴重，日日食抗敏感藥都搞唔掂，而且係會嚴重影響生活質素的話，就可以考慮類固醇 spray
如果係季節性鼻敏感就可能用2-4 weeks，如果係嚴重病例醫生都可能會建議長用

詳細如果巴打有興趣再講

因為正常呢啲藥社區藥房唔會有病人來配，所以正常都唔會有Stock
事關呢啲針劑基本上只會係 診所or 醫院 先會用
所以如果你要K仔針，唯有去醫院先會有
(大部分診所都唔會有，有醫生紙都冇用)

但巴打係醫學上係有需要要用到 K仔針
定其他針劑?

K仔針純粹問下姐

前排某A字針劑全港冇貨 搵sell屎都話冇 公司又要急住用 唯有咪落街房問下

係完全唔入針 定 選黎入？

針會入少量，如果有客配開 or 幫人訂
但平時就好少keep stock 嘅
(之前都可能會有鹽水/ water for injection，但改law 後全部要醫生紙後就好少keep 了)

始終醫藥未分業，好少針單會出來配

行內人工雖市場浮動
一般3x - 5x k都有 (大型連鎖會穩定啲)

利申：4xk

新post留名
做左幾年先

想問有關美容嘅野 唔知關唔關事
最近塊面兩頰不斷keep住生油脂粒
用過有benzoyl peroxide嘅暗瘡膏
隔日會好少少 但係一冇用又繼續生大粒啲
有試過bha 但可能只係用過四五次
所以未見有效果
想問點可以清走啲暗粒？
另外仲想問用咩會減少紅印？

幾年ja
小薯一個

有冇膿？生左好耐? 紅唔紅?
你確定係油脂粒嘛? 定粉刺?
你google 下 毛囊角化（keratosis-pilaris），睇下啲症狀似唔似

如果真係油脂粒的話，benzoyl peroxide未必會好有用
因為佢係針對暗瘡 (殺菌/ 消炎)，但油脂粒係關油脂分泌 & 毛囊事
如果係油脂粒你可以考慮以下：
1. 做好保濕工作；可以考慮使用含有尿素 (Urea)的潤膚膏，濃度越高功效越好但都會越油膩；尿素可以軟化角化皮膚，亦可以改善乾燥的情況；
有少部分病人用含有果酸嘅潤膚產品也會有改善，但要注意果酸可能會引致皮膚過敏嘅情況
市面上面個啲 x粒消 其實都係Urea 呢個成分來

2. 可以考慮係沐浴個陣使用一些海綿去輕輕的搓洗毛囊角化的地方，但注意不要過量搓洗，否則可能會刺激啲皮膚 (尤其係面未必好，如果係身就可以考慮下)

3. 避免刺激患處，唔好成日用手去觸碰OR抓癢；如果留左個疤痕OR令皮膚色素因刺激而加深，會好難消除患處嘅痕跡

如果真係似毛囊角化（keratosis-pilaris）就仲有藥膏可以考慮用的

知唔知邊度有呢隻藥賣
搵左幾間都冇
唔該曬

我塊面好多暗瘡，我個fd就推薦我用呢隻搽落塊面度，用咗一排feel到係好咗啲，但係啲暗瘡印重喺度

想問吓用乜嘢藥膏先可以去走啲暗瘡印？

你去Rx 藥房，大部分冇存貨但應該可以幫你訂架
真係冇就去萬x，屈x叫個藥劑師幫你訂 (但可能貴啲)

btw 偏頭痛係HK真係好少藥可以用
唔似外國咁好多選擇，而且藥房一般都會有存貨有處方就可以配

5htp會唔會有依賴性？老人家食唔食得？
Thx

有冇打算做翻HA?

rx搵左幾間 暫停冇間有
偏頭痛藥係咪少人食？多數人食止痛？

你個支係A酸藥膏來，都幾有效，不過皮膚好易會乾
如果係女仔要注意避孕

講真去暗瘡印真係好難搞，一旦form 左就好難退
azelaic acid 20% 研究顯示係有少少效果去印嘅，可以試下嘅

不過當然啦，最好嘅方法都係預防勝於治療，係個暗瘡仲係細細粒個陣早啲用暗瘡藥膏等佢唔好發大
同時注意生活習慣：
1. 選用合適的潔膚產品來洗面，一日一至兩次，盡量挑選無磨砂的產品。減少做刺激皮膚的行為，如自行擠壓暗瘡及經常觸摸暗瘡
2. 做好防曬措施，避免曝曬裸露的皮膚，呢啲都可以減少暗瘡印的形成
3. 培養規律的生活習慣，每日都要有充足的休息，減少進食垃圾食品如汽水及薯片等等
4. 盡量少化妝，因為許多化妝品內的化學物都會增加油脂分泌及刺激暗瘡生長

老人家咩事食
抑鬱定失眠個啲？

5-HTP (5-Hydroxytryptophan) 一般我都唔會建議人食，因為其實佢係好多病個evidence 都係一般般 (Depression 叫做最多研究，但效果其實都係好弱 & 啲研究都係好小型)
如果真係Depression 建議搵醫生去建立返個diagnosis 先，再確定下一步行動

但我知香港好多人係當5-HTP係保健品咁食
可能係有啲心理作用