由烏日策去波斯尼亞嘅薩拉熱窩（Sarajevo），大約二百公里，車程唔長，但喺羅馬尼亞坐過廁所後，對東歐交通都冇咩期望，所以都預早一日買定飛，見車站職員輕輕鬆鬆賣咗比我地，我地都感歎塞爾維亞真係一個好地方，至少唔會好似羅馬尼亞咁唔比人買定飛但之後又上唔到車
第二朝我地就懷住興奮嘅心情去波斯尼亞進發
結果Delay咗一個鐘
車嚟到之後，一班冇飛嘅本地人突然由唔知邊度衝出嚟，搶先上咗車，仲向司機即時買飛。佢地上完之後，架車好似冇乜位了
但我地諗住一早買咗飛，唔會有問題，仍然淡定地上車，點知比個司機鬧鳩我地
司機：你地見唔到架車滿咗啦咩，仲走上嚟？
我：但我地尋日買咗飛⋯⋯
司機：買咗飛大晒？
我：劃咗位⋯⋯
司機：你趁我未走好快啲返去櫃台退錢啦，遲咗退都冇得你退呀
我：咁都得
被趕落車嘅除咗我地，仲有一對老夫婦，原來係來自瑞士嘅遊客。見到佢地個樣成七八十歲都仍然有氣有力出嚟Backpack，真係由心底佩服佢地
搞掂好退錢手續後，我地就商量點算好，因為我同女神已經Book好咗薩拉熱窩嘅住宿，所以希望今日過到去，而瑞士伯伯同婆婆其實唔介意喺度留多一兩日。
伯伯叫Urs（右二），婆婆叫Regula（右一），一齊被趕落車都係一場緣份，佢地就提議搭的士去Sarajevo。一問價，的士司機（中間）就開價100歐羅
而家諗返落，的士嚟講條數唔係貴，除開四份都係每人二百零蚊，難怪Urs同Regula眼都唔眨。但當時我地都嚇咗一嚇，最後改成坐到邊境過咗關再睇吓點，就變咗30歐羅有交易
好快就到咗排晒長龍又爛爛地嘅關口
呢兩日掛住執嘢冇出文
有返網絡再報告新旅程同埋繼續連載
兩萬幾應該夠
