直到世界盡頭（II）

打定輸數嘅時候，見到有個幾烏克蘭feel嘅學生妹出現咗喺車站中央

我對於烏克蘭嘅女仔係冇抵抗力，就好似有隻上帝之手推我過去個女仔度。

戇鳩其實人生淨係見過一次烏克蘭嘅女仔，就係喺聖彼德堡CS嗰次幫我剪頭髮嗰個 。見得一個，鬼識分咩佢烏克蘭定斯威士蘭咩

總之，就去咗問佢係咪搭同一班車。

以為過咗鐘一定唔係，點之天無絕人之路，原來佢都係搭12點去Lviv！佢係真烏克蘭人（冇圖），搭車係為咗返屋企。因為經常來往呢兩個地方，佢都識講波蘭文，亦一早打咗電話比巴士公司，知道呢班車會Delay一個鐘。

嗰刻突然覺得好好彩，原來只係Delay咋

即刻將呢個喜訊話比女神聽，叫佢唔好比錢book hostel住。原來快樂就係如此簡單

等到一點，終於上車，但原來係惡夢嘅開始。

後來同女神講返，問起旅程中最難頂嘅巴士係邊一程，佢唔駛一秒就講係呢一班 一上到車，就發現幾乎滿座，但買飛嘅時候又冇得劃位，結果要分開坐。巴士冷氣好弱，完全感覺到全車人呼吸嘅氣息。呢啲都係小事，最重要嘅，係上車前因為驚冇得上同埋唔想喺車站比錢入廁所而忍咗好耐尿，但上到車又發現冇廁所 結果一忍就忍咗5個鐘，去到邊境。

去到邊境，因為未有烏克蘭嘅錢，女神就好慘咁企咗喺廁所出面，等待好心人嘅施捨 我就衝咗去隔離嘅找換店，唔鳩理匯率咁換咗先講。結果都係女神快啲，我唱完錢出嚟佢已經入咗去。而我就好似患上咗奇怪嘅疾病咁，早就慣咗十個八個鐘唔去廁所都冇感覺

究竟我個腎係咪喺波蘭的森林嗰時比Martin毒壞咗



烏克蘭Lviv

you only live once=yolo

出現了

終於翻嚟啦

終於番黎啦巴打

樓豬加油
呢個post應該係全登最好睇嘅post
內容罕有，敘事手法又輕鬆易讀
你唔寫落去嘅話真係令連登失色不少

出現了 支持
樓主消失得耐到我幾乎唔記得個遊記之前講緊乜
好快咁由頭睇咗一次

直到世界盡頭唔錯
我聽講有香港人計劃走遍世界, 但個名叫「尋找自殺之旅」

anyway, 佢只係計劃中, 我當佢鳩嗡算

烏克蘭嘅關口可以話頹到仆街。之前以為可能過境嘅時候會好似入俄羅斯咁，比人當咗係中國人，然後驗護照驗屍咁驗先放我地入去。結果係海關上車收晒全車人啲護照之後，冇耐就自動派返比我地，而入面就順利咁蓋咗印 唔駛落車，唔駛檢查行李，完全話之你帶咩過去



望住passport越吸越多印，係開心嘅

過咗境，最大嘅感覺係啲人由過半溝通得到，變成大多數溝通唔到。我地落咗車，竟然有種人海茫茫唔知去邊嘅感覺。喺烏克蘭，其實我地係有個目的地，第一站我地想去睇睇傳說中嘅tunnel of love，唔知係咪所有巴絲都聽過，但對當時嘅我嚟講，佢喺除咗切爾諾貝爾核電廠之外，唯一我所知道嘅一個烏克蘭地方。tunnel of love係一條由樹組成嘅隧道，上網睇啲相好鬼靚，名又浪漫，我亦係用佢嚟說服女神陪我嚟呢啲騎哩國家

要去嗰度，先要由Lviv坐巴士去Rivne，再搵車去Klevan，然後再搵辦法入去。真係聽到都覺得麻煩。網上嘅資訊唔係完全冇，但亦唔多，當然都可能係我持住自己出咗嚟個幾月，冇做足功課就出發 以為會好似喺波蘭同莫斯科咁，點都搵到人幫手。但原來呢度同蒙古都差唔多，唔同嘅係，喺烏蘭巴托我唔駛點自己搞啲咩，報咗團就等比人服侍，喺呢度根本就一啲旅遊業嘅氣息都冇，冇人做生意叫你報團，唔識烏克蘭文或者俄文就真係碌葛咁



喺車站望嚟望去，想搵吓有冇Рівне（Rivne嘅西里爾字母版 ）字樣嘅車飛買，但都唔係好見到。望住個個本地人輕輕鬆鬆鄧梓峰咁買飛，我就好似唔識用八達通嘅大陸人咁卡咗喺個閘到唔知點算，係有啲無助。呢啲時候，我唯有同自己講，難我唔到嘅！咁先似係去旅行丫嘛

淨係聽過元朗個YOHO TOWN

我都由頭睇完先識得寫返

去完就唔捨得自殺架啦

失業左兩個月有多日日搵工好頹廢，見你出返PO搞到我都想出去玩下，去增廣見聞總好過日復日咁樣搵工等電話面試

I know that feel

我都唔敢支持或反對，每個人嘅負擔都唔同，行業性質都唔同，自己諗清楚就得，巴打加油

正當我仲諗緊點樣扮作縝定時，兩個英文流利嘅當地人就出現喺我地嘅面前了

唔知係情侶定兩公婆，總之佢地似乎都去開旅行，見到我地又窮酸又迷惘嘅樣就話要幫我地搵車去Rivne 首先原來我地睇錯咗車站，去Rivne嘅巴士係要去另一個地方先有，然後佢地二話不說就幫我地Call咗的士，叫司機直接車我地去嗰個車站。

Lviv嘅的士唔貴，一般嘅距離都係幾蚊雞或者十幾蚊就去得到。我好少自稱窮遊，因為我唔太鍾意呢啲標籤，而且有需要又值得嘅時候其實我唔介意比錢。呢度啲的士絕對唔會超出我地嘅預算，所以都爽快接受人地嘅好意，速速上車。



我地要去嘅就係呢個叫羅夫諾嘅小城，去到再搵車。搵啱車站之後，一切就冇咗難度。



落車之後，好似已經晏晝四五點，當時我望到車站附近有啲住宿可以落腳，但考慮到呢度除咗個Tunnel冇乜嘢做，似乎不宜久留，就試吓衝一衝睇吓可唔可以即日離開。



即刻就上埋去Klevan嗰架巴士。呢架係短途巴，有啲似香港啲小巴咁，即係要嗌有落先會停車嗰種。我當然唔識嗌有落 就柒柒地咁話想去Tunnel Of Love，但個司機好似唔識呢個地方

即使我比埋烏克蘭文個名佢睇，佢都一副唔知嘅樣，究竟係佢唔想答我，定係呢個地方咁唔出名？又或者佢係一個當地人狗也不屌嘅濕鳩景點？ 我地決定上咗車先算，睇住GPS睇吓邊度落車。

一陣間之後，我見到路邊有個路牌指住Tunnel Of Love嘅分支路，見架車即將越行越遠，我地就機不可失咁衝咗落車，但個牌寫住嘅係仲有8公里

當時已經成5點幾，雖然天未黑，但要行8公里再出返黎，只會比華沙森林隻佛地魔更加恐怖。

明明Google Map話行廿幾分鐘就得，點解會變咗咁遠？冇電話卡上唔到網，冇得再Check。想再問人，但環顧四周，又荒蕪到鬼影都冇隻

希望早日返到份岩自己既工，同埋其實想進修但要有份好穩定既工作前題
或者出去探索完會有啲啟發都未定

咁既處境會好絕望，搵唔到人問冇人幫到你，戇居居咁

樓主加油，人生就係咁㗎啦，有起有落，呢度仲有好多人等睇的，而你嘅遊記亦會影響好多人的。

今日放工已經好夜，聽日補返