直到世界盡頭（II）

樓主之前揾好多

窮撚公屋仔一名

同Ahmit一齊跟咗Soheil嘅波斯波利斯團 架車去到中途仲有個德國仔上咗車，即係上次張合照後排金色頭髮嗰個。

波斯波利斯係以前波斯帝國嘅首都，但被亞歷山大大帝打過去嘅時候焚城燒晒，就淨返今日呢個遺址。佢嘅歷史可以追溯到公元前五百幾年，同希臘嘅巴特農神殿有得比。以佢歷史嘅長度同埋保存到嘅部份嚟講，佢嘅文化價值似乎好高，可能係因為伊朗始終唔係旅遊業嘅大國，所以名氣相對細，但絕對係有個有潛力嘅古跡。


高處望落去就係咁，見到冇遮冇擋都知好熱


用頭巾擋住毒熱嘅太陽。




Soheil有一路介紹每個雕像有咩意思，啲畫又代表緊啲咩，只係我已經唔記得晒 不外乎係啲人戴住啲咩拎住啲咩就代表佢係當時嘅某個階級，又或者係喺一啲日子佢地會進行某一啲儀式，諸如此類。聽嗰時都覺得幾得意，如果冇Guide自己行就可能唔知睇緊咩。

原來我唔係讀歷史嘅材料，睇完都真係唔記得佢講過咩

或者可以歸咎吓以前讀書好少講波斯歷史？諗返轉頭，以前讀西史都係集中喺一戰二戰同冷戰呢啲西方史，耐少少嘅都係主要講工業革命、一係就希臘先賢。同伊斯蘭教關係比較密切嗰啲地方，包括波斯帝國，阿拉伯人點樣改變成個中東同北非，好似喺歷史書都消失咗咁。就算係西方史，好似都好少提及西班牙點樣入侵中南美洲，殺鳩晒啲原住民，英法嗰啲又點樣搞到今日啲非洲人咁撚窮。

定係阿Sir講書嘅時候，我完全瞓着晒所以miss咗

利申理科，History讀到中三

總之，我對伊朗呢個地方嘅歷史就好少認識。以至Soheil講一啲好似常識一樣嘅嘢嘅時候，我都係冇聽過。得伊朗迷Ahmit先可以流暢地同佢狗噏辯論

離開咗波斯波利斯，去咗另一個遺址嘅影相點。Soheil問我地要唔要駛架車入去影相，但我地都話要買飛不了 女神直情話太熱唔肯落車



閘外留影

去完波斯波利斯，返到Soheil屋企，唔記得係我定Ahmit提起不如去Maharloo Lake。

Maharloo Lake係一個粉紅色嘅湖，之前上網見到啲人話好靚，我又冇睇過類似嘅地方，就決定去睇下。Soheil馬上打電話問佢啲Fd得唔得閒車我地去，收返Snapp咁上下嘅價錢，真係好識做生意

喺嗰度我地發現伊朗人嘅另一面。



人山人海嘅粉紅湖，好多設拉子嘅人都特登嚟呢度賞湖。

但係由一落車嗰刻開始，我就隱隱覺得唔妥，因乜事呢度會咁臭架呢



成個範圍都充斥住一種垃圾腐壞嘅味道，又因為湖嘅鹽份太多，湖水完全唔適合魚類生存。成個環境都顯得好冇生氣



周圍睇下影下相嘅同時，就有一個伊朗嘅家庭衝埋嚟叫我地同佢影相 嚟咗伊朗個幾星期，已經習慣咗喺街上面好似明星咁嘅感覺，人人都覺得你好得意，爭相同你影相加你IG同埋傾偈 但今次唔同嘅係，影極都未影完，然後一家人影完又有第二班人衝過嚟要再影。影吓影吓，同我地一齊去嗰個德國人就開始燥，因為太陽越落越低，但佢完全冇機會靜靜地影相。

由最初面露不悅，啲伊朗人冇反應，繼續chur住影相，到最後德國仔爆粗fuck佢地

堅決唔影屌鳩佢地之後，終於可以好好咁欣賞



有時熱情同煩到人，可能只係一線之差。我諗佢地冇心打擾到人，只係冇諗過未必人人都鐘意咁樣。而喺香港，普遍嘅人可能係調返轉，好多時內心想搵對方，但驚住打擾到人就變咗太多內儉，反而顯得冷漠。



過猶不及，太過熱情或者太過冷淡，都會搞到唔開心。但諗深一層，都不過係一種文化差異。或者應該將重點放喺對方好嘅一面，學會欣賞，反而更好

掛住做野冇推
推

個粉紅湖

個粉紅湖幾似eva個海

喺設拉子甚至全伊朗，我最鐘意嘅地方，一定係呢個叫做Nasir ol-Molk Mosque嘅粉紅清真寺。

成日都錯手未打完就出po

等睇新post

喺外面睇落都未覺有咩魅力，但入到去，就自自然然比佢嘅設計吸引住。



利用太陽光射落嘅有顏色嘅窗嘅透光效果，令到成個清真寺入面都好似萬花筒咁灑滿咗七彩嘅陽光，有美感得嚟亦好溫暖。因為時間問題，我地去嘅時候啲陽光已經射得冇咁斜，如果再早少少嚟，可以想像到啲光嘅角度會更加靚



雖然我影相唔叻，但都忍唔住喺度影咗一堆合照





鍾意影相嘅巴絲打真係唔可以錯過呢個地方，我會封佢做頭兩個月最值得影相嘅人類建築 缺點可能係人比較多，想就吓位影啲冇人入鏡嘅相都唔係咁易，一見到空位就要把握機會





Google一下就有好多更靚嘅示範J圖，我就唔獻醜了



但講到設拉子嘅清真寺，就不得不提下Shah Cheragh，佢有個好型嘅中文譯名——燈王之墓。



好多時講伊斯蘭教，未必會細分佢地嘅派別，就好似我地會將天主教、東正教、或者基督新教嘅信徒通稱做耶撚。但事實上，對穆斯林世界嚟講，你屬於遜尼派定係什葉派，可能就會喺關鍵時刻成為戰場上嘅敵人。喺伊朗今日呢一刻相對冇戰爭嘅年代，Soheil同Ahmit都一致認為什葉派同遜尼派嘅分別對佢地冇大意義，就算知道眼前嘅人派系唔同，都絕對可以同對方做朋友。Ahmit係嚟自土耳其嘅遜尼派教徒，而Soheil就係喺伊朗出世嘅什葉派教徒。佢地傾偈嘅時候，都可以大方將自己嘅派別講出嚟，討論宗教時候嘅氣氛肯定和諧過香港黃絲遇上藍絲。但政治上，什葉派為主嘅伊朗仍然同附近嘅遜尼派國家勢成水火。

點都好，呢座燈王之墓就係因為成千年前有什葉派教徒被迫害，嚟到呢個地方避難，後來更加喺度落葬，而令呢度成為咗朝聖之地。

喺伊斯蘭國家，要進入呢啲朝聖地，女嘅包頭笠袍男嘅着長褲係常識。可惜我當日因為只係跟住Ahmit而嚟，事前冇準備到，因而着咗短褲而入唔到去 門口守門嘅叔叔叫我去隔離舖頭買條長褲。



用最平嘅價錢買咗條睡褲咁嘅物體 女神嗰件就有得借。



入面一句講晒就係好閃。

喺設拉子嘅日子相對於伊斯法罕，可以話充實好多，又可以話攰好多。短短三日入面，我地跟住Ahmit去咗花園、詩人陵墓、兩個清真寺、粉紅湖，仲未計返到屋企都有唔少嘅時間係同Soheil嘅屋企人一齊食嘢傾偈；喺伊斯法罕嘅時候，我地日日都去伊瑪目廣場，同Toni、Nicole鳩FIng Fing，見太陽猛得滯就返房開冷氣瞓晏晝，涼返啲又再返去廣場散步，過嘅係完全唔同嘅兩種生活。

Ahmit就好似係極端嘅旅行團主義者，鍾意諗好晒行程一個一個咁攻略，同佢一齊係會覺得每一分鐘都有所斬獲；而Toni、Nicole就係無為而治主義者，鍾意留好多時間容許一啲突發嘅事件插入，但亦可以全日咩都唔做。冇話點樣嘅方式先啱，我地喺呢一年入面，不斷喺呢兩種態度之間游走，只係越到後期就越傾向懶惰式旅行



嚟到最後一個下晝，都要陪Ahmit行紀念品舖，佢要買啲磁石貼返去比朋友 而我係唔買呢啲嘢嘅 呢個地方都有名堂，叫做Vakli Bazaar，但比起德黑蘭嗰個賣Bra嘅巴扎，相對就冇咩特別了

臨走之前跟佢去埋Quran Gate，係一個類似拱門咁嘅物體，重點係陪佢行上後面一座山仔度睇日落。女神話行山出汗不了，就直接留喺的士到等我地行完返落嚟 其實有啲擔心，一個女仔一條友坐喺架的士度，到底當時那來的信心



唔算好特別嘅景色



Ahmit港女上身咁不斷要我幫佢影相，我就催佢快啲落山 陣間我女神比個司機溶咗點算

老老實實，我真係唔識影相，呢兩個Post一路以嚟都辛苦咗各位巴絲，要睇我啲又冇構圖又成日對錯焦嘅鳩相 但相比起Ahmit同埋一路上遇到嘅外國人，我都算影得幾靚，因為佢地啲相係十張有八張都會用手指遮住個鏡頭，或者唔係手震就冇咗半邊面咁 拜打卡文化所錫，香港人影相都真係幾勁

冇等到日落，再用埋迫佢減肥嘅速度落返山，架的士都仲乖乖地喺度等緊我地。去到巴士站，準備坐上去亞茲德（Yazd）嘅巴士，設拉子嘅旅程總算完結。我同女神都不約而同覺得好攰。雖然Ahmit都係去Yazd，但我地都決定靜靜地咁抖返一日再算，而Ahmit當然好積極咁打算一到埗就去睇拜火教啲遺址。就係咁，我地就同Ahmit相約一齊坐埋最後呢程巴士，落車之後就講再見



唔記得點會影到呢張錯體相 只知道佢就係車我地去伊朗最後一站嘅通宵巴士。