直到世界盡頭（II）

我將來想有個trip係保加+羅馬，但其實我中意保加多啲

保加利亞可以揀6月有玫瑰節果陣去 我6月去但冇去玫瑰節 諗返都幾後悔

Day 73，保加利亞，索菲亞。

一直冇刻意去講Day幾Day幾，有兩個原因，一係因為旅途中唔會日日都咁精彩，有時瞓醒覺冇乜嘢想做，落去接待處講聲住多一日，落街行吓超級市場，搵套戲上網睇吓，噉就一日，平凡到冇乜嘢可以講。二就係其實一日一日咁數，好驚會嚇親自己，到咗忽然諗返轉頭嗰吓，先驚覺原來噉就過咗好幾個月。

嚟到保加利亞嘅首都，希臘人眼中嘅貧民窟，旅程不經不覺嚟到第七十三日。

由內蒙古開始，一直穿過戈壁，走入俄羅斯，入到歐元區驚死蝕底咁六日跨越波羅的海三國，去到波蘭、土耳其、伊朗等等都係一個一個景點咁攻略。雖然中間唔係完全冇停低過，但係喺烏克蘭基輔同伊朗亞茲德嗰兩三日休息，真係完全唔夠。喺索菲亞落車嗰一刻，我地不約而同地發現我地真係好攰好攰。明明係朝頭早已經忍唔住一去到Hostel即刻就瞓覺。

然後連續三日，我地都過得好唔「旅行」。

例如：



同女神行街街



行過就飲咖啡。希臘同保加利亞都好流行呢種一大層奶蓋喺面嘅Frappe，喺Sofia 2蚊港紙就飲得到



睇戲。好耐冇入過戲院，40蚊港紙3D IMAX




遊車河。



鳩行。



撚狗




食保加利亞菜

仲有就係有一個下晝用咗嚟行啲大Outlet。呢度嘅Outlet真係啲公司開喺啲好僻嘅地方賣埋嘅賣唔出嘅舊貨次貨，好似深圳IKEA噉嘅大細但就鬼影都冇隻，人流同東涌東薈城嗰種所謂Outlet差咗一萬倍。

同埋每日都好晏起身同好早瞓覺



最後補返一張景點相，以茲證明真係去過索菲亞。打卡，有時都真係有用的

希臘人仲好意思話人貧民

留名推POST，請巴打繼續出

會繼續出

前兩日同屋企人去咗澳門玩，兩日冇文

而家出返

喺索菲亞飲飽食醉三日，眼見冇乜嘢做，就直落羅馬尼亞嘅布加勒斯特。

喺呢度，我地試咗另外一種有趣體驗，就係用Couchsurfing，但唔係住人屋企，而係純粹搵咗個羅馬尼亞妹出嚟玩

有時用CS，都會遇到一啲有心想同你交流，但礙於屋企唔大或者有其他人而唔方便接待你嘅人。喺布加勒斯特，就有個女畫家想邀請我地去睇佢嘅畫作，同埋帶我地喺城市閒逛影相，但比唔到我地留宿。



參觀佢嘅畫郎兼屋企。令到成個布加勒斯特比我嘅感覺就係一個藝術之都，雖然可能得佢一個係噉



同我地周圍搵地方影合照。佢唔係專業嘅攝影師，連屬於自己嘅相機都冇，全程只係借我地部電話嚟影。但佢嘅構圖都唔錯，而且喺呢個旅程入面，我地一直都覺得影合照唔容易，直到喺希臘終於忍唔住買咗個腳架，情況先改善咗。所以今次我地都影得好開心





冇世界級嘅景點，但係一齊走過嘅地方就係最靚嘅地方。



布加勒斯特相比起索菲亞係比較靚嘅城市，物價依然低，仍然係停低落嚟休息同慢慢生活嘅好地方

特別一提，經歷咗土耳其、伊朗、保加利亞呢啲冇啖好食嘅國家，就算物價再低，都難以接受日日出去食啲又鹹又乾嘅嘢⋯⋯

呢個時候，女神研發出用Hostel嘅簡陋廚具嚟蒸水蛋！



呢一餐可能係頭80日旅程食慾最高漲嘅一餐，好賢淑呀

其實我覺得咁樣簡簡單單先係最浪漫

金色走廊張相既構圖世界級

記得當時甚至旅程中後期諗返，會覺得呢段時間有啲無聊，甚至浪費咗。但完晒之後睇返，又覺得其實嗰段日子好開心

靚過我自己影嗰啲好多

羅馬尼亞嘅布拉索夫（Brasov）係我幾鐘意嘅城市，因為靚得嚟之餘，亦可以行吓山。





用咗半日行咗上後面座山。



望返落嚟就係非常一群設計一致嘅紅屋。但噉樣睇又唔特別靚

其實大部份人嚟Brasov，都唔係為咗個城市，而係為咗去Bran's Castle，我地都唔例外。



由Brasov坐一程巴士就去得到，但由於巴士並冇預售車飛嘅做法，等車嘅人又比想像中多好多，啲人亦都唔會排隊，所以上車嘅情況只能用混亂嚟形容。

歷史上座城堡大約一百年前皇后住嘅地方，而佢出名嘅原因，係因為德古拉呢部小說就係以佢為藍本而寫，所以佢同時又叫做德古拉城堡。



我地都唔係德古拉嘅粉絲，嚟到都有種「就係噉嗱？」嘅感覺



完全估唔到會有咁多人嘅一個景點，迫到乜都睇唔到。



圍咗欄嘅位置會好啲。但係喺遊客嘅龐大數量下顯得好細，並冇城堡嘅氣派。



望返落街會開心啲。



匆匆跟住人潮走完一圈就出返去。論人流成個東歐除咗之後會去嘅十六湖國家公園，呢度真係最多了。雖然本身期望唔高，但仍然可以帶來失望，我地都不禁恥笑專登走咗過嚟嘅自己。

喺路上不斷都遇到呢個問題，就係有啲地方預咗唔會太特別，只係覺得一場嚟到，唔去有啲可惜。最後就會跟住大隊咁去咗，去完又覺得早知唔去。但去到下一個地方又再重覆犯錯。

食之無味，棄之可惜，正好用嚟形容呢啲雞肋景點。

到底人幾時先至學識斷捨棄？

喺Bucharest同Brasov兩個城市唔覺意Hea咗九日 唔係話呢度特別舒服，感覺就係夠鐘休息，所以就抖抖了。

身心精神返少少之後，就搭車離開羅馬尼亞。首先要去離塞爾維亞較近嘅Timisoara。

羅馬尼亞嘅巴士好過癮，就算係由一個城市搭去另一個城市嘅長途巴，都冇得預早買飛。我地提早一日去到巴士站想買聽日嘅飛，車站職員叫我地聽日直接過嚟等車就得。點之到咗第二日，我地先發現有好多人都係同我地等緊同一架車

車嚟之後，最不幸嘅事情終於發生，就係根本唔夠位坐 走去搵返尋日問過嗰個職員理論，佢只係表示佢冇辦法

司機都知我地尋日嚟問過，想幫我地，靈機一觸諗到呢個解決辦法。



女神獲得正常座位一個，我就同兩個西班牙遊客Share廁所 原來司機話反正個廁所用唔到，就索性執埋啲雜物叫我地坐入去 我地三個人就兩個守喺出面，一個坐入面，輪流換位直到落車。

好彩唔臭

過咗一半車程，啲人開始陸續落車，我同女神坐返埋一齊後就正式開餐，食垃圾晚餐。



而家都唔明點解當時會食晒一罐粟米當係晚飯