直到世界盡頭（II）

嚟到伊斯坦堡，印象中都係吽吽哣哣，未瞓醒咁。

第一步都係搵個地鐵站，去Hostel check-in補眠。



今時今日嘅土耳其文已經用晒拉丁字母嚟表示，除咗加入咗諸如ç呢啲平時英文冇嘅字母，整體上都唔難辨識。慢慢對一對就好易搵到要去嘅地方



好多恐襲都喺地鐵站發生，落到地底我地不敢鬆懈，不停兩頭望睇清楚有冇可疑嘅人出沒。企喺售票機前面準備買飛嘅時候，就有個成面鬚嘅男人走埋嚟。

鬍鬚男 我
：係咪唔識買飛？
：係囉部機都唔知寫乜鳩。你可以幫我嗎？
：我就係嚟幫你嘅，跟我嚟啦！
：跟你去邊
：come on james

鬍鬚男帶咗我地去不遠處，嗰度地吓有個袋，佢慢慢打開拉鏈⋯⋯我心中暗驚，唔係收埋咗炸彈吓話

佢將入面一袋嘢拎咗出嚟，係一堆地鐵車飛嚟。佢話你地同我買，我平過部機兩毫子。原來因為佢地一次過買多幾程有啲優惠，條蛋散就一次過買好撚多飛，然後轉售比我呢啲散客。正諗住貪小便宜之際，諗諗吓見冇一個當地人會咁買法，為咗一蚊幾毫買埋啲不明來歷嘅飛好似搏唔過。最後都係冇理到佢。

就係咁，伊斯坦堡比我嘅第一印象，係好似大陸咁小心為上

到咗Hostel都一於少理，瞓返夠本。瞓醒後就周圍行吓搵嘢食。



過咗橋去到一個碼頭，好似尖咀碼頭咁，成街都係唔知鴿定海鷗。



離遠問到香嘅烤魚味



食完印象中懵吓懵吓又諗住返去瞓，喺返去嘅時候都係諗住搭返地鐵，而個地鐵站就喺條橋嘅上一層。



行咗上去樓梯之後，就係車站，但今次搵唔到上次用過嗰啲售票機。問職員先知要行返落去再經另一條梯上先買到飛，正擔心緊女神可能會嗌攰之際，幾個當地人就拍一拍我膊頭，叫我跟住佢入閘 佢輕輕鬆鬆鄧梓峰咁將佢張八達通連嘟三次，就帶埋我地入去，仲唔肯收返我錢

對於我嘅連聲多謝，叔叔只係瀟灑咁拋低一句：

Welcome to Istanbul

上次喺卡帕多奇亞遇到嘅順風車男，令我覺得土耳其都係幾熱情嘅國家。而伊斯坦堡嘅地鐵叔叔相比起嚟我認為係更加難得。雖然買一張飛係好小事，但諗深一層其實對大城市生活嚟講，係唔容易。當我地住喺車水馬龍嘅社區，好多事早就見怪不怪，咩膚色嘅遊客其實都見唔少，見吓見吓，好容易會變得麻木。喺香港，我地成日都會見到外國遊客嚟呢度玩，人地可能都會因為搭車搵嘢食呢啲小事而唔知點做，但唔好話伸出援手，更多時候係連人地有需要幫手我都唔會察覺到。

因為，外國人太普遍，根本就唔會去留意。

但係論國際遊客嘅數量，伊斯坦堡絕對係超出香港好多，畢竟整個歐美如果想窺探伊斯蘭世界嘅話，土耳其必定係佢地嘅首選；亞洲遊客，淨係一個中國，求其派幾架旅遊車都可以炸爆佢地個城市。作為遊客喺大城市被忽略，本來就係最自然不過嘅事。

但呢度，係唔一樣

但係好景不常，第二日我地只係喺街上面鳩行，女神睇吓衫，我就睇吓佢睇衫。過咗一日我已經對呢個城市放低咗戒心，雖然話就話有恐怖襲擊，但其實之前喺聖彼得堡都一樣有危險，好多歐洲大城市更加係重災區，但呢度至少少啲小偷。點知一時放鬆咗落嚟就中伏了



頹頹嘅舊區，地下都係爛的。



間中會有啲乏人問津嘅小食攤檔，唔知呢邊有冇小販管理隊



有時會路過啲餐廳見到啲人食水煙，都會想睇吓有冇機會試。但見到人地坐低嗰啲都係不覊嘅浪子，我又矮又毒仲要連講句英文都窒吓窒吓咁，就好驚唔識食夾硬坐低會好柒

最後都係淆底冇試到

試水煙唔成，比路邊一個賣雪糕嘅哥哥叫咗過去。原來係傳說中嘅土耳其雪糕。講真佢係冇乜特別，喺香港同大陸都見過唔少，就係有條友拎住條棍夾住支雪糕筒喺度左cup右cup玩雜耍咁。會行咗埋去嘅原因只係行過口痕，而呢度嘅物價一路都好正常，令我地不虞有詐。見佢係咁撩我地傾偈又影晒selfie咁，諗住十幾廿蚊支我地都照殺，甚至買夠兩支都可以，點知我地咬咗第一啖之後佢同我地講50蚊（港幣）一支 但佢嘅質素係M記雪糕筒再難食幾倍



而家睇返佢個樣都好撚奸

怪就只好怪自己傻仔冇問清楚價錢

喺伊斯坦堡，最深刻嘅可能係佢地嘅甜品。開到一街都係嘅甜品手信舖就有好多款唔同樣嘅Turkish Delight，但全部都好撚甜，甜到我覺得每一款都係一樣味。所以如果有時間，我認為不妨搵一間甜品舖坐低，會食到同手信舖唔同嘅嘢



甜品係女神嘅最愛，我雖然唔算好熱愛，但見到佢有好多款色揀，都覺得開心。甜就唔駛講，所有東歐中東嘢都係有咁濃味得咁濃味，甜嘅極甜，鹹嘅極鹹。但除此之外，佢地嘅整法都好特別，比如上面張圖後邊嗰碟原來係用雞絲整，叫嗰時以為係布甸點知一咬係雞肉 口感亦都好特別。係幾有驚喜嘅一餐。



最後一日喺土耳其，冇乜特定嘅目的地，只係喺啲大街小巷都穿來插去。



亦冇乜遇到特別嘅人和事。

坦白講，成個旅程入面，喺飛去拉丁美洲之前嗰三四個月，最難忘嘅都係開頭內蒙古嗰個濕鳩團，同埋蒙古戈壁嗰啲絕世風景，伊朗都可算係中間嘅一個高潮。但其餘嘅部份，可以話係相對低潮，乏善可陳。如果返工有所謂嘅扮工，咁旅行都或者都有扮旅行。就係你以為我過得好精彩，但其實我都只係鳩FingFing，唔知如何是好。由愛沙尼亞睇Old Town開始，一路走來，去過大大小小嘅景點，唔係唔好，但總係欠缺咗好震撼嘅時刻。不過旅行本來就冇可能日日精彩如初，有時今日嘅平淡，就係為咗襯托明日嘅激動振奮。

終於終於，喺旅程嘅第五十日，我地由伊斯坦堡嘅機場，出發去到德黑蘭。當時我地仍未知道，究竟傳聞之中嘅伊朗落地簽證，到底難唔難搞

終於伊朗喇

我地係坐Pegasus Airline由伊斯坦堡飛去德黑蘭。上機之前，我地用特區護照Check-In自然遇到阻滯

地勤人員攞住我地本護照，睇嚟都係前世未見過咁嘅款，揭嚟揭去又搵隔離櫃位同事幫眼，最後都要打比老細問咗一輪。其間只係識聽佢講Hong Kong China之類嘅單字，我地都見怪不怪。終於佢開口問咗我地一條問題：你地去伊朗駛唔駛簽證？

唔駛！

我反射動作咁講咗呢個大話，佢就出咗兩張Boarding Pass比我地了 事實上，特區護照去伊朗係要簽證，只係據講可以落地簽，但如果我再慢慢解釋，睇個勢搞到起飛都未搞掂 屎急馬行田，非常時期唯有用斬釘截鐵嘅語氣嚟擊敗對方。

講起伊朗簽證，我記得當時睇個官方網站，寫到明除咗某十幾個敵對國家之外，其他全部可以喺特定機場辦落地簽證。所以當時我先認定揸特區護照係符合資格，信心十足咁落機先算。但啱啱上返官網，發現佢嘅版面已經唔同晒，亦冇咗當時寫明可以就咁Visa On Arrival嘅資訊。除而代之嘅係要預早兩日上網填定申請表：

http://e_visa.mfa.ir/en/visa-arrival/

諗住去嘅巴絲打記得查清楚最新嘅安排，慎防中伏

必須一推嘅係以下呢個仆街網站

https://www.iranianvisa.com/index.htm

只要喺google搵iran visa之類嘅關鍵字，好有機會頭幾個結果就係搵到呢個垃圾網。佢話係幫人申請伊朗落地簽證嘅，填晒資料交埋錢去到機場就可以拎到Visa。由於伊朗出入境嗰個官網都冇乜官網味道嘅關係，呢間Agent反而可以以假亂真，令到我初頭以為佢先係辦簽證嘅正式途徑。但起底後發現，好多遊客交完錢都發覺中伏，人地根本識佢老鼠

似乎唔係正式錄用嘅網站。有冇人分享成功例子幫佢平反

真真假假，如果時間充足，直接去領事館搞定先就萬無一失



就係咁，我懷住戰競嘅心情，喺德黑蘭留低我嘅腳毛，昂首邁步向住Visa進發

嚟到扮簽證嘅窗口，全架飛機要搞簽證嘅就好似只得我地，所以都唔駛排隊。衝到窗口前，伊朗哥哥有啲愛理不理咁，似乎嫌我阻住佢睇AV。



就係入面嗰個白衫阿哥。

佢比咗張表我地填，零零舍舍有一行要寫埋你老豆個名，初步感受到呢片土地嘅父權之重。填完啲基本嘢，喺隔離櫃面交低100歐羅，唔駛幾個字就拎返本貼咗伊朗簽證嘅護照。

等待嘅時候，有個男仔用廣東話埋嚟搭嗲，但就唔係我地熟悉嘅口音。一問之下知道係廣州嚟旅行嘅男仔。由於我地分別要去唔同嘅住宿點，所以我地相約一齊搵出離開機場嘅方法之後，就會分道揚鑣。

人在伊朗，係用唔到提款卡的，聽過好多以前嚟過嘅朋友都建議喺機場一次過兌換晒將會用嘅駛費，因為呢度嘅匯率係最好，亦唔擔心間舖頭換假錢，所以我地都決定喺度一次過搞掂。佢地有個奇怪嘅規矩，就係每人只可以換唔記得100定300歐羅，總之係有個上限。但我都未開始諗咁點算之際，就已經有準備離境嘅遊客拎住用淨嘅伊朗幣想換返美金。嚟唱錢嘅人非常之多，基本上就算間找換店閂門都唔駛擔心

但講到成個機場最唔方便嘅地方，一定係交通。詢問處嘅資料係佢地並冇任何公共交通接駁機場，要離開一定要坐的士。戒心十足嘅我地問多幾個當地人，有啲人話應該有巴士，但又講唔出去邊度搭，因為佢地個個都揸車，根本WFC。問咗好耐都不得要領，唯有連同廣州男3人共乘一部的士，衝出機場。



天未光嘅德黑蘭。





冇幾耐就塞車。坐到市區，盛惠20美金

喺德黑蘭我地成功搵到沙發主，代表我地又成功慳到幾晚宿費 但呢幾日喺德黑蘭嘅住宿體驗，就遠超嗰一千幾百蚊。

接待我地嘅係一間工程公司嘅老闆同佢老婆，唔知幾多歲，但佢啲仔女都全部廿幾到卅幾，推算返佢都六十有多。老闆叫Masoud，佢話佢老婆係加拿大人，係佢以前留學讀engine識咗之後跟佢返伊朗嘅，但我就覺得佢老婆都好伊朗樣。重點都唔係呢啲，而係佢真係好撚有錢。屋企座落喺德黑蘭嘅半山區。德黑蘭嘅英文係Tehran，波斯文嘅意思就係山腳下，即係話呢個係一個依山而建嘅城市。如果有山靠住係風水好，咁喺正城市盡頭嘅呢個半山區風水就應該好上加好。一望出去睇住地上嘅嘍民真係有一覧眾山小嘅感覺。



亞洲城市都係密密麻麻，就算地段再貴都毫無美感可言

講返屋入面，除咗有無數間房預備佢地啲仔女一次過返晒嚟之外，客廳同飯廳都好叉大，加埋廚房同兩個廁所，三四千呎一定走唔甩。仲要有個全幢樓共用嘅泳池，但加加埋埋都係得嗰十戶八戶，可以話任何時候去都係我地獨霸



唔好意思光明正大咁影



係咁二自我介紹完，Masoud就將佢屋企揪大匙比咗我地，叫我地呢幾日當正自己屋企就得，隨便自出自入，希望我地喺德黑蘭玩得開心 大佬佢間屋求其一塊波斯地氈都值錢過我條命，嗰下真係受寵若驚，覺得條鎖匙有千斤重。知道我地坐通宵機嚟，佢仲叫我地瞓個晏覺先至出街，千祈唔駛覺得唔好意思。

喺呢一刻我真係相信，原來伊朗人好客唔係都市傳說。

好客到咁

我地到達德黑蘭嘅時候係六月尾，撞正伊朗嘅齋戒月。齋戒月係伊斯蘭教嘅習俗，因為呢個宗教基本上一定政教合一，所以宗教活動亦等於舉國遵守嘅規條。齋戒月係根據伊斯蘭曆嚟決定的，一般嚟講都係六七月嗰啲時間。喺呢段期間，日出至日落間嘅時份係唔准食嘢同飲水，扑嘢都唔得，犯咗戒就會比真主阿拉罰你一世做毒撚

但如果本身係毒撚就罰你唔到

上次提到我地住嘅地方係喺一座山上面，屋企背面閒閒地都係啲三千幾米嘅高峰，對於平時都鐘意行山但行嚟行去得嗰四五百米嘅我嚟講真係好吸引。喺呢次旅行之前，我去過最高海拔嘅地方只係台灣嘅阿里山，好似連三千都未到，見到咁近有得破吓人生紀錄，就除褲狗衝了



咁就犯下一個重大嘅錯誤

德黑蘭係沙漠性氣候，六月底正值夏天，熱到成四十度，喺低濕度下就等同被乾蒸。而最大獲嘅，係女人喺伊朗一定要包到實晒，連女神都唔例外。睇住佢由頭包到落腳，再由腳包返上頭，就覺得呢個文化喺幾咁戇鳩 話就話遮實晒係可以防紫外線，但我相信伊朗啲女人全部都生熱痱。

雖然我可以着短袖衫短褲，但望到身邊嘅人咁樣受難都唔想繼續再行，好快就返歸避暑，聽Masoud講瞓個靚覺算數。嗰晚講開，先知Masoud老婆日日都會去後山晨運，就算齋戒月都風雨不改。佢係虔誠嘅教徒，真係會滴水不沾咁上山，落返山之後都會等到日落先飲 佢仲問我地聽朝要唔要join game

日落之後，為咗慶祝齋戒暫時結束，伊朗人會平時食多少少，仲有有好多大大小小嘅Gathering放縱一下。Masoud就話今晚佢地會有家庭聚會，問我地一唔一齊。

有機會參加咁當地嘅活動，作為深度旅遊撚嘅我當然唔放過



德黑蘭嘅夜晚非常繁忙，相信佢地嘅道路規劃較差，塞車塞撚到仆街。回程時嘅情況更加惡劣，原來當地人鐘意夜晚揸車上山睇夜景，住喺半山區嘅Masoud就自然受到影響，但佢又冇對呢個情況流露任何不滿，反而好歡迎大家一齊上嚟熱鬧一啲

以為只係十個八個人嘅屋企人食餐飯，點知佢地包起咗間餐廳，點知坐咗幾十人



同我地傾偈嘅都係啲廿幾歲嘅人，全部都係Masoud啲親戚，個個都讀Engine，而且都浸過鹹水 即使係拎住伊朗護照，但因為有錢，要申請去美國讀書都其實唔難。同佢地傾偈亦完全唔覺得伊朗封閉，反而冇出國讀過書嘅我先似係由第三世界出嚟嘅鄉下仔 只能夠話，無論喺邊個城市出世，有錢人同窮人嘅差距都係非常之大

原來伊朗曾經係中東數一數二最開放嘅地方，喺七十年代末伊斯蘭革命發生之前，伊朗女仔一樣係着裙出街唔駛包頭，今日嘅法例只不過係出現咗四十年。雖然佢地表面上都會遵守呢啲服飾上嘅規定，但暗地裡其實都反叛，至少有好多年輕一代條頭巾係包得好求其，一副WFC嘅樣。但都比唔上後來喺街頭見到有人派耶穌嘅傳單咁震撼

走嘅時候，呢一家嘅伊朗人不論男女都會錫面擁抱嚟講拜拜，唔好話保守，民風直情可以話係開放過香港好多

加油樓主，好好睇