直到世界盡頭（II）

晨早一推

輕輕一推

返黎喇咩

返黎啦，幾膽心你有事

等你好耐喇樓主1

留名追post

以前用蚊怕水，都係係咁易噴喺外露嘅手、腳部份，最多加埋條頸，細細力咁噴一兩吓就完，盡量都唔會噴到塊面。但Martin話我知，喺呢度唔係咁做。

因為波蘭的森林真係好Q多蚊，企定一秒已經實有幾隻伏喺啲皮膚上面，針撚到你仆街，所以就算着晒長袖衫褲都係未夠。喺屋入面，Martin拎起佢支預先準備好嘅超過40%DEET嘅蚊怕水，合埋眼就對住自己塊面狂噴，好似當自己係曱甴咁噴殺蟲水，然後就將支嘢隊埋嚟叫我地照做。其實平時真係唔建議咁樣做，因為DEET呢種成份接觸到眼係有機會引起敏感反應，但人在江湖，到時比呢度啲毒蚊針幾嘢可能仲大獲，就唯有信佢一次



森林小屋內部。



啲木屋仔係幾有feel。

噴完塊面，我地就出去散步。個森林就冇咩好講，總之就係兩邊都係好高嘅樹，遮到見唔到天空咁。而為咗配合呢種陰森嘅氣氛，最佳嘅活動就係講鬼故。



故事不外乎係森林入面出現過啲唔知咩騎呢動物，邊間屋啲細路又邊一日忽然之間唔見咗咁。其實我份人一向都百無禁忌，好少會怕鬼故，但今舖唔知點解都有少少怯。

之所以有啲驚，唔係因為佢講得好引人入勝，而係越行越入，天亦開始黑了。Martin突然之間唔出聲，望住我地。



成個佛地魔咁企咗喺度

我突然覺得心好寒，今日由坐車入森林開始就隱隱覺得有啲不安，我都講唔出點解。但嚟到呢刻，我終於知，嗰種淆係來自一種旅人嘅直覺。Martin終於喺度露出魔掌。

原來佢係奸嘅。

原來佢咁好心Host我地三日，就係等機會帶我地入森林，然後落手。

今次仆街了。

竟然係到停咗 好緊張
應該唔係真係奸呀？

玩完返黎風趣左咁多

pish

我地大部份行李都喺Martin華沙嘅屋企，要拎嘅話其實好簡單，只要搵個同謀呢個時候上門就得，根本唔駛佛地魔上身。講真搵得host，就係預咗相信人，我信呢個世界好人係比壞人多。

當時我地身上最貴重嘅嘢，應該係嗰部仲未壞嘅macbook同埋部電話，但我諗佢賣咗間祖屋都肯定買到一百幾十部，所以冇理由係為咗呢啲嘢。

唔通⋯⋯係想要我地個腎？

講吓姐，波蘭唔係強國，冇咁痴線。原來佢目露凶光咁突然擰住頭，純粹係想問我地「係咪好驚呢？」

真係個心都比你嚇到離一離

望吓個鐘都成九點幾，再加埋女神比佢啲濕鳩鬼故嚇到魂不附體，我就提議返歸。



揸車返去嘅時候，Martin繼續分享以前host過嘅遊客嘅事。原來佢都host過台灣嘅朋友，仲好嬲咁話佢地唔識歷史，當咗以前嘅波蘭係蘇聯嘅一部份。真相係波蘭曾經係其中一個衞星國，但唔係一部份，因為呢個原因佢嬲到想趕啲台灣人出門口

如果咁都嬲，咁我每次比人當係中國人咪要殺佢全家

見佢如此激動，我都唔敢出聲，一日未落車都唔好刺激到佢

經過呢一日，我肯定呢位叔叔係有啲問題。唔計佢喺黑媽媽嘅森林入面扮鬼嚇鳩我地，淨係佢由朝早揸車出嚟開始去到夜晚連續十個鐘冇停過口已經夠晒痴線。真係以前中學個校長都冇佢咁長氣。而我亦因為一直坐喺前坐，比佢搞到非常煩燥。

亦因為咁，第二日一早，我地就離開華沙，坐車去克拉科夫（Krakow）

嚇到瀨屎

終於live 樓主rich rich啊 搭咁多程飛機

Martin佢痴咗線啊

好恐怖

去Krakow都係想去最有名嘅奧斯威辛集中營。但第一日到達時已經下晝，就頹頹地四圍行吓，留返第二日再去。



天氣好好。



好多人話去到集中營，天氣時時都好陰沉。唔知我地聽日仲有冇咁好天？



瞓醒第二日就係喺Krakow嘅重點，去集中營感受一吓歷史嘅重量。

去集中營，要先坐車去60公里外嘅Oswiecim，落咗車行兩步就到。但估唔到去咗個幾月旅行嘅我地，都犯下低級錯誤。

買完飛之後，我見仲有時間，就一齊食個晏先再返車站。點知食完返去，發現班車已經開走咗

原來我記錯咗二十分做四十分，本應搭四前返到車站變咗搭八先返到。柒住咁拎張車飛返售票處沙個冧，想換下一班車嘅飛，個女職員一臉睬我都戇鳩咁話冇

都深知係自己柒，但又唔想再比多幾十蚊，就決定試吓拎張飛直接上巴士搏大霧

為咗唔比人發現，仲要撕爛咗有寫時間嗰一忽，然後拎住嗰個位上車



我地已經有共識，如果司機話唔得，或者架車滿咗，就唔會發窮惡，會即刻比錢買過張。

我地明白想慳錢唔係大晒，尊重人地嘅地方同制度係旅人嘅風度。只係覺得我地其實有比錢，如果架車冇滿坐，咁巴士公司都冇蝕到，所以想爭取吓睇吓佢地賣唔賣個人情比我地。

點知司機望一望張飛，又望一望我地個寒酸樣，就好瀟灑咁招一招手，叫我地上車

就係咁，我地就出發，向住可能係旅程中最沉重嘅地方進發。

諗深一層，2對1，應該係佢驚過我

莫非呢位巴跟蹤我地

個天好靚

你係遊記度都提左唔少次啦

藍天下嘅奧斯威辛集中營。入口寫住德文Arbeit macht frei，意思係勞動帶嚟自由，同我地嘅社會一樣，你嘅勞動帶嚟老闆嘅自由

咁當然，被送咗入嚟嘅猶太人係悲慘好多，做完一日苦工都係得個包仔食，相入面個個都瘦到皮包骨。





關於集中營，我都無謂講太多。二戰嘅事大部份人都知道，差在係咪嚟到遺址感受一吓嗰種抑鬱。

見到隔離有專講集中營嘅po，我諗我去嘅唯一分別係，天氣非常晴朗。藍天綠草映襯之下嘅集中營有種無以名狀嘅錯置感，好似係上天想話比你知世界就係如此荒誕。



就好似睇到當人嘅價值變成冰冷嘅數據呈現喺你面前，嗰種震撼未必輸比嗰啲血肉模糊嘅相片。



我覺得嚟到嘅人，每一個都帶住沉重嘅心情離開。但係，之後呢？

好似睇完，感受咗，得到咗歷史比我地嘅教訓，學咗好多嘢咁。但事實係，戰爭每一日都發生緊。由二戰結束之後，直到今日，其實從來都冇停過。

或者喺西歐真係少咗好多，但喺世界嘅其他角落，戰爭同種族滅絕從未停止。所以我地先喺冇幾耐之後，又喺薩拉熱窩見到波斯尼亞穆斯林被屠殺嘅墓園，而嗰個年代仲有盧旺達大屠殺同好多我都唔知道嘅事件，最近又有緬甸嘅羅興亞人。好多敍利亞、阿富汗嘅人亦係戰火中過住非人嘅生活。

我地可能會睇完呢類博物館，就好渴望世界和平。但究竟有啲咩係我地可以做，去避免呢啲事不停發生？真係睇多啲少少新聞，關心吓就有用；定係喺世界巨輪面前，我地只能承認自己嘅渺少同無力？

Pish!

推