直到世界盡頭（II）

連續兩日都係喺個廣場度

呢一日主要行吓側邊啲走廊，一路上都係啲紀念品店，奇就奇在伊斯法罕作為伊門熱門旅遊城市，我地行嘅時候都唔覺有咩遊客。



齋戒期間偷食嘅本地人就有唔少 打比真主阿拉捉晒你地先

所以話呢個國家真係好古怪，男人賣胸圍，齋戒時段餐廳又可以開門。而我地當然都係食咗

食飽就亂入啲舖頭到運吓吉



係一間賣波斯地氈嘅舖頭，一入去老闆見到我地就千千聲（Qin＝中國人）咁揮晒手，拎甜茶出嚟招呼我地。呢種甜茶文化喺伊朗係好常見，佢地鍾意成粒糖放落去，越甜越好飲。我就唔係好慣，比較鐘意走甜

每次見佢地落糖都會諗起死亡筆記個L，然後慶幸電影版唔係搵伊朗人嚟拍



Toni同Nicole落力地聽老闆遊說佢地買地氈。

我同女神就坐埋咗一邊睇個老闆啲普通話教科書。個老細為咗做多啲中國人生意，竟然自學普通話同殘體字。雖然我個人主張繁體，但見佢地寫殘體都寫得咁辛苦，都冇咩嘢可以講 有時見到外國人想學中文，好自然會去學殘體，都覺得好唏噓。就算同佢地解釋完繁體嘅背景，都冇可能令到對方想學，一嚟學一種十幾億人用緊嘅文字係吸引過學一種小眾文字，二嚟繁體字嘅難度係會嚇走好多外國人 就好似比我地揀學西班牙文定加泰文，個道理都係一樣



出咗舖頭，仲有唔少攤檔賣零食同生果。

之後又喺廣場比個奇奇怪怪嘅伊朗人搭訕，然後一齊去咗間Cafe。



間Cafe好有中東風情，一入去都有耳目一新嘅感覺



但睇吓就好了，食落就 伊朗嘅甜品普遍都甜到仆街，唯獨喺德黑蘭食過嘅藏紅花雪糕（之前漏咗講 ）幾正；咖啡都好苦，苦得嚟又飲唔到回甘。

至於嗰個伊朗人就全程喺度講自己未來嘅流浪計劃，話過多幾年，佢就要離開呢個令佢窒息嘅社會，要走入荒野同森林，計劃用20年時間遊歷世界 我覺得佢講真都唔奇，但言談間覺得佢淨係掛住講自己嘢，唔聽其他人講嘢，有啲自我中心 傾咗冇幾耐，我地就搵啲藉口走先了。

點知佢竟然話夾番錢，AA制

實在太唔伊朗了 可能就係咁，所以我覺得佢奇奇怪怪

留明

關於伊斯法罕呢座城市，最令我唔捨得嘅，都係Toni、Nicole同洪福。城市本身嘅伊瑪目廣場、清真寺、三十三孔橋，都只係配角。而係臨走嘅時候發生嘅一件事，亦令我重新審視一個地方嘅所謂善惡。

我地喺三十三孔橋附近嘅一間雪糕舖買雪糕（比女神食），而我因為冇散紙，就比咗張一百萬Rial（大約二百港幣）嘅銀紙佢找，佢找返嚟嗰疊錢好散，又十萬又五萬又一萬，比着平時我都未必會數，會直接放落銀包算。因為數啲唔熟悉嘅銀紙其實好阻住後面排隊

當時嘅伊朗人對我嚟講係幾可信，嗰次會認真逐張數，純粹係因為我唱嘅伊朗錢有限，為咗免去再搵找換店嘅煩惱，先會每次買嘢都計清楚，等未來嘅日子有個好預算。點知一數，就發現有張五千RIal應該要係五萬先啱數。

咁我就正正常常咁拎住比個伙計睇，問佢係咪找錯，但佢話冇可能，仲話叫我自己數多次 我數多次，都係佢錯，就叫佢數比我睇。佢一邊數一邊讀，但數到最後幾張時，明顯口講嘅嘢同佢隻手係唔同步，擺明係昆鳩我

我知道佢係有心搏懵之後，就唯有出動港人絕招：叫你老闆出嚟 其實我真係唔多鐘意咁樣，但比人呃又冇辦法 佢見我決心搞大佢就淆底，扮晒死狗咁數返啱比我

伊朗係好多好人，但係亦會有騙子，德黑蘭亦遇過好多的士狗之前冇寫出嚟（主要係見你遊客就開天價，然後聯同其他的士司機一齊唔車你，迫你就範）。而今次特登找少錢呢啲古惑嘢，就算係南美洲又偷又搶嘅地方都冇發生過。只可以講，每個地方都有好人同立心不良嘅人，而講到古惑招數，一定係亞洲地方第一 伊朗係好有潛力向住大陸同阿拉伯嘅方向進發


三十三孔橋，橋下面都乾涸了。

過埋呢一日之後，我地五個都有各自嘅旅程，畢竟大家都係旅人，明白冇需要一直跟住對方，所以喺到道別或者係最好。我地三組人喺伊斯法罕分道揚鑣。我同女神將會去色拉子（Shiraz），Toni、Nicole會返德黑蘭，而洪福就會走上佢嘅波斯人生。

希望下次再見時，大家都已經睇到自己想睇嘅風景，走咗自己想走嘅路

live

這就是人生

呢個係我唯一一個會keep住追既post
樓主要繼續寫落去

都有好多好睇嘅POST

我出得咁慢都追，多謝你

多謝完巴嘅每日一推，我銘記於心

好想睇到最尾

瞓醒一覺又嚟到新地方——設拉子（Shiraz）。



去伊朗，除咗好似丹尼爾嗰類用單車橫越嘅癲佬之外，大部份人都會去伊斯法罕、設拉子呢啲旅遊城市，唔少人都會加埋卡尚、亞茲德，或者去埋東面嘅聖城Mashhad同西邊據講完全唔同嘅Tabriz（據講Tabriz因為類近土耳其，講土耳其語嘅人仲多過波斯語嘅人，但今次冇去，證實唔同，如果係真，預期文化上都會同伊朗中部差幾遠）。

嚟到設拉子，再一次Couchsurfing，值得一提嘅係一直之嚟CS都係由女神負責，全因睇Review同埋打啲好吸引嘅邀請Message係佢嘅強項，我永遠都係簡單講我邊日嚟邊日走，得就得唔得就算 自然係次次都唔得

但設拉子呢次，女神一路搵咗幾日都冇乜回應，所以我就用美男計出山相助，又點知比我send一兩個就成功咗 可能因為伊朗CS都係男人多，加上佢地社會嘅壓抑，令到佢地對於接待男性感到輕鬆自在一啲。

嚟伊朗之前甚至聽過有啲Hostel係要男女分開住，但我地呢十幾日都冇遇上過。



今次住嘅就係呢間屋。抵達嘅時候仲係朝早唔知幾點，似乎個Host仲未瞓醒，㩒咗幾次門鐘都冇人應門 不得其門而入嘅我地只能坐喺門口，好似乞衣仔咁等佢起身 冇幾耐就驚動到隔離屋個伯伯出嚟問我地做乜。

我諗佢一定冇見過人去旅行去得咁撚慘，見我地兩個華人坐喺路邊，都忍唔住幫我地打個電話。打咗幾次比個Host都冇人聽

最後應該等咗個幾鐘，個Host出來了 ，當時嘅心情同劉備第三次去草廬搵諸葛亮終於搵到，如魚得水咁一撚樣



個Host就係圖入面帶黑超嗰個伊朗MK仔（右二），得19歲。雖然佢要我罰企一個鐘，但免費住宿都冇辦法。除此之外，我覺得佢其實幾型。唔係話個MK樣型，而係佢講得出自己想向旅遊業發展，做CS Host係為咗拎多啲帶遊客嘅經驗（仲叫我地Join佢嘅團，住咗佢屋企好難拒絕 ），雖然拎住伊朗Passport但已經諗定一申請到簽證就要去埃及睇遺跡，而我又真係喺佢身上睇到佢對歷史嘅興趣 我19歲嗰時，仲係戇鳩鳩咁唔知為咩而考A-Level，將啲九唔搭八嘅Choice擺晒落揀科嗰個名單到

我不禁喺度諗，究竟係咩驅使到一個人知道自己未來想做咩？係愛定係責任？

樓主讀咩科？

樓主讀咩科？

唔想自爆

你話年輕幾咁好呢
可以拋諸腦後去旅行成年....

的確係，有咗負擔就唔再一樣
但相信每個人生階段都有專屬於嗰個階段嘅精彩
巴打加油

上次張圖最右手邊嗰個人，係我地設拉子呢幾日嘅旅伴。我地喺邊度識？就係喺MK Host間屋企。MK Host叫Soheil，去到先知原來佢唔係淨係接待我地兩個，另外仲有一個嚟自土耳其嘅人，叫Ahmit，係就係生到肥絲大隻，不過就唔會捉字蚤

Soheil一見到我地就話，佢冇幾耐之前先Host過香港人。無獨有偶，幾個月之後，身處阿根廷嘅我又發現之前德黑蘭個Masoud咁啱Host緊一個香港單車友，因為咁我反而認識咗嗰位巴打，世界真係好細

對我嚟講，Soheil係人生嬴家，間屋大到隨時隨地可以招呼到一堆人，淨係佢間房都可以容納埋我同女神再加埋佢三個人瞓都仲有位。諗返起之前無論喺波蘭定俄羅斯，大部份Host都可以空到一間房出嚟比我地瞓，其實係好誇張。喺香港，唔好話多間房，就算個Guest唔介意瞓客廳地下，都未必可以伸直隻腳 我地有諗過，如果可以嘅話，係好想將來有個屬於我地嘅家，係會有足夠嘅空間比我地做CS，將我地旅途上接收到嘅心意傳比下一批旅行嘅人 但現實係，我地自己搞得掂自己已經好好

之前提到，Soheil做CS係為咗做生意。佢好快就邀請我地Join佢帶嘅Persepolis古跡團，索價20美金。計計條數，扣除咗如果我地自己去都要比交通費甚至跟其他團嘅費用，個尾數都仍然抵過喺出面住Hostel，都覺得可以接受，就決定順下佢意 又當係鼓勵一下咁後生已經有生意頭腦嘅後生仔

而今日，我地就跟住肥絲大隻四圍望下。Ahmit雖然係土耳其人，但係喺伊朗讀PhD，仲要係研究伊朗同土耳其嘅關係。佢對伊朗嘅興趣非常濃厚，鐘意到特登學波斯語再嚟到呢度做啲極度冷門嘅研究 佢可以話係伊朗通，我只要閂咗個大腦跟實佢就可以。



呢日我其實唔太記得行咗啲咩 總之係一個少少出名嘅公園。



夜晚就好似去咗紀念某位伊朗詩人嘅廣場。





無論係個公園定個廣場，伊朗好多景點都收門票。而且遊客嘅價錢會遠超本地人價。記得遊客係要比200000Rials（港幣35蚊），本地人只須要30000-50000Rials。Ahmit揸住伊朗嘅學生證，可以享受到本地人嘅待遇，有時佢拍一拍查票員嘅膊頭，就可以用埋本地價帶我地入去 因為呢啲景點要比35蚊，其實我地係想留喺出面



設拉子嘅街頭好似中國。兩者都有昏暗嘅燈飾同埋街上嘅污濁同煩囂。最重要嘅係，中國周街都有紅底黃字嘅歌頌共產黨口號，而伊朗亦都隨處可見青底藍字嘅宣傳伊斯蘭教標語



喺呢度，H&H先係正牌，H&M係唔會搵到 仲唔係返撚咗大陸