直到世界盡頭（II）

去亞茲德係因為諗起一開始Masoud嘅推薦，加上距離返德黑蘭飛走仲有三日嘅時間，就嚟望一望究竟。

亞茲德最出名就係拜火教嘅遺跡，唔少人慕名而嚟都係為咗睇拜火廟同天葬台。但恕我直言，我嚟之前對呢個教係零認識，所以亦講唔上有咩濃厚興趣 到咗之後，望望街上嘅旅行社，發覺團費唔平，又冇公共交通可以自己去到，就決定唔睇了

咁唔睇拜火教嚟到亞茲德有咩好做？其實都有個幾靚嘅古城區係市內，但嗰日又係成四十度，仲熱過之前喺德黑蘭，令到我嘅頹廢嘅基因大爆發，只想留喺房入面好好瞓一覺

呢度啲住宿幾抵住，跟咗Toni Nicole嘅提議，去咗住佢地之前住過嘅一個酒店，係一個休息嘅好地方



喺酒店（兩層）嘅天台望出去，就係亞茲德全景。全個城市最高嘅建築，都係清真寺嚟。其餘嘅屋全部都係一兩層高。

因為喺設拉子太攰，呢兩日連一日三餐都係喺酒店入面解決，懶得出汁。


早餐通常啲乾嘅包。


午餐晚餐就係乾嘅飯、薯條，或者牛雞肉。


甜品就係啲好甜嘅蛋糕。

喺臨離開伊朗呢個國家之前，仲發生咗一件事令我對呢個地方嘅觀感有所改變。話說我地返到德黑蘭嘅最後一個下晝，搵咗一間Cafe邊飲伊朗咖啡邊等待去機場嘅時光。由於天氣太熱，即使入到Cafe坐低咗，女神都覺得熱到有啲暈暈地。佢見成間Cafe淨係得個老細同我地一枱人，就將條頭巾除咗落嚟，等個頭冇咁焗。點知唔夠一分鐘，個老細就行埋嚟我地張台度，指住女神個頭嚟鬧 當時女神好嬲，我都嬲埋一份，覺得點解咁不近人情，但老細就明顯應該除低頭巾呢個行為係好過份，似乎代表住一種唔尊重。究竟佢係覺得咁做係唔尊重佢嘅文化習俗，定係唔尊重佢呢個人，我就分唔清楚。我能夠做嘅只係盡快離開，返去一啲冇呢個風俗嘅地方。

或者有時候，我都會不自覺咁信奉咗一啲喺人地眼中係無意義甚至愚昩嘅規矩。對於我嚟講，當然會覺得迫人戴頭巾係奇怪同難以接受嘅規定，但對人地嚟講，可能未必咁易打破呢種迷思。就好似女仔返某啲工要化妝，男人返某啲工唔比紥辮，食狗肉係唔文明，關愛座寧願空咗都唔好亂咁坐，諸如似類。有時好難判斷乜嘢係啱，而乜嘢係怪。又或者今日係怪嘅嘢，聽日就變咗正常。就正如唔少伊朗人都同我地講，我地而家見到嘅嘢，好多都係近呢三十年先至出現。



走嘅時候，心情有啲複雜。雖然留喺伊朗嘅日子唔長，但係總算遇過有錢得嚟毫無架子到連屋企鎖匙都比埋我地嘅大老闆，揸Snapp但唔收錢嘅司機，喺地鐵撞到又請食嘢又想幫我地比埋博物館門票嘅熱情學生，喺公園拉住我地坐低一齊聚會嘅陌生人；但亦有扯晒貓尾嘅的士司機群，呃錢仲要被揭發都死撐嘅雪糕店職員，為咗捉住你影相搞到遊客發嬲嘅當地人，連中暑都鬧你唔戴頭巾嘅咖啡店老闆。

每個地方都有好同唔好嘅人，而有時好定唔好都係睇你點睇。只可以話，喺伊朗，好嘅人的確係超越世上好多國家，而唔好嘅人大概係同其他地方相差唔遠。咁樣計落，都係要比個正皮佢地

生活逼人，尋日暫停一日

入伊朗前已經買定咗去雅典嘅機票，當時搵唔到太多有關整落地簽證嘅資料，唔想節外生枝，就想買張離開伊朗嘅機票嚟增加拎簽證嘅成功率。環顧伊朗附近嘅國家，比較感興趣嘅係約旦以色列同埋希臘，最後唔知點解就揀咗雅典。

喺聽咗洪福嘅旅行故事之後，其實有諗過唔要張機票，改為去佢極度推薦嘅格魯吉亞，但後來都係唔捨得啲機票錢 高加索嘅旅程唯有下次再繼續



希臘都係我幾晌往嘅一個地方。由以前中學時代讀數開始，就對啲希臘符號有種特別嘅感覺。但一直都以為只係作為符號先會用到。唔知幾時屎忽痕一查，先知世上仲有國家仍然用緊呢種符號嚟作為佢地嘅文字。知道今時今日最泛用嘅拉丁字母（ABCDE）同西里爾字母（ШДЖЯЧ）都係由希臘字母演變而成，不由得明白身為希臘人對自己文字嘅自豪感，深深感受到佢地絕不會轉用拉丁字母嗰個傲氣。就好似用開繁體中文嘅我地，自然不屑使用由繁體退化出嚟嘅殘體。

可惜落機之後，第一件事就係中伏。原本經booking.com訂咗一間住宿，亦有講明會朝早去到放一放低背囊，點知一去到就摸門釘



㩒門鐘冇反應，打佢門口寫住嘅電話冇人聽，WhatsApp、email乜都用晒都係冇料到 冇辦法之下唯有喺附近一間Cafe坐低慢慢等老細覆。通宵機飛過嚟成晚冇沖涼加埋每人廿公斤行李，望落去勁似乞衣，行入人地舖頭都覺得尷尬

等咗成三個鐘終於收到回覆，Hostel老闆比咗個密碼我地入去，裡面冇Reception，我地跟佢指示拎咗自己間房，又發現冇冷氣，但book嗰時係寫明有



旅途中大部份住宿都係女神負責book，因為佢對住宿嘅要求係高我少少，佢接受嘅我一定冇問題，但我接受到嘅佢就未必OK 所以大家一直以嚟都好有共識，住宿嘅最終決定權係喺佢度。當日嘅雅典接近40度，雖然我冇咩環境接受唔到，但都明白40度比人呃咗個冷氣係會憤怒 我地雙劍合璧一齊屌鳩間Hostel。嘈咗一大輪都搞唔掂，因為佢根本成間都冇冷氣 最多只能回水。之後又花多咗個幾鐘搵咗另外一間酒店。

其實唔想做啲麻煩嘅旅客，但人在外地有時唔自己爭取，真係好易比人恰

搞完呢壇嘢已經身心俱疲。到咗真真正正可以休息嘅時候，已經下晝五點

如果樓主想了解拜火教，其實現今既天主教、伊斯蘭教都吸收左佢地既教義

大致講光明vs 黑暗，人既靈魂係光明，但惡魔用黑暗的驅體囚禁靈魂，令人被滯留在黑暗既物質世界，人需要守己達成奉獻，死後靈魂就可以重返光明世界

聽聞香港都有幾百個拜火教教徒，好似要老豆係教徒個仔先有得入教，巴打係咪其中一個

我唔係，只係有睇下宗教

第一日戇鳩鳩換住宿搞咗一日，第二日就去雅典衞城



七月嘅雅典非常熱。行一陣就要抖一抖。



同土耳其唔同嘅係，之前一覺得熱就隨時買支雪糕消吓暑，但嚟到希臘，因為歐元區嘅關係，物價即刻三級跳 以為希臘係破產國家啲嘢會好平，原來只係自己太天真。喺度食餐飯閒閒地都十歐八歐



入雅典衞城，三十歐。





細細個就聽過希臘神話。連雅典呢個城市名都係由智慧女神雅典娜變出嚟。呢座古城同伊朗嘅波斯波利斯比較，名氣上完全高一大截，遊客數量都不可同日而語。


雅典景色。


有好多唔同嘅殿。其實最想睇係巴特農神殿


呢座似似地咁嘅樣，但好殘嘅


屌，真係佢

原來修輯緊，點解好似去到邊都中伏

live

繼續出吓圖，不外乎城市景同埋啲遺跡。









城市嚟講雅典都算核突，啲屋白色為主但又有啲雜亂無章，同之前喺立陶宛見到嗰啲相比較為失色；古跡亦冇乜震撼嘅感覺，好多都維修緊咁樣。或者強就強在以前總會聽過一啲關於希臘嘅神話或者文明，然後嚟到就有種「原來係咁樣嘅」嘅感覺。好似印證咗以前教科書啲古希臘嘢唔係吹水咁樣



好多地方都係荒廢咗咁樣，完全冇人入去。



伸部相機入去影吓就算，唔知睇咗啲咩

整個雅典衞城比我一種暴殄天物嘅感覺。佢嘅遺跡係擺咗喺度，但總係覺得展現唔到嗰種應有嘅文化氣派。啱啱去完嘅伊朗波斯波利斯古城同土耳其棉花堡隔離嗰度古城，感覺都比呢度好。一切好似就係為咗收入場費而存在一樣。

希望巴特農神殿整番好之後會好啲



到時一齊再來一遍吧～～

有冇上狼山睇日落

終於live 去過一次西伯利亞鐵路同東歐
所以睇番巴打既遊記好正

做咩要加密

希望你成功

下次去