直到世界盡頭（II）

喺雅典嘅第二日就決定去一去聖托里尼（Santorini），亦即係嗰個成日出現喺旅遊廣告，周圍都係藍藍白白屋仔嘅希臘外島。

本來我地都未決定要去，但行過旅行社見到船飛最平31歐羅有交易，就覺得可以一戰 噉嘅價錢自然係啲核突時間嘅乞衣飛嚟，冇錯係凌晨船，但對於當時嘅我地嚟講可以話係習以為常。諗返轉頭，都真係辛苦女神因為我貪平而要成日陪我癲

可能就係因為我經常自把自為，忽視咗身邊人嘅需要，喺雅典嘅呢一日我地終於鬧咗場交 重記得當時係喺一間Cafe到，因為啱啱去完土耳其同伊朗嘅關係，我對於伊斯蘭教嘅嘢非常好奇。我睇緊一本關於伊斯蘭文明傳播嘅書就忍唔住係咁捉住女神分享。然後忽然之間，佢就爆了 事後講返，女神應該係兩個月冇行街買衫，再加埋喺伊朗比人鬧佢除咗頭巾，一聽到伊斯蘭嘅嘢就崩潰



就係呢條街。女神好認真咁話要分開吓，自己行，叫我唔好跟住佢。

「今晚七點喺返呢度等。」

比着係你你跟唔跟？

雅典街頭其實好多難民，畢竟希臘係中東進入歐洲嘅第一道閘，唔少因為打仗而離開家園嘅敍利亞人都會嚟到希臘再作打算。加上國家破產，經濟好差，唔少白人樣嘅都衣衫襤褸拎住罐啤酒噉周圍游嚟游去。喺雅典，我唔會話有種好輕鬆舒服嘅感覺，實在唔放心比女友自己一個喺度遊盪 所以我一直都跟喺後面。

旁人睇落可能會認為我先係最危險最變態嗰個



之後詳情就唔講啦 總之最後和好如初



唔好嬲豬 我地去行街街好嗎



hea hea吓就準備上船，出發去渡假 但真係冇諗過隻船咁大部，同埋有咁多人



左邊係比成部車上，右邊係人行。



一上到去，發現有好多層。



只要有錢，船上係有得食有得飲，但價錢可能係雅典嘅兩倍



雖然船飛係有劃位，但係船上面空櫈隨處可見，任坐唔嬲。



我地呢晚就揀咗喺呢度瞓覺 但附近啲鬼仔鬼妹好嘈，後來屌唔住調咗去第二度。





瞓醒就同愛琴海講早晨

第一次睇樓主既post
啱啱喺Vilnius返嚟，做功課時完全冇遊記提過Centre for Civil Education

我仲好記得兩年前去santorini既心情
因為呢個係我既dreamplace 係船上面見到愛琴海已經感動到想喊
不過去到santorini發現好多都已經非常商業化 所以有啲啲失望 但叫做完成左我既bucket list其中一項

Vilnius都係我鐘意嘅城市

商業化都預咗，所以冇乜失望，反而佢嘅自然景觀係超越預期，去完覺得貴得嚟值

落船，第一件事就係感受呢度嘅高物價

Santorini係一坐孤島，交通唔方便係可想而知，去之前亦都Check過，唔揸車嘅話就要等佢地啲好鳩耐先嚟一架嘅巴士，價錢亦都唔平，坐一陣就隨時放低兩三歐。

因為乞衣心態貪平，我地Book咗一間比較偏遠嘅住宿。距離島上面嘅其他景點都幾遠，一係搭車，一係郁啲就行十公里八公里





就係喺呢度附近，而心目中藍藍白白嗰堆屋就喺遙遠嘅他方。



求其喺樓下食吓海鮮

坦白講，我原本對Santorini冇乜期望，因為一早知道係啲好商業化嘅渡假小島，所以一直認定佢係啲比廣告吹大咗嘅港女嘢 個心就覺得佢再靚都靚唔過之前喺蒙古睇到嗰啲。

直至我發現有呢條行山徑


（Google Map）

行嘅難度唔高，一般喺香港有行開山嘅都實應付到 冇行開嘅就需要一個發洩對象喺隔離比你呻吓辛苦

條路有幾靚呢？我都唔識形容。











我覺得係拍得住戈壁沙漠 或者我會覺得咁靚係因為有你陪我？





好記得有一幕係本身前後左右都係山，但一轉角就成個愛琴海出現係眼前，靚到哇咗出嚟



啲白屋仔望落去幾有Feel，但睇返啲相影得好樣衰 遲啲有錢一齊喺度住返晚

條行山徑都十公里，行下抖下，好快天黑。



見到有間專比人睇日落嘅Bar。坐低飲杯橙汁都6歐 飲酒10歐起跳



好撚多人，左ZIP右ZIP先搵到個窿睇

頭先行咗幾個鐘條路都冇乜人，一嚟到呢度啲人就出晒嚟，或者就係咁先顯得頭先係值得行嘅





行完山睇完日落，差啲咩？



梗係食好西，50歐 兩個人Share一碟，食得好寒酸 冇錢唔好嚟

呢度嘅海鮮，甚至全歐洲嘅海鮮，靚嗰啲都會覺得新鮮，但食落始終都略嫌單調，食多兩次就覺得悶，唔會好似香港咁又蒜蓉蒸又避風塘咁幾十種花樣。不過啲外國人似乎冇所謂



Santorini係正嘅。美足不中係會令人感受到自己好窮 但你問我，我都會覺得呢兩日喺度比嘅錢係值回票價。下次有機會再嚟嘅話，就儲多啲彈藥，住返兩晚圖入面嗰堆崖上嘅白色酒店，望住大大個日落，對住愛琴海享受人生

行嘅難度唔高，一般喺香港有行開山嘅都實應付到 冇行開嘅就需要一個發洩對象喺隔離比你呻吓辛苦 

火山？我反而覺得好似比人水左 個火山tour冇乜嘢玩 個火山更加冇嘢睇
不過個海係真係靚既

個人覺得義大利positano比santorini更靚

冇去火山 行山徑就夠

positano有緣再去

好撚好撚好撚浪漫

背囊高過自己個頭，點解嗰時孭得起

上船返到雅典，已經好夜。第二日北上去一個叫Kalambaka嘅地方，為嘅就係一睹傳說中天空之城Meteora嘅風采。

未聽過天空之城？正常嘅，其實我都係去到希臘先知有個咁嘅地方 睇返日期先發現，原來係上年嘅七月頭去，點解咁快就過咗超過一年



雖然唔係高鐵，不過希臘嘅火車都好夠用，有種返咗台灣嘅感覺。



唔同嘅係呢度啲火車架架都畫滿塗鴉。





轉咗次車，用咗幾個鐘，就到咗一個坐落喺天空之城隔離嘅小鎮。

聽朝返工，要瞓覺了

Kalambaka坐一程巴士就到Meteora山腳，不過程巴士都花咗啲時間搵咗一陣。嚟到歐洲，可能太多人自己揸車，即使係旅遊景點，公共交通亦唔會太方便。



落車後就開始上山。





傳說中嘅天空之城，就係中間嗰堆修道院。呢個地方嘅出現，係源於14世紀時期，屬於拜占庭帝國嘅希臘入面嘅東正教修道士為咗避開土耳其嘅入侵，而隱居喺呢度嘅山洞。或者佢地當時都冇諗過佢地起嘅呢堆修道院，七百年後會變咗人地參觀嘅世界遺產。

話唔定香港嘅樓，幾百年後都會成為後人參觀嘅遺跡

到時啲新香港人可能會驚訝，點解當時啲樓咁平 按照今日嘅升幅，一百年後都升到幾百億了



我都逃避緊鄰國嘅侵略，不如比我搬嚟呢度住好嗎



行咗好耐都唔見有任何車可以搭，係時候行返轉頭

支爆咪跌囉