【海菲】《病港ＩＩ》（７９）

「所以係咩事？」

既然野獸人是病獵學會出來，如無意外病變的好有可能是馮覓。

他刻意配合假裝襲擊米田貢，令整件看起來就像有人想要阻止整個公投。

他們真的有必要做到這地步嗎……

「病獵學會有冇人死傷？」

「兩個病獵。」

「隻野獸人走咗去咩方向……」

「我哋無頭緒，但崇基同晨興校董話你有可疑，我哋點都要做少少嘢，搵人睇住你。」

「米田貢喺邊？」

「都喺醫院接受緊治療，佢好輕傷。」

「我想見下佢。」

王峯搖一搖頭：「我哋有命令，暫時唔俾你接觸其他人住，當然都唔會俾其他人接近米田貢。」

最終，今天預習公投以失敗收場。

因為突如其來的襲擊，公投被迫中止。

而事後前來回報的博海德，亦印證了我的猜想，野獸人確實為馮覓本人，能夠病變原因是依靠一隻獼猴偷運藥劑針筒幫助。

當晚過後，各種陰謀論開始浮現……

很多人都相信，是醫療霸權策劃了這起事件。

畢竟軍工和醫療兩個領域上，醫療明顯跟特殊病者關係較深。

加上疑似米田貢自導自演被襲擊，大家都覺得醫療霸權背後的利益勢力很龐大，對校董會越來越討厭。

我們正一步一步，陷入敵人的計謀中。

最近啲文好似好短咁

公子會無左港豬，會人鬥權術計謀都唔係好勁姐

暫時睇唔到佢地電台有咩作用

唔通今次成為公子會第一次敗筆

由dr d襲擊大西北開始
所有野都係米生搞出黎

電台用間接方式去將醫療資訊放入人個腦，時間長啲就會有用，例如特別整幾單新聞同醫療資源唔夠有關導致咩慘劇，咪有市民覺得醫療資源要發展，問題在於公子會唔可以摧毀傷害中大區，米田貢 馮覓可以任玩

米田貢玩到用直接嘅危機，咁就無得鬥，都話正面而嚟嘅危機更容易影響人，假設有一日香港邊境有隻怪物 雷凶獸咁樣衝埋嚟，政府搞掂咗佢，之後話要增強自己防禦同類怪物嘅能力，要運多啲武器落香港，信唔信好多人會同意？

米田貢支持咗軍工發展，再製造危機令市民揀軍工，已經控制咗諗法之後再講公投同動搖咗大學管理層嘅地位，馮覓咁樣走出嚟襲擊米田貢同軍工代表，加埋病獵學會走出嚟，打擊埋醫療 病獵同m，咁所謂防禦都會集中係中大自衛隊同軍工方向，仲可以話大學管理層同m勾結研究病者，如果大學管理層個班咁講民主嘅校董見到大學啲人唔信佢地，米田貢又推公投，可能食埋個大學，中大自衛隊咪變成佢嘅私兵

不過重點應該係姓李個件會點做，如果同米田貢一伙就麻煩，唔同米田貢一伙無理由咩都唔做

寫多啲呢啲，呢啲先係我要嘅病港，而唔係單純嘅打打殺殺霸體屈機

而家馮覓應該已經勁過dr d
自主研發針
仲有動物軍團

Dr D明明第一季出場壓迫感好勁
依家每次出場都負責搞笑

推

推到墨巴出文

認同！多啲呢啲陰謀論或者政治野其實都好睇

有些事情，單靠一個人是無力改變。

經過今日這件事，大學對軍工需求只會有增無減，醫療複合體落敗只是時間問題。

就正當我這麼想之際，米田貢突然半夜派人前來，邀請我到他的病房用餐。

居然主動找上門，是我萬萬意想不到。

我應約前往，看守我的自衛隊亦會跟隨。

米田貢住在高層的私人病房，病房中擺放了折疊四方桌，桌上放滿豐富的火鍋和配料，包括鱸魚、牛頸脊、油麥菜，每款看上去都好新鮮，湯底則以半顆椰菜和蔥調製。

「坐啊。」米田貢夾塊牛頸脊大口吃。

我走入病房，拉開摺椅坐下：「正想搵你。」

「你仲行得走得，即係傷得唔重。」米田貢往碗裡倒酒，推到我面前：「慶祝我哋計劃成功，飲杯。」

「計劃？我無同你有過合作。」

「你係無，但你好配合我計劃。」興高采烈的米田貢仰頭一口灌掉酒。

「……」

米田貢痛快地打個嗝：「飲喇，無毒。」

「病者襲擊倖存區嘅事，係你策劃？」我打算只問一句。

米田貢收起和顏悅色：「亞貢，你想我開口嘅話，至少都飲杯敬酒先。」

病房內，只有火鍋咕嘟咕嘟的沸騰聲。

我握起盛滿黃色酒液的圓碗，快快地喝入肚中。

然而，酒液僅僅是掠過口腔，那既鹹且苦的怪味就攻上腦袋。

「噁！」我下意識把酒吐回碗中，甚至產生反胃的感覺。

「哈哈哈哈，你唔係幾識欣賞咁。」

「唔係酒嚟……」我凝盯起泡沫的酒碗。

「嚴格上嚟講可以話係酒，又唔可以話唔係酒，依啲貞德嘅精華。」

「……」我不敢相信他在說什麼。

「你嗰隻病者馬……」

「唔好叫病者馬咁難聽，係叫天馬，有對翼、全身白雪雪、有隻夢幻嘅獨角，唔好將貞德同其他嘔心核突嘅病者相比。」米田貢一本正經地解說製作程序：「依瓶酒係取自貞德神聖嘅尿液，有做過濾同蒸餾去消毒，然後再做第二次蒸餾去除雜質，配上天然蜂蜜發酵，存放一段時間，先有你今日飲到依瓶咁靚嘅酒。」

「尿就係尿……」我管他做了多少複雜的程序。

「暴殄天物。」米田貢伸手拿起我的酒碗，將我剛剛吐出的馬尿酒喝下。

放下酒碗後米田貢直視著我，該是時候說正事。

「你去咗我屋企嚟？既然話見到貞德。」

「陳浩基同你廚師，都已經講哂我聽。」我直說。

「哈哈哈，但我咩都唔知喎。」米田貢攤開雙手，一副事不關己的樣子：「貞德變病者係因為唔知喺邊舔到病者血，我都好痛心。」

「識令動物都病變，只有馮覓做到。」這就是他倆合作的證據。

米田貢收起嘻皮笑臉的模樣，聲線忽然變低沉：「亞貢……乜你唔覺得奇怪？點解陳浩基同麥里佐，咁順攤講哂所有嘢你聽。」

「……」

「可能你真係有方法挖開佢哋把口？但你有冇諗過最主要原因係，因為佢哋得到我嘅默許。」

「咁做對你無好處。」

「當然有好處，因為你咁樣先會搵方法暫停軍工複合體，引發後面一連串事情。」

「反正你都贏硬，點解仲要搞多次襲擊，累死我兩個病獵。」

「因為我真正嘅目的，你哋仲未睇得透。」

「……」

「經過今日，相信大學已經好多人，對校方嘅不作為感覺到失望同憤怒，心裡面到諗如果早少少撥款發展軍工武器，可能就唔會發生今日嘅事，當佢哋有依種心態嘅時候……」米田貢揚上嘴：「離異心就會出現。」

「你真正計劃係……」

我一直以來都搞錯了，米田貢不是想讓大學發展軍工複合體來幫助自己。

而是想直接掏空大學的軍工部，帶回去北部都會區發展。

「係啊，我要帶哂成個軍工領域嘅專家、學者仲有工程師走。」米田貢夾出一條鱸魚，直接粗暴地咬斷魚頭：「因為佢哋已經對大學失望透頂。」

「……」

「但放心，你都唔會有損失，成間大學大半個軍工專業嘅人才走咗，校董會自然逼不得已將資源投放落醫療複合體到，某程度上你都係贏家，我哋雙贏！」米田貢興奮地說。

「你係幾時就有依個諗法。」我有種被玩弄於股掌之上感覺。

「哈哈哈哈，由我過嚟大學嗰陣，我已經係咁樣諗。」米田貢的深藏不露，假裝落難將我騙到。

「你果然係個野心家……」我直視著米田貢眼睛：「睇小咗你。」

「我感受到你有少少殺意。」

「你第六感唔錯。」

「嘻，你要當場殺死我好易。」米田貢周圍指向不同可用於殺人的物品：「筷子插爆我隻眼、個枕頭可以焗死我、再唔係將我個頭撳落個鍋到，但你最緊要知後果……你殺咗我會變成全校公敵，公投日嘅恐襲事件會入你數，你病獵學會都唔洗旨意再存在。」

「……」

米田貢豎起食指：「另外我喺北區忠心嘅僕人會即刻燒哂所有農田，索性全部人一齊餓死，反正如果我死咗嘅話，依個世界都無存在嘅意義哈哈哈哈。」

「……」

「再加埋依個時間，我安排嘅船應該已經出發。」米田貢稍稍望向病房窗外：「嗰批軍工領域嘅專家學者，都上哂船準備離開大學，船上面裝咗個計時炸彈，如果我趕唔切去上船打密碼解除倒數，隻船就會嘭一聲！爆炸……」

換言之，米田貢以很多很多的生命威脅我，不能殺死他。

可惡的是，種種思量下我動不了手。

他的要脅相當成功。

如果動手，除了會成為人民公敵，更不太可能再跟大學合作。

如果留手，我們目標的醫療複合體可以落實。

這次輸了。

甚至輸得有點徹底，一切都在其掌控內。

米田貢站起身：「咳。」平日那虎背熊腰的身軀，現在看起來如同巨人一樣，無可撼動。

我問他：「你依一切就係為咗權力？」

「只係為咗保護家園，上面嘅來犯有幾凶險，你係唔會想像得到。」

米田貢行到窗前，吹響口哨。

不久，一隻飛翔的白馬於朦朧的月色下，降臨至醫院外頭。

「如無意外，我哋應該唔會再見，亞貢。」米田貢身體半跨出窗外，向我說出道別的話：「有緣再會，呵……有你喺到真係好玩。」

米田貢從高層跳落，未幾乘騎著貞德的背上重新升到半空，於夜幕下飛行離開。

咁樣俾人撚一獲

好少見M同人類鬥會輸到咁 米生有料

米仔幾撚堅

比人撚左一大鑊
但係結果黎講又唔係最差
不過如果之後北區野心再大啲就搞佢唔掂

如果港豬同米田貢鬥智應該會好好睇

米仔果然係智力王

難聽啲講句，咁係因為M一直以黎只係識用暴力解決問題，今次好明顯係鬥智力輸到貼地，又唔可以用暴力解決，就由頭比人撚狗撚到尾