【歷史po】法唔法國。。。。

加萊從此成為英軍喺百年戰爭中嘅重要據點，亦令到法軍喺戰爭中長期落於下風。

與此同時，鼠疫亦喺歐洲大陸漫延，由於患者會因內出血而皮膚發黑，因此被稱為“黑死病”。是次瘟疫喺歐亞非大陸造成咗大約7千5百萬到2億人死亡。



黑死病亦都喺法國肆虐，三分一人口染疫身亡，包括腓六世王后約娜。

鰥夫腓六世選擇咗兒子約翰嘅未婚妻納瓦拉嘅布蘭卡為再婚對象，呢種跡近扒灰嘅行為令約翰同其他貴族對佢離心離德，成為腓六世晚年嘅污點。

1349年，法國透過買賣將多菲內兼併，由於交易條件之一係法王繼承者必須使用多菲內稱號，自此多菲內就好似威爾斯親王咁成為咗皇太子嘅同義詞。



多菲內(Dauphin)即係法文中嘅海豚，盾徽中亦有海豚圖案



首任海豚為約翰長子，日後嘅查理五世。自此歷任國王都會將長子分封去多菲內鍛鍊下，嗰度同威爾斯一樣都係貧困嘅山區。正所謂窮山惡水出刁民，如果太子能夠鎮得住民風彪悍嘅山民，就代表佢有繼承大統嘅資格。

1350年，腓六世病死，由長子約翰二世繼位。

第2段打錯字

約翰二世又被稱為“好人card約翰”，佢係一個性格固執嘅理想主義者，無可救藥地痴迷於騎士精神。



約二世急欲與法國人決一死戰，而愛三世父子亦都同樣好鬥，兩邊關係一觸即發。

1355年，戰情再次白熱化，黑太子喺法蘭西進行騎行劫掠，造成嚴重破壞。約二世決定籌組軍隊予以還擊，大量法蘭西嘅貴族同騎士都響應國王吹雞，帶同手下嘅士卒參戰，連約二世4個仲係青少年嘅仔都有加入。

1356年9月，法英兩軍喺亞奎丹普瓦捷東南一個河谷交會。



法軍號稱有接近5萬人，而英軍只有萬零人。約二世自以為勝算在握，並不急於發動攻勢。而教廷則希望雙方再次和解，亦派遣使節斡旋。

使節喺兩軍之間遊說停戰，約二世囂張地要求黑太子同旗下嘅100名騎士主動投降成為俘虜，被黑太子斷然拒絕。

談判破裂，戰鬥喺翌日展開。約二世嘅戰略係派出以300名騎士組成嘅小隊進行突擊，打亂敵方陣腳，再派主力步兵上前撕殺。

戰場被沼澤同叢林包圍，有碼前進頗為困難。法國人似未汲取克雷西一役教訓，並未積極訓練出弓箭手，反而繼續重用騎兵。英勇嘅法蘭西騎士就好似之前嘅戰爭咁遇上箭雨，紛紛送頭。最後連法王約二世都被俘虜。

樓主出po未

樓主

黑太子秉承中世紀嘅騎士精神，對法王一行人以禮相待，甚至親自侍候佢哋用餐。

同約二世一同被俘嘅仲有近百個貴族，佢哋先被英國人帶到出產紅酒嘅波爾多，7個月後再由黑太子親自護送到英格蘭。約二世嘅軟禁地點不斷轉換，最終被送到倫敦塔。

約二世被捕將國家留咗俾太子查理，隨後四年法英繼續交戰，但由於戰況冇決定性結果，最終雙方喺1360年同意講和。5月初，愛三世父子同約二世父子喺沙特爾附近嘅一個小村莊布勒丁尼會面，雙方同意和解。法國向英國割地求和，但相應嚟講愛三世都要放棄布列塔尼同法蘭德斯嘅宗主權，同埋對法蘭西王位嘅宣稱。



而約二世嘅贖金亦被敲定為3百萬金克朗，喺法國支付咗5分1金額之後，約二世獲得釋放。而法方就提供約二世嘅兩個囝安茹公爵路易同貝利公爵約翰，以及幾十個貴族俾英國做人質。

到咗當年嘅十月，兩位國王喺加萊再次會面。愛三世似乎對放棄法國王位感到後悔，所以要求法國喺一年內將布勒丁尼條約答允嘅土地割讓。由於土地轉讓嘅過程既冗長又複雜，愛三世嘅要求明顯係強人所難，為自己留有選擇餘地。

而到咗1363年夏天，喺英國嘅質子安茹路易竟然逃走返法國。佢父親約二世對此大為不滿，認為有損法蘭西王室嘅聲譽同信用。性格猶如宋襄公嘅約二世不負“好人”之名，佢不顧群臣嘅反對做出一個令人驚訝嘅決定----自願回到英國，代替兒子成為人質。

約二世第二次嘅人質生涯並無維持太耐，喺1364年5月，佢就喺英國因不知名疾病去世。因為約二世本就身體麻麻，相信係自然死亡。

約二世嘅繼任人查五世比亡父要精明現實得多，換言之佢係一個比較好嘅國王。



查五世被後人稱為“賢明王”，佢喺顧問們幫助下強化稅收制度充實王家內庫，加強咗中央集權。佢最大嘅建樹係創立咗第一支有固定津貼嘅常備陸軍，成為日後法國稱雄歐洲嘅一大利器。

法國陸軍扭轉咗百年戰爭中法國嘅頹勢，先後收復咗普瓦圖同布列塔尼，1373年又擊敗南下波爾多嘅英軍。法國人持續對留喺歐陸嘅英軍採取騷擾策略，呢個戰略十分成功，到1374年，英國手上只剩低包括加萊在內嘅5個港口。

喺14世紀結束前，法英之間無大規模戰事。查五世逝世於1380年，由兒子查六世繼位。

查理六世即位時年僅11歲，因此喺佢少年時期朝政由勃艮第、安茹、貝里同波旁等公爵組成嘅攝政團控制。佢哋都係查六世嘅uncles，當中以查五世兩個細佬，勃艮第公勇者腓力同奧爾良公路易最有話語權。而查五世時代透過收割韮菜改善財政而充實嘅國庫，就成為咗諸皇叔角力嘅戰場。

為咗爭權奪利，公爵之間亦時有衝突。以致原本查六世14歲成年就應該結束嘅攝政期，最後到佢20歲（1388年）時先結束。查六世喺當年開始親政----而呢個亦都係法國災難嘅開始。

人只係以神之名，走獨裁之實

其實呢個時期法國君主嘅畫係咪文藝復興年代畫返？呢啲應該16世紀嘅畫

查六世首次精神病發作係喺1392年8月，當時23歲嘅佢同一班騎士一齊騎馬經過樹林，一個侍從因為恰眼瞓，將長矛跌咗喺地。查六世突然發癲大叫，話個侍從係內鬼，仲攞起把刀有殺無賠斬鳩咁斬，到佢終於被人制服嘅時候，已經有幾個騎士死喺佢腳下。

從此查六世就不時發作，有時佢會以為自己係玻璃做嘅一掂就散；有時又會以為自己係聖路易。

由於查六世大部份時間都精神正常，所以貴族搵唔到一個正當理由廢黜佢，但就重新設立一個議政會議，由王后巴伐利亞嘅伊莎貝拉主持，勃艮第腓力同奧爾良路易自然係必然人選。

查六世未成年時嘅攝政會議，係由腓力主導。但路易憑住同王后嘅肉體關係（王后所生嘅12名子女中，有幾個好可能係佢嘅），迅速喺會議中掌權，更加被授予太子同其他王子公主嘅監護權。

奧爾良運用權勢擠壓勃艮第，令兩家嫌隙更深。到1404年，腓力因病去世，由其子勇者約翰繼位。

隨住時日約翰對路易越來越感到難以容忍，於是喺1407年於巴黎街頭派人將路易刺殺，約翰對事件承認責任，但就堅持自己誅殺亂臣賊子冇做錯。




奧爾良路易見風頭火勢於是著咗草一排，過咗年幾時間先再返巴黎，王室對佢冇任何懲罰，仲將諸王子嘅監護權交托比佢。

路易死後由14歲嘅仔查理繼位，佢一心想報父仇，於是尋求外父阿馬尼亞克公爵貝爾納七世幫助，從此奧爾良派又被稱為阿馬尼克派，佢哋同勃艮地一派關係緊張，內戰一觸即發。



對岸嘅英國亦都虎視眈眈，當時嘅英王為亨利五世，佢老豆亨四世本身就係個篡位者（亨四世廢金雀花查理二世，開創蘭開斯特王朝），照計並無資格爭奪法國王位。

但係法國兩派嘅內鬥就為亨五世帶嚟機會，佢希望透過迎娶查六世個女嘉芙蓮嚟加強自己嘅地位。

亨五世派使者嚟到巴黎，向法國獅子開大口地提出一連串要求，包括割讓大量土地、支付約翰二世未俾曬嘅贖金、以及法國王位嘅繼承權。最後要求同嘉芙蓮結婚，嫁妝開價2百萬克朗。

法方對英方嘅開天殺價自然無辦法應承，但法國亦都唔想打仗，於是就提出將一啲土地併入阿奎丹，同埋俾80萬克朗做嫁妝。

法國嘅拒絕正中亨五世下懷，佢於是再次集結大軍，準備向法國攻擊。為咗籌備開戰資金，佢幾乎將所有王室信物作為抵押品，向富有嘅市民借貸。



1415年8月，亨五世坐住戰船越過英倫海峽，直取法北嘅阿夫勒，開始咗第三階段嘅百年戰爭。

聖誕節前有冇機會寫完

連登終於有個post法國開頭真係講法國

樓主
不過點解有呢兩套圖

阿夫勒城位處塞納河畔，城牆長達兩英里半，更有寬而深嘅護城河同塔樓守護，被認為係一座牢不可破嘅城池。

亨五世同佢嘅軍隊喺阿夫勒東方一處沼澤地駐紮，嗰度既潮濕又衛生環境惡劣，英軍因為瘟疫而死咗三分一人，包括大批騎士。然而阿夫勒城內因為糧食不足，最終喺被圍困五星期後開城投降。

亨五世為表示寬大為懷，並無喺城中推行劫掠，只係捉咗啲有頭有面嘅市民，叫佢哋俾贖金就放人。



阿夫勒一役表面上係英軍嘅勝利，但係英軍都死傷慘重，亨五世合理嘅做法係留低部分士兵防守佢新近得到嘅城池，然後主力退回英國。

但係亨五世對戰果並唔滿意，佢決定再次進行軍事冒險，行軍去加萊。呢個決定被英軍眾將反對，因為兩者距離有成百五英里，沿途佈滿荒野沼澤同敵人嘅堡壘，雨季期間河水更不時泛濫，可謂苦難行軍。

但亨五世心意已決，佢決定力排眾議開展征途。喺1415年10月8日英軍出發，途中佢哋接到消息，阿馬尼克派已決定派兵增援，人數更加有英軍嘅5到6倍。