【歷史po】法唔法國。。。。

點解三世個樣好似仲好睇過四世

博義八世係世俗神職人員嘅縮影，佢飽讀詩書，出身意大利名門，做教宗嘅目的係為自己家族謀福利。喺佢眼中腓四世呢啲世俗統治者不過係教廷嘅臣屬，冇資格同佢作對，但腓四世用實力去證明自己有。



腓四世馬上下令限制貨幣黃金等從法國流出，又唔俾教廷派人去收稅。由於羅馬嘅收入高度依賴法蘭西，所以教宗博八世最終被迫就範，同意腓四世可以喺緊急情況下對神職人員徵稅，又將腓四世祖父路九世封聖。

到咗1301年，法蘭西同羅馬嘅紛爭更白熱化。教宗博八世喺未經法王許可嘅情況任命貝爾納·塞瑟為巴米埃主教，此事令法王同教宗再起爭端。腓四世直接以叛國罪名將塞瑟拘捕。

按常規，所有涉及教士嘅案件都歸教會法庭審理，腓四世咁樣做明落面。勃然大怒嘅教宗喺1301年向腓四世頒布敕令，威脅將腓四世踢出教會。

腓四世唔柒理，直接將敕令燒毀，仲話自己以後直接跟上帝唔再跟你個上帝代理人。佢為咗尋求輿論嘅支持，1302年4月喺巴黎聖母院召開法國首次“三級議會”。

三級議會由教士、貴族同平民嘅代表組成，腓四世利用貴族同平民對肚滿腸肥教士嘅忌恨，成功得到議會支持佢同教廷抗衡。

博八世進一步為鬥爭加碼，喺1302年11月發布詔書《唯一的聖者》，重申教廷權威至高無上，並將腓四世絕罰。

腓四世為咗反擊教宗，於是宣佈博八世先係異端同非法當選，並且宣佈要召佢去巴黎交代自己嘅罪行。

腓四世派其親信顧問諾加雷特嘅威廉帶千六兵馬到意大利捉拿教宗，此時博八世正喺意大利中部阿納尼，威廉迅速將無兵無將嘅教宗俘虜。

被俘嘅博八世被毆打凌辱，但因為阿納尼人民對教宗被擒義憤填膺，威廉明智地喺3日後將佢釋放。

博八世雖然獲釋，但七老八十嘅佢經過呢一番折磨，一個月後就病死咗。

博八世嘅繼任人本篤十一世做咗一年就死咗，之後樞機主教為咗繼承人而意見分歧，經歷十一個月嘅空位期，最終由法國波爾多主教當選為教宗，稱為克勉五世。



克五世自己係腓四世嘅法國臣民，腓四世對佢作出威脅，要求佢喺法國進行加冕。克五世一直都想前往羅馬，但受到腓四世阻撓，數年間一直喺法國境內流浪。最後喺1309年克五世決定喺法南嘅亞維農落腳。



亞維農位處地中海，氣候潮濕悶熱，衛生環境惡劣。克五世同佢繼位嘅六個教宗就一直留喺呢個鬼地方留咗近70年。

呢段時間嘅教廷被稱為“巴比倫之囚”，引用以色列人喺公元前6世紀被巴比倫人征服嘅典故。喺呢段時間教宗大部份係法國人，佢哋亦都淪為法王嘅傀儡。

控制住教宗嘅腓四世又

又樓主係咪漏咗一大段

我想問現代法國其實強勢不，我總感覺佢地 d總統好臭串

宣布教皇係異端

老友你咁有料得唔得㗎？

當腓四世徹底掌握住教宗，佢就開始向另一個宗教團體埋手，今次亦係出於財政上嘅考量。

聖殿騎士團創立於第一次十字軍東征後，主要由信奉天主教嘅法國騎士組成，係有名嘅三大騎士團之一。佢最初喺耶路撒冷聖殿山上駐紮(傳說所羅門王嘅聖殿喺呢座山上)，因而得名。



1129年，聖殿騎士團得到羅馬教廷正式支持，擁有諸多特權，遂迅速增長其規模、勢力同財富。佢哋掌握咗東西方之間嘅商貿活動，又發動募捐組團海外朝聖，藉此聚集大量金錢。之後聖殿團就開始將啲錢放債生利，成為咗今日銀行業嘅雛形。

到咗1250年聖殿團已經擁有9千塊以上嘅土地，喺歐洲各地都有分支機構，連法英王室都曾經將國王御庫委託其保管。聖殿團喺當時嘅金融圈舉足輕重，拍得住而家嘅華爾街。

1291年，十字軍喺黎凡特嘅最後領土阿卡城被馬木留克攻陷，耶路撒冷王國滅亡。眾騎士團退守到塞浦路斯，再返回法國。

喺當時聖殿團係歐洲多個君王嘅債主，法王腓四世就欠下佢哋巨債，但當佢哋返到巴黎向佢追數嘅時候，腓四世同牙偉一樣大感困惑：



腓四世開始搵pr周圍唱衰聖殿團，例如話佢哋崇拜撒旦同埋係屎忽鬼(雞姦者)。到咗1307年10月13日星期五(黑色星期五由來)，腓四世派士兵將包括聖殿團長雅克·德·莫萊在內嘅過百名騎士拘捕。

腓四世並命令教宗克五世宣佈聖殿騎士團為異端，被捕嘅騎士遭到嚴刑敲打，有好多捱唔住死在獄中。

1310年腓四世喺巴黎正式對聖殿團進行審判，好多騎士被判火刑慘遭燒死。到咗1314年，連團長莫萊都被判刑，行刑前佢被帶到聖母院前嘅刑台，要求佢重覆一次佢嘅供詞。

七老八十嘅莫萊經過七年牢獄折磨，已經七勞八傷。但風燭殘年嘅老團長早已豁出性命，佢喺台前推翻自己嘅作供，重申聖殿團所做嘅一切對得住上帝，並詛咒法王同教宗會喺一年內面臨上帝嘅審判、卡佩王朝會喺第十三代斷絕。

老團長喺當晚被帶到塞納河一個小島上被燒死，死後佢嘅遺骨被河邊嘅修道院收拾，並將佢尊為聖人同殉道者。

樓主補返漏咗嗰段未

天主孝子法蘭西

莫萊嘅詛咒似乎有一定法力，克五世一個月後就胃can死咗，而正值壯年嘅腓四世就喺半年後打獵時突然中風猝逝。

克五世生前受盡法王拑制，但佢亦都有違抗腓四世嘅時候。佢喺1312年宣佈聖殿團嘅資產撥歸兄弟團體醫院騎士團，但腓四世喺生前依然實質控制聖殿團法國境內嘅房產。

腓四世消滅聖殿騎士可以話係法蘭西王國嘅轉折點，聖殿團本身好似中世紀嘅其他自治法團一樣，雖然總部喺巴黎，但佢嘅權利源於教廷，同王室係平起平坐嘅平行機構。腓四世以野蠻手段好似共產黨鬥地主咁侵吞聖殿團嘅財產，雖然令到王室財政短期大大改善，但係金融中心從此離開巴黎，再無返過嚟。

腓四世嘅行為對法國日後影響深遠，之後幾百年法蘭西嘅信用值一直無辦法提高。甚至到咗18世紀，當蘇格蘭人約翰·羅為咗幫助法國改善財政，以開發密西西比名義發行股票，亦都因為市場對法國王室信心崩潰而導致泡沫爆破。



而除咗同教會鬥爭之外，法英呢對宿敵亦都繼續紛爭不絕。喺1293年一批法國水手喺英國控制嘅加斯科涅(喺亞奎丹)遇襲，事件演變成為外交風波，腓四世要求英王愛德華一世以臣屬嘅身份去法國向佢解釋，但被愛一世拒絕，導致法國喺1294年侵入亞奎丹。

英王愛德華一世渡海營救，經歷數年戰爭擊退法軍，結果雙方最終又握手而和：愛一世娶腓四世之妹為妻，兩人亦同時結為親家，愛一世長子愛德華將娶腓四世之女伊莎貝拉為妻。

呢兩段政治婚姻都唔太幸福，愛一世比佢嘅妻子瑪格麗特年長成40歲；而愛二世同伊莎貝拉嘅婚姻直頭係一場災難，更導致咗法英百年戰爭嘅發生。

樓主

希望樓主可以講到太陽王Louis XIV

腓四世死於1314年，就喺佢死前不久法國王室出現咗史上最大醜聞內勒塔事件，而引發者就係佢個女伊莎貝拉。

伊莎貝拉據記載係一個絕色美人，但佢唔係得個樣嘅花瓶，反而十分精明而且個性強悍毒辣，有著“法蘭西母狼”嘅綽號。



事緣嫁到英國嘅伊莎貝拉喺1314年返娘家探親，佢仲將自己親手刺繡嘅錦囊分別送比自己三個阿嫂(瑪格麗特、布朗歇、讓娜)，後尾當佢準備走辭行嘅時候見到錦囊喺騎士奧內兄弟身上，聰明嘅佢好快就明白係咩一回事。

於伊莎貝拉將呢件事報告俾父王腓四世，腓四世馬上展開調查，果然發現佢哋經常喺巴黎嘅護城塔內勒塔度3女2男。



腓四世勃然大怒，將奧內兄弟同三個新抱捉拿，經過迫供同審判，佢哋被裁定罪成。奧世兄弟先被閹割再被剝皮同截肢，最後被吊死。瑪格麗特同布朗歇被剃光頭，並被判終身監禁，得二嫂讓娜被判無罪(據說佢淨係做汁女喺隔離睇。)

樓主

從陰謀論嘅角度出發，當時3個王子都未有子嗣，而伊莎貝拉已經同愛德華二世生下長子愛德華三世，只要佢三個兄弟一直無後，佢個仔就有權繼承法國王位。

但係雖然腓四世嘅三個仔(路易十世、腓力五世、查理四世，三人先後成為國王)真係好似俾聖殿團長咒中咁冇仔生，但係因為法蘭西王室繼承法嘅確立，以致伊莎貝拉嘅期望終究落空。



腓四世同佢之後嘅諸王繼續強化發源於法蘭克人嘅薩利克繼承法，確立咗傳男不傳女嘅做法，限制女性繼承(女權Karen:)。

為咗確定喺法蘭西王室內部排除女性繼承權，國王仲特登為此召開咗等級會議。但係喺各個諸侯嘅層面，仍然容許女性繼承。

喺法國嘅角度，容許女性繼承就即係將王位送比女婿或外孫，往往就形同將法國送比仇敵英格蘭。而另一方面卡佩家族代代都有正統嘅男性繼承人，從來未有過絕後危機。

美男子腓四世死於1314年底，長子路十世一登基就將被囚嘅妻子瑪格麗特殺死，然後另娶他人。但佢只係做咗短短
兩年國王，就因為一場劇烈嘅網球比賽而猝死(佢係歷史記載打網球同因網球而死嘅第一人)，留低一個大肚嘅老婆。

由於超聲波技術未誕生，所以大家就唔知係仔定女，於是暫時由二叔腓力五世擔任攝政。到1316年查十世妻子匈牙利嘅克萊芒提亞生下遺腹子約翰，但佢只係活咗5日就夭折。

王位落到腓五世手上，同佢兩個兄弟唔同，佢同妻子讓娜十分恩愛，喺內勒塔事件中一直支持佢。

但腓五世一樣係個冇仔送終嘅短命種，佢只係做咗5年就病死咗，然後幼弟查四世繼位。

查四世先後娶過3個老婆，但都冇留低男性後代。佢當政6年病逝，亦都同樣留低個懷孕嘅妻子。歷史奇妙地重覆，但卡佩嫡系已經子孫凋零，只好由旁系嘅瓦盧瓦伯爵腓力擔任攝政。

腓力係三兄弟嘅堂兄弟，當生下嘅係女嬰嘅時候，佢亦都自動成為法國國王。冷手執雞嘅佢被稱為“幸運王”，卡佩王朝就此被瓦盧瓦系所取代。



根據中世紀人嘅睇法，多子多孫係受到上帝恩賜嘅現象，而缺乏男性繼承人明顯係不受上帝青睞嘅現象。而無獨有偶，當瓦盧瓦王朝同佢後繼嘅波旁王朝衰落嘅時候，亦都出現三兄弟因為無子而輪流當國王嘅現象，似是代表該王族氣數已盡，係時候退出歷史舞台。

樓主在嗎

支持樓主出post

腓六世嘅繼位並未令所有人感到滿意，喺英國嘅母狼伊莎貝拉亦對王位虎視眈眈。精明厲害嘅佢早喺1326年勾結胞弟法王查四世，以一支由佢情夫羅傑·莫蒂默率領嘅僱傭兵，將佢老公愛二世推翻，由太子繼位為愛三世。



被迫退位嘅愛二世喺威爾斯嘅徙所被殺，自此伊莎貝拉同莫蒂默獨攬大權。

伊莎貝拉認為愛三世係上任三個國王嘅外甥，以血緣嚟計應該比腓六世更有資格繼承法國王位，對此深深不憤。

腓六世登基後以國王身份要求愛三世代表亞奎丹向佢致敬，愛三世足足拖咗成年先嚟法國見佢，之後兩人又因為宣誓嘅字眼而起咗爭執。

而除咗愛三世之外，腓六世亦都同另一個封臣，法蘭德斯伯爵亦都起咗衝突，法蘭德斯位於今日比利時北部嘅荷蘭語地區，喺當時係一個相當富裕嘅地方，以紡織業聞名。由於英國嘅主要出口產品係羊毛，因此兩地有好緊密嘅生意往來。



當時嘅法蘭德斯伯爵為路易一世，佢堅持效忠法國王室。當愛三世試圖拉攏佢而不果時，就攞出而家美國人對付支那嘅手段，對法蘭德斯實施禁運。

法蘭德斯失去英格蘭嘅羊毛同糧食補給，頓時陷入混亂。1337年法蘭德斯各地爆發叛亂，親英嘅民眾群起反對路易伯爵。

當腓六世支持當年嘅親法勢力鎮壓起義，愛三世索性自稱為法蘭西國王，而腓六世亦宣佈收回英國人喺法國嘅領土亞奎丹，展開咗法英百年戰爭嘅序幕。

法英百年戰爭並非一場單一戰爭，而係由瓦盧瓦同金雀花王朝百年間嘅一連串戰爭組成。英軍初期以今日比利時嘅安特衛普為進侵法國嘅橋頭堡，但到1339年秋先至入侵法國領土。



英軍軍紀敗壞，到處姦淫擄掠，連修女都唔放過，似是想故意故意挑釁法軍。當法軍喺今日法北聖康坦追上英軍時，御駕親征嘅腓六世就對愛三世提出一個富有騎士精神嘅解決分歧方案：



腓六世叫愛三世搵定地方卜場打返鑊，只要係冇樹、沼澤、坑渠嘅地方就得。

但呢個提議正中愛三世下懷，25歲嘅佢正值身強力壯嘅年紀，而且成日都比武，反之腓六世就老佢廿年。

當腓六世嘅斥侯探知愛三世比傳聞中仲要勇健，腓六世就開始對佢隻抽建議感到後悔(愛清。。。恕我軟弱)，轉頭仲返咗巴黎。



愛三世對於腓清嘅笠水感到又鄙夷又無癮，同時亦因為寒冬將至，決定留喺布魯塞爾過冬，並且開始策劃新一輪攻勢。

粒水

屌你咁兒戲