【歷史po】法唔法國。。。。

土耳其咁少人

去到1856年大約3500萬
其實好難計，因為例如北非埃及好難計人口

到底普路士點用6百萬人口頂住三個大國

當時1789年仲係封建制唔會成個國家嘅人投入戰爭
養得起手下幾萬精兵就總有辦法嘅
直到拿破崙出現

其實都唔只因為拿破崙嘅出現，拿破崙之前玩法國大革命初期都已經成日玩緊總動員

成班革命青年熱血上戰場，所以法國喺頭幾次反法同盟嘅圍揪下保留到革命成果

期待拿破崙激戰Alexander I

lm

有啲更正
查返原來1831年嘅人口普查係只限定男性
因為蘇丹Mahmud II 想知道可以收幾多税同士兵

出post都算快

其他係計哂 ?

冇錯係
不過見到啲土耳其網民話嗰時其實土耳其人口普查會計埋馬
所以可以當土耳其條數係啱

樓主呢

接替杜閣嘅係富可敵國嘅瑞士銀行家內克爾，但佢同樣因為捲入宮廷鬥爭當中，喺1781年被迫下台。

而同一時間大西洋對岸亦風起雲湧。1776年7月4日美國宣佈獨立，法國人出於對英國嘅憎恨，舉國由上到下全力支持美國。美國首任駐法公使富蘭克林(一嚿水上面果個)更親身到達巴黎，同伏爾泰世紀會面。

1778年5月30日，83歲嘅伏爾泰死於巴黎，終於唔駛再喺呢個po出現了。

1777年法國正式同美國結盟，並派軍七千人參戰，人數比華盛頓將軍嘅民兵仲多。



美國獨立戰爭喺1783年結束，美國成功脫離英國獨立，法國仲送咗個自由女神像比佢。



此時嘅法國看似已成功挫下宿敵，並且成為世人心中嘅民主自由鬥士。失去美利堅嘅英國只有千二萬人口，而法國足足係佢兩倍🈶️多。

但呢個如日中天嘅朵係用錢買返嚟。法國負債變得前所未有地高，喺81年已達4千6百萬里弗爾(但喺內克爾出版嘅財政預算中則被塗脂抹粉篡改為1000m)。

路十六對財困苦無良方，1788出於國難思良將又召回內克爾。內克爾都好識做，馬上捐獻出兩百萬入國庫，但亦只係杯水車薪。

喺呢個時候，法蘭西經濟已面臨崩潰，全國瀰漫住不滿之聲。人民依然尊重國王，但就對佢好失望，認為王上冇喺貪婪嘅稅吏同貴族手上保護好佢哋：自路十四建凡宮以來，就將全國貴族畜養起嚟，遠離佢哋本應要照顧嘅農民。而杯酒釋兵權嘅代價就係國王為此必須以重金贖買貴族，財政壓力由此落在百姓頭上。

而本來應該同王權相抗衡嘅教會亦喺法國成為國王嘅爪牙，一眾緇衣宰相變成同貴族無異嘅建制派。

法國十分一土地屬於教會，佢哋向農民收取什一稅，但就同貴族一樣唔駛交稅俾國王。淨係每5年隨量執份數比阿公就得，呢啲財富大部份落入紅衣主教們袋中。



對事態束手無策嘅路十六希望聽取民意，於是喺175年後，決定再次召開三級會議。

最後一次三級會議係喺路十三時期召開，但嗰時佢已經只係一個諮詢團體。因為法王早已有自己嘅財政署收稅，國會最核心嘅財政用途一開始就唔存在。

三級會議當時已只得返司法(仲裁貴族糾紛)同禮儀作用。而作為第三階級嘅布爾喬亞(布爾喬亞詞源為市民，後嚟馬克思主義者將佢稱為資產階級)就好似寒門士大夫咁慣於同國王合作對抗貴族同教會，不同於英國上下議院嘅貴族同市民博弈合作，拑制王權。

第三階級必須服從君主嘅傳統一但形成，就會因為路徑鎖定而越發強固。以後無論負擔幾重，只要國王又又又打輸比英國要賠錢，或者比人俘咗要比贖金，布爾喬亞都要硬食。



但另一方面布爾喬亞亦都借助王權，成為紅頂商人般嘅角色。到咗18世紀，佢哋已經擁有相當財勢。佢哋受啟蒙運動薰陶，開始要求與其相應嘅政治權力。佢哋提出改革稅制，取消前兩等級特權等要求。

為解決財政赤字同民怨，路十六喺89年1月宣佈召開三級會議，但國王發現佢其實唔撚知咩人先算係第三階級。喺百幾年前第三階級只有好少人，僅以點綴存在。但到咗而家佢開始覺得要下放更多權力比平民。

為咗解決呢個問題，喺1789年春天舉行咗第三等級選舉。普選資格為法國本土出生或已成為法國公民嘅男性，並要求喺居住地投票同繳納稅款。

最後會議人數定為1200人，第一同第二等級各約25%，第3佔一半。

但國王好快又面對另一難題，佢發現凡宮雖大，卻未能提供一個容納過千人嘅會議廳，最後只好喺皇家娛樂處緊急加建，命名「三階級房間」。

終於到咗89年5月4日星期一，呢日係三級會議召開嘅重大日子，成班尊貴議員好似元朗國天后誕咁，喺凡爾賽街道上由聖母堂一路巡遊到聖路易教堂，同時間進行聖靈彌撒。

經過一日莊嚴而隆重嘅儀式，會議喺羿日舉行。會議一開始就好有封建色彩。可能因為第三等級喺權貴心中都係乞兒，佢哋被要求穿上黑衣出席會議，同貴族嘅華衣與教士法衣呈強烈對比。



第三等級一方面好似劉姥姥入大觀園般感嘆王室嘅奢華，另一方面大概都會奇怪點解王上咁有錢都要開會搵我哋籌期❓而呢種疑忌會慢慢化作憤怒和憎恨，令未來嘅法蘭西變為一片火海。

法國最輝煌嘅時候嚟啦

法國史最鐘意1789到1914年

左派同右派就要出現了

會議從國王冗長而沉悶演說開始。路十六係個老鳳咁款嘅肥毒，講嘢1999。整場演說亦華而不實，死氣沉沉。

之後到財爺內克爾講嘢就仲出事，佢淨係識引用數據，仲講咗成3粒鐘，聽到啲觀眾瞓曬。

第三等級對佢哋嘅官腔自然聽唔入耳，佢哋所要求嘅係更激烈嘅改革。當第三等級嘅代表米拉波伯爵站立發言時，觀眾們先至精神一振。



米拉波本來應該代表貴族，但因為長期生活放蕩而被拒絕，最終以其滔滔雄辯贏得亞琛和馬賽第三等級代表資格。

米拉波其貌不揚，面上滿布幼年患天花留低嘅疤痕，但卻同鹽叔一樣好有女人緣。佢以“噬咬君主專制同特權階級嘅醜陋癲狗”自居，首先就為議會嘅選票問題作出質詢----第三特級理所當然地希望一人一票普選，因為佢哋有成接近600票，但國王同權貴都傾向一個等級一票。

經過一輪激烈嘅討論，第三等級喺6 月 17 日開始稱自己做國民議會，由米拉波領導。仲有12個教士加入佢哋。

呢個舉動嚇怕咗傾向更保守嘅王后，喺佢嘅枕頭風底下路十六決定採取行動：佢喺20號以場地裝修為由，下令關閉議會召開地。

當代表們驚訝地發現密室大門緊鎖，並有士兵把守。由於當時開始落雨，喺一名三級代表吉約丹醫生(佢之後會再出場)提議下，眾人移師附近一個室內網球場。並喺嗰度發表咗有名嘅《網球場宣言》，宣稱憲法不立，國民議會絕不解散。



577名三級代表中，除一名拒絕簽字外，其餘576名代表都在誓言上簽字。網球場宣言常被認為係法國大革命誕生嘅標誌；前文提到好多法國國王都係打完網球就出事，而呢次事件亦敲響咗路十六本人嘅喪鐘。

路十六不承認國民議會法律地位，佢宣告成立王室會議。會上佢拒絕接受一人一票嘅訴求，堅持分組點票。國民議會只可以討論有關稅務問題，冇佢嘅同意，國民議會任何決斷皆屬違法。說罷路十六準備離開議事廳，貴族同教士亦緊隨其後魚貫退場。

但當官員命令國民議會解散時，米拉波猝然發難，話除非國王用刀行住佢哋，否則絕不離開‼️路十六不料其有此一著，當堂。因為毒撚喺網上先惡得出樣，佢只好縮一縮膊頭裝作唔在乎，話由鳩得佢哋啦。

beta國王嘅軟弱壯大咗亂臣賊子野心。數日後大多數教士同47名貴族(尚書大人😹)都加入國民議會，路十六先開始覺得形勢不妥。

7月11日，喺以王后為首嘅保守派操作下，內克爾被當成替罪羊解僱。內克爾雖然講嘢悶，但就喺大眾心中有著定海神針般地位。事情一傳開，巴黎股市大跌，交易所關閉，各區都有市民暴動。

路十六當時已大為恐慌，佢調來16個軍團前來鎮壓，大部份以瑞士同德意志傭兵為主。理所當然佢哋並唔受到民眾歡迎，其中一隊更喺路十五廣場上遭到丟石。

而喺同一時間，喺一個叫德穆蘭嘅年輕律師號召下，民眾武裝起嚟，並喺街上設置路障。佢哋將栗樹嘅樹葉插喺帽上，以茲識別。好快民眾們就發現如果唔以栗葉為帽徽，就會被人吐口水，迫於群眾壓力只好跟隨。

由於無劉曉波阻撓，民眾好快就襲擊咗軍火店同巴黎傷兵院，起出十門大炮同近3萬枝火槍。7月14日清晨，佢哋朝巴黎市中心嘅巴士底監獄方向進發。



巴士底監獄建於14世紀，起初係作為百年戰爭時保衛巴黎嘅城堡，1417年開始成為監獄。路十四主要用佢嚟囚禁政治異見者，喺未能提出證據起訴前，以一個錦衣衛式嘅“黑牢”存在。而喺宗教寬容令廢除後，巴獄亦作為新教徒嘅囚所。

巴獄嘅環境其實唔差，只要你比得起錢，一樣好食好住，甚至仲有一個圖書館。如果你同典獄長關係好，仲有機會同佢共進晚餐。但巴獄依然作為專制君主權力嘅象徵，陰森地屹立於巴黎當中。

到當日清晨，已經有900人喺巴獄門口集。獄長洛奈侯爵只有兩日存糧，根本缺乏勇氣同民眾抗衡。佢嘗試同人民談判，但雙方未達到共識。到中午民眾決定不再等待，殺入巴獄。洛奈侯被殺，人頭被斬下刺於長矛遊街示眾，巴士底監獄就此陷落。

喺7月14當日，路十六成日都去咗打獵，直到第朝瞓醒先有人同佢匯報。睡眼惺忪嘅佢詢問臣下“係咪又有人作反❓🤔”，而獲得嘅答案係“革命已經發生”。

路十六馬上覺悟到事情嘅嚴重性，佢選擇好似趙紫陽一樣對學生作出讓步。佢馬上趕往國民議會，宣佈會撤出巴黎同凡爾賽嘅軍隊，換來第三代表嘅一片歡呼。不久前美國獨立戰爭中嘅英雄法拉葉將軍被選為代表，喺圍堵凡宮嘅人民面前宣讀國王演講，而革命群眾亦被國王接納，成為國民衛隊。法拉葉當場被任命為指揮官，隊員須佩戴代表巴黎嘅紅藍兩色帽徽，之後又加埋代表國王嘅白色。



凡宮前市民見正苦肯跪，於是欣然散去，但巴黎嘅市民依然聚集起嚟爭取內克爾返嚟。可能因為之前嘅政治表演湊效，貧窮嘅巴黎人(被形容為飢餓嘅稻草人)當正內克爾財神爺。軟弱嘅路十六又再屈服。

回到巴黎嘅內克爾受市民夾道歡迎，人們高呼國家/第三代表/內克爾萬歲，但鮮有人嗌國王萬歲。7月17日，路十六到巴黎市政廳發表演說，並同人民一樣別上紅白藍三色帽徽。國王嘅演說雖然依舊軟弱無力，但當群眾見到佢嘅帽徽時依然大聲歡呼，稱佢為“法國之父和自由人民的國王”，令路十六享受到前所未有之榮光。

喺呢個時候君主立憲仍然係國王同法國人所追求嘅目標，畢竟連美國(遑論死對頭英國)都可以用法國人理論成功立憲，法國應該同樣做到。



但歷史證明只有封建性強/人民慣於自治嘅地方先可以發展出穩定民主制度，例如美國或者瑞士----勇悍嘅山民或移民習慣自我保護，而選舉權歸根究底來自參軍嘅血酬。

而法國嘅情況則相反，君權嘅不斷擴大唔單止削弱咗貴族權力，人民嘅自治能力亦一併削弱；可以話法國立憲同民主中國一樣難以實現。

此時嘅路十六實際上已經唔再係法國國王，權力已經悄然從佢指尖溜走。佢已經淪為人民嘅俘虜，被群眾所綁架。

當國王仍沉醉於受人擁戴嘅虛妄幻夢當中，全國各地卻陷入無政府狀態。國民議會被賦予進行改革同制憲嘅權力，但卻無力維持秩序同改善經濟。對城市嘅窮人同農民而言，生活一日比一日難過。法國各地都出現暴動：暴民喺特魯瓦殺咗市長，各地駐軍或逃或加入人民行列，監獄大門被打開。7月22日，有傳言話前財相福倫叫人無飯食可以食稻草，因為法國人始終🈚️中國人咁捱得苦，於是憤怒嘅群眾將福倫同佢個仔捉住，喺佢哋口中塞滿稻草然後吊死路燈上。

一路都覺得好神奇點解英國議會成功但法國一放就爆炸