【歷史po】法唔法國。。。。

可能係過左時機？

眼見國王都已經屈膝於人民，貴族們亦開始知趣地投誠。8月4日，曾經同法拉葉喺北美並肩作戰嘅諾瓦耶子爵宣佈放棄自己嘅封建特權，好多貴族同教士跟隨。

不過幾日後權貴們又反悔，但反正佢哋都無權放棄權利，因為國王表示自己會誓死捍衛貴族同教士嘅權益。

但一直以來毀壞封建權益最多嘅，咪就正正係國王自己⁉️王室破壞曬除自己以外嘅所有封建力量，就如同枝葉削盡嘅樹木，自然難敵颱風。

議會民主雖被小清新所重視，但到底不能治肚餓。10月5日早上，一名年輕女子喺巴黎東區一個街市敲起行軍鼓，慢慢引來人群聚集。佢哋大部份係職業女性，包括小販、洗衣婦、妓女。佢哋不滿面包長期短缺同高通脹，人越聚越多，喺傾盆大雨中集結咗成6千人。



佢哋收集所有能夠收集嘅武器，包括鐮刀、長矛、西瓜刀、摺櫈，浩浩蕩蕩咁遊行到國民議會，一路高叫口號，要求得到面包。米波拉用咗兩個鐘說服佢哋離開，然後國王又接見咗6名婦女代表，打發咗佢哋走。

但嗰6個人係經過群臣篩選，根本不能代表大多數意見。到咗第日清晨，國王兩公婆喺憤怒嘅吼叫聲中驚醒，先發現凡宮周圍已經圍咗幾千人，佢哋明顯針對王后，高呼“奧地利女人去死‼️”。由於喺當時歐洲王族嘅安保並唔嚴格，甚至有醉酒嘅女性嘗試闖入王宮寢室。

幸好國民衛隊指揮官法拉葉已經到場，佢暫時維持咗秩序。但佢知道只有國王同王后蒲頭，先可以平息暴民嘅怒火。

王后喺宮中露台同示威者見面，陪同嘅仲佢嘅年幼子女。由於法國人普遍對佢抱有敵意，人群中甚至有火槍瞄住佢。但王后十分勇敢，佢雙手交叉胸前時傲然站立。正當劍拔弩張之際，法拉葉使出一招奇計，佢虔敬地向王后下跪，並親吻佢嘅手。



示威者始終心底裡敬畏王權，不禁肅然起敬，有啲人甚至嗌起“王后萬歲” 。

然後到國王嚟到，佢宣佈應示威者要求(當時有意見認為國王唔應太離地，應該返巴黎接近群眾)，一家大細搬返巴黎。

路十六一家猶如被裹挾嘅肉參，又如待宰羔羊般當日下午就出發巴黎。佢哋嘅新家就係路十四時代被遺棄嘅故宮杜樂麗，佢哋亦從此無再返過凡宮。。。。

拉法葉*

英國都有內戰
國王 Charles I 畀議會斬頭
可能因為之後慢慢一步步放權
例如Gergeo I 開始有首相

路十六一家好快就感到寢食難安，因為國民議會所在地馬術學校近在咫尺。而議會中亦因為政改歧異而分成兩派：維護既存共同體、支持君主制同維護教權嘅坐右邊；反君主制同教權、想解構現存共同體嘅坐左邊。

右派由出身貴族嘅米拉波主導，而左翼嘅領袖係一個新崛起嘅素人政客。



馬克西米連·羅伯斯庇爾嚟自百年戰爭雲湧之地加萊，先祖據說係愛爾蘭人，出身律師世家嘅佢當時只有31歲。

羅蛇做開律師，理所當然口才好好。佢喺89年喺家鄉當選三級代表，嚟到巴黎。

同醜樣嘅米拉波唔同，羅蛇個人好重儀表，衣著入時。佢好鍾意著深綠色，撲咗粉嘅頭髮梳理得一絲不苟，但因為生得矮所以總會著高踭鞋。

佢不好酒色財氣，生活簡樸，一心致力權術。佢自詡為“堅定無私獻身政治理念者”，米拉波亦讚揚佢堅守自己理念、前程無可限量。

而另一邊箱米拉波有感巴黎嘅激進派越來越多，開始有送國王去外省避風嘅想法。但當然作為國王必須要同人民喺埋一齊，因此唔能夠跨越國境。

但米拉波嘅計劃未有實行，因為佢半年後就病死咗。對王室相對友善嘅米拉波離世令王室情況更為不利。但當時嘅巴黎上流社會依然商女不知亡國恨，政治同文學沙龍繼續進行，但開始有貴族主動放棄自己嘅頭銜。到咗1790年7月14日(1879年被第一共和定為國慶)，巴獄被攻陷一週年，法蘭西全國都有大型慶祝活動。

數千名國民衛隊聚集於巴黎戰神廣場，舉行全國結盟節大會。國王路十六亦有出席，會上佢宣告堅決維護國民議會嘅權力，而之後兩日全國都喺一連串遊行、閱兵、放煙花中渡過，仿佛過去兩年嘅陰霾已經消散。



大會由歐坦主教夏爾·莫里斯·德塔列朗-佩里戈爾主持彌撒，但佢好快就會還俗，日後並被封為塔列朗親王。呢條撚樣會喺之後50年風雲變色嘅法國以及歐洲大陸，一邊翻雲覆雨，一邊喺刀尖上優雅地跳舞。

天不生聖賢，萬古如長夜。1754年2月2日，塔列朗生於巴黎一個古老貴族家庭，父親係路十六嘅遠房表親。



雖然出身尊貴，但塔列朗嘅童年並唔幸福。佢父母耽於逸樂，對佢疏於照顧。據佢回憶錄自述，佢2歲左右喺一個高櫃摔落地下，從此就跛咗。但有研究發現佢嘅跛行其實係近親通婚導致嘅先天遺傳疾病。



塔列朗嘅父母視佢為恥，好細個就掉咗佢去寄宿學校。由於佢身有殘疾無法參軍，所以即使佢喺兄長夭折後成為長子，父母依然將佢送往神學院，剝奪繼承權。

喺神學院嘅5年，塔列朗依然好毒，大部份時間都用來睇書，包括大量啟蒙時代著作。童年時嘅苦痛對人傷害最大，塔列朗因而養成咗狡詐、孤立、敏感同殘酷嘅性格，當佢喺74年畢業，已經成為一個冷漠無情、極端利己、見風使舵嘅馬基雅維利主義者。

畢業後嘅佢憑住家世當上蘭斯聖雷米修道院院長。但佢根本唔係一個虔誠嘅教徒，日日嫖賭飲吹過住世俗貴族嘅生活，唔夠錢就走去炒股票。

但塔列朗並唔係一個淨係識玩嘅紈絝子弟，佢好似韋小寶咁周圍交結權貴，後來更加搭上咗路十五條女杜貴妃，靠刷鞋得到信任從此扶搖直上。

喺89年革命前夜，佢靠政治操作被任命為歐坦教區主教。但佢一直係個玩世不恭嘅無神論者，對宗教理論嗤之以鼻。

塔列朗成為主教後不久即獲任命為第一等級代表出三級會議。佢眼見革命浪潮不可逆轉，知趣地支持革命者嘅反教權主義，並成為最先四位宣誓效忠國家憲法嘅主教。

革命之🔥慢慢燒到教會嗰疊。早喺89年11月，國民議會已宣佈將教會財產收歸國有，塔列朗對此表示大力支持，指出教會財產本嚟就係屬於全體信徒即國民，所以國家有權收回。90年2月，議會又立法所有宗教團體必須解散，修士同修女應該還俗結婚生仔。到7月份議會又通過教士法，將所有神職人員收編為公務員。

教士法令法蘭西教會嚴重分裂，低層教士本嚟就窮，自然選擇加入人民行列。但肚滿腸肥嘅主教則依然忠於教會，除咗少數人如塔狗條冚家剷。

喺呢個時候路十六嘅優柔寡斷性格又發揮效用。作為虔誠天主教徒嘅佢對於要企喺教廷定人民嗰邊猶豫不決，於是寫信俾庇六世問佢意見。其實問嚟都多鳩餘，教宗梗係話你班友咁做係離經叛道。

路十六聽從教宗說話，將已宣誓國安法新憲法嘅告解神父換成無宣誓嘅。

而當庇六世嘅信件被公開後，巴黎人嘅反教權情緒又高漲起嚟，各地都發生暴動：人們燒毀教宗人像、暴民殺入修道院姦淫擄掠、教廷大使被殺。

法國人嘅倒行逆施觸怒咗教廷，教宗庇六世為此發出咗“譴責令”。社運嘅活躍份子塔列朗喺91年被逐出教會，佢欣然換上貴族嘅華衣美服表示wfc。

而路十六則被命令必須更換佢嘅神父，人民開始視佢為不忠於法蘭西嘅賣國賊。91年4月18日，當路十六企圖前往巴黎近郊嘅一座城堡，以便與拒絕宣誓嘅教士慶祝復活節。但就喺王宮門口比群眾包圍，佢一家人被迫喺馬車上等咗兩個鐘先獲准回宮。

路十六此時終於明白，國王作為封建主義最後嘅根，同革命根本不能相容，佢開始知驚想著草。佢一時間諗到佢大舅奧地利皇帝同埋同宗嘅西班牙國王，但點樣走係一個難解嘅技術性問題。佢哋已經見識到杜宮戒備森嚴，國王身邊嘅硬貨幣又唔多，而王后賣珠寶則必定會惹人懷疑；有幾個僮僕一睇就知係派嚟監視王室嘅，路十六一時一籌莫展。

喺呢個時候救星出現，佢就係瑞典貴族兼王后嘅契家佬馮·費爾森。佢當時擔任瑞典同法國之間嘅特使，同王后過從甚密。



費爾森嘅計劃係將國王轉移到邊境附近，然後再引清兵入關。由於國王同王后性格實在太離地，佢哋唔理費爾森勸告，唔願意分頭以小馬車逃走，反而要求安排一架大車同時11人逃走(包括國王同佢個妹一家以及家庭教師)。

喺得到奧皇約二世點頭支持後，路十六計劃逃往同盧森堡接壤嘅法國邊境城市蒙梅迪。眾人原先計劃5月尾動身，但路十六個人做嘢meme moremore，不斷推遲行程，最終定喺6月20日出發。

1791年6月20日，星期一，晴。路十六一行人喺夜晚11點半襯住警衛換班，喺側門偷走。王后份人勁港女，竟然遲到半個鐘。



眾人由裝扮成馬伕嘅姦夫費爾森接應，去到聖馬丁門再轉車出城。到第朝侍從發現國王全家失蹤，自然發散人去搵。而好不幸，因為歷代國王同官僚對首都圈盤剝太深，以致道路狀態奇差，佈滿坑洞。國王一家逃跑速度奇慢，經過一日一夜嘅艱苦行軍，國王到達東北部一個小村莊瓦雷納。

但瓦雷納嘅人民早已知曉國王嘅來臨。一路上，路十六並不費心隱藏，甚至多次下車同附近嘅鄉民交談。當一行人喺前一個驛站換馬時，就已經被驛站長認出。站長於是快馬加鞭去到瓦雷納，通知當地法官。法官因為曾住在凡宮，馬上認出國王，並且跪喺地上。



路十六似乎對行蹤暴露不以為然，仲好型咁彈句“沒錯，我真是你們的王”。6月22日清晨，國民議會使者帶住將逃亡者帶回巴黎嘅命令到達瓦雷訥，國王一家嘅逃亡計劃failed。

國王嘅回家路上一樣艱難，民眾們知曉國王竟然打算做法奸，都感到極度憤怒，佢哋從四面八方趕來，隨着馬車緩緩向巴黎進發。人民向馬車怒吼同吐口水，甚至拳打馬車兩側。



身心俱疲嘅路十六一行人喺5日後先返到巴黎。而佢哋唔知道，更凶險嘅厄運即將降臨。

lm

當年讀世史好似聽過中世紀既法國係好黑暗
黑暗過周邊其他國家幾倍
另外血腥史都多

有時候，on9 真係無藥醫

長於深宮之中婦人之手
可以有幾醒

不過就算路易十六走到佬然後復辟又好，已經無可能好似以前咁。人民尊皇，但係革命已經創造咗好多野心家出嚟，大把好似塔列朗親王果種25仔會做造王者然後人民又當革命領袖係王咁拜

簡單嚟講，歐洲支那

佢如果鐵腕鎮壓下場仲好
可能玩多兩三代

當事件傳到維也納時，皇帝利二世對胞妹嘅安危越發憂心。佢於是邀請咗普魯士國王腓特烈.威廉二世同路十六胞弟阿圖瓦伯爵(後之法王查理十世)共商大事。8月27日三人發表聯合聲明，表示“歐洲全體君王都熱烈關切路十六景況”，希望可以用國際線壓力幫助到妹夫一家。

但利二世嘅言論造成咗鉅大嘅反效果，國民議會視之為境外勢力嘅引戰宣言。代表們開始喺各個政治俱樂部中，討論開戰利弊。其中以雅各賓俱樂部最有影響力。



雅各賓原名憲法之友協會，最初由布列塔尼反保皇黨代表創立，屬左派組織，因為喺巴黎聖奧諾雷雅各賓修道院聚會而得名。(布列塔尼後期先因聯姻併入法國，相對無咁去封建化，甚至仲保留自己嘅三級議會；法蘭西海軍人才絕大部分都係布列塔尼人，即聖馬洛人。)

雅派絕大部份人反對戰爭，但亦都有名為
吉倫特嘅主戰派。派系名稱來自西南吉倫特省，顧名思義以該省代表為主，大部份亦加入咗雅各賓俱樂部。



吉派認為應該對外開戰，佢哋認為可以藉着戰爭，將革命理念宣揚開去，令革命更加穩固持久。

佢哋要求議會對奧普宣戰，認為會激起人民嘅愛國意識，令被君主專制政府壓迫嘅人民得以解放。同時佢哋亦想透過宣戰，測試國王路十六對國家嘅忠誠度。

而其時嘅路十六已經同扯線公仔無異。1792年4月20日，佢被安排喺國民議會演講，宣告：

召喚定先
https://na.cx/i/XF5i0Hz.jpg
慈禧：你班仆街比我抖下好冇

想讀法國史 由大革命開始應該點入手

要正處風雨飄搖嘅法國面對歐陸兩大軍事強國，無疑係玩命行為。法國軍人爭相抗命，幾千名軍官辭職、武器彈藥大量被盜、士兵大量逃亡。

由於人民永遠覺得自己唔會錯嘅關係，佢哋將責任推到國王身上，尤其針對佢個奧地利老婆，認為係佢通風報信比外敵。

1792年6月20日，數千名憤怒嘅民眾自發上街，佢哋衝去杜宮，將宮門強行破壞闖入，挾持路十六。



路十六今次倒有幾分王者之風，佢沉著冷靜同暴民周旋。喺聽過民眾宣讀嘅請願書後，佢為咗安撫暴徒，一面將象徵自由嘅猩紅色軟帽戴喺頭上，一面接過一個人民遞比佢嘅酒一飲而盡。路十六嘅行為為佢博得熱烈嘅掌聲，暴民滿意地散去。



但當普魯士元帥 不倫瑞克公爵發表宣言，威脅如果法國人再對國王無禮，聯軍必將殺入巴黎將其夷為平地，民眾嘅怒火又再次被掀起。8月10日，有成2萬人聚集起嚟，又再次殺入王宮。



革命群眾義憤填膺，決心唔會再咁輕易放過叛國嘅國王，今次一定要將佢廢黜❕人群從四面八方湧入王宮，個個都帶住武器，並發射大砲攻陷前廳。

杜宮當時只有約千名瑞士衛隊同2千個忠誠度存疑嘅國民衛隊守護。國民衛隊紛紛走向民眾行列，有啲仲想揮拳打路十六。國王眼見勢色唔對，決定從祕道走去附近國民議會所在地馬術學校，尋求庇護。

路十六一家被軟禁喺速記員房間，等待議會發落。心慈手軟嘅路十六為免佢嘅子民受到傷害，下令瑞士衛隊投降，但混亂中命令未被傳達；不得不說瑞士山民眞係忠義無雙，佢哋面對廿倍嘅“無套褲漢”(意思指法國無產階級，有別於貴族著嘅裙褲，佢哋着嘅係緊身或直筒長褲，通常用作形容大革命激進分子)依然無所畏懼奮勇還擊，但因為人數差距依然慘敗。




浴血抵抗嘅1,100名瑞士衛隊當中，共有786名士兵戰死。殺紅咗眼嘅暴民湧入宮中，順手將宮中嘅僕役一視同仁地殺害。

佢哋將“敵人”嘅頭顱割下，有啲仲徒手將屍首嘅肉塊撕落嚟，帶喺身上做戰利品。

路十六喺囚禁三日後，被送往聖殿塔，國王喺度渡過咗佢最後嘅5個月時光。

樓主可以考慮整一個專頁講歷史
咁生動同圖文並茂
吸引人瞭解歷史

聖殿塔本為中世紀聖殿騎士團總部，14世紀，美男子腓四世因為唔想還錢，將騎士團(見#134)消滅。被燒死嘅團長臨終前落下詛咒，卡佩王朝後代子孫必將不得好死。



聖殿塔之後就被收歸國有，喺路十六一家入住前係阿圖瓦伯爵府邸，可以話相當舒適。路十六每日嘅生活喺閱讀中度過，佢喺困境中顯得異常沉靜。而好動嘅王后日子就難過得多，唯有靠繡花織冷衫之類活動打發時間。

當國王在囚期間，爆發咗堪稱大革命中最醜陋一章嘅九月大屠殺。因為憂慮普魯士軍即將攻陷巴黎，到時佢哋會將所有囚犯釋放，並成為革命之敵。以記者尚-保羅·馬拉為首嘅激進份子疾聲高呼要先下手為強，將佢哋好似丁力咁殺死‼️到咗9月6日，已經有一半囚犯將近千五人被殺，佢哋大多係貴族同犯咗所謂教士法嘅神父。

大概當時所有人都已進入瘋狂狀態，劊子手以極其殘暴嘅方式折磨----佢哋將受害者以折磨肢解，並挖出佢哋嘅內臟。最可憐嘅係王后嘅best fd朗巴勒夫人，暴民基於憎屋及烏心理，先將佢輪姦再監生肢解，然後再將佢嘅心臟bbq嚟食；人頭插喺枝矛上面，擺正喺王后臥室窗外🤮。

到咗呢個田地革命已經再無回頭路。當得知法軍喺一場小戰役中擊退普軍，國民公會(於8月10日事件後成立，由當時未逃跑嘅代表組成)決定將其宣傳為重大勝利，並喺9月22日宣佈君主制結束，法蘭西第一共和開張大吉🇫🇷🇫🇷🇫🇷。

王制嘅結束同時意味住國王生命嘅終結。12月21日，路十六被控嚴重叛國，93年1月15日，國民公會以大比數通過罪成。



跟住到第日眾人開始討論點處置國王，今次有288人認為應該將佢流放或者監禁，但就有361人認為要將佢處死，國王命運由是塵埃落定。

路十六嘅行刑日定於1月21日，當日佢一早就俾人叫醒，然後做彌撒並喺教士手上接過聖餐，然後出發前往行刑地點法國大革命廣場(現之協和廣場)。

行刑以斷頭台（法語：Guillotine）方式進行，其名稱來自其發明者，喺#447出過場嘅吉約丹醫生(但佢後人以此為恥改咗姓)。原意係人道而迅速執行極刑。

路十六似是已經有曬心理準備，佢鎮靜從容地，由教士陪伴慢慢走上刑台，國王嘅遺言係會原諒處死佢嘅人，並向神祈求自己嘅鮮血唔會再次喺法蘭西嘅土地落下。教士亦聞之動容，高呼“聖路易嘅子孫，願主庇佑你上天國。”



路十六以個人而言不乏人性光輝，但事實上佢嘅下場同朱明宗室被烹成福祿宴一樣，有其必然性：法蘭西能夠統一本嚟就係消滅封建自由嘅結果，而呢一切就由腓四世滅騎士團開始。可以話法蘭西生來就帶有原罪，而從此佢亦一步步向住絕對君主國嘅方向發展；如果跟隨聖路易嘅道路，法蘭西雖無今日版圖，但就好可能發展成君主立憲制。

法國王室揀選嘅道路催生咗太陽王盛世，但亦都代表佢嘅子孫他朝有日要上斷頭台。國王以竭澤而漁式壓榨人民為基礎，去行帝國擴張之路，最後總會到達上限；法蘭西王國實際就好似一個盜賊咁，喺搶到贓物如布列塔尼時，會顯得相當富有。但呢種行為缺乏可持續發展，被掠奪嘅地區因為中央集權嘅反自發秩序性，好快會變得貧瘠。就好似原來能成為同海洋強國荷蘭比肩嘅布列塔尼，只能淪為王國海軍嘅中堅。於是又要再搶過，直到搶唔到為止。

到最後人民專政將絕對君權反噬，斷頭台上嘅鮮血成就咗絕對主義國家；鍘刀仿佛非因地心吸力，而係被歷代法王嘅千斤罪孽壓下。

其實放到盡下場估計都唔會好得去邊，一樣死

分享下，1800年世界人口分佈
數字代表%