【歷史po】法唔法國。。。。

神羅本質上係查理曼/加洛林家族征服東方唔同日耳曼部落（亦都係部落公國 巴伐利亞 士瓦本 薩克森等等嘅前身） 領土大部分都係原法蘭克王國核心（Austrasia) 再東邊
尤其係查理曼血腥征服薩克森人 令佢哋改宗後 其他日耳曼人臣服加洛林 當地貴族同法蘭克統治者融合/被取代 原則上仲維持一定獨立性

西邊領土 就算係勃艮第 亞基坦呢度地方一早就被法蘭克人征服 當地精英更多係高盧-羅馬後代 （什至有傳丕平都有呢個血統）就算經歷封建時代都同東邊呢班新被征服嘅日耳曼部落差好遠

樓豬我respect你咁比心機
但係應該再detail d好睇d
而家咁好教科書咁

不過我覺得呢啲都只不過係誘引 唔係iff
話唔定穆斯林打入啲 成個西法蘭克格局唔同 各自為政 有另一個發展

https://m.youtube.com/watch?v=diwsP8eOpvE&list=PL77A337915A76F660&index=19

呢個教授講呢堂幾詳細
可以睇少少

教宗烏二世本身都係法國人，佢嘅好多同鄉都聽佢號召加入十字軍。當中就包括有圖盧茲伯爵雷蒙德、下洛林公爵布永嘅戈弗雷同佢細佬布洛涅嘅鮑德溫、法王腓力一世(佢正處於被教會破門狀態，見#29)之弟韋爾芒杜瓦伯爵雨果、英王威廉二世之弟諾曼第公爵羅貝爾，以及好多來自法蘭西、法蘭德斯、德意志同意大利嘅貴族。




佢哋組成咗一隊三到五萬人嘅龐大軍隊，並被劃分為四支分隊。雖然佢哋有住同樣目標，但就組織鬆散。隊伍中嘅農民數量大大超過騎士，冇受過軍事訓練。

十字軍正規軍喺1096年8月開始向東進發，佢哋嘅敵人土耳其人採取堅壁清野策略，十字軍因為缺糧缺水同瘟疫，死咗好多人。由於唔夠嘢食，所以十字軍一有機會就進行搶掠，而將領們為咗領導權而時有內鬥。

到咗1097年10月，十字軍大軍到達土耳其嘅安條克，呢座城市位於君士坦丁堡到耶路撒冷之間，當時正喺塞爾柱蘇丹國控制當中。經過8個月嘅圍城戰，十字軍終於喺1098年6月攻陷安條克。

最最最最緊要係加張地圖，d地名無個識

安條克圍城戰況十分慘酷，十字軍喺過程中攻陷穆斯林城鎮時，就將成年異教徒放入鍋內烹煮，而兒童則被切碎後烤熟以供食用。

攻下安條克之後嘅十字軍並未立即前進耶路撒冷，因為士兵們開始對前路感到不安，唔想再作戰，而將領們就喺度喋喋不休咁鬧交。最後拖到1099年頭先至重新出發。

當時聖城正被法蒂瑪王朝所控制，阿拉伯人啱啱喺土耳其人手上將聖城攞返，又要面對基督徒嘅侵襲。十字軍沿住地中海海岸南下，沿途冇受到太多抵抗。到6月份十字軍終於到達耶路撒冷。

西方基督徒經過千辛萬苦先到達聖城，好多人不禁痛哭流涕。

但當十字軍嚟到耶路撒冷城外，佢哋睇到嘅係一片頹垣敗瓦、缺食少水嘅鄉村景象，同想像中嘅聖地好大分別。







到達耶路撒冷嘅十字軍只有萬二人，佢哋喺6月13日發動首次攻城但係失敗。期間有一個叫彼得·德西德流斯嘅修道士聲稱透過神跡得到致勝之道，就係齋戒之後赤腳圍住耶路撒冷行一個圈，咁城牆會自動倒塌(抄自《聖經》中約書亞嘅故事。)

又眞係有班傻仔聽佢9up照做，但幾日後因為城牆冇冧，於是眾將決定喺7月13日發動第二輪攻勢，7月15日十字軍終於攻陷耶路撒冷，聖城喺經歷4百幾年嘅穆斯林統治後又重回基督徒手中。




勝利嘅十字軍決定以大屠殺去慶祝，佢哋將城中所有穆斯林殺死，並且將匿入教堂嘅猶太人監生燒死，據稱死傷者數以萬計。

開埋d垃圾post 撚有人睇咩

煮人肉

聖戰名義嘅戰爭多數都無好野
但最近youtube 睇咗kings& genenral 講安條克圍城戰 另一個角度睇又係幾英勇
圍完人再比人圍再突圍成功

十字軍入城後當務之急就係選出聖城嘅統治者，圖盧茲伯爵雷蒙德軍功最多，本嚟應該由佢坐正。但佢似乎心知自己人緣麻麻，所以假意作出退讓。

但當雷蒙德退選之後各貴族就順水推舟，支持下洛林公布永嘅戈弗雷為王。雷蒙德對局勢發展極度憤怒，憤而帶隊出走。

虔誠嘅戈弗雷因為個人道德高尚而獲得眾人推舉，佢因為唔想喺呢個神聖嘅地方封王，僅僅自稱為“聖墓守護者”。


自此基督徒就喺中東地區打下基石，除咗耶路撒冷王國之外，仲有埃德薩伯國、安條克公國同的黎波里伯國。




其中的黎波里伯國為出走嘅雷蒙德所建立，位於今日黎巴嫩敍利亞嗰頭，而埃德薩則由布洛涅嘅鮑德溫創立，位於今日土耳其敍利亞一帶。

“聖墓守護者”戈弗雷不久就病死，王位由佢細佬鮑德溫繼承，佢開始自稱為耶路撒冷國王。



呢幾個國家雖然唔係直屬於法國，但就以法文為官方語言，亦都同法國交往十分密切，自此法蘭西嘅勢力亦都伸入黎凡特地區。

法國開拓咗咗新嘅商業路線同市場，從中獲利不少。法蘭西不單因為朝聖人數激增而得到經濟利益，仲因為好多對佢有威脅嘅諸侯去咗中東朝聖而減輕壓力。

法王腓力一世死後由長子路易六世繼位，路六世被稱為肥仔路易，人如其名十分肥胖，晚年更因為太過肥而要靠人攙扶先可以起到身。



路六世一生征戰，直到佢喺1137年去世，由同名長子路易七世繼位。

樓主想剩係focus 十字軍法國人果部分？
跳哂前因同 皇帝點接待十字軍/諾曼人博希蒙德

咁個故講法國歷史嘛，講下講下容乜易離提寫哂成個十字軍東征前因，經過，結果？

仲要唔係得一次咁少呢
下下都寫分分鐘離題到爆開

路易七世係虔誠基督徒，佢係路六世次子，本嚟計劃循入空門，但因為兄長早逝而繼承王位。佢被安排同亞奎丹嘅艾莉諾結婚，亞奎丹亦都因為聯姻而併入法蘭西。



篤信基督教嘅路七世為人冷漠一本正經，同個性活潑嘅妻子性格南轅北轍，夫妻感情並不和睦。



路七世喺1142年年因為支持自己嘅大總管韋爾芒杜瓦伯爵拉烏爾同老婆離婚，改娶自己姨仔。因為拉烏爾前妻係香檳伯爵蒂博個妹，最後事件導致法王同香檳伯國嘅戰爭。

戰爭持續咗兩年（1142-44 年），最終以皇家軍隊佔領香檳告終。法王路七世親自帶領軍隊喺香檳地區放火屠城，喺一個名叫維特里嘅小鎮，就有千幾個平民喺教堂避難時被放火燒死。

而因為殺戮太過殘酷，法國亦受到教會嘅譴責，路七世最終退兵並交還土地予香檳伯爵。

虔誠嘅路七世當時離遠見到教堂被焚同聽到人們嘅慘叫聲，內心都感到好大嘅震撼。佢決心為自己贖罪，方法就係發動另一場聖戰。

1147年，路七世同神聖羅馬皇帝康拉德三世一齊領導咗第二次十字軍東征，呢次戰爭嘅導火線係1144年塞爾柱突厥人佔領咗埃德薩，並逼近耶路撒冷王國。



為咗支援耶國，路七世同康三世於是派兵前往中東。當時已經係第一次十字軍東征嘅一百年後，前往聖地嘅朝聖者越來越少，而第一次東征帶嚟嘅歐洲貴族亦相繼腐化，兩大僧侶騎士團醫院同聖殿就構成咗防禦穆斯林嘅主力。




第二次十字軍東征係一場失敗嘅軍事行動，戰爭並未為基督徒帶來土地進帳。路七世同康三世以及兩大騎士團喺亞克港聚首，由於佢哋決定暫緩用兵埃德薩而先攻大馬士革，由於大馬士革對伊斯蘭世界嘅重要性，以致阿拉伯人決定死守。而十字軍中嘅耶路撒冷軍同法德兩軍鬧不和，並且故意將後者引入絕路。最後路七世同康三世只好承認場仗打唔落去，相繼返回西歐。

路七世喺聖地逗留期間，同老婆嘅關係進一步惡化----艾莉諾希望路七世協助佢伯父安條克公爵，但路七世堅持要去耶路撒冷朝聖，兩人因而感情破裂。

最後喺1152年，路七世同王后離婚。由於冇生下男性繼承人(有兩個女)，佢哋嘅婚姻被教會宣告無效。艾莉諾旋即改嫁諾曼底公爵同安茹伯爵亨利(後之英王亨利二世)，路七世可謂賠了夫人又折兵。

百年戰爭coming to town~~~~

金雀花皇朝

亨利二世因為領有諾曼第同安茹等地，計落係路七世嘅臣屬，佢咁樣做自然令路七世十分無面，更有傳言對狗男女未離婚就已經搭上。



艾莉諾嘅改嫁亦都令到亞奎丹呢塊南法嘅油水地落入英國人手上，亨二世自此喺法國地區嘅勢力仲大過法王，此事亦埋下日後法英百年戰爭伏線。

路七世離異後又娶過兩個老婆，第3任王后香檳嘅阿黛勒(香檳伯蒂博之女)為佢誕下繼承人腓力。

腓力14歲時打獵意外走失，當佢比人救起時已因為饑寒交迫而病重。父王路七世為咗幫佢祈福去咗英國根德伯里，但就喺返巴黎途中染病不治，腓力即位為腓力二世。

腓二世1180年登基，佢被稱為法國最偉大嘅國王之一，佢因為擁有強大嘅謀略與同政治手腕而被尊稱為「尊嚴王」（奧古斯都），法國喺佢統治下將會達到盛世。年輕嘅腓二世即位後由舅父香檳伯亨利一世、蘭斯大主教、布盧瓦和沙特爾伯爵蒂博五世等為攝政。



而喺對面海嘅英國，英王亨二世同王后艾莉諾生咗四男三女，其中長子早夭，長大成人嘅有小亨利、理查同杰弗瑞。

根據當時世襲法小亨利成為太子，受封諾曼第、安茹等地，理查則受封母后艾莉諾嘅亞奎丹，杰弗瑞則受封布列塔尼。

後來亨二世同王后又得一子約翰，由於啲地已經分曬，亨二世希望大嘅3個仔分啲領土出嚟比個細仔，但俾佢哋拒絕咗，於是父子反目成仇。

另外亨二世同王后亦都好老土地因為婚外情問題而決裂，艾莉諾大亨二世11年，喺佢人老珠黃嘅時候亨二世就忍唔住喺外面玩女，仲喺海邊起咗個迷宮收埋個二奶。

但終歸紙包唔住火，王后發現咗二奶仲迫佢自殺。呢件事之後夫妻二人分居，亨二世向教宗請求允許佢離婚，但未獲同意。

1172年，小亨利、理查同杰弗瑞三兄弟決定企喺老母嗰邊向父王宣戰，亨二世亦因此將艾莉諾囚禁。

父子之戰長達十幾年，小亨利同杰弗瑞先後病逝。1189年理查同法王腓力二世結盟，亨二世因為年老患病，所以提出同理查暫時停戰，而喺呢個時候佢一直寵愛嘅細仔約翰大概見到父王大勢已去，於是倒戈投向理查同腓二世。

得到此事嘅亨二世感到萬念俱灰，於是決定放棄治療同絕食，但求速死。2日後亨二世含恨而終，傳說佢臨死前命畫匠畫咗幅畫，內容係一隻老鷹同四隻鷹仔互相撕咬，其中最細隻鷹停喺老鷹膊頭上，用嘴啄老鷹隻眼。

宗教一旦扯上世俗事務就永遠冇好野
不論戰爭 投票 定係議會
Those cries For the God! or God wills it! just endless bullshit, nothing more

樓主令我又想睇返天國驕雄
但真係好撚長同賓墟有得鬥

理查繼位後稱理查一世，佢因為驍勇善戰，被世人稱為獅心王----傳說佢年幼時喺荒野走失，被發現時滿手鮮血，旁邊有隻比佢打死咗嘅獅子，從此就得到呢個名號(流流地😂)。

理查出曬名靚仔又大隻，但係喺陽剛嘅外表下其實身體唔多好。佢性格暴躁易怒，缺乏處理政務嘅耐心，但理查有著無窮無盡嘅野心，而且佢為求目的絕對可以不擇手段。



而法王腓二世嘅性格就係理查嘅反面：佢因為疾病而失去一隻眼嘅視力，但佢富有謀略又頭腦冷靜，而且喺戰場上十分勇敢。

腓二世同好多君王一樣有著多疑冷漠嘅性格，個性內斂嘅佢習慣將自己嘅眞實情感收藏喺沉默寡言嘅陰鬱氣質背後，內忌而外寬，猜忌多權變。

而因為第三字十字軍東征嘅關係，呢對性格迥異嘅襟cousin(佢哋老豆係襟兄弟)會再次重遇，並有一番明爭暗鬥。

喺第二次東征過咗40年後，中東只淨低耶路撒冷、的黎波里、安條克三個基督徒國家，而且都係由平庸嘅統治者管理，內部四分五裂。當時耶路撒冷嘅國王為鮑德溫四世，佢身染麻瘋頑疾，常戴面具視人。



鮑四世病情不斷惡化，終於喺1185年病死，佢八歲嘅外甥鮑德溫五世繼位。孩童王鮑五世次年又病逝，繼父呂西尼昂嘅居伊成為耶城國王，由於不能服眾，圍繞王位嘅衝突就為穆斯林帶來可乘之機。

AOE 薩拉丁戰役

當時穆斯林嘅首領為撒拉丁，佢係出生喺伊拉克嘅庫爾德人，叔父謝爾庫赫為埃及總督，佢自幼跟隨叔父行伍，係一個傑出嘅軍事天才。

謝死後埃及嘅勢力就由撒拉丁承繼，撒拉丁為人頗有英雄氣概，佢對待朋友部下都好講義氣，從不吝惜錢財，據說佢死後留低嘅遺產連殮葬費都唔夠。



當時嘅耶城王國正處於風雨飄搖之中，臣民對無能軟弱靠女人上位嘅國王居伊離心離德。1187年底，穆斯林攻進耶路撒冷，將居伊俘虜，喺八十八年後聖城再次落入異教徒手中。

撒拉丁性格寬和，佢既不嗜血亦唔記仇。佢入城後冇對基督徒作出屠殺報復，反而容許佢哋以金錢贖身，而老人同婦孺就被佢免費釋放，軍紀亦比十字軍要好得多。

聖城陷落嘅消息驚動咗西歐嘅幾大國王，1189年，喺當時教宗額我略八世號召下，神羅皇帝“紅鬍子”腓特烈、法王腓二世同英王理查都參加咗呢次東征，可謂陣容鼎盛。



1190年，大軍出發。但好不幸地一出閘就脫腳，68歲嘅老皇帝紅鬍子喺騎馬渡過土耳其薩列法河時，意外墮河遇溺身亡。

紅鬍子出師未捷身先死，神羅軍大部份回國，東征改由法英兩王主導。1190年7月，腓二世同理查喺法國馬賽會師，啟程前往意大利西西里。

post主幅圖太過梁國雄議員
source Wikipedia 第三次十字軍東征