【歷史po】法唔法國。。。。

樓主聖誕快樂，繼續出好文

高質po

法國好似係史上軍事最成功國家，但自從二戰勁柒一獲就成日俾人當剩係識投降

1870之後同pat屎冇分別

咩呀，人地法蘭西一戰成功阻止德國入巴黎

但攻佔巴黎過程並不順利，貞德更於征戰途中腿部受傷。

喺當時英國人已經開始撤退，如果法國人同心協力嘅話或者可以將英國人趕返加萊。但係一直妒忌貞德嘅法軍指揮官拉特雷穆瓦耶公爵擅自決定解散軍隊，隔日朝早貞德就收到王室嘅撤退命令。

英國攝政貝德福德公約翰乘勢集結大軍，佢更加喺1430年將年幼嘅國王亨六世帶到歐陸，希望喺巴黎正式加冕為法王。

貞德度過咗幾個月和平日子後喺1430年3月前往馬恩河畔，前往解救被勃艮地軍圍困嘅康白尼，但佢冇耐就喺5月23日嘅一場小規模戰鬥中遭到俘虜。



貞德被送往不同監獄，勃艮地公腓力喺經過一輪討價還價之後，決定以一萬法朗將貞德交比英國人。貞德喺監禁期間曾經嘗試逃走幾次但都失敗，佢喺1431年2月開始接受審判，最後被裁定為異端並被逐出教會，喺5月30日盧昂市場上嘅火刑柱上被燒死，死時年僅十九歲。

用曬1代人既命去換返黎
結果到2戰都仲係1戰思維

屌原來改咗名

push

🇫🇷🇫🇷🇫🇷

查七世由於並無積極營救貞德，因此被後人垢病為無情無義。而另一方面英王亨六世終於喺1431年嘅聖誕到達巴黎加冕，但加冕典禮相當冷清，根本冇乜人理。亨六世兩日後就on99返咗英國。

法英兩國打咗成百年，兩邊都開始覺得攰，厭戰嘅情緒喺雙方漫延。勃艮地派開始尋求同查七世和解，好人腓力喺1435年召開和會，邀請法英雙方進行和談。

與會嘅英方代表因為拒絕放棄法王頭銜，於是拂袖離開談判桌。但無幾耐佢哋就發覺勃艮地班友已經背叛咗英國並且同查七世傾掂數和解，亨六世得知此事，只能夠掩面痛哭。

1436年，查七世正式進入巴黎，百年戰爭至此已進入尾聲。法蘭西擺脫咗戰爭壓力，立時興旺起嚟。查七世任用天才商人雅克·柯爾為財政大臣，為法國賺咗大嚿錢，柯爾本人亦都富可敵國。

然而好景不常，到咗1450年查七世嘅情婦，號稱法國第一美人阿涅絲·索雷爾（佢亦係首個由王家冊封嘅二奶）不明不白咁死咗。有一個欠落柯爾成身債嘅宮女篤灰佢係主謀，妒忌柯爾嘅人於是紛紛落井下石，言之鑿鑿咁指控佢大量罪名。



最終柯爾嘅財產俾國王沒收，佢自己亦被迫流亡並客死異鄉。

後世人一般都認為柯爾對阿涅絲·索雷爾嘅死並無責任，到近代嘅科學檢測證明佢係死於水銀毒，而種種跡象顯示查七世嘅長子王儲路易，呢個被稱作蜘蛛嘅狡猾男子有莫大嫌疑。

非驕兒不足以為逆子，太子路易（後來嘅路易十一世）同所有寵兒一樣聰明，甚至比老豆更叻。佢喺成長中見到法國嘅衰弱不堪，對父王嘅鄙夷又憎惡。

查七世同樣對呢個頂心杉十分厭惡，但又對佢無可奈何。當路十一年歲漸長，開始向佢老豆要求更多實權。當多次遭到查七世拒絕之後，16歲嘅路十一喺1440年參與封臣對抗佢父王嘅叛亂，企圖令查七世任命太子為攝政王。

政變失敗，路十一唯有向父親乞求原諒。但之後父子間依然紛爭不斷，路十一痛恨老豆嘅二奶阿涅絲，佢一次因為用劍威脅阿涅絲而喺46年被勒令送去太子封地多菲內。

路十一喺自己領地內依然拒絕安守本份，佢喺多菲內實行自己嘅統治，到咗51年更加未得父王同意，就娶咗薩沃依公爵（法國東南部、瑞士同義大利西北部）之女，8歲嘅夏洛特為妻，作為法國介入意大利半島事務嘅開端。

呢場婚姻對法國外交政策產生深遠影響，法蘭西本嚟係一個日耳曼系邦國，但因為地緣關係而處於日耳曼同拉丁同交界處，以致變成咗半日耳曼半拉丁----法蘭西永遠拿唔定主意，既要海洋上嘅利益又要內陸嘅領土，戰略上缺乏連貫性變成咗法蘭西後來稱霸失敗嘅一個重要原因。

1456年，忍無可忍嘅查七世向多菲內發兵。不敵嘅路十一於是唯有投靠查七世嘅另一心腹大患，勃艮地公好人腓力。
 
當查七世得知腓力決定收留佢個忤逆仔, 不禁仰天長嘆”我堂兄，正柒頭。養狼狗，咬心口。”

喺當時勃艮地公國嘅富裕已不下於法蘭西王室，更加從聯姻中得到咗肥肉法蘭德斯。勃艮地公位於第戎嘅宮殿比巴黎更豪華，歷代公爵嘅權勢更加拍得住國王。



查七世喺1458年懷疑因為糖尿病而引致爛腳，路十一拒絕前來探望病危嘅父親，反而請占星家預測佢嘅死期。
 
查七世病情不斷惡化，到佢臨終前一星期潰瘍越發嚴重，一路由隻腳爛到上去下爬，甚至令佢無法吞嚥食物。佢臨終前再次傳召太子來到病榻-----今次路十一終於動身，前往蘭斯搶先喺胞弟嚟到之前登基。

1461年7月，查七世終於病死。佢因為趕走英國人，拯救危急存亡嘅法國而被稱為勝利者同愛國者。君王論作者馬基雅維利對佢高度評價，因為佢建立咗自羅馬帝國以來首支常備軍，為日後法國強盛打下基礎。

路十一終於喺38歲之年登上王位，得到將自己聰明才智變現嘅機會。比起騎士時代明刀明槍同人隻抽或者打仗，佢更加喜歡陰謀詭計。路十一被稱作縝密者或無所不能嘅蜘蛛，工於心計嘅佢擅長編織陰謀之網，然後等待佢嘅敵人上當。
 
而路十一嘅頭號目標就係勃艮地，呢個收留咗自己5年嘅恩人。

竟然連續三篇

路十一以振興法蘭西，建立中央集權王朝為己任，而勃艮地就成為咗佢嘅頭號攔路虎。

路十一為咗壓制包括勃艮地在內嘅大貴族，採用咗東方專制君主慣用嘅策略：佢大量任用出身卑微嘅人，包括任命佢嘅髮型師、裁縫、醫生之類嘅人做大臣，因為只有佢哋先會無底線咁效忠於佢。

路十一嘅倒行逆施引起貴族們嘅不滿，好人腓力之子大膽查理就牽頭建立反對法王嘅公益同盟。

盟軍同路十一打咗一杖，迫使路十弓讓步，但佢之後好快就反口。

而當腓力過世由查理繼位後，法勃關係更加緊張。

查理同路十一由細玩到大，但就性格迥異。查理人如其名，性格莽撞大膽，佢繼承先父遺志，密謀自立為王，為此不惜使用武力。



早喺1465年，當時勃艮地公國治下嘅城市列日出現叛亂。路十一基於敵敵為友嘅原則，對抗爭者作出支持。但當戰況發展不如理想，為人仆街嘅路十一馬上調轉槍頭打返列日嘅舊盟友，數百人被屠殺。

當法勃關係劍拔弩張，勃艮地自然亦都諗到搵對面海嘅法國宿敵英格蘭幫拖，但英國當時亦處於內戰當中。

為咗爭奪英國王位，金雀花王朝兩大分支蘭開斯特同約克家族喺1455年開始咗斷斷續續嘅內戰，由於兩家分別以紅白玫瑰作為家紋，史稱玫瑰戰爭。



蘭開斯特系嘅亨六世因為精神失常，喺1461年被約克公爵愛德華武力推翻，後者成英王愛四世。

亨六世被囚禁於倫敦塔，其妻安茹瑪格麗喺1470年嚟到法國向表兄路十一求助，並且代表蘭家同法國王室簽署和約。而另一方面大膽查理就喺1468年同愛四世之妹結婚，雙方敵友分明。

得到路十一相肋，亨六世得以喺倫敦塔中被救出，而得到新盟友嘅路十一亦決定喺71年主動出擊，派軍往勃艮地。

但係海峽對岸好快又傳嚟惡耗，經過6個月嘅被廢黜，愛四世捲土重來擊敗蘭家登上王位。王后瑪格麗特被捕，亨六世再次被囚禁喺倫敦塔，不久就被愛四世派人殺害。

約家白玫瑰旗幟再次喺西敏宮飄揚，猶如床前明月光；但紅的卻變了牆上的一抹蚊子血。

今次輪到約勃聯盟向法國發動攻擊。1475年7月，愛四世嚟到英國歐陸據點加萊，等待大膽查理前來一同夾擊法國，並且去蘭斯加冕為法王。

但係查理因為心雄走去參加神聖羅馬帝國皇位爭奪，所以冇應約前來。被放飛機嘅愛四世大為憤怒，英軍勢單力弱，根本冇可能獨力對抗法國。

愛四世見形勢比人強，決定同路十一會面和談。兩王喺亞眠市北部皮基尼城一座橋上會談，由於以前有過講講下數反檯冧友嘅不愉快事件，所以雙方同意喺橋中間放個木柵，法英兩王就好似探監咁相會。



路十一用宋朝皇帝應付北方蠻族嘅手段對付英國人，佢提供咗7萬5金冠比愛四世做禮物，每年再向英國人提供歲貢5萬。而英國人只保留加萊作為領土，百年戰爭至此結束。

路十一攪掂英國佬之後專心對付勃艮地，佢智取而不力敵，運用計謀挑撥洛林公國及勇悍嘅瑞士山民同勃艮地衝突。

1477年1月，查理進攻洛林首都，位於今日法國東北嘅南錫。當時正值嚴冬，勃軍因而損失大量兵馬。查理帶領嘅數千殘軍同前來救援嘅洛林瑞士聯軍再遇，展開激烈戰鬥。

戰鬥持續咗幾日，勃艮地軍寡不敵眾。死狀悽慘嘅查理喺戰場上被發現：佢全身赤裸，個頭比斧頭斬開兩截，一半已經被野狼食咗。眾人只能夠從佢嘅身體特徵確認身份。

樓主有冇玩Crusader King 3？

由於查理冇男性繼承人，只有當時20歲嘅獨女瑪麗，勃艮地就因此成為法國同神羅嘅角力場。路十一希望安排自己7歲嘅仔查理同佢結婚，瑪麗理所當然地選擇神羅皇帝之子，同佢年紀相約嘅馬克西米連（後之馬一世）。

勃艮地同神羅嘅聯姻令路十一如坐針氈，佢決定主動出擊。1479年法國進攻勃艮地領地法蘭德斯，法蘭德斯人因為經濟發達，所以崇尚自由。佢哋對法王嘅中央集權制頗為厭惡，更組織民兵支持神羅對抗。

喺戰鬥中法國先勝後負，攻勢受挫。但取得軍事優勢嘅神羅卻輸喺天數上，1482年，廿五歲嘅勃艮地瑪麗喺狩獵期間意外墮馬身亡。

勃艮地繼承權從此落到瑪麗一對仔女手上，而死咗老婆嘅馬一世亦都唔想打落去，決定同法國談判。1482年，雙方締結阿拉斯條約，法國太子查理同馬一世個女奧瑪格麗特訂婚，從而獲得勃艮地領地，而哈布斯堡家族則保有法蘭德斯。



大膽查理嘅遺產從此被神羅同法國瓜分，勃艮地成為咗法國“自古以嚟嘅神聖領土”，法蘭西王國嘅版圖大致奠定。

但成為最後勝利者嘅路十一已經係風燭殘年，晚年百病纏身嘅佢曾數次中風，並受到各種疾病困擾。佢精神亦出現問題，經常疑神疑鬼，主要由長女安妮照顧。

1483年8月，路十一病死，13歲嘅太子查理接位，是為查八世，由家姐安妮攝政。

路十一從來唔係一個受臣民喜愛嘅國王，甚至冇人覺得佢係一個好人。但佢確實令法蘭西變得有史以來最強大，甚至成為當時歐洲第一強國。