【歷史po】法唔法國。。。。

日本

日本人口其實一直都唔算少
特別係江戶時代長時間政治穩定少打仗 人口仲升得快

最後嗰句

胡啟敢

刺客喺4日後就被送上斷頭台。而另一方面馬拉嘅山嶽派同志頭七未過就爭住食佢人血饅頭，國民公會將馬拉封為烈士，遺體更被送進先賢祠(不過3年後就被遷出)。

馬拉遭到謀殺後，公安委員會變得更加血腥。佢哋開始清算王朝親貴，古斯丁將軍同畢宏公爵都先後上咗斷頭台。最後委員會更得出結論：未亡人王后應該要為現時困局負上責任----佢被控耗盡國庫、危害國家安全同叛國罪。

1793年10月16日，被判罪成嘅前王后瑪麗·安東妮被問斬，終年37歲。王后喺過程中始終表現平靜，佢嘅遺言係喺踩到劊子手後向佢道歉(不愧千年貴族哈家出身)。



殺戮依然持續，始作俑者吉派嘅21個領導人物都上咗斷頭台，其中包括羅蘭夫人。佢留下咗膾灸人口嘅遺言：“自由，自由，多少罪惡假汝之名而行！”

但鮮血未夠滿足革命群眾饑渴嘅靈魂，自以為上咗位嘅人民因為頭腦發熱，開始攪起文化大革命：羅蛇任命咗一個暗星負責制訂新曆法，每年由秋季開始，以共和國成立日為元旦。四季順序依次為秋冬春夏，全年36個周，每周有10日，即周一至周十。秋天三個月叫釀月、霧月、霜月，冬天雪月、雨月、風月，春天芽月、花月、牧月，夏天穡月、熱月、菓月。

而革命政權亦打算廢除天主教，改信「理性教」。教堂於是變咗崇拜理性嘅俱樂部同廟宇，耶穌同聖母嘅雕像被反宗教者切成碎片，被馬拉嘅胸像所取代。

法國大革命亦繼續吞噬革命之子；革命黨人好似五毒煉蠱咁自相殘殺。丹東開始多番同羅蛇唱反調，佢以溫和派自居，對羅蛇暗中批評。羅蛇一直視丹東為心腹大患，認為丹東比佢更聰明同受歡迎。忌才嘅佢決定先下手為強，將丹東剷除。丹東喺94年4月5日被送上斷頭台，當囚車路經羅蛇府邸時，佢大聲向羅高呼“下個到您‼️”

斷頭台以每日30人嘅速度不斷切人。死者當中只有1成係貴族，6%係教士，淨低嘅全部都係第三階級。94年6月10日，喺羅蛇推動下牧月法令通過，任何人都可以喺不經審判下處決。

可能係受到丹東遺言影響，羅蛇開始變得神不守舍：據佢嘅訪客記載，羅蛇似乎完全活喺自己世界，對來者置若罔聞，就算有客到都係自顧自咁刷牙洗面剃鬚。

羅蛇嘅表現可能係源於巨大心理壓力：佢好快就發現委員會開始將矛頭指向佢，當7月26日(熱月八日)羅蛇喺國民公會發表演說，斥責同佢作對嘅人。當佢將矛頭指向財政總監康邦，指控佢要為經濟破產負責時，康邦乘勢發難，同羅蛇嘈起上嚟。其他代表亦早已經對獨裁嘅羅深感不滿，紛紛群起噬咬佢，到會議結束時，羅蛇命運已定。

第二日全體代表無異議通過逮捕羅蛇同佢嘅親信。但羅蛇作為同牙侵一樣嘅民粹領袖，手下自有一班無套褲漢支持。由巴黎地區嘅國民代表組成嘅巴黎公社公然對抗公安委員會嘅拘捕令，羅蛇本應被送往盧森堡宮臨時監獄，但巴黎公社命令盧宮唔准接收佢，羅蛇被接到巴黎市政廳，並受到公社成員熱烈歡迎。

到咗熱月十日，國民公會決定採取行動，派兵去市政廳將羅蛇帶走。混亂中羅蛇下爬比槍打中，受咗重傷嘅佢被帶走，經過簡易傷口處後，就同另外廿幾個人一齊被送往刑場。




半昏迷嘅羅蛇被抬上斷頭台，行刑者粗暴地將佢嘅繃帶扯下，此時佢先因為劇痛而醒來。佢發出猶如受傷野獸般嘅慘叫，直至發出聲音嘅頭顱跌落地上。

呢段時間 法國真係好撚癲
同文化大革命有得比

自己就唔係幾鐘意法國大革命
原因除咗樓主講過無足夠的貴族力量
中產階級對普世價值的認同感不足
推翻皇室之後只會變另一個暴政

革命唔同民主投票造成嘅政權交替
革命先天性會形成鬥爭，將舊政權打倒係其一，
由邊個填補權力真空係其二，到新政權內部派系即係政治光譜嘅協調係其三。唔係個個都玩到毛澤東嘅不斷革命，拉一派打一派，將某個體指為公敵用以團結其他各派，
法國大革命就係無限內鬥

羅蛇喺大革命中算係最純粹嘅理想主義者，但佢對意識型態嘅執著最終令佢自掘墳墓，成為革命犧牲品。熱月政變亦令到流亡多年嘅超(級)現實主義者塔列朗得到重返祖國嘅機會，喺經過多番請託之下，塔狗喺96年9月返到巴黎。

95年6月，9歲嘅太子路易因為惡劣嘅衛生環境而死喺獄中。佢流亡意大利嘅阿叔普羅旺斯伯爵宣佈成為國王路十八，但佢要到19年後先正式登基。

到咗呢個地步大革命已進入尾聲，人民對於無止境嘅混亂生厭，對佢哋嚟講革命後嘅生活仲衰過之前：94年到95嘅冬天特別凍，塞納河結冰導致飢餓嘅狼群喺城市同鄉村出現；而春天一到，又因為融雪而河水氾濫。
 
成個法國各地都出現暴亂，但都遭到殘酷鎮壓。透過熱月政變，政治走向由極左去返右傾，大資產階級包括貴族教士都捲土重來。努力重建秩序嘅佢哋喺95年提出“共和三年憲法”，佢哋誠實地指出大眾民主強調嘅絕對平等原則根本係海市蜃樓，與其將權力下放比人民不如集中精英之手。佢哋將國家改組成督政府制度，由一個5人委員會長期執政，進行寡頭馬車統治。

雖然五個督政都對塔列朗冇咩好感，但因為新政府缺乏外交人才，塔亦順利喺97年夏天成為外交部長，開始佢嘅外交官生涯。

投資眼光獨到嘅塔列朗喺呢段時間相中咗一個初露頭角嘅年輕將領，呢個來自科西嘉島嘅矮仔會喺不久將來令全世界天翻地覆。



拿破崙·波拿巴生於1769年8月15日，喺佢出世前3個月科西嘉島被原宗主國熱那亞移交法國，路十五派軍奪取該島，自此拿破崙成為法國人。

拿破崙嘅家族嚟自意大利北部嘅托斯卡尼，為小貴族出身，於16世紀移居科西嘉。拿蛇個子矮小，只有5呎5吋，佢被形容為個性冷靜、有決斷力、工作專注認眞。拿蛇嘅法文一直麻麻地，因為佢嘅母語科西嘉話比較接近意語。少年時投身軍旅嘅佢喺1793年土倫戰役中立功，而當95年10月保皇黨發動叛亂，督政府就選擇指派佢為保羅·巴拉斯嘅副手出面鎮壓。拿蛇對付叛軍嘅方法十分簡單，佢調來
幾十門火炮放喺戰略要點，當大炮一開火叛亂者即刻嚇到四散，拿破崙亦因此成為法國嘅英雄。

講喺土倫戰役又係經典嚟，以少打多嘅圍城戰本身已經難到仆街，仲要一開始乜火炮都無，然後矮仔一嚟到就勁到整埋個小型兵工廠咁乜炮都整到

之後將人地嘅戰略據點逐個打落嚟之後用返嚟打返人轉頭

成件事完全係由無變有

拿破崙喺95年葡月政變後取代咗巴拉斯嘅地位，後來佢又接收咗巴拉斯嘅情婦約瑟芬·德·博阿爾內，並喺96年3月同佢結婚。

而大革命亦釋放咗法國嘅能量，為拿破崙征服歐洲注入新動力。佢喺婚後兩日離開巴黎，轉戰意大利，喺幾場戰役後拿蛇成功征服意大利，下一個目標為世仇奧地利。

日落西山嘅奧地利自然不敵鋒芒正銳嘅拿破崙，法軍一路殺到維也納60里外嘅萊奧本。最後法奧議和，並將意大利嘅老牌勢力威尼斯共和國瓜分為奧地利威尼斯省同法國附庸國奇薩爾皮納共和國。



法軍又再次喺歐洲聲名大噪，督政府希望拿破崙食住個勢，將最後嘅宿敵英格蘭挫下。但拿蛇唔係傻，心知兩國海軍實力差距，決定對督政府嘅命令置若罔聞。而喺呢段時間本篇另一主角塔列朗亦都開始同拿破崙交往密切：塔狗多次寫信比遠征在外嘅拿將軍，口氣日益諂媚。當拿蛇喺97年12月返到巴黎，塔狗馬上向佢獻上一段非常肉麻嘅阿諛之詞，直頭將佢當成凱旋而歸嘅皇帝。

為咗打擊英國，塔列朗為拿蛇獻計，採用迂回攻勢，先取埃及，希望藉此切斷英國同印度嘅紅海生命線。塔狗仲為此制作咗一份外交備忘錄，表示要解放受英國壓迫嘅埃及人(關你撚事咩)。

拿蛇自童年就對東方十分著迷，欣然接下命令。1798年佢被任命為東方遠征軍總司令，仲帶同百幾名隨行學者，希望打開千百年來神秘埃及嘅謎團。

遠征軍首個目標係地中海島嶼馬耳他，嗰度自1530年就由醫院騎士團所有，但經過幾百年勢力已然衰落。當拿破崙要求騎士團准許佢嘅艦隊靠岸，但騎士團回覆只能接納四艘。拿蛇唔鍾意人逆佢意，馬上展開攻擊，島上只有500幾名騎士，輕易就被法軍擊敗。




拿破崙喺島上大肆搶掠，仲將醫院入面比病人用嘅銀製餐具融化為作戰基金，拿蛇留低3千人喺島上駐守又繼續佢嘅征途。

駐守法軍好快同島上居民發生衝突，法國人強加嘅財政、宗教政策激怒咗佢哋。馬耳他人奮起反抗，又向英國皇家海軍求援。當法軍發現自己已被英國海軍封鎖，只好喺1800年向英國投降，馬耳他喺02年開始成為英國自治領。

拿破崙喺埃及其實復興咗埃及學

計埋拿破侖戰爭既話
兩單死亡人數都係天災級
但如果比較正面既 outcome
法國大革命起碼有拿破崙既思想同軍事遺產留比後世
民革頂盡係出左個鄧小平改革開放 可惜到今日都係比個小學生玩殘左

文革最大貢獻係破壞咗蘇聯部署吧

之前睇到，法國喺1783年已經有第一次人手操作嘅熱氣球，Louis XVI本身想罪犯做乘客，但發明家爭取做乘容
去到1794年法軍首次用黎偵察敵軍

埃及自1世紀以來就被突厥奴隸兵馬木留克王朝統治，1517年起佢被鄂圖曼帝國佔領，但隨住土耳其人勢力走下坡，馬木留克又死灰復燃。



98年7月1日夜晚，拿破崙大軍喺埃及第2大城市亞歷山大港登陸。呢個城市顧名思義乃按其奠基人馬其頓亞歷山大帝命名，亦曾經係托勒密王朝首都。但到咗18世紀，嗰度呈現一片頹垣敗瓦，呢個羅馬時代曾經有30萬人口嘅大都市，而家得6千人。



法軍對此感到十分失望，本嚟以為有好多珍寶劫掠，但眼見嘅只有埃及費拉(大概等同小農順民)所居住嘅一大堆茅舍。拿破崙為防軍隊嘩變，決定即刻向下個景點開羅進發。法軍越過尼羅河三角洲，中途並發現咗雕刻於公元前200年，有古埃及法老托勒密五世詔書嘅羅塞塔石碑。



7月21日，法軍終於遇上馬木留克主力部隊，仲停留喺冷武器時代嘅馬木留克騎兵慘遭18世紀裝備嘅法軍碾壓，馬軍死咗2千人，法軍只有29人陣亡。



而此時收到消息嘅英國海軍中將納爾遜橫越地中海追趕法軍，終於喺8月1日喺尼羅河口發現法國艦隊。藝高人膽大嘅納爾遜見東北順風，馬上向法軍開炮。英軍分成兩隊，向法軍船隊左右夾擊，最後除咗4艘法國戰艦，其餘13艘都被英軍擊沉或佔領。



而登咗陸嘅拿破崙則開始著手將埃及改造成長期據點，包括引入法國嘅政制，並進行社會改革。

但埃及人似乎對佢嘅良苦用心冇咩興趣，佢哋對於鳩撚屎屎嘅法國佬普遍冇咩好感，到處都有小規模嘅暴亂同針對法國人嘅偷襲。拿破崙喺十月嘅一場騷亂後只有鐵腕鎮壓，任何持槍嘅埃及人都會被斬頭，屍首掉到尼羅河。

而君士坦丁堡嘅蘇丹亦開始反擊，帝國嘅敘利亞總督開始召募軍隊。當得知敘利亞人來襲來即，拿蛇決定主動出擊，法軍穿越西奈沙漠行軍100公里抵達加沙，法軍喺中東大肆殺戮，當佢哋攻陷麥加附近嘅吉達時，就殺咗成4千人。

拿蛇之後意圖攻下耶路撒冷附近嘅重鎮阿卡，但經歷兩個月圍城都未能攻陷。最終法軍被得到皇家海軍相助嘅鄂圖曼人擊退，法軍死傷慘重。

此時法軍亦因為酷熱同水土不服，遭到另一個敵人腺鼠瘟疫攻擊，唯有無奈退回開羅。無咩人性嘅拿蛇更下令用鴉片毒死染上瘟疫嘅士兵，以加快撤退速度。



回到開羅嘅拿破崙開始對東征意興闌珊，當佢得知自己喺兩年前建立嘅意大利奇薩爾皮納共和國已被奧地利人佔領，更加係心急如焚。於是佢喺1799年8月22日拋低佢嘅軍隊，偷偷地鼠返法國。

而當拿蛇喺東方冒險時，巴黎政壇亦動盪不安。事實上自革命以來，法國政局一直不穩，理論上享有至高無上權力嘅人民，根本無法行使佢哋嘅權力：保王黨或雅各賓黨即使通過議會選舉得到勝利，但因為憲法規定咗督政官必須由元老院選舉產生，而元老院三分二議員必須由原先嘅政府成員組成，自由選舉產生嘅五百人院只係橡皮圖章，就算贏得選舉都永遠無法掌權。

當奧地利喺99年3月向法國宣戰後，主戰嘅雅各賓殘黨喺4月贏得選舉，五督政之一嘅埃馬努埃爾-約瑟夫·西耶斯就高聲疾呼只有軍事獨裁先可以維持秩序。當拿蛇喺10月14日返到巴黎，兩人一拍即合，即刻密謀起事。

事件中塔列朗又再次扮演重要角色，政變中嘅好多細節都係拿破崙喺塔列朗嘅府邸一同策劃。霧月18日(11月9日)政變爆發，掌握軍權嘅拿蛇將督政府廢除，由西耶斯、拿破崙同迪科任臨時執政官，搬入杜樂麗宮嘅拿破崙更擔任第一執政官，實際上已經成為無冕皇帝。




拿蛇花咗一個冬天時間重整旗鼓，當時俄國已經退出反法聯盟，法國嘅敵人得返奧地利，當時奧軍正喺熱那亞圍攻緊拿破崙成立嘅利古里亞共和國。1800年5月，拿破崙率領一支3萬7千人部隊越過阿爾卑斯山，進入義大利北部。兩軍喺意大利西北部嘅馬倫哥村爆發戰役----此役爭啲斷送咗拿蛇軍事生涯，佢因為誤判奧軍將要撤退，試圖分兵攔截奧軍。豈料奧軍突然發動突襲，以火炮猛烈攻擊，攪到法軍需要撤退。

奧軍乘勝追擊，但因為追趕速度太慢，令法國人得到喘息空間，加上德塞將軍率領嘅6千援軍趕到，令法軍士氣大振。最後法軍險勝奧軍，將佢哋擊退(但德塞陣亡)。



拿蛇又再次凱旋回歸巴黎，聲望更隆。戰敗國奧地利同法國喺1801年簽訂呂內維爾條約，法國人重新獲得咗凱撒大帝時代高盧人嘅舊邊界，即萊茵河、阿爾卑斯山同比利牛斯山，奧國並承認法國對比利時同意大利中部嘅統治。



之後嗰年法英亦簽署亞眠和約，標誌住第二次反法同盟戰爭結束。

終於見到歐洲嘅「救世主」

戰事喺中歐持續，之後又擴散到伊比利半島，拿一世戰神上身，接連打敗咗奧俄普英。

拿一世喺稱雄歐陸之後，變得妄自尊大，虛榮心甚至令佢開始相信各國虛與委蛇般嘅外交辭令，直頭覺得大地在我腳下。



另一邊廂，塔列朗喺拿一世麾下撈到風生水起，不但執掌外交大權，更加喺06年被封為意大利嘅本尼凡托親王。

當拿一世威震歐洲，塔狗亦都利用佢嘅威勢大發其財。當時小邦嘅興衰存亡往往就在拿一世一言之間，劣得掂老細嘅塔列朗因而大發其財，大肆收取賄賂。



1806年10月底，拿一世喺耶拿戰役大敗普魯士後佔領柏林。不久即在柏林頒佈「大陸封鎖令」，好似美國人用貿易戰對付中國一樣，希望打擊摧毀英國嘅經濟優勢。法令禁止法國及其他所有歐陸國家同英國做生意。

塔列朗奉命起草法案，喺當時遑論俄奧普，連法國都未完成工業化進程，自己仲係農業國，唔買英國貨無疑傷敵八百自損一千。但塔狗作為一個優秀嘅打工仔，深明“上以媚為忠”，自然聽命執行。



但絕頂聰明嘅塔爺明白皇上最終必被自己嘅野望吞噬：拿破崙不斷播下新戰爭嘅種子，而呢啲新戰爭喺席捲歐洲同法國之後，最終必將導致佢本人嘅滅亡。但呢個恐怕亦係大一統國家嘅宿命，帝國佔領嘅新地盤好快會好似原有核心地帶咁變得貧瘠，為咗維持帝國門面只有走上飲鴆止渴不斷擴張之路。

塔列朗係一個深謀遠慮嘅人，擁有喺道路起點就睇到終點嘅能力。當佢眼見拿一世條船就快沉，於是喺07年8月突然辭去外交大臣職務。

而拿一世雖然欣賞佢嘅外交力，但亦厭惡佢利用職權敲詐勒索而且貪得無厭，於是批准咗佢嘅請辭。塔列朗被封為副大選侯呢個神檯位，職務只係喺重大節日作為侍從長企喺皇帝身邊，拿一世同塔列朗兩個殘疾人就此分道揚鑣。

上面拿破崙啲畫作係咪好有名堂？印象中細個睇書見過（尤其加冕果幅）

加冕嗰幅係Jacques-Louis David嘅作品，佢最出名嘅作品拿玻崙騎馬

馬拉之死都係佢畫

1807年到09年拿破崙仲同伊朗結盟，令土耳其嘅蘇丹馬哈茂德二世好唔開心（之前1798年已經入侵埃及，宜家仲同土耳其世仇之一伊朗做朋友）


當時伊朗嘅國王