【歷史po】法唔法國。。。。

樓主垃圾來，你留乜撚野名

兩王喺9月份先後到達西西里。當時西西里王國立立亂，先王威廉二世駕崩後，佢嘅私生子堂弟坦克雷迪罔顧威二世將科斯坦察公主(威二世姑姐)立為繼承人嘅遺詔，反而自立為王。仲軟禁埋威二世嘅遺孀瓊，而瓊就係英王理查個妹。



理查嚟到西西里首都墨西拿之後就同坦克雷迪交涉，要求佢釋放瓊並且交還佢應得嘅遺產。但當安頓好細妹之後，理查就展示出對西西里嘅野心，佢放任英國人四處生事(調戲婦女之類)，仲佔領咗巴西略救世主修道院做軍營。

英軍嘅胡作非為引起墨西拿人民公憤，佢哋將城門關起同埋封鎖港口，希望將英國人驅逐。

理查嘅解決方案簡單直接，就係強攻入城大肆殺戮，墨西拿頓成一片火海。

英軍喺墨西拿嘅惡行雖然令人髮指，但國王坦克雷迪卻一直留喺附近嘅卡塔尼亞按兵不動，甚至當法王腓二世遣使提出幫助佢時，坦克雷迪都出乎意料地婉拒。

坦克雷迪之所以唔同英國對抗因為佢有另外一重盤算----王位正統繼承人科斯坦察嫁咗比紅鬍子個仔，新任神羅皇帝亨利六世。坦克雷迪憂慮亨六世會為妻子爭奪西西里王位，而腓二世同神羅一向關係唔錯，所以佢寧願聯英對抗日耳曼同法國人。

於是坦克雷迪決定向理查求和，並且向佢贈送重金同約定聯姻。

腓二世對於坦克雷迪選擇同對手理查結盟而背棄自己，自然相當唔高興，但城府深沉嘅佢依然同理查保持表面上嘅協作，兩人就十字軍嘅後勤各種事宜進行討論。但當兩人談論到一件同東征無關嘅事時，就爭啲反曬面。

事緣腓二世嘅異母姐艾莉絲(母親並非艾莉諾)本嚟同理查有婚約，佢8歲時就被當成童養媳咁連同豐厚嘅嫁妝送去英國。但理查老豆亨二世除咗將嫁妝留低，仲連艾莉絲都留低食埋，仲有傳言話兩人育有私生子。



艾莉絲嘅婚事就此一直擱置，喺當時佢已經成30歲，腓二世雖然同佢冇咩感情，但就認為咁樣對一個法國公主有失體面，於是就向理查提出要求娶佢家姐。

理查當場表示拒絕，佢話我又唔係鍾培生，唔興兩仔爺交換女玩，自己亦都已計劃另娶他人。

樓主加油

推

推

睇幅畫幾靚女，你睇下清朝果班

法英兩王嘅關係瀕臨破裂，但兩人始終仲有正經事要做，所以最後都係各自離開西西里向目的地進發。

1191年夏，腓二世同理查先後到達中東。耶城王居伊兩年前已被薩拉丁釋放，佢初時想去泰爾，但嗰度已經俾意大利貴族蒙費拉托嘅康拉德佔領。康拉德拒絕俾居伊入城，居伊唯有轉移陣地，改為攻擊由穆斯林控制嘅富裕港口城市，位於今日以色列嘅阿卡。




居伊將阿卡包圍並收納法國援軍，但同時薩拉丁軍亦都對圍城軍展開反包圍。到1190年夏天，瘟疫喺十字軍營地大規模爆發，連居伊之妻西庇拉女王都病死咗。

因聯姻而得到繼承權嘅居伊亦因喪妻失去王位正當性，覬覦王位嘅康拉德同西庇拉之妹伊莎貝拉結婚，為老婆爭取王權。

另一方面腓二世同理查相繼到達阿卡幫拖，奧地利公爵利奧波德亦都前來坐陣。

瘟疫繼續喺營中漫延，連法王腓二世都身染痢疾，同佢同病相憐嘅仲有法蘭德斯伯爵腓力，但呢個腓力憐唔得幾耐就病死咗。

由於腓力死後無裔，而法蘭德斯嘅繼承權對法蘭西東北邊境安全至為重要，腓二世亦都萌生回國嘅念頭。

十字軍繼續圍城戰，理查以巨大嘅投石車打破城牆。眼見阿卡遲早陷落，薩拉丁同十字軍展開停火談判，最終1191年7月守城軍向十字軍投降。



入城後嘅十字軍喺阿卡城牆上揚起法英德三國軍旗，但三位王公好快就因為戰利品而嘈起上嚟，理查更加將德國軍旗從城樓丟下嚟羞辱利奧波德，兩人亦因此結下仇怨。

此外喺耶路撒冷王位嘅鬥爭中，理查亦都同腓利二人對立，英王支持居伊而法奧支持同兩者有關嘅康拉德。最終居伊取得勝利繼續其統治，但康拉德將會喺佢去世後得到冠冕。

受挫於理查加上健康不佳，腓二世決定回國，留低一萬法軍腓力由勃艮地公爵指揮，同佢一同離開嘅仲有利奧波德。

腓二世拍拍蘿柚行咗去，理查自然十分不滿。佢將怒火發洩喺穆斯林身上，當薩拉丁拒絕執行阿卡和議嘅條款之後，理查就將數千名穆斯林戰俘殺害，連婦孺都唔放過。



但之後十字軍同穆斯林嘅戰況膠著，理查嘅軍隊兩度進逼耶路撒冷，但均未攻克。

喺交戰過程中撒拉丁同理查亦都識英雄重英雄，據說撒拉丁得知理查嘅戰馬身亡，仲特登送贈佢一匹名馬。

到咗1192年夏天，理查收到消息腓二世正同佢細佬約翰眉來眼去，暗中密謀造反，於是決定返歐洲。佢同撒拉丁締結三年和約，期間容許基督徒同商人去耶路撒冷朝聖同做生意。

理查嘅回國之旅可謂多災多難，首先因為天氣問題被迫延續出發，後來又遇到海難，幾經辛苦先返到歐洲。

而佢嘅歐陸之旅亦都荊棘滿途，因為理查平日份人尻屎得罪人多----神羅皇帝亨利六世因為西西里繼承權問題同佢不睦，而奧地利公爵利奧波德更加因為阿卡嘅爭執而對佢恨之入骨。1192年秋，理查假扮成商人回國時，喺維也納附近被識破，結果被利奧波德捉咗，囚禁喺杜倫施坦，到後嚟利奧波德又將佢交咗比亨六世。

綁匪向英國王室要求贖金十萬鎊銀子，相當於英王年收入兩到三倍。理查母后艾莉諾經過一輪奔波，終於籌夠錢，理查喺1194年3月返到英國。

期間法王腓二世亦都有攪啲小動作，佢試圖賄賂亨六世，想佢囚禁理查耐啲，但係失敗咗。

唔quote啦

打打下突然左膠上身送戰馬，好似殺人當殺雞咁小事

腓二世同約翰喺1202年一度停戰，之後戰爭開始白熱化。阿爾蒂爾喺1203年7月於米拉博附近遭到約翰奇襲被俘虜，不久就神秘失蹤，普遍認為佢係俾約翰害死。

而由於約翰份人屎忽鬼，人緣仲差過佢大佬理查，以致大部份盟友同佢離心離德。英軍由此不敵法軍，約翰被迫喺1206年同腓二世簽訂對法國壓倒性有利嘅和約：約翰被迫放棄好多原屬金雀花王朝嘅領地，包括諾曼第、安茹等，得返阿奎丹。

為咗收復失地約翰同咗神羅皇帝奧托四世結盟(奧四世係佢外甥)，約定由東西兩邊夾擊腓二世，盟友仲包括法蘭德斯伯爵斐迪南。

1214年7月27日，法軍同聯軍喺法國北部嘅小村莊布汶展開決戰，法軍只有萬5人而聯軍有2萬5人。腓二世喺戰鬥中更一度墮馬受傷，幸好有盔甲保護先無事。



戰鬥喺短暫嘅交鋒後進入失控狀態，戰爭變成咗無數小規模混戰，而缺乏戰術嘅戰爭反而對素來擅於單打獨鬥嘅法國貴族有利。法軍最後獲勝，奧托四世因為受傷而被帶離戰場，回國後不久更被迫退位。法蘭德斯伯爵斐迪南亦被法軍生擒，仲俾法國囚禁咗12年。

法軍喺戰鬥中獲得決定性勝利，而神羅就喺之後幾百年不斷衰弱同分裂，法蘭西正式取代德意志成為歐洲大陸上嘅主要國家。

約翰嘅慘敗令到佢更加聲名狼藉，回國後被一向都憎恨佢嘅貴族脅迫，簽署咗對英國憲法影響深遠嘅《大憲章》。

約翰喺1216年病死，死前眼見法軍已經入侵英格蘭但已無能為力。

腓二世派太子查理進軍英國，查理被反對金雀花王朝嘅諸侯奉為英王(查理妻子係英王亨利二世嘅外孫女，因此有繼承權)，佢喺1216年5月不顧教宗反對入侵英格蘭，好快就進佔咗半個英國。

但幾個月後出名乞人憎嘅約翰離世，英格蘭貴族們開始改變主義，改為擁立約翰9歲嘅仔亨利繼位，貪佢容易控制。

法軍喺英格蘭開始節節敗退，1217年5月法軍喺林肯大敗，到8月法國海軍亦喺桑威治外海戰敗。最終雙方達成協議簽署《蘭貝思和約》，查理獲得1萬馬克報酬，承諾不再入侵英格蘭。

腓二世喺1223年7月病死，佢係首個無喺生前為太子加冕嘅卡佩國王，因為此時王室嘅力量已經十分強大，唔需要再用呢種方式去確保王位。

腓二世死後路易繼位，是為路易八世。但佢做咗幾年國王就因為痢疾病死，留低12歲嘅同名長子繼承王位。



路易九世生母為卡斯蒂利亞嘅布蘭卡，布蘭卡係英王亨利二世同艾莉諾係外孫女。

腓二世個太子係查理定路易？

布蘭卡係虔誠基督徒，路九世喺母親教育下亦變得對宗教十分熱忱----佢朝朝都會聽彌撒曲，晏晝聽亡者日課，得閒仲會學耶穌幫窮人洗下腳。

布蘭卡亦係一個control freak，對路九世嘅控制十分嚴格，甚至喺佢結婚後都表現出病態嘅佔有慾----路九世娶普羅旺斯嘅瑪格麗特為妻，布蘭卡竟然安排呢對新婚夫婦住喺唔同樓層嘅房間。據說兩個房間都受到嚴密監控，攪到佢哋要好似啲mk咁喺後樓梯扑嘢，但依然冇阻佢哋生咗11個仔女。



作為一個虔誠嘅耶撚，路九世希望能夠為基督教世界出分力，而最直接嘅方法就係喺穆斯林手上奪回聖地，即係又攪十字軍東征。



由路九世發起嘅第7次東征同之前幾次一樣多災多難。十字軍喺1249年登陸埃及，攻佔位於開羅北方嘅杜姆亞特，但酷熱嘅天氣令佢哋好唔適應，惡劣嘅衛生環境更加令到瘟疫漫延。

1249年仲夏路九世試圖進軍開羅，但由於尼羅河年度泛濫而令行軍十分困難。1250年4月，十字軍同穆斯林軍團喺埃及北部嘅曼蘇拉打咗3日。十字軍不敵驍勇善戰嘅欽察奴隸騎兵（馬木留克），兩萬個十字軍全軍覆沒。

路九世嘅細佬羅貝爾喺戰鬥中被殺，路九世本人都被穆斯林俘擄。



可能拜得神多真係有神庇佑。1250年5月，當時嘅埃及蘇丹被馬木留克推翻，新統治者同法國達成協議，收取40萬第納爾贖金(約今日8千萬美金)釋放路九世。

路九世獲釋後無選擇即刻回國，反而喺黎凡特地區留多咗4年。佢協助殘存嘅十字軍國家建設防禦工事，並同敘利亞、埃及嘅伊斯蘭勢力進行無意義嘅外交。1254 年春，佢同倖存嘅軍隊返回法國。

謝指正

路九世返到闊別6年嘅祖國，迎接佢嘅係對佢滿懷不滿嘅貴族們，當中當然包括英王亨利三世(佢亦係法王嘅封臣)。

路九世同佢嘅祖先唔同，佢更加睇重嘅係基督教世界嘅和諧。經過數年鬥爭後路九世同亨三世喺1259年簽署巴黎條約，英國同意放棄大量歐陸領土，只仍以法王藩屬嘅身份佔有加斯科尼同部分亞奎丹。作為交換，路九世唔再支持反英叛亂。

而路九世所持嘅理由係“法英王后係親生姐妹，大家一家人應該相親相愛”(咁計法全歐洲貴族都係親戚啦)

但路九世嘅慷慨確實令到基督徒世界暫時得到和平，直到80年後法英百年戰爭嘅爆發。

而路九世喺唔打仗嘅時候主要精力就花喺審判案件上，傳說上佢終日坐喺一棵老橡樹底下，自己審理案件。佢大幅修改司法系統廢除中世紀盛行嘅神裁法。並破天荒咁引入咗“無罪者假定”呢個概念，大大咁影響咗日後普通法嘅發展。

但路九世始終念茲在茲嘅都係聖城耶路撒冷，佢喺1267年54歲嘅時候又再次發動第8次東征。佢今次選擇由北非嘅突尼西亞進攻。但路九世似乎冇從之前喺熱帶作戰嘅失敗經驗汲取教訓，十字軍因為缺乏乾淨嘅食水同酷熱，好多都病咗。

1270年8月，路九世自己都病死埋。路九世死後十字軍由佢細佬安茹嘅查理接手，大家都喺意興闌珊下決定回國。



德高望重嘅路九世為法蘭西國王奠定君權神授嘅基礎，從此大家都認定法王係上帝挑選嘅合法君王，為日後絕對君權邁進一大步。

亦因為路九世嘅虔誠舉世聞名，喺佢死後25年教庭將佢封為聖人，但亦都因為咁聖路易就得到死無全屍嘅下場。



路九世嘅屍身會分成多個部份，作為聖物咁保存喺唔同嘅教堂，時至今日依然得到妥善保存。

的確依家歐洲皇室全撚部都係親戚黎
大多數同維多利亞女皇有關

當時防腐咁先進？

木乃伊歷史仲耐啦

分屍

嗰個人想睇日本史

當路九世去世時太子腓力正隨同佢喺突尼西亞東征，路九世死後腓力三世就喺當地繼位為王。

腓三世因精於騎射而被稱為“勇者腓力”，但佢真實性格軟弱同優柔寡斷，並無太多勇氣。



1285腓三世受教宗慫恿下攻擊西班牙嘅亞拉岡王國，初時戰況頗為順利，但係好快法軍又受到瘟疫痢疾所苦，連國王本人都染病，結果被迫撤退。但腓三世等唔到返屋企就係中途病逝，由佢同命長子繼位。

腓四世被稱作“美男子腓力”，但呢個名同佢老豆個朵一樣被認為係有水份，佢眞人只係中上樣。佢性格沉默寡言、陰沉但係野心勃勃，頗有雄心壯志想令法國強大。

腓四世同腓二世、聖路易並稱為卡佩王朝三大名王，但亦係最後一個。



腓四世透過聯姻同其他繼承權，將法蘭西版圖擴大，亦因為咁法國嘅財政壓力大增。為咗搵錢，法王於是就打起教會嘅主意。1296年，腓四世強行向法蘭西境內嘅神職人員收取重稅。

當時嘅教宗博義八世對此大為震怒，禁止教會人士向法王課金，此事亦開始咗法國同教庭多年嘅爭端。