【歷史po】法唔法國。。。。

歐洲所有民族嘅祖先？？

查八世喺強勢父親教育下長大，個性軟弱。佢被後人稱為“和藹者”，反映佢比人嘅印象係個無乜撚用嘅好人，同老豆嘅老奸巨滑爭得遠。



1488年，布列塔尼（位於法國西部）公爵病逝，淨返一個叫安妮嘅女做繼承人。勃艮地嘅戲碼再度上演，今次又係法國同神羅爭女嘅局面。查八世嘅準外父馬一世亦向布列塔尼安妮求婚，當時佢已經控制住法蘭德斯，如果攞埋布列塔尼就會形成犄角之勢夾擊法國，攝政公主安妮自然唔會比呢件事發生。

安妮幫佢細佬諗咗一個萬無一失嘅求婚方式----1491年，查八世帶住4萬人軍隊去布列塔尼求婚，順利娶得布列塔尼安妮，令該地永遠併入法國。



而查八世原來嘅未婚妻，馬一世之女瑪格麗特亦都只有返奧地利。佢自3歲就作為童養媳住喺巴黎，後嚟嫁咗比西班牙皇太子。

同年安妮攝政結束，21歲嘅查八世開始親政。志大才疏嘅佢夢想再開展新一次十字軍東征建功立業，意大利半島就係一個合適嘅跳板。

查八世以自己係聖路易之弟安茹查理後裔為由，宣告自己有資格繼承那不勒斯國王（查理喺13世紀時係那不勒斯同西西里國王），開始咗佢南方嘅軍事冒險。

而當時亦似乎係一個適合入侵意大利嘅時候：佛羅倫斯嘅統治者同米開蘭基羅嘅贊助商羅倫佐·麥地奇喺1492去世，由佢平庸嘅兒子繼任。麥地奇生前努力維持意大利各城邦嘅和平，但隨住佢嘅死平衡亦同時打破。

3個月後教宗諾森八世亦都死埋，接替佢嘅係西班牙人亞歷山大六世。亞六世出身於波吉亞家族，出名貪婪腐敗只顧個人私利，教廷因而威望值大降。（佢亦係首個正式承認私生子嘅教宗，波家慣用手段包括賄賂同毒殺，更有亂倫傳聞。）



1494 年 1 月 ，那不勒斯國王斐迪南一世意外去世，由兒子阿方索二世繼位。查八世再次宣稱自己對那不勒斯擁有合法統治權，並決定出兵。

當年9月，查八世同堂兄奧爾良公爵路易帶住由法蘭西騎兵、瑞士、日耳曼僱傭兵組成嘅2萬5千人大軍，一路跨過阿爾卑斯山南下。米蘭同佛羅倫斯都對佢哋夾道歡迎，當抵達羅馬時教宗亞六世經過短暫逃亡後，最好亦只有屈服。



1495年2月，查八世到達那不勒斯。當地人民早就不滿西班牙人統治（當時統治者亞拉岡王朝來自西班牙），全城歡聲雷動，到5月查八世更加冕為那不勒斯國王。

AC Brotherhood 劇情

但係那不勒斯人好快就發現法國人只不過係另一批侵略者，法軍喺那不勒斯軍紀敗壞，令居民怨聲載道。



意大利同歐洲其他勢力亦都對法國人嘅行為感到驚慌，教宗、神羅、西班牙、威尼斯、米蘭等勢力喺1495年3月組成咗神聖同盟。呢個聯盟同上帝冇咩關係，純粹係想趕走法國人。

查八世得知消息，決定先行返回法國。返法途中要經過好多佢嘅新敵人領土同崎嶇山路，最甘嘅係要拎住啲輜重如火炮上山落山。

到7月份法軍嚟到福爾諾沃，終於遇上等待佢哋嘅3萬人神聖聯盟軍。盟軍以逸待勞而且有人數上嘅優勢；而法軍經過舟車勞頓，已經疲憊不堪。但法軍包括查八世都英勇作戰，最後終於殺出重圍。



意大利人有數千人死亡，而法國人嘅份亡數字遠低於佢哋，不過就失去咗大部份戰利品。

但無幾耐法國其他戰線亦傳來惡耗：法蘭西海上遠征軍被熱那亞海軍擊敗；那不勒斯舊王阿方索二世之子斐迪南得到西班牙人幫助，迅速奪回那不勒斯。

法國嘅軍事成果自此化為泡影，查八世越過阿爾卑斯山返國，淨低奧爾良路易維持法國喺半島上嘅勢力。

查八世嘅南征為遠世帶來深遠影響，當佢嘅軍團解散後士兵四散，四處傳播開以下信息：意大利氣候和暖陽光普照，生活富貴優雅高尚。但呢啲高雅人士既唔團結又唔好打，簡直就係待宰嘅肥羊。從此意大利嘅北方鄰居就開始咗佢哋嘅入侵之路。

除咗征服意大利嘅黃金夢，士兵們亦都進行起其他傳播。1492年哥倫布發現新大陸，順便將梅毒帶返西班牙，然後西班牙人又將佢帶到那不勒斯。

當法軍喺那不勒斯駐紮嘅幾個月，因為無所事事所以成日叫雞，結果好多人都奶咗嘢。

法軍解散後好多士兵返咗家鄉，有啲就繼續做僱傭兵，梅毒就跟住佢哋喺歐洲迅速擴散。然後又因為航海事業嘅發達，再傳埋去亞洲。



各國相繼將呢個病毒以敵國或鄰居命名：法國人叫佢那不勒斯病，意大利、英格蘭則稱其為高盧病。荷蘭稱其為西班牙病，波蘭稱為德國病。

路八世回國後一直想再次打意大利，但因為國家負債累累而受阻。 1498年4月，查八世喺昂布瓦斯城（法國中部）準備去睇網球比賽時撞到個頭，佢冇理繼續去睇比賽。到佢睇完經過同一個位時突然慣低，佢嘅侍從可能怕孭鑊就由得佢瞓喺度。9個鐘頭後查八世傷重不治，年僅28歲。

查八世死後無子，王位由佢嘅戰友奧爾良路易繼承。路易十二世除咗係查八世嘅堂兄弟，亦娶咗佢家姐讓娜。但路十二並唔愛佢，加上想保住布列塔尼領地，佢決定同讓娜離婚，改為同查八世嘅寡婦安妮結婚。



路十二以重金賄賂教宗之子切薩雷·波吉亞（馬基雅維利偶像，受佢啟發寫君王論），得以宣告婚姻無效再娶。路十二除咗繼承先王嘅老婆之外，亦繼續佢征服意大利嘅計劃。除咗那不勒那，路十二亦聲稱因為佢阿嫲係米蘭公爵之女為由，宣布佢對米蘭公國有繼承權。佢為咗爭取教宗支持，更將法東嘅瓦朗斯贈予切薩雷，封佢為瓦倫提諾公爵。



1499年，法軍再次南征意大利並好快成功征服咗米蘭。米蘭統治者盧多維科·斯福爾扎棄城逃亡，但喺次年兵敗被擒，八年後死喺獄中。

路十二對意大利嘅野心並不止於米蘭，佢同西班牙嘅亞拉岡國王斐迪南二世喺1502年協議瓜分那不勒斯，以此換取佢放棄支持佢嘅西班牙親戚。但兩邊好快就因為分贓不勻而反目----戰爭持續咗兩年，最終法國人被西班牙人逐出那不勒斯。

樓主

未去到17世紀嘅法國
太陽王

樓主冇事呀嘛

樓

本嚟路十二嘅意大利征服之旅可能會結束，但1503年發生嘅事改變咗佢嘅決策----教宗亞六世喺當年8月暴斃，接任人做咗3個月就死咗，結果由波吉亞家宿敵儒略二世繼任。

儒二世堪稱文藝復興時期最有雄心壯志嘅教宗，以武勇好戰聞名於世，係教廷史上唯一親上戰場嘅教宗。當米開達基羅為佢做雕像時，佢就提出使用持劍嘅造型。



佢意圖將意大利半島三分天下，北部以米蘭為中心歸法國；南部歸西班牙人；而中部就由教宗國佔有。

儒二世計劃嘅最大障礙係中部另一大勢力威尼斯共和國。為打擊威尼斯，佢喺1508年聯合法國、神羅、阿拉貢等勢力，喺法北小鎮康布雷結盟，相約瓜分威尼斯領土。
 
聯軍喺1509年擊敗咗威尼斯嘅僱傭兵團，佔領咗好多原來隸屬威尼斯嘅城鎮。但習慣於威尼斯人寬鬆統治嘅居民好快就忍受唔到嚴苛嘅新統治者，1509年7月，帕多瓦市民發動起義抵抗神羅入侵者，由於神羅駐紮士兵不足，最後威尼斯人重新控制帕多瓦。

但除咗神羅之外，威尼斯仲要面對法國同費拉拉公國嘅攻勢，兩線作戰十分吃力。於是決定同教宗講數，喺割地賠款等苛刻條件底下，威尼斯同教廷暫時握手言和。
 
教廷同威尼斯嘅和解打破咗勢力平衡，加上法國同教廷亦因為分地問題而失和，導致康布雷同盟瓦解。1511年儒二世又再牽頭成立神聖同盟，今次嘅敵人變為法國同佢盟友費拉拉。



1512年4月，雙方喺拉文納爆發咗意大利戰爭其中一場最血腥嘅戰役。2萬1千人法費聯軍由路十二外甥內穆爾公爵加斯頓·德·富瓦親率，VS由西班牙人拉蒙·德·卡爾多納率領嘅1萬6千人神聖同盟軍。



法軍喺年輕嘅軍事天才加斯頓帶領下，加上有當時最精銳嘅費拉拉炮兵相助，成功喺拉文納戰役擊敗神盟軍。

但貪勝嘅加斯頓喺帶領一小隊騎士意圖狙擊一支陣容完整嘅西班牙步兵時，不幸中槍落馬被殺，年僅22歲。



失去外甥嘅路十二不久亦失去佔領咗13年嘅米蘭。1512年5月神盟軍將法軍趕出米蘭，恢復斯福爾扎家族對米蘭嘅統治。隔年法軍喺諾瓦拉戰役又再次失利，法國暫時退出意大利。
 
1514年1月，法國王后布列塔尼安妮病逝。喺當年10月，52歲嘅路十二同英王亨利八世之妹，18歲嘅瑪麗再婚。鑑於當時人嘅短壽同早婚，呢段婚姻可被視為爺孫戀。但路十二畢竟年事已髙，婚後3個月就因為馬上痛風疾病而去世。

樓主出現了

被稱作“人民之父”嘅路十二不幸地唔係任何男性繼承人之父，王位因而落入佢堂侄兼女婿法蘭索瓦手中。法一世出身瓦盧瓦旁支，靠迎娶路十二與安妮之女克洛德入繼大統，法國亦得以保留布列塔尼。

受過良好教育嘅法一世被認為係法國第一位文藝復興式君主。佢多才多藝精通多種語言，亦都好喜愛藝術品。就連著名嘅李奧納多·達·文西亦都受法一世邀請，喺佢人生最後三年移居法國。兩人關係深厚，達文西更加係喺法一世懷中去世。



傳說中達文西嘅遺言：



魅力不凡嘅法一世亦同時係一個風流天子，雖然有人詬病佢個鼻太大，但亦不妨礙佢喺情場上縱橫馳騁。




才華橫溢嘅法一世有如漆黑中嘅螢火蟲一樣鮮明出眾。而胸懷大志嘅佢不久就會因為想實現自己嘅野心，同當世另一雄主 哈布斯堡嘅查理五世發生嚴重衝突，甚至連自身都淪為階下之囚。

法一世算唔算第二次法國黃金時代？
第一次係蜘王蛛路易十一世

法一世即位初期，喺馬里尼亞諾戰役打敗教皇國／瑞士聯軍，收復米蘭。同年亞拉岡國王斐迪南二世病逝，王位傳外孫哈布斯堡查理，繼承嘅領土包括西班牙、南意大利同美洲新大陸。



到1519年神羅皇帝馬一世亦都駕崩，帝位好有可能亦由嫡孫查理五世繼承，即係話法蘭西會被哈布斯堡家族領地所包圍，呢個對法一世嚟講唔係好消息。

法一世於是決定出馬爭奪神羅帝位，但佢始終唔係日耳曼人，得唔到七個選帝侯嘅青睞。而當查五世以家族礦產利權為抵押，向富可敵國嘅富格爾家族得到貸款之後，法一世已經注定失敗。

法一世意識到自己需要強大嘅盟友對抗查五世，而哈布斯堡嘅坐大而令到歐洲其他勢力感到不安，當中就包括法蘭西宿敵英格蘭。

當時嘅英國國王係成日殺老婆嗰個亨八世，佢比法一世年長3歲。亨八世喺外交顧問紅衣主教沃爾西建議下，答應同法一世見面會談。



1520年6月7日，兩王喺英屬加萊嘅巴蘭岡會面。由於兩人都想對方面前炫耀財富，所以嗰次會議嘅佈置極盡奢華。亨八世從英國帶咗數千名隨行人員同聘請人數相約嘅藝術家同工匠，動用大量人力臨時建造咗一座巨大華麗嘅宮殿。

而法一世亦都不甘後人，同樣以奢華嘅帳篷、服飾、宴會、音樂同其他活動去同對方攀比。由於兩方嘅帳篷同服飾都繡咗大量金線，史稱“金帛盛會”。



法英兩王17日喺會上除咗瞓覺同食飯（驚對方落毒）幾乎形影不離，佢哋風花雪月唔講政治，就好似舉行緊個大型嘉年華會。有次佢哋可能飲得興起，竟然喺度玩摔跤。但亨八世嘅體型應該比較適合玩相撲，結果敗於文武雙全嘅法一世手上。



呢個會議除咗飲飲食食之外喺政治上毫無作用，亨八世據說因落敗懷恨在心（方丈佢。。。），喺會後竟然同查五世結盟，同法國作對。

1521年，查五世將法國人逐出米蘭。隔年法一世派兵意圖奪回米蘭但係失敗。到咗1524年夏，法一世決定親自帶兩萬軍隊越過阿爾卑斯山，當年十月再次收復米蘭。

攻克米蘭嘅法一世下個目標係附近嘅帕維亞，當地只有約6千人嘅日耳曼西班牙混成部隊看守，而法軍則有2萬6千人，包括9千名法國人同埋由瑞士、德意地、意大利等組成嘅僱傭兵。



帕維亞守軍人數雖然處於劣勢，但仍然英勇頑抗。本嚟喺寒冬將至嘅情況下，法軍好應該退守。但好大喜功嘅法一世決定繼續圍城戰，喺持續咗4個月之後嘅25年4月24日，增援嘅2萬人神羅軍隊終於嚟到，帕維亞戰役爆發。



是次戰役喺科技上有劃時代意義，因為係首次火繩槍被廣泛使用。驍勇善戰嘅瑞士長槍兵團敵不過洋槍，大量被配備火槍嘅神羅軍射殺。



是役法軍損失達1萬4千人，神羅只有千幾人陣亡。法一世不愧“騎士王”美名，佢奮力戰鬥到筋疲力盡，先至被敵軍俘虜。

呢個會議除咗飲飲食食之外喺政治上毫無作用，亨八世據說因落敗懷恨在心（方丈佢。。。），喺會後竟然同查五世結盟，同法國作對。

法一世成為繼聖路易九世同好人約翰二世之後，第三位被俘嘅國王。佢初時被囚禁喺意大利北部皮齊蓋托內，後嚟被安排送去那不勒斯。

驕傲嘅法一世唔願意成為那不勒斯人囚徒，佢懇求負責看守佢嘅總督送佢去馬德里。總督竟然罔顧皇帝嘅命令，眞係將法一世送咗去馬德里。
 
查五世唯有對佢嘅不速訪客表示歡迎，對佢以君王之禮侍候，法一世被安排喺一座塔樓嘅閣樓居住。

法一世在囚期望染上咗重病，令佢喺法國嘅家人非常擔心。自法一世出征以來，國事就由佢阿媽薩伏依嘅路易絲攝政，由於太后好忙甩唔到身，改為派法一世嘅家姐瑪格麗特公主去西班牙探望。

公主不分晝夜照顧皇弟，結果法一世終於好轉。佢哋仲計劃用一個喺今日會被視為政治不正確嘅方式逃亡----法一世塗黑塊面扮成送柴火嘅黑奴脫獄。



逃獄行動因為走漏風聲而失敗，查五世寬大地不予以追究。眼見走唔甩嘅法一世只好屈服，向查五世談判。查五世要嘅唔係錢，而係佢太公大膽查理嘅勃艮第遺產（佢阿嫲係查理獨女）。1526年1月兩國簽訂《馬德里條約》，法國將割讓勃艮地並放棄爭奪米蘭同那不勒斯，法一世亦會同查五世個妹艾蕾諾爾結婚。

為咗以免法一世回國後反悔，佢兩個分別7歲同8歲嘅仔亨利同法蘭索瓦被安排到西班牙做人質，1526年3月法一世得以回國。