【歷史po】法唔法國。。。。

其實睇返嗰個年代嘅真無乜邊個法國佬正正常常，塔狗對比起都唔算太仆街，偏偏係得塔狗咁嘅人先有能耐去執拿帝爛攤子又不失法國體面

教宗庇九世先後向那不勒斯、西班牙、奧地利同法國要求支援，前三國都冇理佢。

問題喺法國身上，路總靠拿破崙個牌頭起家，自然要有拿破崙嘅霸業，而且法蘭西歷代都在干涉意大利嘅前科。路易年輕時曾經去過意大利參加社運，佢加入咗當地祕密組織燒炭黨，同教廷/奧地利抗爭。呢段經歷對路易影響深遠，亦令佢多一個誘因參與意大利冒險。

燒炭黨建立目的不為自殺，而係為咗反教權同建立一個自由統一嘅意大利，Carbonari字面意思係農村嘅木炭製造者。佢哋發源於那不勒斯，勢力範圍主要喺南部。

佢哋嘅作風近似今日黑手黨，即係會殺25仔全家嗰隻，同遠東嘅洪門三合會一樣喺革命中發揮重大作用。



路總能夠挾高民意上台，靠嘅係眾多政治集團對第二共和嘅不滿，而家佢需要兌現選舉承諾；喺保王黨/天主教保守勢力心中，波拿巴始終係攪革命嘅，路總想靠住幫教廷鎮壓革命，討得佢哋歡心。

同時路易亦對奧國勢力喺意半島座大有所警惕，所以佢希望搶先一步挾教宗以令諸侯。1849年4月25日，法軍由烏迪諾將軍帶領，喺羅馬附近奇維塔韋基亞登陸。

法軍本以為革命黨人只係一少撮激進份子組成，自己上岸後會遇到夾道歡迎。但事實係羅馬人準備奮勇頑抗，佢哋雖然人唔多，但就準備集結一切力量同法軍抗衡。

身一場戰役喺4月30日展開，法軍因為烏迪諾嘅輕敵，被迫鎩羽而歸，烏將軍請求增援。個幾月後佢帶住2萬人，經過27日嘅圍攻，終於喺6月30日攻陷羅馬。

喺答應留低一支法國駐軍後，庇九世返到羅馬，而路易將來會為呢個決定後悔。

但係孤星淚係講1832年個起義喎

喺法國嘅路總花咗好多時間去鞏固自己地位，佢就好似傳說中勤政愛民嘅明君咁喺法國各地巡遊。仰賴工業化下蓬勃發展嘅鐵路網，佢得以走遍大江南北，人民當時都好愛戴佢。

隨住民望越來越高，路易仿效路十四廢除相權，將軍政大權集於一身。但佢本人明白什麼都總有限期，而法國總統就只得四年，唔夠時間比佢建功立業。

路總希望用溫和嘅方式改革政制，佢想先通過向議會請願嚟解決。但隨住選民人數增加，黨派亦變得分散，達成一致嘅可能性就更細。經過冗長而激烈討論，最終不獲通過。

於是淨低嘅只有政變一途。1851年12月1日，嗰日係拿一世加冕47周年前夕，路易選中嗰日發表公告：國民議會試圖架空人民賦予王子總統閣下嘅權力，總統將會喺兩星期內舉行全民公投，俾人民眞正嘅選擇(有啲似國王同平民聯手擠壓貴族)。路易漏夜派人將文宣貼到巴黎大街小巷。

第二日當國會議員照常去波旁宮開會，發現大門已被總統關上。佢哋轉移到市政廳抗議，但無幾耐就被警察拘捕。11點鐘路易按原定計劃騎住黑馬出現，同行嘅仲有佢阿叔，生得最似拿破崙嘅傑羅姆。傑羅姆仲一路擺出拿蛇嘅招牌R肚腩手勢cosplay佢。



如痴如醉嘅民眾歡呼“皇帝萬歲”，政變幾乎結束，但依然有班中產階級知識份子包括文豪雨果繼續抗議，路障又再喺巴黎街頭出現。可惜法豬們大多擁戴皇帝，根本唔支持佢哋。12月4日，路易派軍隊清場，拆毀路障同射殺示威者。士兵喺下午殺紅了眼，仲去咗意大利大道嘅咖啡廳殺咗百幾個無辜客人。



曾經支持路易.波拿巴嘅雨果從此流亡海外，不斷發表批評佢嘅言論；公投結果一於所料，路易得到700萬人支持，反對嘅只得60萬。法國理論上仲係共和國，但路總行為已經同皇帝無異。1852年元旦，佢由愛麗舍宮搬到去國王住嘅杜宮。11月7日，已經完全由佢控制嘅上議院動議路易稱帝，佢嘅後代亦能繼承皇位，喺一票反對下獲得通過。

11月21日又再舉行全民公投，以780萬對25萬通過稱帝方案。1852年12月1日即拿一世加冕48周年，44歲嘅拿三世登基成為法國皇帝。

法國人民以民主方式選出專制皇帝，實在係因為已經受唔到持續混亂嘅政局，希望安安樂樂做黎生。而為咗維持秩序，就只有好似拿三世咁以軍事政變奪權。

而呢個亦係法國喺大革命後陷入嘅死循環，不斷喺中央集權-革命-軍事專政之間來回loop，呢個傳統更一直延續到第三同第五共和。



拿三世已經治國平天下，單身嘅佢開始覺得要修身齊家。佢係一個花花公子，有個英國情婦名叫哈麗雅特·霍華德。哈麗喺男人身上搵咗好多錢，好多就用咗嚟支持拿三世嘅光復志業，但可惜大家都認為佢唔係皇后嘅合適人選。



拿三世唯有另覓對象，各歐洲正統王室都唔願意同暴發戶波拿巴扯上關係，令皇帝好難搵到一個門當戶對嘅人選。不過佢就喺愛宮一個ball度邂逅咗西班牙女子歐珍妮，並驚為天人。



歐珍妮來自西班牙一個沒落貴族家庭，自幼年時起便以美貌而聞名。拿三世對佢展開熱烈追求，但外間仲係有好多反對聲音，拿三世嘅好友佩爾西尼公爵甚至出小冊子粗鄙地抹黑歐珍妮。



但兩人最後都排除萬難，喺53年結婚，並分別喺杜宮同巴黎聖母院舉辦咗盛大婚禮。

但兩人婚後生活唔算幸福，歐珍妮係個性冷感，認為扑嘢十分不潔。幸好1855年夏天某晚佢鼓起勇氣當俾鬼責，十個月後為第二帝國誕下太子拿四世。

另外歐皇后亦好有fashion sense，佢提拔嘅設計師包括路易·威登。



婚後嘅拿三世雖未修心養性，但亦勵精圖治著力建設法國。19世紀巴黎擁擠不堪又衛生程度低下，實在配唔起帝都之名。因此拿三世決定推行大規模基建，佢重用法國塞納省長奧斯曼，拆毀咗擁擠髒亂嘅中世紀街區，改建為寬敞嘅街道、公園、廣場。

而拿三世對巴黎嘅最大建樹係徹底重建咗下水道系統，令巴黎告別滿街屎尿。

呢場改造被認為極大咁改變咗巴黎嘅城市格局，為當代巴黎塑造出輪廓。而且更提供咗大量就業崗位，暫時壓制咗法國各階層矛盾。

另一方面法國喺拿三世任內完成工業化，亦都同英國打好咗關係。為咗喺耶路撒冷爭教堂用啲毛屎小事，法俄土三國喺53年10月爆發克里米亞戰爭。(法國參戰原因部份因為拿三世想保持佢嘅高人氣)由於近東病夫不堪一擊，俄軍得以喺黑海長驅直進，足以威脅大英嘅海洋霸業。法英因而聯手，喺1854年3月對俄宣戰。

以此為契機，拿三世提出到訪英國進行國是訪問。但事頭婆維多利亞明顯對波拿巴人有所疑慮，對此不置可否。



但雙方關係明顯慢慢改善，當1855年3月拿三世邀請王夫阿拔到訪法國時，今次冇再食檸檬。

因為番書仔拿三世德文仲叻過法語，所以同德國人阿拔言談甚歡。阿拔驚訝地發現法國皇帝份人幾nice又醒目，對佢大為改觀。



可能拿三世帶咗王夫去call g，佢返到英國之後喺老婆面前為拿三世美言好多句，令事頭婆對法皇好感大增。

終於喺1855年4月16日，拿三世夫婦世紀訪問英倫。

當事頭婆見到身高只有166嘅拿三世，不禁慨嘆佢的確係一個波拿巴❗但拿三世嘅幽默同迷人魅力好快就令到女王卸下心防，事頭婆更立即增其嘉德騎士勳章，另外佢亦對氣質優雅人品正直嘅歐皇后大有好感。

拿三世嘅訪英十分成功，兩國關係大大改善。5個月後事頭婆亦回訪法國，自金帛盛會以來，已有3百多年。兩人喺狂風暴雨中結伴前往拜祭拿一世，事頭婆同拿三世手挽手企喺拿一世墓前，火把嘅火光似係為見證兩國友誼而閃爍。

法英喺自由貿易協定下大做生意，兩邊都發過牙day。50年代嘅法蘭西喺明君統治下看似一切都好美好，直到法國嘅虛榮心又令佢捲入漩渦。

成撚日暴動

又真係唔怪得樓主嘅，由法國大革命到巴黎公社，法國都唔知發生左幾多次呢d起義革命，多到唔記得邊次打邊次好正常

玩到2032年

點解法國啲黑人破壞呢個家園

拿三世作為一個民選產生嘅獨裁者，不免被其支持者所綁架，好似民粹主義者咁做出討好選民嘅行為。



例如拿三世嘅出征意大利，就係為咗向佢嘅波拿巴基本盤交代：拿一世從來都係反奧地利嘅，之前拿三世為咗保王黨人保護教宗已經令佢哋好唔高興，佢必須有所交代。

拿三世為咗證明自己真係一個拿破崙，亦都想打下勝仗提振下悄悄滑落嘅民望，但佢對於是否參戰始終心大心細。

但奧地利人幫佢做咗決定。1859年4月23日維也納向都靈發出最後通牒：命令薩國停止一切軍事動員，然而薩國並不予理會。奧地利因此喺4月29日向薩國宣戰，從而將法國捲入戰爭。

拿三世更決定首次御駕親征，佢喺1859年5月12日到達熱那亞。6月24日，兩軍喺索爾費里諾爆發咗意獨戰爭中最大戰役。此役有拿三世、薩丁維二世、奧地利法一世參與，為歷史上最後一場由各國君主親自指揮作戰嘅重大戰役，兩軍各有13萬士兵。

以近身肉搏戰為主嘅戰鬥清晨開始直到傍晚，奧軍因為損失達二萬人而決定撤退，慘戰嘅聯軍損失人數相約。




而戰役後，又因為斑疹傷寒嘅流行而死咗幾千人。拿三世畢竟唔係佢鐵石心腸嘅伯父，對修羅場般景況反感震驚。另外佢亦收到消息日耳曼邦聯將吹雞35萬人支援奧地利，令佢想盡快喺戰爭中甩身。

另外佢亦都忌憚盟友薩國會喺南方變得太過強大，自法軍登陸已來已經有幾個小公國想推翻統治者併入薩國。

1859年7月11日，法奧兩皇喺意北自由鎮會面，好快就達成共識，奧地利將大部份倫巴底交俾法國，再由法國轉交薩丁。意大利將以教宗為虛君建立邦聯，威尼斯同威內托加入邦聯，但名義上仍然由奧國統治。

似係移民二三代缺乏社會上升渠道❓

拿三世私自議和一事觸怒咗盟友薩丁，加富爾本人甚至辭職抗議。眼見盟友大怒，法國亦唔好意思迫佢哋遵守協定內容。薩丁繼續擴張，吞併咗中意幾個邦國，奧國亦只有無奈離開半島，影響力日漸式微。

而當奧地利被削弱，就令佢哋無法再節制普魯士嘅德意志統一之路，新興嘅德國會喺法蘭西嘅血泊中建立起嚟🇩🇪。

而喺地球另一邊亦風湧雲起。1821年，墨西哥脫離西班牙獨立，年輕軍官阿古斯丁自立為帝，但在位3年就被槍決。喺之後嘅數十年墨西哥由幾個軍事僭主所掌管，佢哋全部係西班牙裔墨西哥人(事實上拉美各國獨立運動都係由一少撮西班牙人領導美洲原住民)。

墨國本土缺乏商品經濟，軍閥們為咗籌餉去相互撕殺，皆以礦產抵押予歐洲列強貸款。但因為戰爭打極唔完，以致債台高築。最終喺1861年，忍無可忍嘅三大債主法英西派聯合海軍到達墨西哥，並且接管咗佢嘅關稅部門。

當時墨西哥由原住民血統嘅自由派代表胡亞雷斯做總統，佢因為想沒收教會同地主土地嚟還債，引起保守派強烈不滿，佢哋興起勤王想法。



英國同西班牙人喺收唔到爛數後，好快就返咗歐洲。但法國人就留咗喺墨西哥，因為皇帝拿三世正幻想自己喺度捉緊一盤大棋：佢認為將來世界會係盎格魯-撒克遜人同拉丁人二分天下，法蘭西人作為最強嘅拉丁系國家/天主教會長女，有責任為拉丁民族出頭。而波拿巴亦會因其豐功偉績，成為新時代嘅加洛林。

另一方面拿三世見到美利堅冉冉上升，亦有感新教徒喺新大陸勢力過大，正好襯住佢打緊南北戰爭自顧不暇，一挫其銳氣。

1862年5月法墨喺普埃布拉首戰，法軍被擊敗。本嚟將條數撇帳然後慨嘆遇到阿偉會係法國嘅最佳選擇，但拿三世出於佢嘅野望，又再派2萬5千人登陸。

法國希望先喺墨西哥建立天主教帝國，然後再推而廣之到拉美各地；佢相中咗奧皇之弟馬克西米連，想擁立佢做皇帝。



出身哈家嘅馬囝血統無可挑剔，佢娶咗比利時王利一世之女夏洛特。夏公主個性強勢，對於做皇后嘅想法表現得十分雀躍。而馬囝係個耳仔軟怕老婆嘅beta，最後佢喺老婆同拿三世慫恿下，搭上咗去墨西哥嘅賊船。



1864年4月10日佢登基為墨西哥皇帝馬一世。馬一世眞係幾廢下，佢將國事委予夏皇后，自己喺墨西哥各地旅行，同平民飲酒。

但胡亞雷斯喺國內仍好有影響力，同皇帝形成平衡體系。馬一世喺65年10月頒佈“黑色法令”針對呢班反賊，任何人一經發現參與非法武裝組織：



約有萬一人被殺，但胡亞雷斯支持者依然越枕越多人。拿三世終於意興闌珊，喺1866年5月31日撤回法軍，失去法國軍事支援嘅帝國兵敗如山倒。

此時掌管內閣嘅夏皇后已經壓力爆煲，佢知道無外援嘅話佢兩公婆一定死梗。於是喺66年秋天返到歐洲求救。

佢嘅第一站係法國，拿三世因為罪疚感，一度避而不見，最後喺歐珍妮皇后堅持下先答允。兩人發現夏皇后已經喺壓力下變得極危險：佢將一盤檸檬汁掃落地下，堅稱已被下毒。

當佢覲見教宗時亦同樣痴線，今次受害嘅飲品係朱古力。之後佢捉咗雞返酒店房，每日以雞蛋、橙、堅果維生。直到佢阿哥利奧波德接佢返比利時，佢又喺嗰度生活咗60年，1927年先死。

馬一世喺67年5月16日被共和軍逮捕，胡亞雷斯以佢嘅黑色法令為依據判佢死刑。佢喺6月19日被槍決，終年34歲。



法國將軍馬克西姆·魏剛1867年1月出生於比利時布魯塞爾，一二戰期間戰績輝煌。佢自稱身世不明，但就由比利時王室資助軍校學費。佢被認為同比利時軍人阿弗雷德·史密森形神俱似，而史則曾參與墨西哥支援戰。




如果魏剛係夏皇后同史密森私通所出，或者就能夠解釋到佢點解咁大壓力會精神崩潰。

身在歐陸嘅拿三世有更加大嘅難題等緊佢。1865年10月普魯士首相俾斯麥到訪法國，同拿三世喺比亞里茨會面。會上鐵血的宰相向拿三世透露會向奧地利開刀，實現日耳曼統一，希望法國保持中立。



拿三世對俾相嘅單刀直入表示驚訝，而佢自己似乎忘記咗歷代法王分裂德意志嘅祖宗家訓，爽快地答應咗俾嘅要求，並且不求任何回報。

後世人對拿三世嘅軟弱表現有唔同解讀，當時已經57歲嘅拿三世唔知係咪滾得多導致生賢石，健康不佳嘅佢早已失去初登基時嘅銳氣。

其次係當時奧國領土係普國兩倍，而普魯士長久以嚟比人嘅形象係近似北歐嘅和平主義者，喺拿三世眼中根本不足為患；而且當時普魯士嘅國土係分散嘅，喺萊茵河到東普魯士之間被其他各邦切割到碎濕濕。



喺拿一世時代人眼中普國根本易攻難守，普軍難以同時派兵保衛柏林同經濟命脈萊茵。但工業革命改變咗佢嘅命運。



普魯士人透過修建鐵路網，將各小邦之春袋握於手中。為咗經濟發展，各邦都願意配合，而各要害車站、起點、終點都俾普國揸住，各小邦已經變咗佢嘅附庸。



1866年6月，普魯士進犯薩克森，直迫奧國邊界，意大利為奪威尼斯，亦同普國聯手。兩軍喺今日捷克薩多瓦開戰，加埋有成30幾萬人，係當時世上最多人參與嘅戰役。

呢次亦係首次大規模採用鐵路用無綫電嘅戰役，普軍大獲全勝。



戰敗後奧地利放棄意大利淨餘領土，以普魯士馬首是瞻嘅北日耳曼邦聯成立，由普王威一世任主席，俾斯麥為相。

印象中見過上面幅圖嘅英文版

但現時搵親都係德文

我估最大分別就係個參謀部

普軍嘅參謀部係玩情報搜集兼集合人才嚟玩戰略模擬

而法軍嘅參謀部係被人流放兼閒置嘅人嚟玩戰略遊戲，簡單嚟講，即係得閒捉下旗咁

法國佬政治指揮軍事
內宣主導外交
眞係so fucking chinese

啱啱先發覺巴打好似冇講過法國對東亞嘅影響?定未係時候

奠邊府

拿三世被送到威一世喺德國卡瑟爾嘅城堡，喺嗰度住咗6個月。

當皇帝投降嘅消息傳到巴黎，市民都表現得情緒激動。同帝國有關嘅街道都被改名，標誌被塗鴉破壞。

歐皇后尤其不能接受，甚至多次聲稱拿三世已經戰死。九月四日，議員甘必大喺市政廳宣佈推翻帝制，建立第三共和。

一時間杜樂麗宮前有成20萬民眾聚集，要求皇后離開。勇敢嘅歐珍妮初時拒絕，後來先喺身邊人力勸下撤離，步波旁奧爾良後塵流亡英國。

1871年3月拿三世獲釋，去咗英國同妻兒團聚。皇帝嘅餘生依然受到腎石疾病同色當戰役困擾，當佢喺喺73年1月逝世，臨死前仲問醫生自己喺色當係咪懦夫(恕我軟弱)。

歐皇后嘅厄運尚未完結，佢獨仔拿四世喺色當戰場上被父皇送走後亦去咗英國，並喺嗰度就讀軍校。當1879年南非爆發第2次祖魯戰爭，拿四世為洗脫父子怯懦惡名，決定從軍。



由於歐皇后同事頭婆嘅老交情，拿四世被安排加入無咁危險嘅情報局。5月30日傍晚，佢被指派去前方偵測，並尋找當晚紮營地點。軍官已被告知附近冇祖魯人，所以安心派太子前行，隨同嘅仲有幾個軍官。但不幸地佢嘅情報唔多準，突然有班祖魯戰士突襲，拿四世逃脫不及，慘死當場。

歐皇后喺喪夫喪子後，又幫佢哋守咗四十年墳先高齡去世。

返到去1870年嘅法國，法國人民表示對投降不能接受，要奮戰到底。佢哋推舉特羅胥將軍為第三共和臨時大總統，甘必大則擔任內政及戰爭部長。



皇帝雖降，法普戰爭未完。兩人集結咗一支50萬人雜牌軍，包括35萬國民衞隊、6萬色當返嚟嘅正規軍、9萬民兵、仲有啲海員添。甘必大更揚言法蘭西寸土不讓，必將誓死保衛巴黎。

毛奇心知法國人唔準備投降，打算圍而不攻消耗佢哋，等佢哋無飯開自然會屈服。巴黎城內眾人雖仍士氣高昂，但亦心知不妙。副總統暨外交部長法夫爾被委為使節，周遊英奧俄意各國尋求支持，但無人理佢，只好死死氣搵俾斯麥講數。

兩人喺Lafite老細羅富齊男爵巴黎市郊嘅別墅會面，佢哋傾到夜深都傾唔掂數。俾斯麥堅持要嘅就係亞爾薩斯同洛林，佢食住煙斗故意將煙吹向唔食煙嘅法夫爾面上，並坦言咁做係因為要削弱將來必有一戰嘅敵人法國。憤怒嘅法夫爾高呼“你而家係咪想收法國皮呀⁉️”