想到這裡,我就覺得在這座城市從事文字創作愈來愈自卑微,幸運的一群也是足夠糊口和基本生活,能夠擁有生活以外的事情已經是奢侈,而幸運以外的大多數,執著的就像我這樣浮浮沉沉,或許就只有一直沉,其餘已經是呈半放棄狀態。
而接受讚賞的我,心虛的感覺又再出現。
「唔緊要。」
「你寫咗好耐?」
「寫咗三個月左右......」
「我覺得開頭係好睇,但過咗開頭就有啲悶。」
面對自己的作品受到批評,在網絡連載有一段日子的人會習以為常。
「點解呢?」
Bella想了一會:
「我覺得男主角太多嘢諗,我唔鍾意男主角嗰種連一齊都吊兒郎當,而且都唔浪漫嘅。」
「咁唔一定個個男主角都係韓劇咁,又壁咚又王子咁。」
「咩喎,咁小說都係想畀人有幻想空間啫。」
「係就係,但唔係部部小說作品都係得一種方式去呈現。」
「我唔知,總之我覺得小說作品就係要令人有幻想空間,咁我睇小說都係為咗開心,如果要貼地要寫實咁我點解要睇?」
「可能就係大部份人好似你咁諗,所以寫得沉重啲就唔會有人欣賞,跟住有部份人選擇隨波逐流,寫啲譁眾取寵嘅嘢,跟住又畀另一班人屌呢個地方寫得出嘅嘢就係得呢啲。」
不知怎的,我們的話題又再變得沉重起來。
我看到Bella的目光變得不知所措,頓時深感內疚,因為把自己的見解和想法加諸在他人身上是自私,於是我堆出笑意:
「多謝你睇我寫嘅嘢,我入返房再睇多次,睇吓有咩執。」
然後我把手提電腦拿回自己的睡房,把那個文件的檔案打開,接著就待在睡房裡一動不動地沉思。
有時候我覺得自己就是這般失敗,想保持兩者的平衡,最終兩邊都不討好,寫自己想寫的,市場和出版社不喜歡,而我最討厭的就是那些旁觀者會跟人說,總有人會欣賞你,做回自己。
但試問有幾多人可以不戴任何面具不靠任何演技,在這座城市赤裸裸的演活自己?