她點了點頭:
「其實我都好多人追㗎......」
我承認藉著這個機會借故打量她幾眼:
「睇得出。」
「你聽我講埋先啦,最記得情人節呀生日呀,都有唔少男仔送嘢畀我,但只係得佢記得我對花敏感,同埋我唔食得士多啤梨,我覺得佢好暖男呀。」
雖然我作為男人,但這個故事證明了任何暖男的追求者,也有可能是一位中央暖氣甚至是一位騙子。
「吓,士多啤梨我好鍾意食喎。」
「咁如果下次我又收到咁你記得幫我食晒佢。」
「都......得嘅,你指嘅係士多啤梨呀嘛?」
「係呀。」
「咁你都大把人追,證明受歡迎啦,都唔算失敗呀。」
她嘆道:
「我出身已經唔好,讀書努力但又讀得唔好,份工又唔係做得特別好,感情上就經常遇仆街,而家仲要搞到自己辛辛苦苦儲落嘅錢都無晒,仲要爭銀行錢......」
話音剛落,她竟然落下淚來,然後慢慢地半躺在梳化上,又把自己的小腿搭在我的大腿上,但這次我沒有亂了方寸。
「唔好咁啦,咁......而家都有呢個避風港呀。」
或許,我們都有一些相同的特質,至少恰巧在這個地方避世。
她淚汪汪地笑道:
「咁呢個避風港係咪叫失敗者俱樂部。」
我故意說笑:
「最好唔好啦,兩個人住就夠,地方唔大呀。」
她瞇著雙眼問:
「哈,你幾時生日?」
我不禁打了一個呵欠:
「你想知我星座咋?」
「我已經唔信星座,純粹想知你幾時生日?順便問埋你幾多歲。」
「7月13號,92年。」
她醒了一醒:
「咦,我8月13號呀,啱啱好遲你一個月,細你四年。」
「哈哈,咁一定記得。」
「不過你個樣真係唔似92。」
「似82?哈哈。」
「唔係呀,話你個樣都唔老。」
然後我也不知不覺的睡著了,甚至完全沒在意自己怎麼會突然睡著了,或許是睡了啤酒的緣故,而醒來的時候天已經亮了,陽光從窗戶射進來,Bella也出門上班去。
坐在梳化呆若木雞一會,由於睡了一晚梳化,腰有點酸,頭有點痛,伸了一把懶腰,走回自己的睡房,拾起在床上的手機,發現有一則whatsapp的提示:
「你已被Bella新增進失敗者俱樂部。」
她在Whatsapp開設了一個只有我們兩人的群組,我不禁笑了笑,然後在群組問道:
「得兩個人嘅群組個作用喺邊呢?」
在訊息的結尾加上一個哭笑的emoji。
「起身啦?你唔覺得有個群組先叫住埋同一間屋咩?」
我在現實和手機的回覆幾乎同步:
「吓?咁好啦。」
這個女孩的想法可真是奇異,但我又覺得這是一種生活趣味,感覺不錯,至少宿醉的被一掃而空。
她說,我們一開始都在追求很多慾望,最後我們只追求最簡單的慾望,快樂無痛苦。
待續
等大家追live,同埋等150正評