深夜在線
這是她搬了進來一星期後,我們第一次正式的交談,不知怎的,我與她的傾談有一種氣餒的感覺。
「我筆名叫莫少。」
「未聽過,哈哈!咁你識唔識張愛玲?你有無見過阿邊個(不便開名)仲有阿邊個(不便開名)?我好鍾意睇佢哋facebook啲文!我最鍾意阿邊個(不便開名)其中一篇,話女人犯錯講大話嘅時候唔係要男人苛責,而係要一個擁抱,內疚係會令一個人反省自己過錯。」
腦海在瞬間彷彿有人對我說無人識你呀!
「......小學生都知道犯錯講大話係唔啱要罰企啦。」
「咁可能係現代教育嘅失敗呢,擁抱都係愛的教育嘛,我信有啲人性本善,有啲人性本惡。」
「......」
我發現EQ和耐性正在急速下降,我發現我們之間需要一位翻譯。
「你啱嘅。」
為免我的EQ和耐性會被她耗光,接而影響創作的心情,於是扯開了話題:
「其實你而家同我呢個識咗只係一個星期嘅男人一齊住,你屋企人知唔知?其實點解你唔搬返去同你屋企人住?」
「感情唔好囉,都係嗰啲啦!」
「嗯?即係一直都係自己住?」
她用上急速的語調說道:
「阿媽出軌同老豆離婚,老豆唔鍾意我,佢後來個老婆更加憎到我死,阿媽有頭家又唔理我,所以我咩都靠自己,辛辛苦苦忍到U Grad就搬咗出去,你寫書應該都聽唔少呢啲情節啦,唔好再問啦。」
我知道每個人都想對自己的過去輕描淡寫,但不能片言隻字便說盡的,往往是最沉重。
既然如此,我也放棄追問吧,畢竟把她問哭了我會不知所措。
「sorry呀。」
她長長地嘆一口氣問道:
「咁你嘅真名?或者英文名呢?都未認真問過點叫你?」
「你可以嗌我莫少。」
無可否認,我不太喜歡自己本來的名字,而且有了筆名後開始把筆名當成自己的名字。直到近幾年則更加討厭自己本來的名字,又或者用一個較為矯情的說法,就是那個被出版社簽約後嫌棄的人,他本來的名字。